.jpg)
អំណោយរបស់រាជរដ្ឋាភិបាលសំរាប់ត្រៀមចែកជូនដល់បងប្អូនប្រជាពលរដ្ឋដែលរស់នៅក្នុងតំបន់បិទខ្ទប់កាលពីថ្ងៃទី២៤ ខែមេសា ឆ្នាំ២០២១។រូបថត រដ្ឋបាលរាជធានីភ្នំពេញ
ភ្នំពេញៈ លោក នួន ផារ័ត្ន អភិបាលរងរាជធានីភ្នំពេញ និងជាសមាជិកគណៈកម្មការជាតិគ្រប់គ្រង និងដឹកនាំអនុវត្តវិធានការបិទខ្ទប់ (គបខ) បានឲ្យដឹងថាក្នុងរយៈពេលនៃការបិទខ្ទប់នេះ មានអំណោយរបស់រាជរដ្ឋាភិបាលជាង ១០ ម៉ឺនកញ្ចប់ត្រូវបានចែកជូនដល់ដៃពលរដ្ឋដែលកំពុងខ្វះខាតនៅក្នុងរាជធានីភ្នំពេញ។
ថ្លែងក្នុងសន្និសីទសារព័ត៌មានស្តីពីការបន្តបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅនៃខេត្តកណ្តាលនៅព្រឹកនេះ លោក នួន ផារ័ត្ន បានអះអាងថា៖ «គ្រាន់តែយើងជូនក្នុងរយៈពេលប៉ុន្មានថ្ងៃនេះគឺមានសរុបជាង ១០ ម៉ឺនកញ្ចប់សម្រាប់បងប្អូនដែលកំពុងរស់នៅក្នុងរាជធានីភ្នំពេញដែលមានជីវភាពខ្វះខាត និងផ្តល់អាទិភាពខ្ពស់ដល់អ្នករស់នៅក្នុងតំបន់ក្រហម ដែលពួកគាត់មិនអាចចាកចេញពីផ្ទះបាន»។
លោក ផារ័ត្ន បានអះអាងថា ការចែកអំណោយសង្គ្រោះបឋមរបស់លោកនាយករដ្ឋមន្ត្រី ហ៊ុន សែន នៃរដ្ឋាភិបាលកម្ពុជាគឺសំដៅជូនដល់ពលរដ្ឋដែលមានជីវភាពខ្វះខាត ដូច្នេះចំពោះអ្នកមិនមានជីវភាពខ្វះខាត មិនគួរទាមទារនូវអំណោយទាំងនេះទេ។
ការថ្លែងរបស់លោកយ៉ាងដូច្នេះ ដោយសំអាងថា ក្នុងស្ថានភាពបច្ចុប្បន្ន រដ្ឋាភិបាលអាចផ្តល់ជូនតែពលរដ្ឋមួយចំនួនប៉ុណ្ណោះជាពិសេសពលរដ្ឋដែលប្រឈមការខ្វះខាតខ្លាំងហើយអ្នកដែលអាចទ្រទ្រង់បានដោយខ្លួនឯង គួរតែចូលរួមជួយជាមួយរដ្ឋាភិបាល។
លោកបានបញ្ជាក់ថា៖ «ការផ្តល់ជូនប៉ុណ្ណឹងគឺមិនទាន់ដល់ដៃប្រជាពលរដ្ឋដែលខ្វះខាតគ្រប់នោះទេ។ ប៉ុន្តែយើងបាននិងកំពុងប្រឹងប្រែងមានយន្តការតាមរយៈក្រុមតេឡេក្រាមរបស់ (គបខ) ដែលផ្តល់ព័ត៌មានស្នើសុំជំនួយនេះ។ ក្នុងអំឡុងពេលមួយខ្លីយើងមិនអាចរៀបចំនូវអំណោយរាប់សែនកញ្ចប់ដល់ពលរដ្ឋបានគ្រប់ៗគ្នា ក្នុងរយៈពេលមួយខ្លីនោះទេ»៕
