.jpg)
លោក សម រង្ស៊ី និងលោក ហូរ វ៉ាន់ (ទី ២ រាប់ពីស្ដាំ)។ រូបថត សហការី
ភ្នំពេញៈ លោក សម រង្ស៊ី ប្រធានស្ដីទីនៃអតីតគណបក្សសង្គ្រោះជាតិកាលពីពេលថ្មីៗនេះបានចាប់ផ្ដើមធ្វើយុទ្ធនាការប្រមូលផ្ដុំការគាំទ្រចំពោះគម្រោងការវិលត្រឡប់មកកម្ពុជាវិញនៅថ្ងៃទី ៩ វិច្ឆិកា ដោយលើកម្រាមដៃ ៩ ធ្វើជាសញ្ញា ប៉ុន្តែមន្ត្រីជាន់ខ្ពស់រាជរដ្ឋាភិបាលបានចាត់ទុកយុទ្ធនាការនេះជាផែនការប៉ុងប៉ងធ្វើរដ្ឋប្រហារ។
មន្ត្រីដដែលនេះបានព្រមានផងដែរចំពោះអ្នកចូលរួមយុទ្ធនាការម្រាមដៃ ៩ របស់ក្រុមអតីតគណបក្សប្រឆាំងនឹងត្រូវទទួលទោសតាមផ្លូវច្បាប់ ហើយយុទ្ធនាការនេះនឹងទទួលបរាជ័យដូចគ្នាយុទ្ធនាការម្រាមដៃស្អាត ដែលជាសញ្ញាមិនឲ្យពលរដ្ឋចូលរួមការបោះឆ្នោតជ្រើសតាំងតំណាងរាស្ត្រកាលពីខែ កក្កដា ឆ្នាំ ២០១៨។
លោក ជិន ម៉ាលីន អ្នកនាំពាក្យក្រសួងយុត្តិធម៌បានថ្លែងឲ្យដឹងកាលពីម្សិលមិញថា យុទ្ធនាការណាមួយដែលជាការធ្វើសកម្មភាព ការផ្សព្វផ្សាយព័ត៌មាន និងការបញ្ចេញមតិក្នុងចេតនារៀបចំផែនការប៉ុនប៉ងធ្វើរដ្ឋប្រហារដើម្បីផ្តួលរំលំរាជរដ្ឋាភិបាលស្របច្បាប់នឹងប្រឈមជាមួយវិធានការតាមផ្លូវច្បាប់គ្រប់យ៉ាងដើម្បីថែរក្សាសន្តិភាព ស្ថិរភាពរបស់ប្រទេស។
លោក ម៉ាលីន បានថ្លែងថា៖ «ជនណាដែលមានចេតនាបង្កចលាចល ក្នុងសង្គមគឺសមត្ថកិច្ចត្រូវតែមានវិធានការម៉ឺងម៉ាត់ក្នុងការទប់ស្កាត់ ហើយប្រជាពលរដ្ឋគាំទ្រទៅលើវិធានការច្បាប់នេះដោយសារតែយើងគាំទ្រតម្លៃនៃសន្តិភាពដែលមានក្នុងពេលបច្ចុប្បន្ន»។
លោក ម៉ាលីន បានឲ្យដឹងទៀតថា៖ «ច្បាប់បានបញ្ញត្តិហើយគឺការធ្វើសកម្មភាពតាមគ្រប់រូបភាពមិនថាតាមរយៈការបញ្ចេញមតិ ការផ្សព្វផ្សាយព័ត៌មាន ការធ្វើកាយវិការ ឬក៏ទង្វើផ្សេងៗឲ្យតែក្នុងចេតនាមួយគាំទ្រដល់ផែនការនៃការវិលត្រឡប់វិញ (របស់លោក សម រង្ស៊ី) ច្បាប់បានចាត់ទុកថាផែនការទាំងមូលហ្នឹងគឺជាផែនការនៃការប៉ុនប៉ងធ្វើរដ្ឋប្រហារ ដូច្នេះការធ្វើសកម្មភាពគ្រប់បែបយ៉ាងក្នុងការគាំទ្រដល់ផែនការនៃការប៉ុនប៉ងផ្តួលរំលំរដ្ឋាភិបាលស្របច្បាប់គឺជាការប្រព្រឹត្តបទល្មើសដែលច្បាប់បានកំណត់ថាជាការរួមគំនិតក្បត់»។
ជាមួយគ្នានេះដែរលោក ផៃ ស៊ីផាន អ្នកនាំពាក្យរាជរដ្ឋាភិបាលបានឲ្យដឹងថា ក្រុមបក្សប្រឆាំងបានប្រើប្រាស់ល្បិចគ្រប់បែបយ៉ាងរួមទាំងយុទ្ធនាការម្រាមដៃ ៩ ដើម្បីញុះញង់ឲ្យប្រជាពលរដ្ឋចូលរួមចលនារបស់គេក្នុងការប៉ុនប៉ងធ្វើរដ្ឋប្រហារប្រឆាំងរាជរដ្ឋាភិបាលកម្ពុជា។
លោកបានបញ្ជាក់ថា៖ «នេះគ្រាន់តែជាការប៉ុនប៉ងធ្វើរដ្ឋប្រហារ។ គេធ្វើយ៉ាងម៉េចដើម្បីញុះញង់ប្រជាពលរដ្ឋរងគ្រោះពេលដែលសមត្ថកិច្ចចាត់វិធានការផ្លូវច្បាប់។ ទី១ គាត់បានអំពាវនាវរៀបចំធ្វើរដ្ឋប្រហារផ្តួលរំលំ របប និងរាជានិយម។ គេនឹងក្លាយទៅជាអ្នកចូលរួមធ្វើរដ្ឋប្រហារដូច្នេះអ្នកហ្នឹងត្រូវតែទទួលទោសតាមផ្លូវច្បាប់»។
លោក ផៃ ស៊ីផាន ថ្លែងថា៖ «គេប្រើល្បិចគ្រប់យ៉ាងដើម្បីឲ្យប្រជាពលរដ្ឋ ចូលរួមនៅក្នុងចលនាធ្វើរដ្ឋប្រហារនេះ យើងសូមអំពាវនាវដល់ប្រជាពលរដ្ឋទាំងអស់រាល់សកម្មភាពទាំងឡាយណាដែលចូលរួមធ្វើរដ្ឋប្រហារ ពួកគេនឹងប្រឈមមុខទៅនឹងច្បាប់។ នេះមិនមែនជាការគាំទ្រ រង្ស៊ីទេ តែជាការធ្វើរដ្ឋប្រហាររាជរដ្ឋាភិបាលស្របច្បាប់ ដូច្នេះត្រូវតែប្រយ័ត្នប្រយែង ខ្ញុំសូមអំពាវនាវដល់ប្រជាពលរដ្ឋឲ្យរក្សាភាពស្ងៀមស្ងាត់ហើយនិងសណ្តាប់ធ្នាប់។
ប្រតិកម្មរបស់មន្ត្រីជាន់ខ្ពស់ទាំង ២ រូបធ្វើឡើងបន្ទាប់ពីលោក ហូរ វ៉ាន់ អតីតមន្ត្រីគណបក្សសង្គ្រោះជាតិបានបង្ហាញក្នុងហ្វេសប៊ុកនាថ្ងៃទី ២៣ កញ្ញា ថា៖ «ពីថ្ងៃនេះទៅ ដល់ថ្ងៃ ៩ ខែ វិច្ឆិកា ឆ្នាំ ២០១៩ គ្រប់ការជួបស្វាគមន៍គ្នា យើងលើកដៃម្រាម ៩ ដើម្បីបញ្ជាក់ពីការគាំទ្រថ្ងៃ ៩ វិច្ឆិកា»។
យុទ្ធនាការម្រាមដៃ ៩ ធ្វើឡើងបន្ទាប់ពីលោក សម រង្ស៊ី ប្រធានស្តីទីនៃអតីតគណបក្សសង្គ្រោះជាតិដែលកំពុងនិរទេសខ្លួនឯងនៅឯក្រៅប្រទេសបានអំពាវនាវទៅដល់កងកម្លាំង និងពលរដ្ឋឲ្យចូលរួមគាំទ្រដំណើរវិលត្រឡប់ចូលកម្ពុជាវិញនៅថ្ងៃទី ៩ ខែវិច្ឆិកាខាងមុខនេះដើម្បីប្តូរមេដឹកនាំនៅក្នុងរដ្ឋាភិបាលបច្ចុប្បន្នគឺលោកនាយករដ្ឋមន្ត្រី ហ៊ុន សែន សង្គ្រោះប្រជាធិបតេយ្យហើយបានត្រៀមថវិកាសម្រាប់ទុកឲ្យកងទ័ពដែលផ្តាច់ខ្លួនចាំជួយការពារពលរដ្ឋខ្មែរ នៅពេលដែលលោកវិលត្រឡប់ទៅកម្ពុជា។
លោក សុខ ឥសាន អ្នកនាំពាក្យគណបក្សប្រជាជនបានថ្លែងប្រាប់កាសែតភ្នំពេញប៉ុស្តិ៍កាលពីម្សិលមិញថា យុទ្ធនាការម្រាមដៃ ៩ កាន់តែទទួលបរាជ័យ ធ្ងន់ធ្ងរ និងដ៏អាម៉ាស់ដូចយុទ្ធនាការម្រាមដៃស្អាតកាលពីឆ្នាំ ២០១៨ ។
លោក ឥសាន បានថ្លែងថា៖ «យើងធ្លាប់ដឹងហើយម្រាមដៃស្អាតដែលបានបរាជ័យរួចទៅហើយ ហើយឥឡូវមានម្រាមដៃ ៩ ទៀតវាកាន់តែបរាជ័យខ្លាំង។ ហើយជីវិតនយោបាយរបស់ទណ្ឌិតត្រូវចូលក្នុងគុកព្រៃ ស»។
លោក គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិត្យសភាកម្ពុជាក៏បានថ្លែងស្រដៀងគ្នាដែរថា រាល់សកម្មភាពបុគ្គលទាំងឡាយដែលគាំទ្រចលនារបស់លោក សម រង្ស៊ី គឺជាទង្វើចូលរួមការប៉ុនប៉ងធ្វើរដ្ឋប្រហារប្រឆាំងរដ្ឋាភិបាលដោយសារតែលោក សម រង្ស៊ី បានអំពាវនាវដល់ប្រជាពលរដ្ឋ និងកម្លាំងឲ្យក្រោកឈរធ្វើរដ្ឋប្រហារប្រឆាំងរដ្ឋាភិបាលកម្ពុជា។
លោកថ្លែងថា៖ «ទង្វើទាំងឡាយណាដែលពាក់ព័ន្ធនឹងចលនានោះ និងយុទ្ធនាការនោះគឺស្មើនឹងសមគំនិតក្នុងផែនការក្បត់ជាមួយ សម រង្ស៊ី ហើយការលើកដៃ ឬធ្វើសកម្មភាពណាមួយដែលពាក់ព័ន្ធផែនការណាមួយដែលផ្តួចផ្តើមដោយលោក សម រង្ស៊ី គឺជាការរួមគំនិតក្បត់ដែលប្រឈមទោសទណ្ឌទៅតាមផ្លូវច្បាប់»។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុកកាលពីម្សិលមិញបានបដិសេធធ្វើអត្ថាធិប្បាយពាក់ព័ន្ធនឹងការលើកឡើងរបស់រាជរដ្ឋាភិបាល។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិបានថ្លែងថា វិធានការរបស់សមត្ថកិច្ចចំពោះបុគ្គលដែលធ្វើសកម្មភាព ឬបញ្ចេញមតិផ្សេងៗ គាំទ្រផែនការរបស់លោក សម រង្ស៊ី គឺជាការរំលោភសិទ្ធិសេរីភាពនៃការបញ្ចេញមតិដែលមានចែងក្នុងរដ្ឋធម្មនុញ្ញដែលនេះធ្វើឲ្យលោកកាន់តែព្រួយបារម្ភ។
លោកបានបញ្ជាក់ដូច្នេះថា៖ «វាមិនមែនអ្វីប្លែកទេ ជារឿងដដែលៗតាំងពីយុទ្ធនាការ អាវស អាវខ្មៅ ម្រាមដៃស្អាត ហើយឥឡូវនេះយុទ្ធនាកានេះថែមទៀត ហើយរដ្ឋាភិបាលមិនគួរ ប្រតិកម្មទៅលើបញ្ហានេះខ្លាំងទេដោយសារតែវាធ្វើឲ្យប៉ះពាល់ដល់សិទិ្ធសេរីភាពប្រជាពលរដ្ឋ។ ប្រជាពលរដ្ឋមួយចំនួនមិនយល់ពីបញ្ហានេះ ហើយលោកគ្រាន់តែជាអ្នកស្រឡាញ់គាំទ្រលោកប្រធាន សម រង្ស៊ី ហើយខ្លួនក៏ធ្វើតាម ហើយបើយកពួកគេមកដាក់ ទោសគឺវាខុស។ វាធ្វើឲ្យស្ថានការណ៍កាន់តែធ្ងន់ធ្ងរខ្លាំងទៅ»។
លោក ឆាយ គឹមខឿន អគ្គស្នងការរង និងជាអ្នកនាំពាក្យអគ្គស្នងការនគរបាលជាតិកាលពីម្សិលមិញបានបដិសេធធ្វើអត្ថាធិប្បាយ។ លោក ខៀវ សុភ័គ អ្នកនាំពាក្យក្រសួងមហាផ្ទៃមិនអាចទាក់ទងសុំអត្ថាធិប្បាយបានទេកាលពីម្សិលមិញ៕
វីដេអូ៖
