.jpg)
ភាគរយពុករលួយតាមស្ថាប័នដែលមន្ត្រីថាមិនអាចប្រើផ្លូវការបាន។ រូប អង្គការតម្លាភាព
ភ្នំពេញៈ មន្ត្រីជាន់ខ្ពស់រាជរដ្ឋាភិបាលបានចាត់ទុកលទ្ធផលស្ទង់មតិរបស់អង្គការតម្លាភាពកម្ពុជាស្តីពីការវាស់វែងអំពីអំពើពុករលួយជាសកលឆ្នាំ ២០២០ ថា មិនអាចយកមកប្រើជាផ្លូវការបាន ដោយសារការស្ទង់មតិនេះមិនឆ្លុះបញ្ចាំងពីតថភាពនៅក្នុងសង្គមកម្ពុជា ថ្វីបើគិតជាភាគរយមានការថយចុះក៏ដោយ។
កាលពីថ្ងៃទី ២៤ វិច្ឆិកា អង្គការតម្លាភាពកម្ពុជាបានប្រកាសផ្សាយរបាយការណ៍ស្តីពីការវាស់វែងអំពីអំពើពុករលួយជាសកលឆ្នាំ ២០២០ ដោយផ្អែកលើការស្ទង់មតិសាធារណជនអំពីទស្សនៈ និងបទពិសោធរបស់ពួកគេក្នុងតំបន់អាស៊ីចំនួន ១៧ ប្រទេសទាក់ទងនឹងករណីពុករលួយ។
តាមការស្ទង់មតិនេះបានរកឃើញថា កម្ពុជានៅតែមានអំពើពុករលួយនៃការសូកប៉ាន់ខ្ពស់ក្នុងចំណោមប្រទេសទាំង ១៧ នោះដោយប្រសើរជាងតែឥណ្ឌាមួយប៉ុណ្ណោះ។ ប៉ុន្តែការរកឃើញនេះបង្ហាញថា អំពើពុករលួយនៅកម្ពុជាបានថយចុះពី ៤០ ភាគរយ មកនៅត្រឹម ៣៧ ភាគរយ បើធៀបនឹងការស្ទង់មតិកាលពីឆ្នាំ ២០១៦។
របាយការណ៍ដែលផ្អែកលើការស្រង់មតិពលរដ្ឋកម្ពុជាចំនួន ១ ០០០ នាក់ និងពលរដ្ឋនៅអាស៊ីជិត ២ ម៉ឺននាក់បានឱ្យដឹងបន្តថា អំពើពុករលួយទូទាំងអាស៊ី បានកើនឡើងនៅ ១២ ខែចុងក្រោយនេះ ។
របាយការណ៍ដដែលបានឱ្យដឹងទៀតថា ពលរដ្ឋកម្ពុជាដែលឆ្លើយសំណួរ ៨៩ ភាគរយយល់ថា មានអំពើពុករលួយក្នុងជួរមន្ត្រីនគរបាល រីឯ ៧២ ភាគរយ យល់ថាមានក្នុងវិស័យតុលាការ និងក្នុងមន្ត្រីរដ្ឋាភិបាល។
របាយការណ៍ដដែលបានបញ្ជាក់ថា «៣៧ ភាគរយ នៃអ្នកចូលរួមផ្តល់សម្ភាសន៍ឆ្លើយថា ធ្លាប់បានសូកប៉ាន់ ដើម្បីទទួលបានសេវាសាធារណៈក្នុងរយៈពេល ១២ ខែកន្លងមកនេះ។ ក្នុងចំណោមអ្នកបានឆ្លើយថា បានធ្លាប់សូកប៉ាន់ ៤០ ភាគរយបញ្ជាក់ថា ធ្លាប់សូកប៉ាន់ដើម្បីទទួលបានឯកសារបញ្ជាក់អត្តសញ្ញាណ និង ៣៨ ភាគរយ បានសូកប៉ាន់ដល់ប៉ូលិស»។
យ៉ាងណាក្ដីលោក ជិន ម៉ាលីន អ្នកនាំពាក្យក្រសួងយុត្តិធម៌បានប្រាប់ភ្នំពេញប៉ុស្តិ៍ពីម្សិលមិញថា លទ្ធផលនៃការរកឃើញនេះ គឺមិនអាចឱ្យរដ្ឋាភិបាលយកមកធ្វើជាមូលដ្ឋានក្នុងការប្រើជាផ្លូវការបានទេ ដោយសារតែមិនបានឆ្លុះបញ្ចាំងពីស្ថានភាពពិតនៅកម្ពុជា។
លោកបញ្ជាក់ថា៖ «ខ្ញុំពិនិត្យមើលទៅរបាយការណ៍ និងលទ្ធផលនៃការស្ទង់មតិនេះយកមកធ្វើជាមូលដ្ឋានសម្រាប់ធ្វើការដោះស្រាយបញ្ហានៅក្នុងប្រទេសមិនកើត ព្រោះនេះគ្រាន់ជាការស្ទង់មតិ ហើយរើសយកមនុស្ស ១ ក្រុមយកមកសួរ ហើយយើងមិនដឹងថា យកក្រុមណាផង ដែលមាននិន្នាការនយោបាយរបៀបម៉េច?... ហើយធាតុផ្សំនៃបទល្មើសពុករលួយយ៉ាងម៉េចផង»។
ក៏ប៉ុន្តែលោក ម៉ាលីន បានជំរុញឱ្យអង្គការនេះគួរមានមូលដ្ឋានច្បាស់លាស់ដោយបង្ហាញពីបញ្ហាអំពើពុករលួយឱ្យចំគោលដៅជាក់លាក់ជាងនេះដើម្បីឱ្យស្ថាប័នមានសមត្ថកិច្ចអាចប្រើប្រាស់ជាមូលដ្ឋានក្នុងការបង្ក្រាបបទល្មើសទាំងនោះ។
ចំណែកលោក ផៃ ស៊ីផាន អ្នកនាំពាក្យរដ្ឋាភិបាលបានហៅរបាយការណ៍នេះថា មិនមានភាពសុចរិត និងមិនបានឆ្លើយតបនឹងស្ថានភាពជាក់ស្តែងនៅកម្ពុជា ព្រោះមានគោលបំណង និងនិន្នាការនយោបាយរបស់ខ្លួនរួចជាស្រេចទៅហើយ។
លោកថា៖ «ប្រសិនបើយើងមើលទៅលើសមិទ្ធផលរបស់រដ្ឋាភិបាល និងសង្គមកម្ពុជាហ្នឹងគឺបានទទួលស្គាល់នឹងការប្រយុទ្ធប្រឆាំងអំពើពុករលួយរួចទៅហើយ ដែលមានស្ថាប័នអង្គភាពប្រឆាំងអំពើពុករលួយដែលបានធ្វើកិច្ចការនេះ។ ស្របជាមួយគ្នាហ្នឹង ការប្រើប្រាស់លុយផ្ទាល់ដៃ និងការសម្រេចគឺមានតម្លាភាពតែងតែមានការត្រួតពិនិត្យពីអង្គភាពប្រឆាំងអំពើពុករលួយ»។
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជាបានលើកឡើងថា របាយការណ៍នេះអាចមានលម្អៀងខ្លះព្រោះការស្ទង់មតិលើកនេះធ្វើឡើងតាមទូរស័ព្ទ ដែលខុសពីមុនធ្វើតាមការចុះជួបពលរដ្ឋផ្ទាល់។
យ៉ាងណាលោកអះអាងថា របាយការណ៍នេះធ្វើឡើងដោយស្ថាប័នឯករាជ្យ ដែលនៅតែអាចធានាបាននូវសុក្រឹតភាព និងភាពប្រាកដប្រជា ដែលអាចយកធ្វើជាមូលដ្ឋានមួយក្នុងការលុបបំបាត់អំពើពុករលួយនៅកម្ពុជាបាន។
លោកបញ្ជាក់ថា៖ «ការសិក្សានេះ គឺធានាបាននូវសុចរិតភាពខ្ពស់ណាស់ក្នុងការធានាថា កម្រងសំណួរ ហើយ និងការសាកសួរមានភាពប្រាកដប្រជាខ្ពស់ ដែលកម្រិតលម្អៀងមានតិចបំផុត។ ខ្ញុំលើកទឹកចិត្តឱ្យសាមីក្រសួង មេត្តាត្រួតពិនិត្យអំពីព័ត៌មានលម្អិតនៃការរកឃើញពីមតិយោបល់របស់ពលរដ្ឋ»។ ក្នុងពេលកម្ពុជាកំពុងប្រឈមនឹងវិបត្តិផ្ទួនៗ ការកាត់បន្ថយអំពើពុករលួយគឺជាការចាំបាច់បំផុត។
យោងតាមរបាយការណ៍របស់អង្គការតម្លាភាពកម្ពុជាអំពើពុករលួយនៃការសូកប៉ាន់នៅកម្ពុជាគឺមានការថយចុះ បើធៀបនឹងការស្ទង់មតិរយៈពេល ៣ ដងកន្លងមកនេះដោយកាលពីឆ្នាំ ២០១៣ មាន ៥៧ ភាគរយ នៅឆ្នាំ ២០១៦ មាន ៤០ ភាគរយ និងចុងក្រោយឆ្នាំ ២០២០ នេះមាន ៣៧ ភាគរយ៕
វីដេអូ៖
