.jpg)
លោក ហុឹម យ៉ាន អគ្គស្នងការរងនគរបាលជាតិ ថ្លែងនៅក្នុងសន្និសីទកាសែត កាលពីថ្ងៃម្សិលមិញ។ ហេង ជីវ័ន
ភ្នំពេញៈ មន្ត្រីជាន់ខ្ពស់ក្រសួងសាធារណការ និងដឹកជញ្ជូន និងនគរបាលជាតិ បានអះអាងថា វិធានការត្រួតពិនិត្យលក្ខណៈបច្ចេកទេសយានយន្ត និងបណ្ណបើកបររថយន្តដឹកទំនិញនៅតាមកំពង់ផែ បាននឹងកំពុងទទួលជោគជ័យ ខណៈដែលសមាគមរោងចក្រកាត់ដេរនៅកម្ពុជា (GMAC) បានសម្តែងក្តីបារម្ភចំពោះវិធានការអនុវត្តច្បាប់នេះដោយថា បានធ្វើឲ្យប៉ះពាល់ដល់ដំណើរការដឹកជញ្ជូនក្នុងវិស័យកាត់ដេរ។
វិធានការត្រួតពិនិត្យរឹតបន្តឹងការអនុវត្តច្បាប់ ស្តីពីការត្រួតពិនិត្យលក្ខណៈបច្ចេកទេសយានយន្ត និងបណ្ណបើកបរ របស់អ្នកបើកបររថយន្តដឹកទំនិញចេញចូលកំពង់ផែស្វយ័តក្រុងព្រះសីហនុ និងកំពង់ផែស្វយ័តក្រុងភ្នំពេញធ្វើឡើងបន្ទាប់ពីលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានដាក់បញ្ជាថា បើសិនអ្នកបើកបររថយន្តគ្មានបណ្ណបើកបរ ឬរថយន្តគ្មានការឆៀកត្រឹមត្រូវទេនោះគឺក្រសួងមិនអនុញ្ញាតឲ្យរថយន្តរបស់ក្រុមហ៊ុននោះដឹកទំនិញចេញពីកំពង់ផែឡើយ។
GMAC កាលពីថ្ងៃទី ១ ខែ កក្កដា ឆ្នាំ ២០១៩ បានចេញសេចក្តីថ្លែងការណ៍មួយដោយស្នើសុំរាជរដ្ឋាភិបាលកម្ពុជាឲ្យមានដំណោះស្រាយបណ្ដោះអាសន្នមួយជាមួយសមាគមអ្នកដឹកជញ្ជូនកម្ពុជា (CAMTA) ពាក់ព័ន្ធការពង្រឹងការអនុវត្តច្បាប់ចរាចរណ៍របស់គណៈកម្មការជាតិសុវត្ថិភាពចរាចរណ៍ផ្លូវគោក ពីព្រោះសមាជិករបស់ GMAC បាននិងកំពុងក្លាយទៅជាជនរងគ្រោះនៅក្នុងបញ្ហានេះ។
សេចក្តីថ្លែងការណ៍លើកឡើងដូច្នេះថា៖ «វត្ថុធាតុដើមនាំចូល និងផលិតផលសម្រេចនាំចេញជាច្រើនរបស់សមាជិក GMAC ត្រូវបានកកស្ទះ ដែលនឹងអាចបង្កឲ្យមានការខាតបង់ផ្នែកហិរញ្ញវត្ថុ ក៏ដូចជាទំនុកចិត្តពីសំណាក់អ្នកបញ្ជាទិញលើភាពអាចទុកចិត្តបានស្តីពីប្រសិទ្ធភាពនៃការផ្គត់ផ្គង់ទំនិញបានទាន់ពេលវេលា»។
លោក ខេន លូ អគ្គលេខាធិការ GMAC ថ្លែងប្រាប់អ្នកសារព័ត៌មានកាលពីម្សិលមិញនៅក្រសួងសាធារណការ និងដឹកជញ្ជូនបន្ទាប់ពីសន្និសីទសារព័ត៌មានស្តីពីស្ថានភាពការអនុវត្តយន្តការចុះត្រួតពិនិត្យ លក្ខណៈបច្ចេកទេសយានយន្ត និងបណ្ណបើកបររបស់អ្នកបើកបររថយន្តដឹកទំនិញចេញ ចូលកំពង់ផែស្វយ័ត ក្រុងព្រះសីហនុ និងកំពង់ផែស្វយ័តក្រុងភ្នំពេញថា វិធានការអនុវត្តន៍ច្បាប់ ចរាចរណ៍នេះ បានធ្វើឲ្យក្រុមហ៊ុនដឹកជញ្ជូនមួយចំនួនធំមិនហ៊ានដឹកទំនិញចូលកំពង់ផែដោយសារតែពួកគេខ្លាចការផាកពិន័យដែលបណ្តាលឲ្យមានការកកស្ទះធ្វើឲ្យប៉ះពាល់ដល់ដំណើរការវិស័យកាត់ដេរ។
លោកបញ្ជាក់ថា៖ «វាប៉ះពាល់ខ្លាំងដោយសារតែក្រុមហ៊ុនដឹកជញ្ជូនគាត់ខ្លាចការពិន័យ ដូច្នេះគេមិនទទួលអីវ៉ាន់ពីរោងចក្រ ដូច្នេះរោងចក្រត្រូវទទួលខុសត្រូវចំពោះមុខអ្នកបញ្ជាទិញនៅពេលដែលរោងចក្រខាត តើនរណាទទួលខុសត្រូវ។ ម្ចាស់រោងចក្រ (មួយចំនួន) កំពុងយំ»។
ទន្ទឹមនឹងនេះដែរម្ចាស់ក្រុមហ៊ុនដឹកជញ្ជូនទំនិញមួយក្នុងចំណោមម្ចាស់ក្រុមហ៊ុនចំនួន ៣០ ដែលគ្រាន់តែប្រាប់ថា ឈ្មោះ ឆាយ បានថ្លែងថា មន្ត្រីសមត្ថកិច្ចបានប្រព្រឹត្ដអំពើពុករលួយ តាមរយៈការផាកពិន័យដោយទាមទារទឹកប្រាក់ដ៏ច្រើនដែលអ្នកបើកបរមួយចំនួនធំមិនអាចបង់ជូនបាន ដែលធ្វើឲ្យពួកគេ មិនហ៊ានចូលកំពង់ផែដោយខ្លាចការផាកពិន័យ។
លោកបញ្ជាក់ដូច្នេះថា៖ «កុងតឺន័រ មិនចូលផែដោយសារតែខ្លាចប៉ូលិសផាកពិន័យប៉ូលិសគាត់រកកំហុសគ្រប់បែបយ៉ាង ដើម្បីផាកពិន័យហើយនៅពេលដែលពួកគេផាកពិន័យម្តងៗទាររាប់រយដុលា្លរ។ ការផាកពិន័យបែបនេះធ្វើបាបប្រជាជន និងកម្មករហើយ»។
លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន។ ហេង ជីវ័ន
ប៉ុន្តែលោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន ដែលជាប្រធានក្រុមការងារ ត្រួតពិនិត្យរឹតបន្តឹងការអនុវត្តច្បាប់ ស្តីពីចរាចរណ៍ផ្លូវគោកថ្លែងប្រាប់អ្នក សារព័ត៌មានក្នុងសន្និសីទសារព័ត៌មានស្តីពីស្ថានភាពការអនុវត្តយន្តការចុះត្រួតពិនិត្យ លក្ខណៈបច្ចេកទេសយានយន្ត និងបណ្ណបើកបររបស់អ្នកបើកបររថយន្តដឹកទំនិញ ចេញចូលកំពង់ផែ ស្វយ័តក្រុងព្រះស៊ីហនុ និងកំពង់ផែស្វយ័តក្រុងភ្នំពេញថា យានយន្តភាគច្រើន គឺមានលក្ខណៈត្រឹមត្រូវតាមបច្ចេកទេសហើយម្ចាស់ក្រុមហ៊ុនដឹកជញ្ជូនអ្នកបើកបរម្ចាស់យានយន្តមានការចូលរួម អនុវត្តច្បាប់ បានល្អ។
លោកបន្តថា ម្ចាស់ក្រុមហ៊ុនដឹកជញ្ជូន ម្ចាស់យានយន្តអ្នកបើកបរយានយន្តប្រហែលជា ១០ ភាគរយ ដែលមិនទាន់បានចូលរួមគោរពច្បាប់ និងអនុវត្តច្បាប់ឲ្យបានត្រឹមត្រូវ និងនៅមានរថយន្តធុនធ្ងន់មួយចំនួនតូចខុសលក្ខណៈបច្ចេកទេស ហើយនៅមានអ្នកបើកបរមួយចំនួនគេចវេះពុំព្រមសហការជាមួយសមត្ថកិច្ចដើម្បីចូលរួមពិនិត្យបណ្តាលឲ្យកកស្ទះ។
លោកបានច្រានចោលការចោទប្រកាន់របស់ក្រុមហ៊ុនមួយចំនួន ដែលថា សមត្ថកិច្ចបានប្រព្រឹត្តអំពើពុករលួយ។
លោកបញ្ជាក់ដូច្នេះថា៖ «ម្ចាស់ក្រុមហ៊ុនគេថា យើងសមត្ថកិច្ចធ្វើការផាកពិន័យយកលុយគេ បញ្ហានេះ ខ្ញុំសូម បញ្ជាក់ជូនថា យើងមានឯកសារផាកពិន័យទាំងអស់ ពីតម្លៃប៉ុន្មាន ដល់ប៉ុន្មាននៅក្នុងតារាងហើយប្រសិនបើយើងគោរពច្បាប់តាមការណែនាំនិងអនុក្រឹត្យគេមិនដែលទៅឆែក ឬទៅសួរនាំ នោះទេ។ ប្រសិនបើយើងមានឯកសារគ្រប់គ្រាន់យើងជិះមិនខ្លាចប៉ូលិសទេ តែនៅពេលដែលយើងខ្វះហើយពេលយើងឃើញប៉ូលិស យើងខ្លាចតែម្តង ដោយយើងដឹងថាគេនឹងផាកពិន័យ»។
បើតាមលោក ឈួន តាមការពិនិត្យអង្កេតនៅកំពង់ផែភ្នំពេញកន្លងមកនេះ មានការកកស្ទះដោយសារតែរថយន្តទាំងអស់នោះមិនមានឯកសារគ្រប់គ្រាន់ ធ្វើឲ្យអ្នកបើកបរ មិនហ៊ានចូលខណៈអ្នកដែលមានឯកសារគ្រប់គ្រាន់គេចេញចូលបានដោយងាយស្រួល។
ចំណែកនាយឧត្តមសេនីយ៍ ហឹុម យ៉ាន អគ្គស្នងការរងនគរបាលជាតិ បានថ្លែងនៅក្នុងសន្និសីទនោះដែរថា ក្នុងរយៈពេល ១៥ ថ្ងៃកន្លងមក ក្រសួងបានពិនិត្យយានយន្តសរុបចំនួន ១ ៩៥៤ គ្រឿង ទាំងនៅកំពង់ផែស្វយ័តក្រុង ព្រះសីហនុ និងកំពង់ផែស្វយ័តក្រុងភ្នំពេញ ហើយថា មានរថយន្តប្រមាណជា ៣០០ គ្រឿង ដែលមានចំនួន ស្មើនឹង ១១ ភាគរយ នៃចំនួនសរុប ដែលបានរំលោភបំពានពាក់ព័ន្ធនឹងលិខិតស្នាម និងបច្ចេកទេសហើយរថយន្តទាំងនោះ ត្រូវបានធ្វើការផាកពិន័យតាមច្បាប់ចរាចរណ៍ដោយតម្លាភាព។
លោកថា៖ «ដោយឡែកការយឺតយ៉ាវក្នុងការដឹកទំនិញនោះក៏យើងមិនមានបញ្ហាអ្វីដែរ ដោយយើងបានខិតខំធ្វើការសម្រួលមិនឲ្យមានការកកស្ទះទេ ក៏ប៉ុន្តែសូមជម្រាបជូនថា កម្លាំងសមត្ថកិច្ចអនុវត្តច្បាប់ គឺរឹតបន្តឹងច្បាប់នេះដើម្បីសុវត្ថិភាពទាំងអស់គ្នា។ ប្រសិនបើយើងទុកឲ្យបញ្ហាបច្ចេកទេសយានយន្តនៅបន្តដោយមិនបានត្រួតពិនិត្យមើលនោះទេ ពួកគេនឹងខាតបង់ធ្ងន់ធ្ងរ»។
លោកឲ្យដឹងថា ការផាកពិន័យគឺធ្វើទៅតាមច្បាប់ដែលបានចែងដែលមានទឹកប្រាក់ចាប់ពី ១៥ ០០០ រៀល ១២៥ ០០០ រៀល និងធ្ងន់ធ្ងរ ៨០០ ០០០ រៀលគ្មានប័ណ្ណបើកបរ និងគ្មានស្លាកលេខ។ លោកបន្តថា ការត្រួតពិនិត្យលក្ខណៈបច្ចេកទេសយានយន្ត ដែលទទួលបានផលជាវិជ្ជមាននេះ គឺអាចជួយកាត់បន្ថយគ្រោះថ្នាក់ចរាចរណ៍នៅតាមដងផ្លូវ។
លោកបញ្ជាក់ថា៖ «មានមតិរិៈគន់មិនត្រឹមត្រូវ និងខុសពីការពិត ហើយខ្ញុំសូមបដិសេធទាំងស្រុង»។
យ៉ាងណាក្តី GMAC បានប្រកាសគាំទ្រចំពោះការអនុវត្តច្បាប់ របស់គណៈកម្មការជាតិសុវត្ថិភាពចរាចរណ៍ផ្លូវគោក ប៉ុន្តែបានអំពាវនាវសូមឲ្យសមត្ថកិច្ចសម្រួលកុំឲ្យមានការកក ស្ទះក្នុងការដឹកជញ្ជូនទំនិញ និងក៏បានអំពាវនាវដល់ក្រុមហ៊ុនផ្តល់សេវាដឹកជញ្ជូនទំនិញធុនធ្ងន់ទាំងអស់ផងដែរសូមឲ្យព្យាយាមគោរពអនុវត្តច្បាប់ ស្តីពីចរាចរណ៍ផ្លូវគោក ឲ្យបានពេញលេញ ដើម្បីធានានូវសុវត្ថិភាពលើផ្លូវសាធារណៈ និងធានាឲ្យបាននូវនិរន្តរភាពនៃការផ្តល់សេវាដឹកជញ្ជូនដល់អតិថិជនរបស់ខ្លួន៕
