ភ្នំពេញៈ មន្ត្រីជាន់ខ្ពស់អះអាងថា សន្និបាតគណៈកម្មាធិការកណ្តាលគណបក្សប្រជាជនកម្ពុជាដែលដឹកនាំដោយលោក ហ៊ុន សែន នាយករដ្ឋមន្ដ្រីកម្ពុជា និងជាប្រធានគណបក្សបានដាក់ចេញទិសដៅភារកិច្ចសំខាន់ៗនិងធ្វើកំណែទម្រង់ស៊ីជម្រៅលើគ្រប់វិស័យដើម្បីដណ្តើមយកជ័យជម្នះ ក្នុងការបោះឆ្នោតក្រុមប្រឹក្សារាជធានី-ខេត្ត ស្រុក-ខណ្ឌ និងការបោះឆ្នោតតំណាងរាស្ត្រនីតិកាលទី ៧ ទៀត។
ការលើកឡើងរបស់មន្ត្រីជាន់ខ្ពស់គឺលោក សុខ ឥសាន ធ្វើឡើងបន្ទាប់ពីមានការផ្សព្វផ្សាយ វាយប្រហារថា ការធ្វើសន្និបាតរបស់គណបក្សប្រជាជនកម្ពុជា នឹងដាក់បញ្ចូលសមាសភាពថ្មីៗដូច ជាមន្ត្រីរាជការ កងកម្លាំងប្រដាប់អាវុធ និងក្រុមកូនថ្នាក់ដឹកនាំបក្ស ដើម្បីពង្រឹងអំណាចបក្សហើយថាធ្វើឡើងដើម្បីបិទបាំងការភ័យខ្លាច។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានឲ្យដឹងតាមសារតេឡេក្រាមថា សន្និបាតគណៈកម្មាធិការកណ្តាល គណបក្សប្រជាជនកម្ពុជាលើកទី ៤១ បានលើកទិសដៅភារកិច្ចសំខាន់ៗនិងធ្វើកំណែទម្រង់ស៊ីជម្រៅលើគ្រប់វិស័យ ដើម្បីដណ្តើមយកជ័យជម្នះក្នុងការបោះឆ្នោត។
លោកអះអាងថា គណបក្សប្រជាជន បាននិងកំពុងក្តាប់សភាពការណ៍យ៉ាងណែននិងកាន់អំណាចយ៉ាងរឹងមាំដោយពុំមានការការភ័យខ្លាច ដូចការចោទប្រកាន់ របស់ក្រុមប្រឆាំងនោះទេហើយថាគណបក្សប្រឆាំងវិញទេ ដែលភ័យខ្លាច ហើយតែងតែចាញ់ហើយបានរត់ចោលស្រុករហូត។
លោកបានបញ្ជាក់ថា៖ «លើកទិសដៅភារកិច្ចសំខាន់ៗដើម្បីដណ្តើមយកជ័យជម្នះថែមទៀតក្នុងការបោះឆ្នោតក្រុមប្រឹក្សា រាជធានី-ខេត្ត ស្រុក-ខណ្ឌ និងកំណែទម្រង់ស៊ីជម្រៅលើគ្រប់វិស័យ ព្រមទាំងជោគជ័យក្នុង ការបោះឆ្នោតតំណាងរាស្ត្រនីតិកាលទី ៧ ទៀត»។
លោកបន្ថែមថា៖ «ការធ្វើសន្និបាត ៤០ លើករួចមកហើយសុទ្ធ តែទទួលបានជ័យជម្នះរហូតទាំង ៤០ លើកដែរនោះ ហើយរាជរដ្ឋាភិបាលថ្មី បាននិងកំពុងដំណើរការការងាររបស់ខ្លួនដោយការទទួលខុសត្រូវខ្ពស់ដឹកនាំប្រទេសរហូត។ ចំណែកឯគណបក្សដែលអត់ភ័យខ្លាច បានចាញ់ និងរត់ចោលស្រុករហូតដែរ។ ឱម្នាលអគតិ ហ្អើយ គួរចេះខ្មាសអៀនផង មុននឹងនិយាយ»។
សន្និបាតលើកទី ៤១ នេះធ្វើឡើងរយៈពេល ៣ ថ្ងៃ ពីថ្ងៃទី ១៨ ដល់ថ្ងៃទី ២០ ខែធ្នូ ឆ្នាំ ២០១៨ នៅមជ្ឈមណ្ឌលសន្និបាត និងពិព័រណ៍កោះពេជ្រ ដែលមានការចូលរួមពីសមាជិកប្រមាណ ៣១៥០ នាក់។
សន្និបាតនេះ គឺដើម្បីរួមគ្នាពិនិត្យវាយតម្លៃអំពីសភាពការណ៍ទូទៅអំពីការដកពិសោធការងារកន្លងមក និងការកំណត់ទិសដៅ និងវិធានការនានាដែលត្រូវប្រកាន់យកសម្រាប់អនុវត្តនាពេលខាងមុខ ហើយសន្និបាតនឹងពិភាក្សាស៊ីជម្រៅសំខាន់ទៅលើរបាយការណ៍ស្តីពីសភាពការណ៍ទូទៅ និងការងារគណបក្សឆ្នាំ ២០១៨ និងទិសដៅភារកិច្ចឆ្នាំ ២០១៩ និងការបោះឆ្នោតជ្រើសសមាជិកគណៈអចិន្រៃ្តយ៍បន្ថែម។
លោកអភិបាលខេត្ត ១ រូប ដែលបានចូលរួមប្រជុំសន្និបាតសុំមិនបញ្ចេញឈ្មោះ បានឲ្យដឹងថា អង្គសន្និបាតបានពិភាក្សាទៅលើបញ្ហាប្រឈមជាច្រើនដើម្បីធ្វើយ៉ាងណាផ្តល់សេវាកម្មល្អដល់ប្រជាពលរដ្ឋ។
លោកថា៖ «មន្ត្រីដែលខិលខូចចាំតែយកជើងរាទឹក និងមន្ត្រីដែលមិនបម្រើប្រជាពលរដ្ឋដោយស្មោះត្រង់នឹងធ្វើការវះកាត់»។
ក៏ប៉ុន្តែលោក មាស នី អ្នកវិភាគនយោបាយថ្លែងថា គណបក្សប្រជាជនកម្ពុជា បាននិងកំពុងខិតខំប្រឹងប្រែងធ្វើការងារដើម្បីស្តារប្រជាប្រិយភាពរបស់ខ្លួនឡើងវិញ បន្ទាប់ពីធ្លាក់ចុះ ដោយសាររំលាយគណបក្សប្រឆាំង។
លោកថា៖ «វាអាស្រ័យថា តើការធ្វើកំណែទម្រង់ និងគោលការណ៍ដែលបានដាក់ចេញហ្នឹងថា តើវាមានប្រសិទ្ធភាព ដែរឬទេ? ប្រសិនបើកំណែទម្រង់ និងគោលការណ៍ដូចអាណត្តិមុន វានឹងមិនមានប្រសិទ្ធភាព»៕