.jpg)
លោក អ៊ុក គឹមលេខ រដ្ឋលេខាធិការក្រសួងមហាផ្ទៃ។ រូបថត ក្រសួងមហាផ្ទៃ
ភ្នំពេញៈ លោក អ៊ុក គឹមលេខ រដ្ឋលេខាធិការក្រសួងមហាផ្ទៃបានចាត់ទុកមតិរិះគន់ ជុំវិញសេចក្តីព្រាងច្បាប់ស្តីពីសណ្តាប់ធ្នាប់សាធារណៈត្រង់ចំណុចការស្លៀកពាក់ខ្លីរបស់ស្ត្រីថា ជាធាតុចូលមួយដើម្បីឲ្យរដ្ឋាភិបាលអាចតាក់តែងច្បាប់នេះឡើងប្រកបដោយប្រសិទ្ធភាព ប៉ុន្តែលោកថា សេចក្តីព្រាងច្បាប់នេះគឺហាមតែស្ត្រីដែលស្លៀកពាក់ខ្លីដល់លេចខ្លាំងនៃកេរភេទតែប៉ុណ្ណោះ។
បន្ទាប់ពីក្រុមការងារក្រសួងមហាផ្ទៃបានសម្រេចបញ្ចប់សេចក្តីព្រាងច្បាប់នេះ និងបញ្ចូនទៅរដ្ឋបាលរាជធានី-ខេត្តទាំង ២៥ ដើម្បីទទួលបានមតិយោបល់ និងធាតុចូលក្នុងការបំពេញបន្ថែមឲ្យសេចក្តីព្រាងច្បាប់នេះ អាចអនុវត្តបានដោយរលូនក៏មានមតិមួយចំនួនបានរិះគន់ ចំពោះចំណុចខ្លះៗនៃសេចក្តីព្រាងច្បាប់នេះដូចជាការហាមស្ត្រីស្លៀកខ្លី លេចលើលេចក្រោម ចេញផ្នែកខ្លះនៃកេរភេទ និងហាមបុរសមិនឲ្យដោះអាវនៅតាមទីសាធារណៈ។
ក្នុងនោះអ្នកលេងបណ្តាញសង្គមមួយចំនួនក៏បានធ្វើញត្តិតាមអនឡាញរួមគ្នា ដើម្បីជំទាស់នឹងការហាមប្រាមស្លៀកខ្លីនេះផងដែរ ដោយពួកគេអះអាងថា ច្បាប់គួរតែត្រូវបានធ្វើឡើងដើម្បីការពារសិទ្ធិរបស់ប្រជាពលរដ្ឋ មិនមែនជិះជាន់ពលរដ្ឋនោះទេ។
ញត្តិអនឡាញនោះបញ្ជាក់ថា៖ «ស្ត្រីគួរតែអាចប្រើសេរីភាពជាមូលដ្ឋានរបស់ពួកគេ រួមទាំងការបញ្ចេញមតិខ្លួនឯងតាមរយៈសម្លៀកបំពាក់ ដែលពួកគេជ្រើសរើសស្លៀក។ ការស្តីបន្ទោសស្ត្រីចំពោះការជ្រើសរើសសម្លៀកបំពាក់របស់ស្ត្រីគឺជាការជួយគាំទ្រដល់ការយល់ឃើញថា ស្ត្រីគឺជាដើមហេតុនៃអំពើហិង្សាផ្លូវភេទដែលពួកគេទទួលរង ហើយហេតុនេះវាគឺជាការបន្ថែមនូវវប្បធម៌និទ្ទណ្ឌភាពដែលទាក់ទងនឹងអំពើហិង្សាប្រឆាំងនឹងភេទ»។
លោក អ៊ុក គឹមលេខ បានប្រាប់ភ្នំពេញប៉ុស្តិ៍កាលពីថ្ងៃអង្គារថា ការដែលមានមតិរិះគន់នូវចំណុចទាំងអស់នេះគឺសុទ្ធតែជាធាតុចូលសម្រាប់កែតម្រូវឲ្យច្បាប់នេះកាន់តែល្អនៅពេលសេចក្តីព្រាងច្បាប់នេះ ត្រូវបានអនុម័ត និងដាក់ឲ្យប្រើប្រាស់ជាធរមាន។
លោកបន្តថា ក្នុងដំណាក់កាលនេះ គឺក្រុមការងារបច្ចេកទេសកំពុងតែប្រមូលធាតុចូលពីគ្រប់ភាគី ព្រោះនេះវាគ្រាន់តែជាសេចក្តីព្រាងបឋមនោះទេ ដោយត្រូវរង់ចាំការជជែក ដើម្បីទទួលបានមតិពីគ្រប់មជ្ឍដ្ឋានជាច្រើនទៀត។ បើតាមលោក គឹមលេខ សេចក្តីព្រាងច្បាប់នេះទើបតែបញ្ជូនឲ្យថ្នាក់រាជធានី-ខេត្តទាំង ២៥ ពិនិត្យ និងទទួលធាតុចូលមកវិញ ដើម្បីធ្វើការជជែកពិភាក្សាជាថ្មីជាមួយអង្គការសង្គមស៊ីវិល និងអន្តរក្រសួង មុននឹងបញ្ចូនសេចក្តីព្រាងច្បាប់នេះទៅរដ្ឋាភិបាល ធ្វើការពិនិត្យ និងសម្រេចបន្តទៀត។
លោកថា៖ «សុំឲ្យអ្នកប្រតិកម្មទាំងអស់មើលខ្លឹមសារនៃសេចក្តីព្រាងច្បាប់នេះឲ្យអស់ ព្រោះខ្លឹមសារនេះគឺហាមខើចលើខើចក្រោមលេចខ្លាំងនៃកេរភេទ។ បានន័យថាស្លៀកឡើងលេច (កេរភេទ) ហើយដើរតាមទីសាធារណៈទៀត។ ប៉ុន្តែស្លៀកខ្លីចុះនៅក្នុងបន្ទប់នៅក្នុងផ្ទះ ស្លៀកអីស្លៀកចុះ មិនបានហាមទេ»។
លោក គឹមលេខ បញ្ជាក់ថា សេចក្តីព្រាងច្បាប់នេះគឺមានខ្លឹមសារល្អៗជាច្រើនក្នុងការការពារនូវសកម្មភាពបំពាននឹងអសីលធម៌នៅក្នុងសង្គមរាល់ថ្ងៃដូចជាការបញ្ញត្តិហាមគ្រប់អនីតិជនអាយុក្រោម ១៨ ឆ្នាំមិនឲ្យចូលលេងក្នុងក្លិបកម្សាន្ត មិនឲ្យសេពគ្រឿងស្រវឹង ឬចែកចាយ និងទិញលក់គ្រឿងស្រវឹងដាច់ខាត ហើយជនណាលួងលោម លើកទឹកចិត្ត ឬបង្កលក្ខណៈឲ្យអនីតិជនអាយុក្រោម ១៨ ឆ្នាំសេពគ្រឿងស្រវឹងនឹងត្រូវទទួលទោសទណ្ឌតាមច្បាប់នេះ។
តាមសេចក្តីព្រាងច្បាប់ស្តីពីសណ្តាប់ធ្នាប់សាធារណៈដែលមាន ៨ ជំពូក និង ៤៨ មាត្រា បានធ្វើការហាមរាល់ការធ្វើសកម្មភាពប៉ះពាល់សោភណភាពនៅទីសាធារណៈដូចជាការហាល ឬការព្យួរសម្លៀកបំពាក់ ឬសម្ភារផ្សេងៗនៅលើអគារ តាមទីធ្លាជាប់ដងផ្លូវ ឬកន្លែងផ្សេងៗជាច្រើនទៀតដែលប៉ះពាល់សណ្តាប់ធ្នាប់សាធារណៈ។
ចំពោះការចាក់ ការជះ ឬការបង្ហូរវត្ថុរាវ សំណល់កង្វក់នៅទីសាធារណៈ ការដាក់តាំង ឬការលក់ទំនិញបំពានលើទីសាធារណៈគ្មានសណ្តាប់ធ្នាប់ និងការតបណ្តាញខ្សែអគ្គិសនី ខ្សែកាប ខ្សែទូរស័ព្ទ ឬខ្សែបណ្តាញផ្សេងៗទៀតរួមទាំងការរំខានដោយសំឡេងធុងបាស់ការស្រែកខ្លាំងៗក្នុងពេលវេលាមិនសមស្របដែលនាំការរំខានដល់អ្នកជុំវិញខ្លួន ក៏ត្រូវបានហាមឃាត់ផងដែរ។
លោក ប៉ា ច័ន្ទរឿន ប្រធានវិទ្យាស្ថានប្រជាធិបតេយ្យកម្ពុជាថ្លែងថា តាមពិតទៅប្រទេសកម្ពុជាគឺត្រូវការច្បាប់ស្តីពីសណ្តាប់ធ្នាប់សាធារណៈនេះជាចាំបាច់ ដើម្បីធានាបាននូវសុខសុវត្ថិភាព និងសណ្តាប់ធ្នាប់នៅក្នុងសង្គម។ ប៉ុន្តែបញ្ហានៅត្រង់ថា នៅពេលបង្កើតច្បាប់នេះ តើមានការជជែកពិភាក្សា និងប្រឹក្សាយោបល់ពីគ្រប់ភាគី ជាពិសេសសំឡេងគណបក្សប្រឆាំងបានកម្រិតណា ដើម្បីឲ្យច្បាប់នេះអាចអនុវត្តទៅមានប្រសិទ្ធភាព និងទូលំទូលាយ។
ចំពោះការហាមប្រាមការស្លៀកពាក់ខ្លីចេញកេរភេទ និងហាមដោះអាវតាមទីសាធារណៈនោះលោកយល់ថា ចំណុចត្រង់នេះហាក់ចែងហួសព្រំដែនបន្តិច ប្រសិនបើគិតពីសុខសុវត្ថិភាពរបស់ពលរដ្ឋគឺច្បាប់នេះគួរតែកំណត់ និងផ្តោតទៅលើការប្រើប្រាស់សម្លៀកបំពាក់បែបណាដែលអាចបង្កឲ្យមានភាពអសន្តិសុខដល់សង្គមវិញ។ «រឿងការស្លៀកពាក់របស់ប្រជាពលរដ្ឋទូទៅមិនគួរណាចែងក្នុងច្បាប់នោះទេ ព្រោះច្បាប់ខុសពីសីលធម៌ ច្បាប់មានលក្ខណៈចាប់បង្ខំ មិនអាចបដិសេធបាន ហើយបើធ្វើខុសនឹងត្រូវទទួលទោសទណ្ឌតាមហ្នឹង។ ចំណែកសីលធម៌ បើពលរដ្ឋមិនគោរពប្រតិបត្តិតាមការរស់នៅនោះទេ នោះគ្រាន់តែមានការស្តីបន្ទោស ឬតិះដៀលពីសង្គមតែប៉ុណ្ណឹងឯង»៕
វីដេអូ៖
