ភ្នំពេញៈ មន្ត្រីជាន់ខ្ពស់ក្រសួងការពារជាតិបានថ្លែងពីម្សិលមិញថា ឆ្នាំ ២០១៨ កន្លងទៅនេះកងទ័ពជើងគោកបានត្រួតពិនិត្យ ទប់ស្កាត់ និងបង្ក្រាបបទល្មើសផ្សេងៗតាមតំបន់ព្រំដែនជាង ៥ ពាន់ករណី ហើយថាស្ថានភាពសន្តិសុខនៅតាមព្រំដែនកាលពីឆ្នាំមុនមានលក្ខណៈល្អប្រសើរជាងឆ្នាំ ២០១៧ ឆ្ងាយណាស់។
នាយឧត្តមសេនីយ៍ ឈុំ សុជាតិ អនុរដ្ឋលេខាធិការ និងជាអ្នកនាំពាក្យក្រសួងការពារជាតិបានប្រាប់ភ្នំពេញប៉ុស្តិ៍កាលពីថ្ងៃទី ២ មករា ថាក្នុងឆ្នាំ ២០១៨ កន្លងទៅនេះកងទ័ពជើងគោកបានត្រួតពិនិត្យ ទប់ស្កាត់ និងបង្ក្រាបបទល្មើសផ្សេងៗសរុបបានចំនួន ៥១៩៣ ករណីនៅតាមខ្សែបន្ទាត់ព្រំដែន។ លោកក៏បានប្រៀបធៀបស្ថានភាពសន្តិសុខនៅតាមបណ្តោយព្រំដែនក្នុងឆ្នាំ ២០១៨ ថាមានភាពល្អប្រសើរជាងឆ្នាំ ២០១៧ ទៅទៀត។
លោកបញ្ជាក់ថា៖ «ជាង ៥ ពាន់ករណីគឺពាក់ព័ន្ធបទល្មើសព្រំដែនដូចជាឆ្លងដែនខុសច្បាប់ គ្រឿងញៀន កាប់ឈើ ការនាំពលករខុសច្បាប់ហើយបទល្មើសដែលពាក់ព័ន្ធនឹងការឆ្លងព្រំដែន។ យើងបន្តការអនុវត្តគោលនយោបាយរបស់រាជរដ្ឋាភិបាលស្តីពីការសហប្រតិបត្តិការជាមួយប្រទេសជិតខាងដើម្បីរួមគ្នាទប់ស្កាត់នូវបណ្តាបទល្មើសដែលកើតឡើងតាមបណ្តោយព្រំដែន»។
លោកបន្ថែមថាកងយោធពលខេមរភូមិន្ទបានពង្រឹងប្រៀបការពារជាតិលើគ្រប់វិស័យនៅតាមតំបន់ព្រំដែនធ្វើល្បាតជាប្រចាំដើម្បីត្រួតពិនិត្យ គ្រប់គ្រងសភាពការណ៍ និងភូមិសាស្ត្រទទួលខុសត្រូវ និងចូលរួមទប់ស្កាត់ បទល្មើសផ្សេងៗ និងសកម្មភាពឆ្លងដែនខុសច្បាប់ព្រមទាំងបានបន្តកិច្ចសហប្រតិបត្តិការល្អជាមួយប្រទេសជិតខាងដោះស្រាយបញ្ហា ផ្សេងៗដែលកើតមានដោយសន្តិវិធី និងបានអនុវត្តភារកិច្ចការពារអធិបតេយ្យ បូរណភាពទឹកដីយ៉ាងហ្មត់ចត់ ដែលធ្វើឲ្យស្ថានភាពសន្តិសុខតាមបណ្តោយព្រំដែនមានភាពល្អប្រសើរជាងឆ្នាំ ២០១៧ ឆ្ងាយណាស់។
លោកបញ្ជាក់ថា៖ «មានលក្ខណៈល្អប្រសើរជាងឆ្នាំ ២០១៧ ឆ្ងាយណាស់យើងមិនមានបញ្ហាអ្វីដែលជាការលំបាកទេ។ នៅតាមបណ្តោយព្រំដែនយើងសហការគ្នាបានល្អណាស់។ ពេលខ្លះពេលយើងឃើញមានបាតុភាព យើងបានសហការជាមួយគ្នាដោះស្រាយដោយសន្តិវិធីតាមបណ្តោយព្រំដែនដែលធ្វើឲ្យស្ថានភាពនៅតាមព្រំដែនទាំងអស់មានលក្ខណៈប្រក្រតីធម្មតា»។
លោកបានបន្ថែមថាពេលមានបទល្មើសគឺកងទ័ពឈរមុខគេព្យាយាមដោះស្រាយនៅនឹងកន្លែងដើម្បីរក្សាព្រំដែនឲ្យមានស្ថិរភាព និងសន្តិភាព ហើយថាកងយោធពលខេមរភូមិន្ទដែលនៅតាមបណ្តោយព្រំដែនបានយាមល្បាតយ៉ាងរឹងមាំ និងម៉ឺងម៉ាត់ក្នុងការការពារអធិបតេយ្យ បូរណភាពទឹកដី និងបង្កើនកិច្ចសហប្រតិបត្តិការជាមួយប្រទេសជិតខាងដើម្បីប្រែក្លាយតំបន់ព្រំដែនដែលជាតំបន់អភិវឌ្ឍន៍ និងទីផ្សារដើម្បីជួយលើកស្ទួយជីវភាពប្រជាពលរដ្ឋដែលរស់នៅតាមបណ្តោយព្រំដែន។
កាលពីខែសីហាឆ្នាំ ២០១៧ បញ្ហាវិវាទព្រំដែនកម្ពុជា-ឡាវបានឡើងកម្ដៅដោយសារកងទ័ពឡាវបានចូលមកឈរជើងនៅតំបន់អូរអាឡៃ និងអូរតាង៉ាវ ស្ថិតក្នុងស្រុកសៀមប៉ាង ខេត្តស្ទឹងត្រែង។ នាយករដ្ឋមន្ត្រីនៃប្រទេសទាំង ២ បានឯកភាពគ្នាសរសេរលិខិតទៅកាន់ប្រធានាធិបតីបារាំង ដើម្បីស្នើសុំបញ្ជូនអ្នកជំនាញការព្រំដែនបារាំងមកជួយវាស់វែង និងដោះស្រាយបញ្ហាជម្លោះនៅតាមព្រំដែននេះផងដែរ ខណៈបញ្ហាព្រំដែនកម្ពុជា និងវៀតណាមក៏បានសន្យាដែរថានឹងអនុវត្តឲ្យបានពេញលេញនូវបណ្តាសន្ធិសញ្ញា កិច្ចព្រមព្រៀង និងអនុស្សរណៈនៃការយោគយល់គ្នាស្តីពីបញ្ហាព្រំដែនរវាងប្រទេសទាំង ២ ហើយក៏ប្តេជ្ញារួមគ្នាដោះស្រាយរាល់បញ្ហាព្រំដែន និងពន្លឿនការបោះបង្គោលព្រំដែនឲ្យឆាប់ចប់ដើម្បីកសាងខ្សែបន្ទាត់ព្រំដែនមួយប្រកបដោយសន្តិភាព មិត្តភាព កិច្ចសហប្រតិបត្តិការ និងការអភិវឌ្ឍប្រកបដោយចីរភាព។
ប្រធានបណ្តាញជនជាតិដើមភាគតិចប្រចាំខេត្តមណ្ឌលគិរីលោក គ្រើង តុលា បានថ្លែងថាកន្លងទៅមានករណីដឹកជញ្ជូនឈើខុសច្បាប់ទៅប្រទេសវៀតណាមយ៉ាងច្រើនតែ ១ ខែកន្លងទៅនេះហាក់បីដូចជាមានលក្ខណៈថយចុះ។ លោកក៏បានសម្តែងការព្រួយបារម្ភពាក់ព័ន្ធនឹងការហូរចូលខុសច្បាប់នូវបន្លែ និងផ្លែឈើវៀតណាមដែលបានធ្វើឲ្យកសិករខ្មែរដែលជាអ្នកដាំដុះបន្លែ និងផ្លែឈើមានការព្រួយបារម្ភពីការបាត់ទីផ្សារ។
លោកបញ្ជាក់ថា៖ «យើងមានការព្រួយបារម្ភពីបន្លែ និងផ្លែឈើដែលនាំចូលពីប្រទេសវៀតណាម។ យើងព្រួយបារម្ភពីសុខភាពរបស់ពួកយើង ដោយសារតែបន្លែ និងផ្លែឈើរបស់វៀតណាមមានជាតិគីមីច្រើន ហើយយើងព្រួយបារម្ភដោយសារតែពលរដ្ឋគ្មានទីផ្សារលក់បន្លែផ្លែឈើរបស់ខ្លួន»៕