.jpg)
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល ថ្លែងនាពេលកន្លងមក។ ហេង ជីវ័ន
ភ្នំពេញៈ មន្ត្រីជាន់ខ្ពស់នៃរាជរដ្ឋាភិបាលកម្ពុជាបានបន្តធ្វើការអំពាវនាវឱ្យប្រជាពលរដ្ឋមានការប្រុងប្រយ័ត្នកាន់តែខ្លាំងបន្ថែមទៀត ខណៈដែលចំនួននៃការឆ្លងជំងឺកូវីដ ១៩ ក្នុងព្រឹត្តិការណ៍សហគមន៍ ២០ កុម្ភៈនៅតែមានការកើនឡើងជារៀងរាល់ថ្ងៃដែលមកដល់ថ្ងៃទី ១៣ ខែ មីនា ឆ្នាំ ២០២១ មានរហូតដល់ជាង ៧០០ ករណីហើយ។
យោងតាមរបាយការណ៍របស់ក្រសួងសុខាភិបាលនៅថ្ងៃម្សិលមិញនេះបានឱ្យដឹងថា ក្រសួងបានបន្តរកឃើញអ្នកឆ្លងកូវីដ ១៩ ចំនួន ៤១ នាក់បន្ថែមទៀត ដែលសុទ្ធតែជាករណីឆ្លងក្នុងព្រឹត្តិការណ៍សហគមន៍ ២០ កុម្ភៈ ខណៈអ្នកជាសះស្បើយមានចំនួន ២៤ នាក់ ហើយអ្នកដែលកំពុងសម្រាកព្យាបាលនៅមន្ទីរពេទ្យមានចំនួន ៦៥៦ នាក់។
នៅក្នុងសេចក្តីប្រកាសព័ត៌មានបានបន្តថា ក្នុងចំណោមអ្នកឆ្លងទាំង ៤១ នាក់ មានជនជាតិខ្មែរចំនួន ១២ នាក់ ជនជាតិចិន ២៣ នាក់ ជនជាតិវៀតណាម ៤ នាក់ និងជនជាតិថៃ ២ នាក់។
អ្នកឆ្លងក្នុងព្រឹត្តិការណ៍សហគមន៍លើកទី៣ នេះបានកើតឡើងក្នុងរាជធានី-ខេត្ត នៅទូទាំងប្រទេសចំនួន ១០ ហើយក្នុងនោះមាននៅរាជធានីភ្នំពេញ ខេត្តកណ្តាល ព្រះសីហនុ ខេត្តស្វាយរៀង ខេត្តកោះកុង ខេត្តកំពង់ធំ ខេត្តព្រៃវែង ខេត្តកំពង់ចាម ខេត្តសៀមរាប និងខេត្តបាត់ដំបង ដែលរហូតមកដល់ពេលនេះអ្នកឆ្លងក្នុងព្រឹត្តិការណ៍សហគមន៍មានសរុបចំនួន ៧៩២ នាក់។
គិតត្រឹមព្រឹកថ្ងៃទី ១៤ ខែមីនា ឆ្នាំ ២០២១ កម្ពុជាបាន រកឃើញអ្នកឆ្លងកូវីដ ១៩ សរុបចំនួន ១ ៣០៥ នាក់ ក្នុងនោះអ្នកត្រូវបានព្យាបាលជាសះស្បើយចំនួន ៦៤៧ នាក់អ្នកកំពុងសម្រាកព្យាបាលមានចំនួន ៦៥៦ នាក់ និងមានអ្នកស្លាប់ដោយសារកូវីដ១៩ ចំនួនម្នាក់។
លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ ក្រសួងការពារជាតិ និង លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានបន្តធ្វើការអំពាវនាវទៅដល់ប្រជាពលរដ្ឋទាំងអស់ឱ្យបន្តប្រុងប្រយ័ត្នឱ្យកាន់តែខ្លាំងបន្ថែមទៀត ខណៈដែលអាជ្ញាធរបាននិងកំពុងត្រៀមរៀបចំមន្ទីរពេទ្យបន្ថែមសម្រាប់ព្យាបាលអ្នកជំងឺកូវីដ ១៩។
លោក ហ៊ុន ម៉ាណែត បានសរសេរលើបណ្តាញសង្គមរបស់លោកនៅថ្ងៃម្សិលមិញនេះថា៖ «អនុវត្តតាមបទបញ្ជារបស់សម្ដេចតេជោក្នុងការរៀបចំមន្ទីរពេទ្យបម្រុងសម្រាប់ព្យាបាលជំងឺកូវីដ១៩ ជូនដល់ប្រជាពលរដ្ឋក្នុងករណីមានតម្រូវការចាំបាច់។ ក្រុមការងារយើងបានខិតខំប្រឹងប្រែងធ្វើការទាំងយប់ទាំងថ្ងៃ ដើម្បីធ្វើយ៉ាងណាឱ្យមន្ទីរពេទ្យនេះអាចចាប់ផ្ដើមដំណើរការត្រៀមលក្ខណៈព្យាបាលក្នុងពេលយ៉ាងខ្លីបំផុតដែលអាចធ្វើទៅបាន»។
ជាមួយគ្នានេះលោកក៏បានអំពាវនាវចំពោះបងប្អូនទាំងអស់សូមបន្តអនុវត្តឱ្យបានខ្ជាប់ខ្ជួននូវវិធានសុខាភិបាល ដើម្បីការពារខ្លួនឯង គ្រួសារ សង្គមជាតិ និងប្រជាជននៅក្នុងកាលៈទេសៈដ៏លំបាកនេះ ពីព្រោះការប្រយុទ្ធប្រឆាំងនឹងជំងឺកូវីដ ១៩ គឺផ្តើមចេញពីខ្លួនឯង ដើម្បីការពារខ្លួន និងអ្នកដទៃ។
អ្នកនាំពាក្យក្រសួងសុខាភិបាលលោកស្រី ឱ វណ្ណឌីន បានអំពាវនាវជាថ្មីម្តងទៀតឱ្យប្រជាពលរដ្ឋទាំងអស់បន្តការប្រុងប្រយ័ត្នខ្ពស់កាន់តែខ្លាំងលើស្ថានភាពឆ្លងបច្ចុប្បន្ននេះ គឺវីរុសកូវីដ ១៩ បំប្លែងថ្មីដែលកំពុងចរាចរយ៉ាងសកម្មខ្លាំងក្លានៅក្នុងប្រទេសកម្ពុជា។
លោកស្រីបានលើកឡើងថា៖ «វីរុសបំប្លែងថ្មីនេះ សាហាវជាង និងខ្លាំងជាងវីរុសនាពេលមុនៗដែលអាចធ្វើឱ្យបុគ្គលស្លាប់បានគ្រប់ពេលវេលា ដែលថ្មីៗនេះ យើងមានករណីស្លាប់ម្នាក់រួចទៅហើយ និងនៅមានអ្នកដែលស្ថិតក្នុងសភាពធ្ងន់ធ្ងរមួយចំនួនទៀតដែរដែលក្រុមគ្រូពេទ្យកំពុងតែជួយសង្គ្រោះយ៉ាងមមាញឹកជាទីបំផុត»។
លោកស្រីបានស្នើសុំឱ្យប្រជាពលរដ្ឋទាំងអស់នៅផ្ទះ និងកុំធ្វើការចល័តពីកន្លែងមួយទៅកន្លែងមួយ ហើយមិនត្រូវបង្កការជួបជុំគ្នាច្រើនដូចជាពិធីមង្គលការ ឡើងផ្ទះ បុណ្យសាសនាផ្សេងៗជាដើម ទាំងនេះជាវិធានការជួយដល់ការកាត់ផ្តាច់បាននូវការចម្លងពីបុគ្គលម្នាក់ទៅបុគ្គលម្នាក់ទៀតបានជាអតិបរមា។
ទន្ទឹមនឹងនេះដែរ ខណៈពេលដែលមានប្រទេសមួយចំនួនផ្អាកនូវការចាក់វ៉ាក់សាំងរបស់ក្រុមហ៊ុន AstraZeneca ដោយសារមានបញ្ហាប៉ះពាល់សុខភាព លោកស្រី ឱ វណ្ណឌីន បានធ្វើការពន្យល់ពីប្រភេទវ៉ាក់សាំងដែលកម្ពុជាទទួលបានពីមជ្ឈមណ្ឌលកូវ៉ាក់មានឈ្មោះថា កូវីសែល (Covishield) ផលិតនៅប្រទេសឥណ្ឌាដែលទទួលបានអាជ្ញាប័ណ្ណផលិតពីក្រុមហ៊ុន AstraZeneca។
លោកស្រីបានបញ្ជាក់ទៀតថា៖ «តាមការបញ្ជាក់ពីអង្គការសុខភាពពិភពលោកដែលជាអ្នកសម្របសម្រួលក្នុងការផ្គត់ផ្គង់វ៉ាក់សាំងនេះមកកម្ពុជាថា មកដល់ពេលនេះមិនទាន់មានបញ្ហាណាមួយ ឬប្រតិកម្មខ្លាំងនៃវ៉ាក់សាំងនេះទេ ហើយវ៉ាក់សាំងដែលប្រទេសយើងកំពុងប្រើនេះមិនមែនជាវ៉ាក់សាំងដែលកំពុងមានបញ្ហានៅខាងអឺរ៉ុបនោះទេ»។
អ្នកនាំពាក្យដដែលបានបន្តថា អង្គការសុខភាពពិភពលោកប្រចាំប្រទេសកម្ពុជា ក៏បាននិយាយដែរថា ការបន្តចាក់វ៉ាក់សាំងនៅក្នុងប្រទេសកម្ពុជា នៅតែមានភាពចាំបាច់ដើម្បីប្រយុទ្ធនឹងការរាតត្បាតនៃកូវីដ១៩ដែលកំពុងមានការបារម្ភនៅក្នុងប្រទេសកម្ពុជានាពេលនេះផងដែរ។
យោងតាមរបាយការណ៍របស់ក្រសួងសុខាភិបាលបានឱ្យដឹងថា គិតពីថ្ងៃទី ១០ ខែកុម្ភៈ ដល់ថ្ងៃទី ១៣ ខែ មីនា ឆ្នាំ ២០២១ ក្រសួងបានចាក់វ៉ាក់សាំងស៊ីណូហ្វាម (Sinopharm) របស់ចិនលើកទី១ ដល់ប្រជាពលរដ្ឋនៅទូទាំងប្រទេសបានចំនួន ១៦១ ៨១៨ នាក់ និងអ្នកចាក់លើកទី២ បានចំនួន ៩ ០៣៣ នាក់។ ចំណែកក្រសួងការពារជាតិបានឱ្យដឹងផងដែរថា ក្នុងរយៈពេលដូចគ្នានេះ ក្រសួងបានចាក់វ៉ាក់សាំងកូវីដ ១៩ លើកទី១ ជូនកងកម្លាំងចំនួន ១០៨ ៦៤៨ នាក់ និងចាក់លើកទី២ បានចំនួន ៤៧ ៧៥១ នាក់។
ម្សិលមិញនេះដែរ លោកស្រី ឱ វណ្ណឌីន បានបញ្ជាក់ពីករណីស្លាប់បុរសជនជាតិខ្មែរអាយុ ៦៩ ឆ្នាំម្នាក់នៅក្នុងស្រុកពាមរក៍ ខេត្តព្រៃវែងដោយសារជំងឺស្ទះសរសៃបេះដូង មិនមែនដោយសារជំងឺកូវីដ ១៩ ទេ។ បុរសរូបនេះមានតេស្តវិជ្ជមានកូវីដ ១៩ និងបានសម្រាកព្យាបាលនៅមន្ទីរពេទ្យបង្អែកខេត្តព្រៃវែងនៅថ្ងៃទី ១៣ ខែមីនា ប៉ុន្តែអ្នកជំងឺរូបនេះមិនមានអាការក្អក ហត់ និងក្តៅខ្លួនទេ។
នៅពេលព្រឹកថ្ងៃទី ១៤ ខែមីនា បុរសរូបនេះបានចេញទៅហាត់ប្រាណយ៉ាងយូរ ហើយពេលត្រឡប់មកវិញ គាត់បានសម្រាន្តលក់យ៉ាងយូរ ខណៈដែលអ្នកនៅបន្ទប់ជាមួយបានដាស់គាត់ឱ្យពិសាបាយព្រឹក ក៏ឃើញថា ជនរងគ្រោះរូបនេះបានស្លាប់បាត់ទៅហើយ៕
