.jpg)
បុរសម្នាក់ពេលកំពុងឆែករកព័ត៌មានតាមអនឡាញកាលពីម្សិលមិញ។ ហេង ជីវ័ន
ភ្នំពេញៈ មន្ត្រីជាន់ខ្ពស់ក្រសួងប្រៃសណីយ៍ និងទូរគមនាគមន៍បានឱ្យដឹងថា នៅក្នុងអំឡុងពេលនៃការរីករាលដាលនៃជំងឺកូវីដ ១៩ នេះកំណើននៃការប្រើប្រាស់ប្រព័ន្ធអ៊ីនធឺណិតនៅក្នុងប្រទេសកម្ពុជា មានការកើនឡើងគួរឱ្យកត់សម្គាល់ ដោយសារមានកំណើនតម្រូវការលើការបញ្ជាទិញទំនិញ ការសិក្សាអាជីវកម្ម និងការប្រើប្រាស់ប្រចាំថ្ងៃ។
លោក តុល ញ៉ាក់ អគ្គនាយកប្រៃសណីយ៍ និងទូរគមនាគមន៍ប្រាប់ភ្នំពេញ-ប៉ុស្ដិ៍កាលពីថ្ងៃ ១៦ មីនាថា នៅក្នុងវិបត្តិនៃជំងឺកូវីដ ១៩ នេះ ពលរដ្ឋមិនអាចចេញទៅក្រៅបានសិស្សរៀនតាមប្រព័ន្ធអនឡាញ និងមន្ត្រីរាជការនៅតាមស្ថាប័ន ក៏ត្រូវបានអនុញ្ញាតឱ្យធ្វើការពីផ្ទះ ដែលធ្វើឱ្យការប្រើប្រាស់អ៊ីនធឺណិតមានការកើនឡើង ប៉ុន្តែលោកមិនបានបញ្ជាក់ពីតួលេខនៃកម្រិតកើនឡើងនោះទេ។
លោក តុល ញ៉ាក់ បានបន្តថា ម្យ៉ាងវិញទៀតនៅក្នុងវិបត្តិនេះពលរដ្ឋទាំងវិស័យរដ្ឋ និងឯកជនបានបើកកិច្ចប្រជុំតាមប្រព័ន្ធអនឡាញក៏កើនឡើងច្រើនផងដែរ។ ជាមួយគ្នានេះ ពលរដ្ឋជាច្រើនមិនអាចចេញទៅណាមកណារួច ហើយបានចូលរួមជាមួយនឹងរាជរដ្ឋាភិបាលក្នុងការប្រយុទ្ធប្រឆាំងនឹងជំងឺកូវីដ ១៩ និងអនុវត្តតាមការណែនាំ ឬគោលការណ៍របស់ក្រសួងសុខាភិបាល ហើយបានបញ្ជាទិញទំនិញពីទីផ្សារ។
លោក តុល ញ៉ាក់ ថ្លែងថា៖ «លក្ខណៈទាំងអស់នេះមានការប្រែប្រួលច្រើន ដែលតួនាទីបច្ចេកវិទ្យាឌីជីថលក្នុងបរិបទនៃកូវីដ ១៩ មានការលូតលាស់ទៅលើ App ក៏កើតច្រើន។ អាចនិយាយបានថា នៅក្នុងបញ្ហាប្រឈមនេះបាននិងកំពុងបង្កើតជាឱកាស»។
បើតាមលោក តុល ញ៉ាក់ ទន្ទឹមនឹងមានឱកាសក៏មានបញ្ហាប្រឈមខ្លះដែរនៅក្នុងសេវាអនឡាញនេះពាក់ព័ន្ធនឹងសេវា និងសន្តិសុខបច្ចេកវិទ្យាក៏បានកើនឡើងផងដែរ។ ដើម្បីធានាបាននូវសុវត្ថិភាពក្រសួងបាននិងកំពុងរៀបចំធ្វើច្បាប់ Cyber Security។
លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ប្រាប់ប្រព័ន្ធផ្សព្វផ្សាយរបស់ក្រសួងព័ត៌មានកាលពីថ្ងៃទី ១៦ ខែមីនាថា ក្នុងបរិបទកូវីដ១៩នេះ ពលរដ្ឋប្រើប្រាស់អ៊ីនធឺណិតមានការកើនឡើងដែលមានរហូតដល់ ១៥ លាន ៥ សែននាក់ គឺជាអ្នកប្រើប្រាស់អ៊ីនធឺណិតតាមទូរស័ព្ទដៃ មានន័យថា ប្រជាពលរដ្ឋប្រើប្រាស់ 3G ឬ 4G សម្រាប់សេវាអ៊ីនធឺណិត។
ដោយឡែកអ្នកប្រើប្រាស់សេវាអ៊ីនធឺណិតនៅតាមផ្ទះ អគារ និងក្រុមហ៊ុន ដែលអូសខ្សែកាប្លិ៍ក្រោមដី ក្រោមទឹក និងលើអាកាសមានចំនួនជិត ១ លានកន្លែង។
លោក ជា វ៉ាន់ដេត ថ្លែងថា៖ «ក្នុងពេលមានការកើនឡើងនេះដែរក៏មានបញ្ហាប្រឈមមួយចំនួនដែលធ្វើឱ្យអ្នកប្រើប្រាស់បានត្អូញត្អែរពីសេវាអ៊ីនធឺណិតមានការយឺតយ៉ាវ ដែលធ្វើឱ្យប៉ះពាល់ដល់ដំណើរការអនុវត្តការងារប្រចាំថ្ងៃ ក៏ដូចជា ការសិក្សាតាមអនឡាញរបស់ក្មួយៗសិស្សានុសិស្សក្នុងបរិបទនេះ»។
ក៏ប៉ុន្តែលោក វី កៃយ៉ាសិទ្ធ អ្នកគ្រប់គ្រងធនធានមនុស្សរបស់ក្រុមហ៊ុនអនឡាញ NHAM24 បានថ្លែងកាលពីម្សិលមិញថា ក្នុងអំឡុងពេលផ្ទុះជំងឺកូវីដ ១៩ នៅកម្ពុជានេះ ការបញ្ជាទិញទំនិញតាមអនឡាញរបស់ក្រុមហ៊ុនលោកមានការកើនឡើងត្រឹមតែចន្លោះពី ៥ ទៅ ១០ ភាគរយប៉ុណ្ណោះ ពោលគឺស្ថិតក្នុងកម្រិតតិចតួចនៅឡើយ។
លោកថ្លែងថា៖ «ប្រព័ន្ធអនឡាញ ឬ App សម្រាប់បញ្ជាទិញដែលក្រុមហ៊ុនខ្ញុំបង្កើតឡើងនេះ គឺដើម្បីបង្កភាពងាយស្រួលដល់អតិថិជន ជាពិសេសនៅក្នុងអំឡុងពេលកូវីដនេះដែលមិនអាចចេញទៅក្រៅបាន គឺពួកគាត់អាចរកទិញអីវ៉ាន់ បន្លែ និងម្ហូបផ្សេងៗ»។
យ៉ាងណាក្ដីលោក វី កៃយ៉ាសិទ្ធ បានបញ្ជាក់ថា ការប្រើប្រាស់ App និងបច្ចេកវិទ្យាផ្សេងតាមបណ្តាញអ៊ីនធឺណិត សម្រាប់បញ្ជាទិញទំនិញរបស់ពលរដ្ឋកម្ពុជានាពេលបច្ចុប្បន្នគឺមិនទាន់បានទូលំទូលាយនោះទេ ប៉ុន្តែនៅពេលមានការផ្សព្វផ្សាយពីក្រុមហ៊ុនជាច្រើននៅក្នុងប្រទេសពី ១ ថ្ងៃ ទៅ ១ ថ្ងៃ វានឹងអាចកើនឡើងកាន់តែច្រើននាពេលអនាគត៕
