.jpg)
ស្លាកពន្ធនាគារខេត្តព្រះវិហារដែលអ្នកជាប់ឃុំឆ្លងជំងឺគ្រុនផ្តាសាយធំ។ រូបថត សហការី
ព្រះវិហារៈ លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងថា ការធ្វើតេស្ដពីមន្ទីរពិសោធន៍បង្ហាញថា អ្នកជាប់ពន្ធនាគារចំនួន ១៤៧ នាក់ នៅខេត្តព្រះវិហារមិនមានជំងឺកូវីដ ១៩ នោះទេ វាគ្រាន់តែជាករណីឆ្លងជំងឺផ្ដាសាយធំជាក្រុមតែប៉ុណ្ណោះ ដោយពួកគេកើតមានអាការក្អក ក្ដៅខ្លួន និងហៀរសំបោរ។
លោកស្រី វណ្ណឌីន បានថ្លែងពីម្សិលមិញថា បន្ទាប់ពីក្រសួងសុខាភិបាលទទួលបានព័ត៌មានករណីសង្ស័យជំងឺគ្រុនផ្ដាសាយធំលើក្រុមអ្នកជាប់ពន្ធនាគារនៅខេត្តព្រះវិហារកាលពីថ្ងៃទី ៣១ សីហា និងក្រោយពីក្រុមគ្រូពេទ្យជំនាញចុះស្រាវជ្រាវ និងពិនិត្យ គឺបានបែងចែកឱ្យនៅដាច់ដោយឡែករវាងក្រុមអ្នកជាប់ពន្ធនាគារជា ៣ ក្រុម។
ក្នុងចំណោមទាំងក្រុមនោះគឺក្រុមអ្នកឈឺចំនួន ១៤៧ នាក់ក្នុងនោះជាស្ដ្រីចំនួន ១៩ នាក់ត្រូវបានយកសំណាកមកធ្វើតេស្ដ ក្រុមអ្នកសង្ស័យឆ្លងជំងឺផ្ដាសាយធំចំនួន ១១ នាក់ និងក្រុមមិនសង្ស័យឆ្លងជំងឺគ្រុនផ្ដាសាយធំចំនួន ៣២៦ នាក់។ លទ្ធផលធ្វើតេស្ដលើអ្នកជាប់ពន្ធនាគារទាំង ១៤៧ នាក់ចេញផ្សាយនៅថ្ងៃទី ១ កញ្ញា គឺអវិជ្ជមានជំងឺកូវីដ ១៩ តែជាការឆ្លងជំងឺគ្រុនផ្ដាសាយធំ។
លោកស្រីថា៖ «ដូច្នេះមិនមែនជាករណីជំងឺកូវីដ១៩នោះទេ ហើយលទ្ធផលវិភាគមន្ទីរពិសោធន៍ក៏បានបញ្ជាក់ដែរថា ជាករណីជំងឺផ្តាសាយធំ (Influenza A) ដែលជាជំងឺអាចឆ្លងបន្តគ្នាបានក្នុងទ្រង់ទ្រាយបែបនេះ ប្រសិនបើបុគ្គលម្នាក់ៗមិនបានអនុវត្តកិច្ចការពារខ្លួនបានត្រឹមត្រូវទេនោះ។ ក្រុមការងារ ក៏បានអប់រំសុខភាព ដើម្បីឲ្យអ្នកនៅក្នុងពន្ធនាគារទាំងអស់ចេះការពារខ្លួនកុំឲ្យមានការចម្លងបន្តគ្នាបន្ថែមទៀត»។
លោកស្រី ឱ វណ្ឌឌីន បញ្ជាក់ទៀតថា ស្ថានភាពសុខភាពរបស់អ្នកជំងឺទាំង ១៤៧ នាក់គឺមានសភាពល្អប្រសើរជាបណ្តើរៗ និងស្ថិតក្រោមការតាមដានដោយយកចិត្តទុកដាក់ពីក្រុមគ្រូពេទ្យរបស់មន្ទីរសុខាភិបាលខេត្តព្រះវិហារ។
កាលពីពាក់កណ្ដាលខែសីហា ព្រះសង្ឃវត្តប្រាសាទនាងខ្មៅចំនួន ៣៤ អង្គ ស្ថិតក្នុងភូមិចា ឃុំរវៀង ស្រុកសំរោង ខេត្តតាកែវ ក៏ធ្លាប់ត្រូវបានក្រសួងសុខាភិបាលយកសំណាកទៅធ្វើតេស្ដជំងឺកូវីដ ១៩ ដែរ បន្ទាប់ពីព្រះសង្ឃទាំងនោះបានចេញរោគសញ្ញាផ្ដាសាយ។ លទ្ធផលធ្វើតេស្ដបញ្ជាក់ថា ព្រះសង្ឃទាំងនេះគ្រាន់តែឆ្លងជំងឺផ្ដាសាយធម្មតាប៉ុណ្ណោះ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃបានថ្លែងពីម្សិលមិញថា នៅក្នុងពន្ធនាគារខេត្តព្រះវិហារ គឺមានអ្នកជាប់ឃុំជាង ៤០០ នាក់។ លោកបន្តថា កាលពីពេលថ្មីៗនេះគឺមានអ្នកជាប់ឃុំថ្មី និងមានអ្នកជាប់ឃុំចំនួន ១១ នាក់ ទើបបានបញ្ចប់ការធ្វើចត្តាឡីស័ក ហើយបញ្ចូនឱ្យទៅរស់នៅក្នុងបន្ទប់ឃុំឃាំងជាមួយអ្នកជាប់ឃុំចាស់ៗផ្សេងទៀត។ លោកថា៖ «យើងមិនដឹងថា ឆ្លងពីណា ថាតើឆ្លងពីអ្នកនៅក្នុងពន្ធនាគារស្រាប់ ឬមួយក៏ឆ្លងពីអ្នកទើបចូលថ្មី វាអត់ទាន់កំណត់បាន»។
ចំណែកលោកវេជ្ជបណ្ឌិត គួង ឡូ ប្រធានមន្ទីរសុខាភិបាលខេត្តព្រះវិហារបានប្រាប់ភ្នំពេញប៉ុស្ដិ៍ម្សិលមិញដែរថា ការផ្ទុះឡើងការឆ្លងជំងឺគ្រុនផ្ដាសាយធំជាក្រុមនៅក្នុងពន្ធនាគារនេះ អាចឆ្លងដោយសារនៅពេលក្រុមអ្នកជាប់ពន្ធនាគារចេញមកធ្វើពលកម្ម នៅខាងក្រៅបន្ទប់ជាប់ឃុំ។
លោកបន្តថា រាល់សាច់ញាតិចូលទៅសួរសុខទុក្ខអ្នកជាប់ឃុំគឺត្រូវឆ្លងកាត់វិធានការសុខាភិបាលជាមុន ដូចជា វាស់កម្ដៅ និងលាងសម្អាតដៃជាមួយអាល់កុលនៅមាត់ច្រកចេញចូលនៃពន្ធនាគារ ហើយការសន្ទនារវាងសាច់ញាតិ និងអ្នកជាប់ពន្ធនាគារគឺឆ្លងកាត់របាំងកញ្ចក់។
លោកបានបញ្ជាក់ថា៖ «នៅក្នុងពន្ធនាគារហ្នឹងគឺបានអនុវត្តតាមវិធាននៃការចម្លងកូវីដ ១៩។ អ៊ីចឹង! ការការពារចម្លងជំងឺកូវីដ១៩នេះ វាក៏ជាការការពារការចម្លងជំងឺគ្រុនផ្ដាសាយធំដែរ និងក៏អាចការពារជំងឺឆ្លងតាមផ្លូវដង្ហើមផ្សេងទៀតដែរ។ ប៉ុន្តែអ្វីដែលយើងចាប់អារម្មណ៍នោះ គឺថាពួកគាត់អាចឆ្លងតាមរយៈគ្នាគាត់ នៅពេលអ្នកជាប់ពន្ធនាគារចេញមកធ្វើការងារនៅខាងក្រៅអគារឃុំឃាំង»។
លោក គួង ឡូ បានបញ្ជាក់ទៀតថា អ្នកជាប់ឃុំដែលឆ្លងជំងឺគ្រុនផ្ដាសាយ ទាំងនោះ នៅពេលនេះគឺមានអាការធូរស្រាលឡើងវិញហើយ ក្រោយពីពួកគេទទួលបានថ្នាំលេបពីមន្ទីរសុខាភិបាលខេត្ត។ លោកបន្តថា ក្រោយពីការផ្ដល់ថ្នាំឱ្យលេបបានចំនួន ៣ ថ្ងៃ ខាងមន្ត្រីពេទ្យរបស់មន្ទីរសុខាភិបាល ខេត្តព្រះវិហារនឹងចុះទៅពិនិត្យសុខភាពរាល់អ្នកជាប់ឃុំទាំងនោះម្ដងទៀត ហើយនឹងបន្តតាមដានរហូតពួកគេជាសះស្បើយទាំងស្រុង។
កាលពីថ្ងៃម្សិលមិញ ក្រសួងសុខាភិបាលបានរាយការណ៍ថា គ្មានករណីជំងឺកូវីដ ១៩ ថ្មីទៀតនោះទេ និងក៏គ្មានករណីជាសះស្បើយថ្មីនោះដែរ ខណៈដែលករណីអ្នកឆ្លងជំងឺកូវីដ ១៩ ទាំងអស់នៅកម្ពុជាមានសរុបចំនួន ២៧៤ នាក់ ក្នុងនោះត្រូវបានព្យាបាលជាសះស្បើយចំនួន ២៦៦ នាក់ និងនៅសល់តែ ៨ នាក់ទៀតប៉ុណ្ណោះ ដែលកំពុងបន្តសម្រាកព្យាបាលនៅក្នុងមន្ទីរពេទ្យ៕
