ភ្នំពេញៈ មន្រ្តីជាន់ខ្ពស់ម្នាក់របស់អង្គការសហប្រជាជាតិ (អ.ស.ប) បានធ្វើការអំពាវនាវទៅដល់ម្ចាស់ជំនួយអន្តរជាតិ និងរដ្ឋាភិបាលកម្ពុជាឲ្យផ្តល់មូលនិធិសម្រាប់ធ្វើឲ្យសាលាក្តីខ្មែរក្រហមមានចីរភាព។
លោក Jan Eliasson អគ្គលេខាធិការរងនៃអង្គការសហប្រជាជាតិ បានថ្លែងកាលពីថ្ងៃព្រហស្បតិ៍ថា ម្ចាស់ជំនួយមានកាតព្វកិច្ចចំពោះប្រជាជនកម្ពុជា ក្នុងការធ្វើឲ្យមេដឹកនាំខ្មែរ ក្រហមទទួលខុសត្រូវ និងធានាថា តុលាការចម្រុះជាតិសាសន៍មួយនេះមិនទទួលបរាជ័យទេ។
លោកបានថ្លែងនៅសន្និសីទស្តីពីតុលាការខ្មែរក្រហមនេះនៅឯទីក្រុង ញូវយ៉ក ថា៖ «យើងទាំងអស់គ្នាឯកភាពថា មិនអាចមាននិទ្ទណ្ឌភាពចំពោះបទឧក្រិដ្ឋកម្ម ដែលហែកហួរដល់គ្រឹះនៃមនុស្សជាតិរួមរបស់យើងនោះឡើយ។ ប៉ុន្តែ យើងត្រូវតែបន្តទៅទៀតពីលើការដែលបានព្រមព្រៀង និងសម្តីដែលបានសន្យា»។
លោកថ្លែងថា៖ «ពាក្យសម្តីមិនបង់ថ្លៃចំណាយទេ។ ប្រសិនបើយើងមិនបង់លើចំណាយនោះយើងនឹងទទួលបរាជ័យ ចំពោះសេចក្តីប្រកាសរបស់យើង។ យើងនឹងធ្វើឲ្យប្រជាជនកម្ពុជាដែលរស់រានមានជីវិតរួចផុតពីអំពើព្រៃផ្សៃ និងដែលរស់នៅចង់ឃើញយុតិ្តធម៌រាប់លាននាក់ខកចិត្ត ដែលមើលឃើញសាច់ញាតិរបស់ខ្លួនស្លាប់ដោយអយុត្តិធម៌។
លោក Eliasson បានថ្លែងថា ថវិកាទ្រទ្រង់តុលាការសម្រាប់ឆ្នាំក្រោយបានឆ្លុះបញ្ចាំងនូវវិធីសាស្រ្តសាមញ្ញ និងកាត់បន្ថយចំណាយ» ដើម្បីបំពេញតាមការកំហិតខាងហិរញ្ញវត្ថុរបស់ម្ចាស់ជំនួយដល់សាលាក្តីនេះ។
ដោយកត់សម្គាល់នូវកូដកម្មមិនធ្វើការរបស់បុគ្គលិកជាតិដែលគ្មានប្រាក់ខែកាលពីខែ កញ្ញា លោកបានអំពាវនាវដល់កម្ពុជា និងម្ចាស់ជំនួយឲ្យធ្វើការដោះស្រាយ «វិបតិ្តហិរញ្ញវត្ថុរ៉ាំរ៉ៃ និងដែលកាន់តែធ្ងន់ធ្ងរ ហើយនឹងរាំងស្ទះការងារនេះ»។
កាលពី ខែ មុន រដ្ឋាភិបាលបានបង់ប្រាក់ចំនួន ១,៨ លានដុល្លារអាមេរិកបន្ថែមទៀត ដើម្បីបង់ថ្លៃចំណាយរបស់បុគ្គលិកនៅខាងភាគីជាតិ រហូតដល់ដំណាច់ឆ្នាំ ២០១៣។
លោក Eliasson បានលើកឡើងថា៖ «ជំនួយហិរញ្ញវត្ថុបន្ថែមនេះ មិនគួរធ្វើឡើងតែម្តងទៀត។ វាគួរមានចីរភាព ដល់ឆ្នាំក្រោយ និងឆ្នាំបន្តបន្ទាប់»។
កាលពីសប្តាហ៍មុន អង្គការគំនិតផ្តួចផ្តើមយុតិ្តធម៌សង្គមបើកទូលាយ ដែលជាអង្គការឃ្លាំមើលតុលាការនេះ ដែលមានមូលដ្ឋាននៅទីក្រុង ញូវយ៉ក បានអំពាវនាវដល់ម្ចាស់ជំនួយឲ្យឈប់កាត់ជំនួយដល់តុលាការ ប្រសិនបើពួកគេចង់ផ្តល់ជំនួយដល់តុលាការក្នុងការជំនុំជម្រះលើក ទី២ សម្រាប់សំណុំរឿង ០០២។
សេចក្តីថ្លែងសន្និដ្ឋានបិទការសវនាការសួរដេញដោលក្នុងការបើកជំនុំជម្រះលើក ទី១ សំណុំរឿងក្តី ០០២/០១ បានបិទបញ្ចប់នៅថ្ងៃ ទី៣១ ខែ តុលា កន្លងទៅ។
តុលាការនេះបានលើកឡើងជាថ្មីម្តងទៀតថា បើទោះជាមានវិបតិ្តថវិកាក៏ដោយ ក៏ប៉ុន្តែ ការជំនុំជម្រះលើក ទី២ ដែលនឹងបើកសវនាការលើបទចោទទាក់ទងនឹងអំពើប្រល័យពូជសាសន៍ មន្ទីរ ស‑២១ និងសហករណ៍ គឺត្រូវធ្វើផ្អែកតាមដីកាពីអង្គជំនុំជម្រះតុលាការថ្នាក់កំពូល៕ TK
