The Phnom Penh Post Search

Search form

Logo of Phnom Penh Post newspaper Phnom Penh Post - មន្ត្រី​នគរបាល​ថា​នឹង​មាន​ចំណាត់ការ​ទៅ​លើ​កង​កម្លាំង​ដែល​បាញ់​កម្មករ




មន្ត្រី​នគរបាល​ថា​នឹង​មាន​ចំណាត់ការ​ទៅ​លើ​កង​កម្លាំង​ដែល​បាញ់​កម្មករ

មន្ត្រី​នគរបាល​ថា​នឹង​មាន​ចំណាត់ការ​ទៅ​លើ​កង​កម្លាំង​ដែល​បាញ់​កម្មករ

131114_06b
នគរបាលប្រើកាំភ្លើងពិតបាញ់តម្រង់កម្មករកាលពីថ្ងៃអង្គារ

ភ្នំពេញៈ អ្នក​នាំ​ពាក្យ​នគរបាល​ជាតិ បាន​ថ្លែង​កាល​ពី​ម្សិលមិញ​ថា មន្រ្តី​នគរបាល ដែល​រឹង​ទទឹង មិន​ស្តាប់​បញ្ជា​ហើយ​បាន​បាញ់​ទៅ​លើ​កម្មករ ដែល​បាន​ធ្វើ​ការ​តវ៉ា​កាល​ពី​ថ្ងៃ​អង្គារ​អាច​នឹង​ត្រូវ​បណ្តេញ​ចេញ​ពី​តំណែង ខណៈ​ដែល​ការ​បាញ់​នោះ បាន​ធ្វើ​ឲ្យ​ស្រ្តី​អ្នក​លក់​បាយ​អាយុ ៤៩ឆ្នាំ ម្នាក់​ស្លាប់។

លោក គៀត ច័ន្ទថារិទ្ធិ អ្នក​នាំ​ពាក្យ​នគរបាល​ជាតិ បាន​ប្រាប់​នគរបាល​កាល​ពី​ម្សិលមិញ​ថា គណៈកម្មការ​មួយ​ត្រូវ​បាន​បង្កើត​ឡើង បន្ទាប់​ពី​មាន​ករណី​ស្លាប់​អ្នក​ស្រី អេង សុខុម ដែល​ជា​អ្នក​លក់​បាយ ដើម្បី​ស៊ើប​អង្កេត​រក​មូល​ហេតុ ដែល​នគរបាល​ប្រើ​កាំភ្លើង​បាញ់​គ្រាប់​ពិត​ទៅ​លើ​កម្មករ​រោងចក្រ SL។ លោក គៀត ច័ន្ទថារិទ្ធិ ថ្លែង​ថា៖ «អគ្គ​ស្នងការ​នគរបាល​ជាតិ លោក នេត្រ សាវឿន បាន​បញ្ជា​មិន​ឲ្យ​ពួក​គេ​ប្រើ​កាំភ្លើង។ គាត់​បាន​បញ្ជា​ឲ្យ​ពួក​គេ​គ្រាន់​តែ​ប្រើ​ទឹក និង​ឧស្ម័ន​បង្ហូរ​ទឹក​ភ្នែក​ប៉ុណ្ណោះ»។

លោក​បន្ថែម​ថា មន្រ្តី​នគរបាល​ដែល​បាន​បំពាន​បញ្ជា​នេះ​នឹង «ប្រឈម​មុខ​ចំណាត់ការ​វិន័យ ទៅ​តាម​ការ​ស៊ើប​អង្កេត»។ លោក​ថ្លែង​ទៀត​ថា ចំណាត់ការ​វិន័យ​នេះ អាច​រួម​មាន​ការ​ដក​ចេញ​ពី​តំណែង ប៉ុន្តែ​វា​អាស្រ័យ​ទៅ​លើ​គណៈកម្មការ​។ នៅ​ពេល​សួរ​ថា តើ​មន្រ្តី​ដែល​បាញ់​កាំភ្លើង បណ្តាល​ឲ្យ​មនុស្ស​ស្លាប់ និង​របួស អាច​នឹង​ត្រូវ​ប្រឈម​មុខ​បទ​ចោទ​ប្រកាន់​ព្រហ្មទណ្ឌ​ឬ​យ៉ាង​ណា? ទូរស័ព្ទ​របស់​លោក គៀត ច័ន្ទថារិទ្ធិ បាន​ដាច់ ហើយ​មិន​អាច​ទាក់​ទង​សុំ​អត្ថាធិប្បាយ​ម្ដង​ទៀត​បាន​ឡើយ។

បន្ទាប់​ពី​ការ​បាញ់​សម្លាប់​លោក ម៉ៅ សុខចាន់ អាយុ ២៩ ឆ្នាំ​ក្នុង​អំឡុង​ការ​ប៉ះ​ទង្គិច​គ្នា​មួយ នៅ​ស្ពាន​អាកាស​ក្បាល​ថ្នល់ កាល​ពី​ខែ កញ្ញា អង្គការ​សិទ្ធិ​មនុស្ស​បាន​អំពាវនាវ​ឲ្យ​មាន​ការ​ស៊ើប​អង្កេត​ពេញ​លេញ​មួយ។

ប៉ុន្តែ​បើ​ទោះ​ជា​មាន​ការ​លើក​ឡើង​ថា ការ​ស៊ើប​អង្កេត​នោះ មិន​ត្រូវ​បាន​ធ្វើ​ឡើង​ក៏​ដោយ ក៏​លោក ច័ន្ទថារិទ្ធិ បាន​ថ្លែង​កាល​ពី​ម្សិលមិញ​ថា នគរបាល​បាន​បង្កើត​គណៈកម្មការ​រួច​ហើយ ដើម្បី​ស៊ើប​អង្កេត​ករណី​បង្ហូរ​ឈាម​នោះ។

លោក ប៊ុត បុនឈាន ជា​មន្រ្តី​ផ្នែក​ច្បាប់ នៅ​សម្ព័ន្ធ​សហជីព​ប្រជាធិបតេយ្យ​កម្មករ​កាត់ដេរ​កម្ពុជា ហៅ​កាត់ ស៊ីខៅឌូ ដែល​ស្ថិត​នៅ​ក្នុង​ហេតុការណ៍​ប៉ះ​ទង្គិច​គ្នា​កាល​ពី​ថ្ងៃ​អង្គារ​បាន​ថ្លែង​ថា សហជីព​របស់​លោក​នឹង​ចាប់​ផ្តើម​ការ​ស៊ើប​អង្កេត​ដោយ​ផ្ទាល់​ខ្លួន ទៅ​លើ​ករណី​បាញ់​នោះ។ លោក​បន្ត​ថា៖ «យើង​នឹង​ធ្វើ​ការ​ស៊ើប​អង្កេត [ហេតុ​អ្វី​បាន​ជា​នគរបាល​បាញ់​កាំភ្លើង] បង្ក្រាប​ទៅ​លើ​កម្មករ»។ «យើង​មិន​អាច​ទទួល​យក​បាន​ទេ​ចំពោះ​អ្វី​ដែល​បាន​កើត​ឡើង»។

លោក Dave Welsh នាយក​ប្រចាំ​ប្រទេស​កម្ពុជា នៃ​មជ្ឈមណ្ឌល​អាមេរិក ដើម្បី​សាមគ្គីភាព​ការងារ (ACILS) បាន​ថ្លែង​ថា វា​ជា​រឿង​សំខាន់​ណាស់​ដែល​ករណី​ស្លាប់​របស់​អ្នក​ស្រី សុខុម ត្រូវ​តែ​ធ្វើការ​ស៊ើប​អង្កេត​។ លោក​បញ្ជាក់​ថា៖ «ការ​ប្រើ​គ្រាប់​កាំភ្លើង​គឺ​មិន​អាច​ទទួល​យក បាន​ជា​ដាច់​ខាត។ វា​ជា​រឿង​សំខាន់​ណាស់ ដែល​ត្រូវ​មាន​ការ​ស៊ើប​អង្កេត និង​ការ​ទទួល​ខុស​ត្រូវ»។

អង្គការ សិទ្ធិ​មនុស្ស​និង​ក្រុម​អ្នក​សង្កេត​ការណ៍ នឹង​ផ្តោត​ខ្លាំង​ទៅ​លើ​ដំណើរការ​នៃ​ការ​ស៊ើប​អង្កេត ជា​ពិសេស​បន្ទាប់​ពី​អ្នក​នាំ​ពាក្យ​កង​រាជ​អាវុធហត្ថ លោក ខេង ទីតូ បាន​ថ្លែង​កាល​ពី​ថ្ងៃ​អង្គារ​ថា វា​មិន​ទាន់​មាន​ការ​សន្និដ្ឋាន​នៅ​ឡើយ​ទេ ថា​តើ​គ្រាប់​កាំភ្លើង​របស់​នគរបាល បាន​សម្លាប់​អ្នក​ស្រី សុខុម ឬ​យ៉ាង​ណា។ លោក ខេង ទីតូ មិន​អាច​ទាក់​ទង​សុំ​អត្ថាធិប្បាយ​បាន​ទេ​កាល​ពី​ម្សិលមិញ។

កាល​ពី​ម្សិលមិញ ស្នងការ​រង​នគរបាល​រាជធានី​ភ្នំពេញ លោក ជួន ណារិន បាន​ថ្លែង​ស្រដៀង​គ្នា​នឹង​លោក ទីតូ ដែរ។ លោក ណារិន បាន​សួរ​អ្នក​កាសែត​ក្នុង​សន្និសីទ​កាសែត​ថា៖ «តើ​អ្នក​ពិត​ជា​បាន​ឃើញ​នគរបាល​យក​កាំភ្លើង​បាញ់​ពួក​គេ​ឬ​អត់?»៕ PS

អត្ថបទគួរចាប់អារម្មណ៍