ភ្នំពេញៈ អ្នកនាំពាក្យរដ្ឋសភា និងជាតំណាងរាស្រ្តមកពីគណបក្សកាន់អំណាចបានថ្លែងកាលពីម្សិលមិញថា រដ្ឋសភានឹងពិចារណាអនុវត្ដបទបញ្ជាផ្ទៃក្នុងដែលនឹងបង្ខំឲ្យគណបក្សប្រឆាំងដាក់បេក្ខជនក្រោមៗមកជំនួសតំណាងរាស្រ្តជាប់ឆ្នោតរបស់ខ្លួន បើការធ្វើពហិការនៅតែបន្តរហូតផុតថ្ងៃកំណត់។
ប្រការ ៨៣ នៃបទបញ្ជាផ្ទៃក្នុងរដ្ឋសភាចែងថា៖«អាសនៈតំណាងរាស្រ្តដែលនៅទំនេរដោយសារតែការលាលែង ឬការលះបង់ការងាររយៈពេល ៣ ខែ ដោយគ្មានការអនុញ្ញាត...ត្រូវតែជំនួសដោយតំណាងរាស្រ្តថ្មី ដែលជ្រើសរើសចេញពីបញ្ជីបេក្ខជនតំណាងគណបក្សក្នុងមណ្ឌលតែមួយ»។
ប៉ុន្តែ អ្នកវិភាគនិងគណបក្សសង្គ្រោះជាតិពីម្សិលមិញថ្លែងថា មូលដ្ឋានប្រើបទបញ្ជាផ្ទៃក្នុងនេះនៅតែមិនច្បាស់ ហើយបើទោះជាយកមកអនុវត្តមែន ក៏គណបក្សសង្គ្រោះជាតិនៅតែគ្រប់គ្រងលើអាសនៈខ្លួន និងថាតើមានអ្នកជំនួសអាសនៈមកពីណា?
លោក ឈាង វុន អ្នកនាំពាក្យរដ្ឋសភា បានថ្លែងពីម្សិលមិញថា រដ្ឋសភាដឹងច្បាស់អំពីបទបញ្ជាផ្ទៃក្នុង ប៉ុន្តែមិនពិភាក្សាអំពីការអនុវត្តបទបញ្ជានោះជាសាធារ ណៈឡើយ រហូតទាល់តែដល់កំណត់៣ខែ គឺថ្ងៃទី២៣ខែធ្នូ។
លោកបន្តថា៖«បើដល់ថ្ងៃកំ ណត់យើងនឹងពិភាក្សាអំពី[ប្រ ការ៨៣]។ នឹងមានការសម្រេចរបស់គណៈអចិន្រៃ្តយ៍សភា»។ លោកបន្តថា៖«បើយើងពិភាក្សាចំណុចនេះវានឹងមានភាពចម្រូងចម្រាសខ្លាំង ដូច្នេះយើងចៀសវាង...ប៉ុន្តែបើគេនៅតែមិនយកអាសនៈ យើងនឹងអនុវត្តតាមបទប្បញ្ញតិ្ដដែលមានស្រាប់»។
លោក សុន ឆ័យ តំណាងរាស្រ្តពីគណបក្សសង្គ្រោះជាតិ បានថ្លែងថា គណបក្សបានដឹងអំពីបទបញ្ជាផ្ទៃក្នុងនេះ ប៉ុន្តែលោកថា វាអាចអនុវត្តបានតែទៅលើតំណាងរាស្រ្តពួកគេទេ។
លោកបន្ថែមថា៖ «យើងដឹងអំពីបទប្បញ្ញត្តិនេះ ប៉ុន្តែគឺសំដៅ តែតំណាងរាស្រ្តផ្លូវការដែលបានស្បថចូលជាតំណាងរាស្រ្តពេញសិទិ្ធ។ តំណាងរាស្រ្តគណបក្សសង្គ្រោះជាតិមិនទាន់ស្បថនៅឡើយទេ ដូច្នេះ យើងមិនមែនជាតំណាងរាស្រ្តទេ»។
លោកសុន ឆ័យ អះអាងថា បើរដ្ឋសភាគ្រប់គ្រងដោយគណបក្សកាន់អំណាច ប្រើប្រាស់វិធានការនោះ គណបក្សសង្គ្រោះជាតិក៏គ្មានការបារម្ភដែរ។ លោកបន្តថា៖ «តើគេអាចធ្វើអ្វីបាន? នីតិវិធីគឺថាមេដឹកនាំគណបក្សនឹងផ្ញើបញ្ជីបេក្ខជនជំនួសទៅ គ.ជ.ប។ គណបក្សប្រជាជនគ្មានតួនាទីនេះទេ។ គ្មានផ្លូវដែលគណបក្សនេះ ប្រើចំណុចនោះជាការគំរាមមកលើយើងទេ»។
មេធាវី និងអ្នកវិភាគច្បាប់ ដែលខ្លះសុំមិនឲ្យបញ្ចេញឈ្មោះ បានគាំទ្រការបកស្រាយរបស់គណបក្សសង្គ្រោះជាតិ ដែលថា គេមិនអាចចាត់ទុកថា ការលះបង់ការងារទេបើគ្មានការស្បថចាប់ផ្តើមការងារជាមុននោះ។
លោក អ៊ូ វីរៈ ប្រធានមជ្ឈមណ្ឌលសិទិ្ធមនុស្សកម្ពុជា បានថ្លែងថា បើទោះជាលោកមិនជឿលើការអះអាងថា តំណាងរាស្រ្តគណបក្សសង្គ្រោះជាតិមិនទាន់ជាតំណាងរាស្រ្តក៏ដោយ ក៏ប៉ុន្តែ ការប្រើវិធានការនេះ នឹងមានឥទិ្ធពលតិចតួចបំផុត។
លោក គល់ បញ្ញា ប្រធានអង្គការខុមហ្រែលថ្លែងថា គណបក្សសង្គ្រោះជាតិអាចបដិសេធមិនដាក់បេក្ខជនជំនួស។លោកថា៖«វានឹងមានវិបតិ្ត បើរដ្ឋសភាដកយកអាសនៈទាំងអស់បញ្ជូនទៅគ.ជ.ប ដើម្បីគណនាឡើងវិញ។ ប៉ុន្តែ គ្មាននីតិវិធីឲ្យគ.ជ.ប ដកបេក្ខជនពីបញ្ជីទេ...គឺអាស្រ័យលើគណបក្ស..គណបក្សនៅតែមានអំណាច»៕ TK
