The Phnom Penh Post Search

Search form

Logo of Phnom Penh Post newspaper Phnom Penh Post - មន្ត្រី​សហជីព​ទៅ​ចែក​ខិត្តប័ណ្ណ​ប៉ះទង្គិច​នឹង​កម្មករ​របួស​៧​នាក់




មន្ត្រី​សហជីព​ទៅ​ចែក​ខិត្តប័ណ្ណ​ប៉ះទង្គិច​នឹង​កម្មករ​របួស​៧​នាក់

មន្ត្រី​សហជីព​ទៅ​ចែក​ខិត្តប័ណ្ណ​ប៉ះទង្គិច​នឹង​កម្មករ​របួស​៧​នាក់

130827_7a
មន្ត្រីសហជីពរងរបួស ក្នុងការប៉ះទង្គិចគ្នាជាមួយកម្មករម្សិលមិញ សម្រាកក្នុងគ្លីនិកឯកជន ផា លីណា

ភ្នំពេញៈ សមាជិក​សហជីព​ចំនួន​៤ មាន​គ្នា​ប្រមាណ ​៧ ​នាក់​បាន​រងរបួស​នៅ​ក្នុង​ការ​ប៉ះទង្គិច គ្នា​មួយ​រវាង​សហជីព​និង​កម្មករ កាលពី​ម្សិលមិញ នៅ​ខាង​មុខ​រោងចក្រ Dayup Global នៅ​ខណ្ឌ​ពោធិ៍សែនជ័យ រាជធានី​ភ្នំពេញ ក្នុង​ពេល​ពួក​គេ​ចុះ​ទៅ​ចែក​ខិត្ត​ប័ណ្ណ​ដែល​បង្ហាញ​អំពី​ច្បាប់​ការងារ សិទ្ធិ និង​ការ​ទាមទារ​មួយ​ចំនួន​របស់​កម្មករ។

មន្ត្រី​មកពី សហជីព​ទាំង​បួន រួម​មាន​សហព័ន្ធ​សហជីព​ដើម្បី សិទ្ធិ​ការងារ សហព័ន្ធ​សហជីព ពលកម្ម​កម្ពុជា សហព័ន្ធ​សហជីព​កម្មករ​ខ្មែរ និង​សហព័ន្ធ​សហជីព​សន្តិភាព​ដើម្បី​កម្មករ។

លោក សាន ឡាយ អគ្គលេខាធិការ​សហព័ន្ធ​សហជីព​ដើម្បី​សិទ្ធិ​ការងារ​ដែល​បាន​រងរបួស​ដៃ បាន​ថ្លែង​កាលពី​ម្សិលមិញ​ថា កម្មករ​បាន​ពឹង​សុំ​ឲ្យ​ពួក​គេ​ជួយ​ធ្វើ​អន្តរាគមន៍​ពី​ការ​រំលោភ​សិទ្ធិ របស់​រោងចក្រ​ចំពោះ​កម្មករ បន្ទាប់​មក​សមាជិក​ប្រហែល​១០​រូប នៃ​សហជីព​ទាំង​បួន​នេះ​បាន​ចុះ​ទៅ​កាន់​រោងចក្រ​នោះ។

លោក​ថ្លែងថា៖ «យើង​បាន​ចុះទៅ​កាន់​រោងចក្រ និង​ចែកចាយ​ខិត្តប័ណ្ណ​ដល់​ពួក​គេ​នៅ​ខាង​ក្រៅ​រោងចក្រ មុន​ពេល​ពួក​គេ​ចូល​ធ្វើ​ការងារ។ នៅ​ពេល​ពួក​យើង​ចែក​ខិត្តប័ណ្ណ​អស់​ហើយ យើង​បាន​ទៅ​បរិភោគ​អាហារ​ពេល​ព្រឹក​នៅ​ក្បែរ​រោងចក្រ​នោះ ក៏​ស្រាប់​តែ​មាន​កម្មករ​មួយ​ក្រុម ដែល​ដើរ​ចេញ​ពី​រោងចក្រ​ក្នុង​ដៃ​មាន​កាន់​ដុំ​ថ្ម ដំបង និង​កាំបិត​ប៉័ងតោ​ស្ទុះ​មក​វាយ​ប្រហារ​មក​លើ​ពួក​យើង»។

លោក សាន ឡាយ បាន​លើក​ឡើង​ថា កម្មករ​ទាំង​នោះ គឺជា​កម្មករ​ទំនើង​នៅ​ក្នុង​រោងចក្រ ព្រោះ​ពួក​គេ​ចេញ​មក​ពី​រោងចក្រ ហើយ​ពួក​គេ​បាន​រត់​ចូល​ទៅ​ក្នុង​រោងចក្រ​វិញ។

លោក សំ សឿន ប្រធាន​សហព័ន្ធ​សហជីព​ដើម្បី​សិទ្ធិ​ការងារ​បាន​ប្រាប់​ឲ្យ​ដឹង​ដែរ​ថា លោក​បាន​ដាក់​ពាក្យ​បណ្ដឹង​ទៅ​កាន់​ប៉ុស្តិ៍​នគរបាល​សង្កាត់ ហើយ​លោក​កំពុង​រៀបចំ​ពាក្យ​បណ្ដឹង​មួយ​ទៀត​ដាក់​ទៅ​តុលាការ។

លោក បញ្ជាក់​ថា៖ «ខ្ញុំ​កំពុង​រៀបចំ​ពាក្យ​បណ្ដឹង​ប្ដឹង​អ្នក​គ្រប់គ្រង​រដ្ឋបាល​រោងចក្រ Dayup Global និង​បក្ខពួក​មាន​គ្នា​ជាង​៤០​នាក់ ដែល​បាន​ប្រើ​អំពើ​ហិង្សា​មក​លើ​សមាជិក​សហជីព​ខ្ញុំ​បណ្ដាល​ឲ្យ​រងរបួស។ សមាជិក​៥ រូប មាន​របួស​ស្រាល តែ​ពីរ​រូប​ទៀត​រងរបួស​ធ្ងន់​ដោយ​ក្អួត​ចេញ​ឈាម ត្រូវ​ក្បាល ថ្គាម និង​ដួល​សន្លប់។ យើង​បាន​បញ្ជូន​ពួក​គេ​នេះ​ទៅ​ព្យាបាល​នៅ​គ្លីនិក​ឯកជន​ហើយ»។

លោក សំ សឿន បាន​ថ្លែង​ថា ពួក​គេ​មាន​បំណង​សម្លាប់​សមាជិក​សហជីព​ឲ្យ​ស្លាប់​តែ​ម្ដង តែ​ពួក​យើង​សំណាង​ល្អ ដែល​បាន​ក្រុម​អ្នក​ភូមិ​នៅ​ក្បែរ​រោងចក្រ​នោះ ជួយ​ស្រែក​បញ្ឈប់​ពួក​កម្មករ​ទំនើង​ទាំង​នោះ។

លោក​អះអាង​ថា៖«យើង ប្ដឹង​ពួកគេ​ពី​បទ​មនុស្សឃាត​ដោយ​ចេតនា​និង​ប្លន់។ ពួក​គេ​មាន​បំណង​សម្លាប់​យើង ហើយ​បាន​យក​ទូរស័ព្ទ​ពួក​យើង​ចំនួន​៣​គ្រឿង និង​អាយកូម​២​គ្រឿង​នៅ​ក្នុង​ពេល​ពួក​គេ​វាយប្រហារ​លើ​ពួក​យើង។ ខ្ញុំ​ចង់​ឲ្យ​តុលាការ​រក​យុត្តិធម៌ និង​កាត់​ទោស​ពួក​គេ​តាម​ច្បាប់។ ខ្ញុំ​មិន​ចង់​បាន​ការ​សង​ជំងឺ​ចិត្ត​ឡើយ»។

លោក យ៉ង រិទ្ធី ប្រធាន​រដ្ឋបាល​នៅ​រោងចក្រ Dayup Global បាន​បដិសេធ​ចំពោះ​អ្វី​ដែល​សមាជិក​សហជីព​ទាំង​នេះ​ចោទ​ប្រកាន់​ទៅ​លើ​រោងចក្រ។

លោក​បាន​បញ្ជាក់​ថា​៖«​ពួក​គេ​បាន​បំផ្លាញ​ទ្រព្យសម្បត្តិ ក្រុមហ៊ុន​និង​វាយ​ខ្ញុំ​ព្រម​ទាំង​កម្មករ​៤នាក់​ទៀត​ឲ្យ​រងរបួស​។ យើង​មិន​បាន​វាយ​ប្រហារ ដូច​អ្វីដែល​ពួក​គេ​បាន​និយាយ​ទេ»។

លោក អះអាង​ថា​ក្រុមហ៊ុន​នឹង​ប្ដឹង​ពី​បទ​បំផ្លាញ​ទ្រព្យសម្បត្តិ និង​ធ្វើ​ឲ្យ​កម្មករ​រងរបួស។

លោក យ៉ង រិទ្ធី បញ្ជាក់​ទៀត​ថា៖«យើង​មាន​ភ័ស្តុតាង​ទាំង​អស់ ដូច​ជា វីដេអូ អំពី​សកម្មភាព​ពួក​គេ​វាយ​ទៅ​លើ​ពួក​យើង។ ក្រុម​កម្មករ​មិន​មាន​ការ​តវ៉ា​អី​ទេ ដោយ​សារ​ក្រុមហ៊ុន​បាន​ផ្តល់​ជូន​អ្វី​ដែល កម្មករ​ស្នើសុំ​រួច​ហើយ ប៉ុន្តែ​សមាជិក​សហជីព​ទាំង​នោះ​មក​ញុះញង់​ឲ្យ​កម្មករ​ធ្វើ​ការ តវ៉ា និង​បណ្ដាល​ឲ្យ​មាន​អំពើ​ហិង្សា​ដល់​កម្មករ។ យើង​នឹង​ចាត់​វិធានការ​ទៅ​តាម​ផ្លូវ​ច្បាប់»៕ PN

អត្ថបទគួរចាប់អារម្មណ៍