The Phnom Penh Post Search

Search form

Logo of Phnom Penh Post newspaper Phnom Penh Post - មន្ត្រី​សហជីព សាប្រ៊ីណា បី​នាក់​រង​ការ​​ព្យួរ​ការងារ

មន្ត្រី​សហជីព សាប្រ៊ីណា បី​នាក់​រង​ការ​​ព្យួរ​ការងារ

មន្ត្រី​សហជីព សាប្រ៊ីណា បី​នាក់​រង​ការ​​ព្យួរ​ការងារ

131107_09a
កម្មកររោងចក្រសាប្រ៊ីណា ជួបជុំគ្នាតវ៉ាឲ្យតុលាការកំពង់ស្ពឺដោះលែងមិត្តភក្តិជាប់ចោទ ហេង ជីវ័ន

ភ្នំពេញៈ ការ​រង់​ចាំ​តុលាការ​ក្នុង​សំណុំ​រឿង​ដែល​បង្ក​ពី​កូដកម្ម ហិង្សា​ដឹក​នាំ​ដោយ​សហជីព​នៅ​រោងចក្រ​កាត់ដេរ សាប្រ៊ីណា ក្នុង​ខេត្ត កំពង់ស្ពឺ កាល​ពី​ខែ ឧសភា និង​ខែ មិថុនា ត្រូវ​សហជីព​សេរី​កម្មករ​បាន​ចោទ​ថា អ្នក​គ្រប់​គ្រង​បាន​ផ្អាក​មន្ត្រី​ខ្លួន​ក្នុង​រោងចក្រ​នេះ​ដោយ​ខុស​ច្បាប់។

លោក ស៊ុន វណ្ណនី ប្រធាន លោក សែម សុភ័ក្រ្ត អនុ​ប្រធាន និង​លោក ជី សាក់ឡា អគ្គ​លេខាធិការ​នៃ​សហជីព​សេរី​កម្មករ​ក្នុង​រោងចក្រ​កាត់ដេរ សាប្រ៊ីណា ត្រូវ​សន្តិសុខ​ប្រាប់​ពី​ការ​បញ្ឈប់​ការងារ​ខណៈ​ព្យាយាម​វិល​ត្រឡប់​ទៅ​ធ្វើ​ការ​វិញ​នៅ​ព្រឹក​ថ្ងៃ​ចន្ទ បន្ទាប់​ពី​អវត្តមាន​អស់ ៥ខែ ចាប់​ពី​មាន​កូដកម្ម​កើត​ឡើង។

លោក វណ្ណនី និយាយ​ថា៖ «ខ្ញុំ​មាន​ការ​ភ្ញាក់​ផ្អើល ពេល​ដឹង​ថា ខ្ញុំ​ក៏​ត្រូវ​គេ​ព្យួរ​ការងារ​ដោយ​គ្មាន​ការ​ជូន​ដំណឹង​មុន។ ខ្ញុំ​ទើប​តែ​ដឹង​ពេល​ទៅ​ធ្វើ​ការ​នៅ​ព្រឹក​ថ្ងៃ​ចន្ទ ព្រោះ​សន្តិសុខ គេ​មិន​អនុញ្ញាត​ឲ្យ​ខ្ញុំ​ចូល​រោងចក្រ​ទេ»។

លិខិត​ចុះ​ហត្ថលេខា​ដោយ​នាយក​ក្រុមហ៊ុន សាប្រ៊ីណា ដាក់​ទៅ​មន្ទីរ​ការងារ​ខេត្ត កំពង់ស្ពឺ បញ្ជាក់​ថា អ្នក​ទាំង​បី​ត្រូវ​រោងចក្រ​ព្យួរ​ការងារ​នៅ​ថ្ងៃ ទី៥ ខែ កញ្ញា ដោយ​សារ​តែ​បាន​រំលោភ​ច្បាប់​ការងារ​ជាច្រើន​ករណី រួម​ទាំង​អវត្តមាន​គ្មាន​ច្បាប់​ផង។

មន្រ្តី​រោងចក្រ សាប្រ៊ីណា ពុំ​អាច​ទាក់​ទង​សុំ​ការ​អត្ថាធិប្បាយ​បាន​ទេ កាល​ពី​ម្សិលមិញ។

អ្នក​ទាំង​បី​ស្ថិត​ក្នុង​ចំណោម​កម្មករ ១៦ នាក់ ដែល​ប្រឈម​នឹង​ការ​ចោទ​ប្រកាន់​របស់​តុលាការ ពី​បទ​ញុះ​ញង់​ឲ្យ​ប្រើ​អំពើ​ហិង្សា ដែល​បាន​បង្ក​របួស​ដល់​មនុស្ស​យ៉ាង​តិច ២៣ នាក់ ក្នុង​នោះ​មាន​នគរបាល និង​បំផ្លិច​បំផ្លាញ​ទ្រព្យ​សម្បតិ្ត។ លោក សុភ័ក្រ្ត ត្រូវ​ចាប់​ខ្លួន​នៅ​កន្លែង​កើត​ហេតុ​ក្នុង​កូដកម្ម​ថ្ងៃ ទី៣ ខែ មិថុនា ហើយ​បាន​ជាប់​ឃុំ​រយៈ​ពេល​ជិត ៥ខែ។ លោក វណ្ណនី និង​លោក សាក់ឡា ត្រូវ​តុលាការ​កោះ​ហៅ​ទៅ​សាក​សួរ​នៅ​ខែ សីហា ហើយ​ត្រូវ​បាន​ដោះលែង រង់​ចាំ​ការ​ជំនុំ​ជម្រះ។

លោក មឿន តុលា ប្រធាន​កម្មវិធី​ការងារ​នៅ​មជ្ឈមណ្ឌល​អប់រំ​ច្បាប់​សម្រាប់​សហគមន៍ ថ្លែង​ថា ការ​ព្យួរ​ការងារ​និង​ការ​បញ្ឈប់​ដោយ​ខុស​ច្បាប់ ពុំ​មែន​ជា​រឿង​ថ្មី​ក្នុង​ឧស្សាហកម្ម​កាត់ដេរ​ទេ។

លោក គង់ អាទិត្យ អនុ​ប្រធាន​សហជីព ស៊ីខៅឌូ បាន​ថ្លែង​ថា ក្នុង​ករណី​ដូច​គ្នា​នេះ​ដែរ ក្នុង​ខេត្ត កណ្តាល បុរស​ពីរ​នាក់​ដែល​រៀបចំ​លក្ខន្តិកៈ​សហជីព ស៊ីខៅឌូ ត្រូវ​បាន​បញ្ឈប់​ពី​រោងចក្រ Meridian Industries Garment កាល​ពី​ខែ​មុន។

លោក សុខ ឡោ នាយក​ប្រតិបតិ្ត​នៃ​មូលនិធិ​ក្រុម​ប្រឹក្សា​អាជ្ញាកណ្តាល ឲ្យ​ដឹង​ពី​ម្សិលមិញ​ថា ស៊ីខៅឌូ បាន​ដាក់​ពាក្យ​ប្តឹង​ទាមទារ​ឲ្យ​ទទួល​យក​ចូល​ធ្វើ​ការ​វិញ នៅ​ថ្ងៃ ទី១ ខែ វិច្ឆិកា ហើយ​ក្រុមប្រឹក្សា​បាន​បង្គាប់​ឲ្យ​កម្មករ​ទាំង​បី​នាក់​ចូល​ធ្វើការ​បណ្តោះ​អាសន្ន​វិញ ដោយ​សារ​តែ​ក្រុម​ប្រឹក្សា​កំពុង​ស៊ើប​អង្កេត​ពី​ការ​បញ្ឈប់​ពួក​គេ​ពី​ការងារ។

ការ​ហៅ​ទូរស័ព្ទ​និង​អ៊ីមែល​ទៅ​រោងចក្រ Meridian ពី ភ្នំពេញ ប៉ុស្តិ៍ ពុំ​ទទួល​បាន​ចម្លើយ​តប​ទេ កាល​ពី​ម្សិលមិញ៕ TK

អត្ថបទគួរចាប់អារម្មណ៍