The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​សហជីព ៤ នាក់​ត្រូវ​កាត់​ឲ្យ​ជាប់​ទោស​ម្នាក់ៗ ១៣ ខែ

មន្ត្រី​សហជីព ៤ នាក់​ត្រូវ​កាត់​ឲ្យ​ជាប់​ទោស​ម្នាក់ៗ ១៣ ខែ

Content image - Phnom Penh Post
មន្រ្តី​សហព័ន្ធ​សហជីព​ចលនា​កម្មករថ្លែងប្រាប់អ្នកសារព័ត៌មាន មុខ​សាលា​ដំបូង​ខេត្ត​ស្វាយរៀង​មុន​ពេល​ឡើង​សវនាការ​កាល​ពី​ម្សិលមិញ។ រូបថត សហការី

មន្ត្រី​សហជីព ៤ នាក់​ត្រូវ​កាត់​ឲ្យ​ជាប់​ទោស​ម្នាក់ៗ ១៣ ខែ

ស្វាយរៀងៈ មន្រ្តី​សហព័ន្ធ​សហជីព​ចលនា​កម្មករ​ ៤ ​នាក់​ត្រូវ​សាលា​ដំបូង​ខេត្ត​ស្វាយរៀង​ប្រកាស​សាលក្រម​ពី​ថ្ងៃ​ចន្ទ​ឲ្យ​ជាប់​ឃុំ​ ១៣ ​ខែ និង​ពិន័យ​ប្រាក់​ ៣ លាន​រៀល​ក្នុង​ម្នាក់ៗ​​ក្រោម​បទ​ចោទ​ញុះញង់​ឲ្យ​ប្រព្រឹត្ត​បទឧក្រិដ្ឋ​ជា​អាទិ៍​ប្រព្រឹត្ត​ កាលពី​ខែ​សីហា​ឆ្នាំ​ ២០១៤​ ប៉ុន្តែ​ជន​ជាប់ចោទ​ថា​អយុត្តិធម៌។

លោក ប៉ាវ ស៊ីណា ប្រធាន​សហព័ន្ធ​សហជីព​ចលនា​កម្មករ​បាន​ថ្លែង​ពី​ថ្ងៃ​អង្គារ​ម្សិលមិញ​នេះ​ថា​មន្រ្តី​ ៤ ​រូប​នេះ​មិន​បាន​ប្រព្រឹត្ត​ដូច​ការ​ចោទ​ទេ​ហើយ​ការ​កាត់ទោស​នេះ​មិន​អាច​ទទួល​យក​បាន​ឡើយ​ដោយ​លោក​ស្នើឲ្យ​តុលាការ​​ពិចារណា​ឡើង​វិញ​។

លោក​ថា៖ «លោក​នឹង​ប្ដឹង​ឧទ្ធរណ៍​ហើយ​បើ​សាលា​ឧទ្ធរណ៍​តម្កល់​សាលក្រម​ និង​ចាប់​ខ្លួន​មន្រ្តី​ខ្ញុំ​ទាំង​ ៤ ​នាក់​នេះ​ខ្ញុំ​នឹង​អំពាវនាវ​ដឹកនាំ​ការ​តវ៉ា​ទ្រង់ទ្រាយ​ធំ​មួយ​ទូទាំង​ខេត្ត​ស្វាយរៀង​តែ​ម្តង»។

លោក​ប្រាប់​ថា​អ្នក​ដែល​ប្តឹង​គឺ​លោក​ កែវ គង់ អធិការ​ក្រុង​បាវិត​ដោយសារ​អធិការ​រូប​នេះ​ចង់​កម្ចាត់​សហជីព​លោក​ដែល​តែងតែ​ជួយ​កម្មករ​។

លោក​ ទួន សារ៉ែន អគ្គលេខា​សហព័ន្ធ​ខាង​លើ​ជា​មនុស្ស​ម្នាក់​ដែល​ជាប់​ក្នុង​បណ្តឹង​នោះ​បាន​ថ្លែង​ថា​កម្មករ​រោងចក្រ​យូលី​បាន​ពឹង​មក​សហជីព​ឲ្យ​ជួយ​អន្តរាគមន៍​ក្នុង​ការ​ទាមទារ​លក្ខខណ្ឌ​ការងារ​កាលពី​ថ្ងៃ​ទី​ ១៣-១៨ ​សីហា​ឆ្នាំ​មុន​ហើយ​ពួក​លោក​បាន​ចុះ​ទៅ​ប្រាប់​កម្មករ​មិន​ឲ្យ​បិទ​ផ្លូវ​តែ​បែរ​ជា​​ត្រូវ​គេ​ចោទថា​ជា​អ្នក​ញុះញង់​ឲ្យ​បិទ​ផ្លូវ​ទៅ​វិញ។

លោក​ថា៖ «រឿង​នេះ​អយុត្តិធម៌​បំផុត​តែ​ខ្ញុំ​មិន​ខ្លាច និង​មិន​គេច​ខ្លួន​ឡើយ​»។

លោក កែវ គង់ បាន​បដិសេធ​អធិប្បាយ​កាលពី​ម្សិលមិញ​៕

អត្ថបទគួរចាប់អារម្មណ៍