The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​សុំ​ក្រសួង​ផាក​ពិន័យ​រោងចក្រ​មិន​គោរព​កិច្ច​ព្រម​ព្រៀង




មន្ត្រី​សុំ​ក្រសួង​ផាក​ពិន័យ​រោងចក្រ​មិន​គោរព​កិច្ច​ព្រម​ព្រៀង

កម្មការិនី​រោងចក្រ​កាត់​ដេរ​ដែល​ដួល​សន្លប់​មក​សម្រាក​នៅ​មន្ទីរពេទ្យ​មិត្តភាព​ខ្មែរ-សូវៀត កន្លង​មក។
កម្មការិនី​រោងចក្រ​កាត់​ដេរ​ដែល​ដួល​សន្លប់​មក​សម្រាក​នៅ​មន្ទីរពេទ្យ​មិត្តភាព​ខ្មែរ-សូវៀត កន្លង​មក។ ម៉ៃ វីរៈ

មន្ត្រី​សុំ​ក្រសួង​ផាក​ពិន័យ​រោងចក្រ​មិន​គោរព​កិច្ច​ព្រម​ព្រៀង

ភ្នំពេញៈ គណៈកម្ម​ការ​ទប់​ស្កាត់​ករណី​សន្លប់​នៃ​ក្រសួង​ការងារ នឹង​ធ្វើ​របាយ​ការណ៍​ទៅ​កាន់​រដ្ឋ​មន្រ្តី​ពី​ករណី​កម្មករ​ជាច្រើន​នាក់​បាន​ដួល​សន្លប់​នៅ​ក្នុង​រោងចក្រ​ចំនួន ៦ ក្នុង​សួន​ឩស្សាហកម្ម​វឌ្ឍនៈ ២ ក្នុង ខណ្ឌ​ដង្កោ រាជធានី​ភ្នំពេញ កាល​ពី​ព្រឹក​ថ្ងៃ​សុក្រ និង​ថ្ងៃ​សៅរ៍ និង​បាន​សុំ​យោបល់​ធ្វើ​ការ​ផាក​ពិន័យ​ចំពោះ​រោងចក្រ​ដែល​មិន​គោរព​តាម​កិច្ច​ព្រម​ព្រៀង​ជាមួយ​ក្រសួង។

មន្រ្តី​គណៈកម្មការ​ទប់​ស្កាត់​ករណី​សន្លប់​នៃ​ក្រសួង​ការងារ​សុំ​មិន​ឲ្យ​បញ្ចេញ​ឈ្មោះ​បាន​ឲ្យ​ដឹង​កាល​ពី​ម្សិល​មិញ​ថា ខាង​គណៈកម្មការ​បាន​ចុះ​កិច្ច​ព្រម​ព្រៀង​ជាមួយ​នឹង​រោងចក្រ​ទាំង​អស់​ដោយ​ឲ្យ​កម្មករ​ចូល​មក​ធ្វើ​ការ​នៅ​ថ្ងៃ​ចន្ទ ព្រោះ​ទុក​ពេល​ឲ្យ​ពួក​គេ​សម្រាក ប៉ុន្តែ រោងចក្រ​បាន​ធ្វើ​ខុស​ពី​កិច្ច​ព្រម​ព្រៀង ដោយ​ឲ្យ​កម្មករ​មក​ធ្វើ​ការ​នៅ​ថ្ងៃ​សៅរ៍ ទើប​បាន​បណ្តាល​ឲ្យ​កម្មករ​ជាច្រើន​នាក់​ត្រូវ​ដួល​សន្លប់​ថែម​ទៀត។

លោក​ថ្លែង​ថា៖ «ថ្ងៃ​ចន្ទ​នេះ​គណៈកម្មការ​នឹង​ស្នើ​ទៅ​កាន់​លោក​រដ្ឋ​មន្រ្តី​ដើម្បី​សុំ​គោល​ការណ៍​ដើម្បី​ធ្វើ​ការ​ផាក​ពិន័យ​រោងចក្រ​ណា​ដែល​មិន​ស្តាប់​តាម​ការ​ណែ​នាំ​របស់​គណៈកម្មការ»។

លោក​ឲ្យ​ដឹង​ដែរ​ថា ការ​សន្លប់​នេះ​អាច​មក​ពី​ជំងឺ​ផ្លូវ​អារម្មណ៍​ដែល​ពួក​គេ​មាន​ភាព​ភ័យ​ខ្លាច​តៗ​គ្នា​នៅ​ពេល​បាន​ឃើញ​មិត្ត​រួម​ការងារ​ដួល​បន្ត​គ្នា ប៉ុន្តែ មិន​មាន​អ្នក​រង​គ្រោះ​ធ្ងន់​ធ្ងរ​ទេ។

ទាក់​ទង​នឹង​ការ​ចំណាយ​ក្នុង​ការ​ព្យាបាល លោក ម៉េង ហុង អនុ​ប្រធាន​បេឡាជាតិ​របប​សន្តិសុខ​សង្គម (ប ស ស) បាន​ថ្លែង​ថា៖ «ការ​រ៉ាប់​រង​ការ​ព្យាបាល ទាំង​អស់​គឺ​ជា​ការ​ទទួល​ខុស​ត្រូវ​របស់​បេឡាជាតិ​របប​សន្តិសុខ​សង្គម​ក្នុង​ការ​ចេញ​ថ្លៃ​ព្យាបាល​ជូន​ពួក​គាត់។ កម្មករ​មិន​បាច់​ចំណាយ​ប្រាក់​ផ្ទាល់​ខ្លួន​ទេ»។

ពាក់​ព័ន្ធ​នឹង​ការ​ដួល​សន្លប់​ដែរ​លោក តឹប ប៊ុនថេន នាយ​ប៉ុស្តិ៍​នគរបាល សង្កាត់​ក្រាំង​ពង្រ បាន​ឲ្យ​ដឹង​ថា កម្មករ​រោងចក្រ​ប្រមាណ ១៣០ នាក់​បាន​សន្លប់​កាល​ពី​ថ្ងៃ​សុក្រ និង​ថ្ងៃ​សៅរ៍។

លោក​ឲ្យ​ដឹង​ថា កម្មករ​ត្រូវ​បាន​នាំ​យក​ទៅ​មណ្ឌល​សុខភាព​និង​គ្លីនិក​ឯកជន នៅ​ក្បែរ​នោះ​ភ្លាមៗ បន្ទាប់​ពី​កម្មករ​ជាច្រើន​ដួល​សន្លប់​ក្នុង​ពេល​កំពុង​តែ​ធ្វើ​ការងារ​កាល​ពី​ព្រឹក​ថ្ងៃ​សុក្រ។

លោក ប៊ុនថេន អះអាង​ថា៖ «ខ្ញុំ​បាន​ចុះ​ទៅ​ពិនិត្យ​រោងចក្រ​ដែល​មាន​កម្មករ​សន្លប់ ប៉ុន្តែ មិន​បាន​ធុំ​ក្លិន​សារធាតុ​គីមី ឬ​ឃើញ​មាន​បញ្ហា​ណា​មួយ​ពាក់​ព័ន្ធ​នឹង​បរិស្ថាន​ក្នុង​រោងចក្រ​ទេ»។

លោក​សន្និដ្ឋាន​លើ​មូល​ហេតុ​នៃ​ការ​សន្លប់​កម្មករ​ថា មក​ពី​សុខភាព​កម្មករ​ខ្សោយ​បូក​រួម​នឹង​ការ​តក់​ស្លុត​នៅ​ពេល​ឃើញ​មិត្ត​រួម​ការងារ​ដួល​សន្លប់​បន្ត​គ្នា​ជា​ច្រើន​នាក់។ លោក​ថា៖ «កម្មករ​ខ្លះ​ងើប​តាំង​ពី​ម៉ោង ៤ ទៀប​ភ្លឺ​មក​រង់​ចាំ​ជិះ​ឡាន​មក​ធ្វើ​ការ គេ​គេង​បាន​តិច​ហូប​ក៏​តិច​ទើប​ធ្វើ​ឲ្យ​សុខភាព​ពួក​គេ​ចុះ​ខ្សោយ»។

លោក ប៊ុនថេន បន្ត​ឲ្យ​ដឹង​ដែរ​ថា នេះ​មិន​មែន​ជា​លើក​ដំបូង​ដែល​កម្មករ​នៅ​តំបន់​ឧស្សាហកម្ម វឌ្ឍនៈ ២ សន្លប់​ទេ ពី​មុន​មាន​កម្មករ​សន្លប់​ច្រើន​ជាង​នេះ​ដែល បណ្តាល​មក​ពី​ការ​ហូរ​ប្រេង​ម៉ាស៊ីន និង​ការ​ភាយ​ក្លិន​ចូល​ក្នុង​កន្លែង​ធ្វើ​ការ។

លោក​បន្ត​ថា៖ «យើង​នឹង​ចុះ​ទៅ​ទីនោះ​ម្តង​ទៀត​នៅ​ថ្ងៃ​ស្អែក​ដើម្បី​ពិនិត្យ​មើល​ស្ថានភាព​ព្រោះ​ពួក​គេ​ត្រូវ​ត្រឡប់​ទៅ​ធ្វើ​ការ​វិញ​នៅ​ថ្ងៃ​ចន្ទ​នេះ ដូច្នេះ​យើង​បារម្ភ​ខ្លាច​ពួក​គេ​ជួប​បញ្ហា​នេះ​ម្តង​ទៀត»។

លោក ប៉ុក វណ្ណថាត អនុ​ប្រធាន​នាយកដ្ឋាន​សុខភាព​ការងារ​នៃ​ក្រសួង​ការងារ មិន​អាច​ទាក់​ទង​បាន​ទេ កាល​ពី​ថ្ងៃ​ម្សិល​មិញ។

លោក ថន ថុល អគ្គ​លេខាធិការ​រង​នៃ​សហជីព​សេរី​កម្មករ (FTU) បាន​ឲ្យ​ដឹង​កាល​ពី​ម្សិល​មិញ​ថា លោក​មិន​ទាន់​ដឹង​ពី​មូល​ហេតុ​ដែល​ធ្វើ​ឲ្យ​កម្មករ​សន្លប់​នៅ​ឡើយ​ទេ ព្រោះ​សហជីព​លោក​មិន​មាន​ក្នុង​រោងចក្រ​ទាំង​នេះ។

លោក​បញ្ជាក់​ថា៖ «ខ្ញុំ​នឹង​ព្យាយាម​រក​មូល​ហេតុ​ក្នុង​រឿង​នេះ តែ​នេះ​ចាត់​ថា​ជា​ដំណឹង​ល្អ​ដែរ ដែល​មិន​មាន​កម្មករ​ណា​ម្នាក់​ជួប​បញ្ហា​ធ្ងន់​ធ្ងរ»។

លោក​យល់​ឃើញ​ថា ករណី​នេះ​វា​ជា​កំហុស​របស់​ភាគី​រោងចក្រ​ព្រោះ​វា អាច​បណ្តាល​មក​ពី​បរិយាកាស​នៅ​ក្នុង​រោងចក្រ​ទាំង​នោះ​មិន​ល្អ ទើប​ប៉ះ​ពាល់​ដល់​សុខភាព​កម្មករ។

រោងចក្រ​ជួប​បញ្ហា​ទាំង ៦ នោះ​មាន​ដូច​ជា Newpex Co.,Ltd រោងចក្រ Accasette Garment Co.,Ltd រោងចក្រ Moha Garments Co.,Ltd រោងចក្រ Dongdu Textile (Cambodia) Co.,Ltd រោងចក្រ Papillion Textile (Cambodia) Co.,Ltd និង រោងចក្រ Boltex factory។

លោក វេង វុទ្ធី អនុ​ប្រធាន​មណ្ឌល​សុខភាព ពង​ទឹក ជា​ទី​ដែល​មាន​កម្មករ​ជា​ច្រើន​ត្រូវ​បញ្ជូន​ទៅ​ព្យាបាល​នៅ​ទី​នោះ បាន​ឲ្យ​ដឹង​ថា កម្មករ​បាន​ត្រឡប់​ទៅ​ផ្ទះ​តាំង​ពី​ថ្ងៃ​សៅរ៍ ព្រោះ​ពួក​គេ​បាន​ធូរ​ស្បើយ​អស់​ហើយ។

លោក​បន្ត​ថា៖ «កម្មករ​បាន​និយាយ​ថា មុន​ពួក​គេ​សន្លប់ គេ​បាន​ធុំ​ក្លិន​ថ្នាំ​ចេញ​ពី​ដុំ​ក្រណាត់​ថ្មី​ដែល​ទើប​នាំ​ចូល»។ លោក​ថា វា​ក៏​បណ្តាល​មក​ពី​សុខភាព​ខ្សោយ​របស់​កម្មករ​ដែរ ព្រោះ​កម្មករ​ខ្លះ​បាន​ងើប​មក​ធ្វើ​ការ​តាំង​ពី​ព្រលឹម​ពេក។

លោក​អះអាង​បន្ត​ថា៖ «មាន​ហេតុ​ផល​ជា​ច្រើន​ដែល​ធ្វើ​ឲ្យ​ពួក​គេ​សន្លប់​ដូច​ជា​ក្លិន​មិន​ល្អ នៅ​កន្លែង​ធ្វើ​ការ​ក្តៅ​ពេក និង​សុខភាព​ពួក​គេ​មិន​ល្អ»៕

អត្ថបទគួរចាប់អារម្មណ៍