.jpg)
សកម្មភាពតវ៉ារបស់បុគ្គលិកនៅកាស៊ីណូ «ដាយម៉ិនស៊ីសាខាទី ២» ថ្មីៗនេះ។ រូបថត FN
ព្រះសីហនុៈ លោក ហេង សួរ អ្នកនាំពាក្យក្រសួងការងារបានឲ្យដឹងថា មន្ត្រីនៃមន្ទីរការងារកំពុងបន្តសម្របសម្រួលករណីថៅកែកាស៊ីណូជាតិចិននៅខេត្តព្រះសីហនុបានរត់ចោលដោយមិនបើកប្រាក់ខែជូនបុគ្គលិក ខណៈជម្រើសរបស់ក្រសួងមានទាំងការដាក់លក់ទ្រព្យសម្បត្តិក្រុមហ៊ុនដើម្បីទូទាត់សំណង ប៉ុន្តែមន្ត្រីសហជីពថា គួរមានខ្ទង់ប្រាក់ណាមួយដោះស្រាយសិន។
កាលពីល្ងាចថ្ងៃទី ២៤ ខែធ្នូ ឆ្នាំ ២០១៩ បុគ្គលិកជនជាតិចិន និងជនជាតិខ្មែរជាច្រើននាក់ដែលធ្វើការនៅកាស៊ីណូឈ្មោះ «ដាយម៉ិនស៊ីសាខាទី ២» ស្ថិតក្នុងសង្កាត់លេខ ៣ ក្រុងព្រះសីហនុ ខេត្តព្រះសីហនុបានមកស្វែងរកកិច្ចអន្តរាគមន៍ពីសមត្ថកិច្ចឲ្យជួយដោះស្រាយ ក្រោយថៅកែរបស់ពួកគេបានរត់ចោល ហើយមិនបើកប្រាក់ខែជូនដល់បុគ្គលិក។
លោក ហេង សួរ បានប្រាប់ភ្នំពេញប៉ុស្តិ៍កាលពីថ្ងៃពុធថា ចំពោះករណីនេះមន្ត្រីជំនាញនៃមន្ទីរការងារខេត្តព្រះសីហនុបានចុះទៅដល់កាស៊ីណូខាងលើនេះ ដើម្បីសម្របសម្រួល និងធ្វើការដោះស្រាយ។ លោកបន្តថា ក្នុងករណីនេះបើទោះជនជាតិណាក៏ដោយ (បុគ្គលិកកម្មករ) មិនថា បរទេស ឬខ្មែរនោះទេឲ្យតែមានកិច្ចសន្យាការងារស្របច្បាប់គឺក្រសួងនឹងដោះស្រាយជូន។
លោកបានបញ្ជាក់ថា៖ «មន្ទីរការងារកំពុងតែធ្វើកិច្ចការងារនេះ ហើយកំពុងសម្របសម្រួល។ ជាគោលការណ៍ឲ្យតែពេលណាពាក់ព័ន្ធនឹងការបិទទ្វារក្ស័យធន (រោងចក្រ) គឺយើងមិនបារម្ភទេ ព្រោះយើងមានច្បាប់ក្ស័យធន ហើយនឹងមានបញ្ជីដើម្បីរឹបអូសទ្រព្យសម្បត្តិ (របស់ក្រុមហ៊ុន) ដើម្បីទូទាត់ផលប្រយោជន៍ជូនបងប្អូននិយោជិត»។
លោក ភុល ភ័ស្តា អធិការនគរបាលក្រុងព្រះសីហនុបានប្រាប់ភ្នំពេញប៉ុស្តិ៍យ៉ាងខ្លីកាលពីថ្ងៃពុធថា បន្ទាប់ពីមានការតវ៉ាមន្ត្រីនៃមន្ទីរការងារបានចុះមកដោះស្រាយ ហើយស្ថានភាព នៅពេលនេះក៏បានស្ងប់ស្ងាត់ផងដែរ។ លោកបន្តថា ក្រោយបញ្ចប់ការតវ៉ានេះនីតិវិធីបន្តគឺមន្ត្រីនៃមន្ទីរការងារកំពុងដោះស្រាយ។
លោកបញ្ជាក់ថា៖ «មន្ត្រីនៃមន្ទីរការងារ អ្នកទទួលដោះស្រាយណាទាក់ទងទៅមន្ទីរការងារទៅ ប៉ុន្តែខ្ញុំដឹងតែថា រឿងហ្នឹងបានចប់ហើយ (ឈប់តវ៉ា)»។
លោក ប៉ាវ ស៊ីណា ប្រធានសហជីពចលនាកម្មករបានលើកឡើងថា វិធានការដែលថាមន្ទីរការងារនឹងសម្រេចលក់ទ្រព្យរបស់ក្រុមហ៊ុននេះអាចជាវិធានការមួយដែលត្រូវប្រើពេលវេលាវែងដែលធ្វើឲ្យបុគ្គលិកកម្មករនិយោជិតទាំងអស់ត្រូវចំណាយពេលរង់ចាំយូរ ខណៈដែលពួកគេកំពុងគ្មានប្រាក់ចំណូលនោះ។
លោកបន្តថា៖ «ត្រូវការប្រើពេលវែងនៅក្នុងការលក់ទ្រព្យសម្បត្តិក្រុមហ៊ុន យកប្រាក់មកឲ្យកម្មករនិយោជិត ហើយស្មុគស្មាញទៀត។ ដូច្នេះរដ្ឋត្រូវតែមានខ្ទង់ថវិកាណាមួយនៅក្នុងការទូទាត់ជូនកម្មករនិយោជិតមុន ហើយបើច្បាប់ត្រូវចំណាយទឹកប្រាក់ប៉ុន្មានយកមកដោះស្រាយសិន។ បន្ទាប់មកចាំយើងបំពេញនីតិវិធីក្នុងការលក់ និងចាត់ចែង (ទ្រព្យសម្បត្តិក្រុមហ៊ុន) តាមក្រោយទើបជួយសម្រាលបន្ទុករបស់បងប្អូនយើងបាន»។
សម្រាប់លោក ប៉ាវ ស៊ីណា ករណីដែលកាស៊ីណូ និងក្រុមហ៊ុនជាច្រើននៅក្នុងខេត្តព្រះសីហនុបានបិទទ្វារជាបន្តបន្ទាប់នោះ ព្រោះតែមានកត្តា ២ យ៉ាងគឺការបិទល្បែងអនឡាញ និងការប្រកាសមិនឲ្យជនបរទេសធ្វើការលើមុខរបរ ១០ មុខ ប៉ុន្តែត្រូវបានលុបចោលវិញដែលជាហេតុឲ្យជនបរទេស ជាពិសេសជនជាតិចិនដែលបានសម្រុកមកកម្ពុជាត្រូវត្រឡប់ទៅប្រទេសគេវិញ៕
