.jpg)
អភិបាលរងខេត្តព្រះវិហារលោក គោស៊ុំ ប៊ុនសឿត ថ្លែងក្នុងសន្និសីទកាសែតកាលពីម្សិលមិញ។ ហុង មិនា
ព្រះវិហារៈ អភិបាលរងខេត្តព្រះវិហារលោក គោស៊ុំ ប៊ុនសឿត ពីម្សិលមិញលើកឡើងថា សកម្មភាពបទល្មើសព្រៃឈើនៅក្នុងខេត្តព្រះវិហារមានការថយចុះប្រមាណជិត ៩០ ភាគរយ បើប្រៀបធៀបនឹងឆ្នាំកន្លងទៅ។ មន្ត្រីសង្គមស៊ីវិលជំរុញឲ្យមានការយកចិត្តទុកដាក់បន្ថែមទៀត ដើម្បីឲ្យការទប់ស្កាត់បទល្មើសព្រៃឈើមានប្រសិទ្ធភាពក្នុងរយៈពេលវែង។
ក្នុងសន្និសីទសារព័ត៌មានមួយស្ដីពីវឌ្ឍនភាព និងទិសដៅការងារបន្ដរដ្ឋបាលខេត្តព្រះវិហារពីម្សិលមិញនាទីស្តីការគណៈរដ្ឋមន្ត្រីលោក គោស៊ុំ ប៊ុនសឿត ថ្លែងថាបញ្ហាបទល្មើសព្រៃឈើនៅក្នុងខេត្តព្រះវិហារមានការថមថយ បើប្រៀបធៀបទៅឆ្នាំកន្លងទៅ។
រាជរដ្ឋាភិបាលប្រគល់តួនាទីបង្ក្រាបបទល្មើសព្រៃឈើឲ្យទៅលោក សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ធ្វើជាប្រធានគណៈកម្មការទប់ស្កាត់ និងបង្ក្រាបបទល្មើសធនធានធម្មជាតិដែលលោកបានដាក់បទបញ្ជាឲ្យមន្ត្រីជំនាញចុះបង្ក្រាប និងទប់ស្កាត់ជាហូរហែ។
លោកថ្លែងថា៖ «ជារួមគឺនៅខ្វះចន្លោះតិចតួចខ្ញុំមិនអាចធានាថាល្អ ១០០ ភាគរយទេ។ ប៉ុន្ដែបទល្មើសព្រៃឈើគឺថយច្រើនប្រហែលជាជិត ៩០ ភាគរយហើយបើយើងប្រៀបធៀបទៅឆ្នាំកន្លងទៅដោយសារនៅឆ្នាំនេះយើងប្រើប្រាស់វិធានការក្ដៅរបស់ឯកឧត្តម សៅ សុខា។ ប៉ុន្ដែខ្ញុំមិនចាំចំនួនតួលេខនៃការបង្ក្រាបបទល្មើសជាក់លាក់ទេគឺវាថយចុះច្រើនមែន»។
លោកថា បទល្មើសព្រៃឈើនៅមានសេសសល់តិចតួច ដោយសារពលរដ្ឋសហគមន៍កាប់ឈើដឹកតាមម៉ូតូ ដើម្បីយកធ្វើផ្ទះ ឬធ្វើក្រោលគោក្របីរបស់អ្នកភូមិ។ ប៉ុន្ដែចំពោះការកាប់ឈើជាលក្ខណៈទ្រង់ទ្រាយធំដឹកតាមរថយន្ត ឬគោយន្តគឺគ្មានសកម្មភាពបន្តទៀតទេ។
លោក ពីង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារថ្លែងពីម្សិលមិញថា មន្ត្រីឧទ្យានុរក្សនៃមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារទាំងអស់បានបង្កើនសកម្មភាពរបស់ខ្លួនទ្វេដងក្នុងការចុះល្បាត និងការបង្ក្រាបបទល្មើសព្រៃឈើនៅតាមផ្លូវ និងក្នុងតំបន់ព្រៃឈើ។
លោកបញ្ជាក់ថា៖ «ករណីនេះយើងចុះល្បាតជាប្រចាំ ឥឡូវនេះគ្មានបទល្មើសព្រៃឈើទេ យើងបង្ក្រាបអស់ហើយ។ វានៅសេសសល់តិចតួចដែរ ពលរដ្ឋសហគមន៍យើងគាត់ [កាប់យក] ទៅធ្វើផ្ទះ ឬគាត់កាប់ទៅជួសជុលផ្ទះគាត់ ហើយរឿងអ្នកកាប់ឈើជាលក្ខណៈទ្រង់ទ្រាយធំ គឺគ្មានទេ យើងចាប់អស់ហើយ»។
លោកបន្ដថា ការថយចុះបទល្មើសព្រៃឈើនេះគឺសមត្ថកិច្ចពាក់ព័ន្ធបានចុះផ្សព្វផ្សាយ អប់រំប្រជាពលរដ្ឋតាមមូលដ្ឋាន និងពង្រឹងការអនុវត្តច្បាប់យ៉ាងតឹងរ៉ឹងរបស់អាជ្ញាធរថ្នាក់ក្រោមជាតិ និងគណៈកម្មការទប់ស្កាត់ និងបង្ក្រាបបទល្មើសធនធានធម្មជាតិ។ ដូច្នេះវាជាជោគជ័យថ្មីមួយសម្រាប់ការទប់ស្កាត់ និងបង្ក្រាបបទល្មើសព្រៃឈើនៅក្នុងខេត្តព្រះវិហារ។
លោក ឡោ ចាន់ មន្ត្រីផ្នែកសិទ្ធិមនុស្សនៃសមាគមអាដហុកប្រចាំខេត្តព្រះវិហារថ្លែងពីម្សិលមិញថា បទល្មើសព្រៃឈើនៅខេត្តព្រះវិហារពិតជាមានការថមថយមែន ប៉ុន្ដែប្រហែលត្រឹមតែរយៈពេលខ្លីប៉ុណ្ណោះ។ លោកជំរុញឲ្យមន្ត្រីជំនាញ និងអាជ្ញាធរពាក់ព័ន្ធបង្កើនការយកចិត្តទុកដាក់បន្ថែមទៀត ដើម្បីការពារកុំឲ្យបទល្មើសព្រៃឈើមានសកម្មភាពឡើងវិញ។
លោកបញ្ជាក់ថា៖ «ខ្ញុំបានសាកសួរទៅពលរដ្ឋសហគមន៍ និងចុះសង្កេតតាមមូលដ្ឋានមួយចំនួនដែរ គឺមានការថមថយមែន ប៉ុន្ដែអាជ្ញាធរមិនគួរផ្អាកសកម្មភាពអនុវត្តច្បាប់ត្រឹមនេះទេ។ យើងត្រូវតែបង្កើនការអប់រំ ការបង្ក្រាបហ្នឹងបន្ថែមទៀត។ ឥឡូវនេះវាមានបទល្មើសដែរ តែវាតិចតួចទេគឺវាមិនសូវដឹកឈើគគ្រឹកគគ្រេងដូចមុន»។
អ្នកស្រី ភោគ ហុង សមាជិកបណ្ដាញសហគមន៍ព្រៃឡង់ប្រចាំ ខេត្តព្រះវិហារថ្លែងពីម្សិលមិញថា អ្នកស្រី និងពលរដ្ឋសហគមន៍ព្រមទាំងមន្ត្រីបរិស្ថានប្រមាណជាង ២០ នាក់ បានចុះល្បាតក្នុងតំបន់ព្រៃឡង់ចាប់ពីថ្ងៃទី ១៦-១៩ ឧសភាបានជួបបទល្មើស ៣ ករណីតូចៗប៉ុណ្ណោះ។ អ្នកស្រីអះអាងថា បទល្មើសព្រៃឈើមានការថយចុះគួរឲ្យកត់សម្គាល់។
អ្នកស្រីនិយាយថា៖ «ពួកខ្ញុំបានចុះល្បាតជាមួយមន្ត្រីបរិស្ថានរយៈពេល ៣ ឬ ៤ ថ្ងៃមុននេះបានជួបអ្នកបាញ់សត្វព្រៃ និងកាប់រានដីព្រៃដែរ ប៉ុន្ដែពួកគាត់មិនទាន់បានធ្វើសកម្មភាពអ្វីទេ ហើយមន្ត្រីយើងក៏គាត់ឲ្យធ្វើកិច្ចសន្យាដែរ។ បើបានវាថមថយបទល្មើសអ៊ីចឹងទៅ ព្រៃឈើយើងប្រហែលជានៅគង់វង្ស។ ប៉ុន្ដែខ្ញុំមិនដឹងថា វាស្ងាត់រយៈពេលប៉ុន្មានថ្ងៃទេចាំមើលយើងសង្កេតមើល និងបន្តចុះល្បាតបន្ថែមទៀត»៕
