.jpg)
លោក សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ធ្វើតេស្តរកកូវីដ ខណៈកម្លាំងនគរបាលជាង ៨០ នាក់ រកឃើញវិជ្ជមាន។ TVK
ភ្នំពេញ៖ ថ្នាក់ដឹកនាំ និងកងកម្លាំងកងរាជអាវុធហត្ថលើផ្ទៃប្រទេសទាំងអស់ ត្រូវតម្រូវឲ្យយកសំណាកធ្វើតេស្តរកកូវីដ ១៩ ដោយសារតែមានការបារម្ភពីការឆ្លងរីករាលដាលជំងឺនេះ ខណៈកម្លាំងនគរបាលជាតិកងអន្តរាគមន៍នៅតំបន់ក្រហមជាង ៨០ នាក់ ត្រូវបានធ្វើតេស្តរកឃើញវិជ្ជមានជំងឺឆ្លងនេះ។
នៅថ្ងៃទី ១០ ខែឧសភានេះ មានថ្នាក់ដឹកនាំ និងមន្ត្រីកងរាជអាវុធហត្ថលើផ្ទៃប្រទេសប្រមាណ ១០០ នាក់ បានធ្វើសំណាករហ័សរកកូវីដ ១៩ នៅបញ្ជាការដ្ឋានកងរាជអាវុធហត្ថលើផ្ទៃប្រទេស បន្ទាប់ពីកងកម្លាំងទាំងនោះ បានចូលរួមយ៉ាងសកម្មក្នុងសកម្មភាពនៃការបិទខ្ទប់នៅទូទាំងប្រទេស ជាពិសេសក្នុងរាជធានីភ្នំពេញ។
ការយកសំណាកដើម្បីធ្វើតេស្តរកមេរោគកូវីដនឹងបន្តធ្វើទៅលើមន្ត្រីកងរាជអាវុធហត្ថទាំងអស់ ហើយមន្ត្រីដែលមិនទាន់បានធ្វើតេស្តរួចរាល់ នឹងមិនអនុញ្ញាតឲ្យចូលបន្ទាយ ឬអង្គភាពរបស់ខ្លួននោះឡើយ។ នេះបើតាមលោក សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ដែលបានដឹកនាំការយកសំណាកបានប្រាប់ ភ្នំពេញ ប៉ុស្តិ៍ នៅថ្ងៃនេះ។
លោក សៅ សុខា បាននិយាយថា កន្លងមកកងកម្លាំងកងរាជអាវុធហត្ថ គឺបានទទួលភារកិច្ចពីរាជរដ្ឋាភិបាលចូលរួមជាមួយកម្លាំងសមត្ថកិច្ច និងអាជ្ញាធរពាក់ព័ន្ធធ្វើការអនុវត្តនូវសេចក្តីសម្រេចចិត្តបិទខ្ទប់រាជធានីភ្នំពេញ និងក្រុងតាខ្មៅ។
ក្នុងពេលដែលរាជធានីភ្នំពេញបានបិទខ្ទប់ គឺមានការផ្ទុះ និងការឆ្លងរីករាលដាលនៃជំងឺកូវីដ ១៩ យ៉ាងខ្លាំង ដែលវាមិនត្រឹមតែគំរាមកំហែងមកលើប្រជាពលរដ្ឋនោះទេ សូម្បីកងកម្លាំងដែលអនុវត្តភារកិច្ចនេះ ក៏ប្រឈមមុខនឹងការឆ្លងរីករាលដាលផងដែរ។
លោកបន្តថា៖ «បើទោះបីកងកម្លាំងអាវុធហត្ថត្រូវបំពេញតួនាទី ក៏តម្រូវឲ្យកងកម្លាំងអាវុធហត្ថខ្លួនឯងត្រូវមានការការពារខ្លួន និងត្រូវបញ្ចៀសការឆ្លងជំងឺនេះ ដើម្បីរក្សាសុវត្ថិភាពរបស់កងកម្លាំងប្រដាប់អាវុធទាំងអស់ ក្នុងការអនុវត្តបន្តនៃការបិទខ្ទប់ ឬការពារសុវត្ថិភាពសន្តិសុខក្នុងសង្គម»។
លោកបញ្ជាក់ទៀតថា៖ «ការសម្រេចចិត្តធ្វើការត្រួតពិនិត្យសុខភាពកងកម្លាំងយើងមុនគេ ក្នុងនោះ រួមមានទាំងខ្ញុំមួយទៀត ត្រូវធ្វើតេស្តមុនគេ ដែលអាចបណ្តាលឲ្យមានការឆ្លងរីករាលដាលទៅកាន់កងកម្លាំងផ្សេងទៀត ដែលនាំឲ្យមានបញ្ហាលំបាកក្នុងពេលខាងមុខ»។
បើតាមលោក សៅ សុខា មានចំណុចពិសេសចំនួន ២ ដែលតម្រូវឲ្យកងកម្លាំងកងរាជអាវុធហត្ថ ត្រូវតែធ្វើតេស្តយកសំណាករកជំងឺកូវីដ ១៩ នេះ គឺទី១ ដោយសារតែការបិទខ្ទប់រាជធានីភ្នំពេញ គឺជាករណីថ្មីសម្រាប់កងកម្លាំងប្រដាប់អាវុធក្នុងការអនុវត្តសេចក្តីសម្រេចនេះ។
ចំណែកទី២ ដោយសារតែសេចក្តីសម្រេចចិត្តរបស់រដ្ឋាភិបាល គឺបានធ្វើការផ្តាស់ប្តូរចិត្តយ៉ាងឆាប់រហ័ស ដែលតម្រូវឲ្យកងកម្លាំងទាំងអស់ ត្រូវតែត្រៀមជាស្រេចនូវសុវត្ថិភាពផ្ទាល់ខ្លួន។
លោកបន្ថែមថា៖ «រ៉ាបិសតេស្តនេះ យើងនឹងយកធ្វើតេស្តលើបុគ្គលិកយើងទាំងអស់ថា តើមានអ្នកណាផ្ទុកមេរោគកូវីដ ១៩ អត់ ដើម្បីយើងគ្រប់គ្រងគោលដៅយើង និងការឆ្លងចូលមកក្នុងអង្គភាពកងកម្លាំង អនុវត្តកងរាជអាវុធហត្ថនេះ។ អ៊ីចឹងហើយ បានជាយើងធ្វើតេស្តនេះ ខណៈមន្ត្រីដែលយើងបានធ្វើតេស្តប្រមាណ ១០០ នាក់នេះ គឺមិនមានវិជ្ជមានកូវីដ ១៩ នោះទេ»។
ប៉ុន្តែ បើតាមលោក សៅ សុខា ក្នុងរយៈពេលនៃការឆ្លងរីករាលដាលជំងឺកូវីដ ១៩ ក្នុងសហគមន៍ ២០ កុម្ភៈ គឺមានមន្ត្រីកងកម្លាំងប្រដាប់អាវុធប្រមាណជាង ១០ នាក់ បានឆ្លងរួចមកហើយ ដោយសារតែពួកគេបានឆ្លងពីក្រុមគ្រួសារ។
យ៉ាងណាក្តី មន្ត្រីមួយចំនួនបានព្យាបាលជាសះស្បើយអស់ហើយ ខណៈមួយចំនួនទៀត កំពុងបន្តសម្រាកព្យាបាល។
ជាមួយគ្នានេះ លោក ឆាយ គឹមខឿន អ្នកនាំពាក្យអគ្គស្នងការរងនគរបាលជាតិបានប្រាប់អ្នកសារព័ត៌មាននៅថ្ងៃនេះដែរថា គិតត្រឹមថ្ងៃនេះ គឺមានកម្លាំងនគរបាលជាតិកងអន្តរាគមន៍ប្រមាណជាង ៨០ នាក់ ត្រូវបានធ្វើតេស្តរកឃើញវិជ្ជមានជំងឺកូវីដ ១៩។
លោកបន្តថា កម្លាំងអន្តរាគមន៍ទាំងជាង ៨០ នាក់នេះ គឺជាក្រុមប្រចាំការនៅតំបន់ក្រហមដែលជាទីតាំងសម្បូរប្រជាពលរដ្ឋឆ្លងជំងឺកូវីដ ១៩។
លោកបញ្ជាក់ថា៖ «កងកម្លាំងនគរបាលជាតិកងអន្តរាគមន៍ពិតជាបានឆ្លងជំងឺកូវីដ ១៩ ពិតប្រាដកមែន ហើយកងកម្លាំងទាំងអស់នោះ ជាក្រុមការងារប្រចាំការនៅក្នុងតំបន់ក្រហមចំណុចច្រមុះជ្រូកស្ទឹងមានជ័យ រាជធានីភ្នំពេញ»៕
