ពោធិ៍សាត់ៈ កូនឈើជាង ៤ ម៉ឺនដើម ត្រូវបានមន្ត្រី និងអ្នកពាក់ព័ន្ធយកទៅដាំក្នុងសហគមន៍តំបន់ការពារធម្មជាតិស្ទឹងថ្មីនៃដែនជម្រកសត្វព្រៃភ្នំសំកុស ខេត្តពោធិ៍សាត់លើផ្ទៃដីទំហំ ៥៦ ហិកតា ក្នុងចំណោមផ្ទៃដី ៣០០ ហិកតា ក្នុងបំណងស្តារព្រៃឈើឡើងវិញ បន្ទាប់ពីទីតាំងនោះត្រូវបានដកហូតពីជនខិលខូច ដែលលួចកាប់ទន្ទ្រានព្រៃខុសច្បាប់។
ការដាំកូនឈើនេះបានប្រព្រឹត្តឡើងកាលថ្ងៃទី ៧ ខែតុលា ដោយមានការចូលរួមពីមន្ត្រីក្រសួងបរិស្ថានតំណាងកម្មវិធីអភិវឌ្ឍន៍សហប្រជាជាតិ (UNDP) ស្ថានទូតស៊ុយអែតប្រចាំកម្ពុជា ក្រុមការងារ RECOFTC អាជ្ញាធរដែនដី សិស្សានុសិស្ស លោកគ្រូ អ្នកគ្រូ និងពលរដ្ឋជាច្រើនរូបផងដែរ។
អនុរដ្ឋលេខាធិការក្រសួងបរិស្ថាន លោក រ័ត្ន វិរៈ បានថ្លែងក្នុងឱកាសដាំកូនឈើនោះថា ការចូលរួមដាំស្តារព្រៃដោយផ្ទាល់ពីអាជ្ញាធរមូលដ្ឋានគ្រប់លំដាប់ថ្នាក់ និងពលរដ្ឋក្នុងសហគមន៍នាពេលនេះគឺជាការបង្ហាញពីស្មារតីស្រឡាញ់ធនធានធម្មជាតិ រួមមាន ព្រៃឈើ និងសត្វព្រៃជាដើម។ ទាំងអស់នេះគឺជាផ្នែកមួយនៃការទាក់ទាញទឹកភ្លៀង រក្សាលំនឹងធម្មជាតិ ការពារខ្យល់ព្យុះ និងគ្រោះធម្មជាតិផ្សេងៗ។
លោក រ័ត្ន វិរៈ បានបញ្ជាក់ថា៖ «ព្រៃឈើនៅក្នុងតំបន់នេះគឺជាប្រភេទព្រៃរបោះ ដែលអាចឱ្យសត្វគ្រប់ប្រភេទរស់នៅបាន ហេតុដូច្នេះប្រសិនបើយើងការពារព្រៃឈើ សត្វព្រៃបាននោះ យើងនឹងបានថវិកាជួយដល់ការអភិវឌ្ឍជីវភាពសហគមន៍»។
ជាមួយនេះដែរលោកបានសង្កត់ធ្ងន់ថា នៅពេលខាងមុខក្រសួងបរិស្ថាននឹងចូលរួមអភិវឌ្ឍក្នុងតំបន់នេះឱ្យមានប្រភពចំណូលតាមរយៈការបង្កើតជាតំបន់ទេសចរណ៍ធម្មជាតិដែលភ្ញៀវទេសចរអាចមកមើលសត្វព្រៃ និងព្រៃឈើក្នុងតំបន់នេះផងដែរ។
លោក ខៀវ បូរិន អគ្គនាយកនៃអគ្គនាយកដ្ឋានសហគមន៍មូលដ្ឋានបានថ្លែងដែរថា ការកំណត់យកសហគមន៍តំបន់ការពារធម្មជាតិស្ទឹងថ្មីដាំកូនឈើនេះគឺដើម្បីលើកទឹកចិត្តឱ្យសហគមន៍តំបន់ការពារធម្មជាតិដាំស្តារព្រៃ និងលើកកម្ពស់ការចូលរួមពីពលរដ្ឋ និងអ្នកពាក់ព័ន្ធដែលបានខិតខំចូលរួមការពារ និងអភិរក្សធនធានធម្មជាតិ។
លោកបានថ្លែងដូច្នេះថា៖ «ការដាំកូនឈើព្រៃនេះគឺសម្រាប់ការអភិរក្សធនធានធម្មជាតិជាពិសេសបង្កើនជីវចម្រុះសម្រាប់កូនចៅជំនាន់ក្រោយ។ ព្រៃឈើនៅទីនេះមិនអាចផ្តល់ផលដល់គាត់ផ្ទាល់មែន ប៉ុន្តែវាអាចអភិរក្សជីវចម្រុះ ហើយអាចរក្សាទឹក និងទាក់ទាញទឹកភ្លៀង តាមរយៈការថែរក្សាព្រៃឈើឱ្យបានល្អនេះ»។
បើតាមលោក ខៀវ បូរិន ទៅថ្ងៃខាងមុខ ក្រសួងបរិស្ថានមានគម្រោងដាំដើមអាកាស្យាក្នុងដីនៃផ្នែកណាមួយក្នុងតំបន់នេះខណៈឈើប្រភេទនេះកំពុងមានតម្រូវការខ្ពស់ និងអាចប្រមូលផលក្នុងរយៈពេល ៥ ទៅ ៦ ឆ្នាំខាងមុខ។ ជាមួយគ្នានេះក្រសួងនឹងពិនិត្យលទ្ធភាពលើកកម្ពស់ជីវភាពសហគមន៍តាមរយៈការផ្តល់ពូជមាន់ គោ ពពែ ជ្រូក ដែលជួយបង្កើនចំណូលដល់ពលរដ្ឋផងដែរ។
យោងតាមក្រសួងបរិស្ថានបានឱ្យដឹងថា សហគមន៍តំបន់ការពារធម្មជាតិស្ទឹងថ្មីបានបង្កើតឡើងនៅឆ្នាំ ២០១០ ដែលគ្របដណ្ដប់លើផ្ទៃដីចំនួនទំហំ ៧១២ ហិកតាដោយមានការចូលរួមពីប្រជាជនចំនួន ១១០ គ្រួសារ។
រីឯកូនឈើព្រៃដែលបានដាំប្រមាណជាង ៤ ម៉ឺនដើមនាពេលនេះជាប្រភេទឈើគ្រញូង ធ្នង់ បេង គគីរ ឈើទាល កកោះ ជាដើម ដែលនាយកដា្ឋនជីវភាពសហគមន៍បានទទួលថវិកាសម្រាប់ការដាំស្តារព្រៃឈើនេះពី UNDP និងពីមជ្ឈមណ្ឌលសម្រាប់មនុស្ស និងព្រៃឈើ (RECOFTC) ដើម្បីចូលរួមលើកកម្ពស់ជីវភាពសហគមន៍ ខណៈគ្រួសារមួយចំនួនបាននិងកំពុងរងផលប៉ះពាល់ដោយសារជំងឺកូវីដ ១៩៕