.jpg)
មន្ត្រីជំនាញកម្ពុជា ១៥ រូបដែលបញ្ចប់វគ្គសិក្សាស្តីពីការព្យាបាលអ្នកញៀនគ្រឿងញៀនពីឥណ្ឌា។ សហការី
ភ្នំពេញៈ មន្រ្តីជំនាញកម្ពុជាចំនួន ១៥ នាក់នៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀន ទើបបានបញ្ចប់ការចូលរួមវគ្គបណ្ដុះបណ្ដាលខ្លី ១ នៅទីក្រុងញូវដែលី ប្រទេសឥណ្ឌា ពាក់ព័ន្ធនឹងការព្យាបាលអ្នកប្រើប្រាស់គ្រឿងញៀន ដែលវគ្គបណ្ដុះបណ្ដាលនេះត្រូវបានមន្ត្រីលើកឡើងថា ជាឱកាសទទួលបានចំណេះដឹងនិងបទពិសោធបន្ថែមពីអ្នកជំនាញរបស់ឥណ្ឌា។
លោក លឹម តុងហួត ប្រធាននាយកដ្ឋាននីតិកម្ម អប់រំ និងស្ដារនីតិសម្បទានៃអគ្គលេខាធិការដ្ឋាន អាជ្ញាធរជាតិប្រយុទ្ធប្រឆាំងគ្រឿងញៀនបានប្រាប់ភ្នំពេញប៉ុស្ដិ៍ ពីម្សិលមិញថា វគ្គបណ្ដុះបណ្ដាលស្ដីពីការបង្ការ ព្យាបាលនិងស្ដារនីតិសម្បទា ពីអ្នកជំនាញឥណ្ឌានេះ គឺបានធ្វើឡើងកាលពីថ្ងៃទី ៤ ដល់ថ្ងៃទី ៩ ខែកុម្ភៈ ឆ្នាំ ២០១៩។
លោកបានបន្តថា វគ្គបណ្ដុះបណ្ដាល ១ សប្ដាហ៍គឺបានជួយឱ្យមន្រ្តីកម្ពុជាទាំង ១៥ នាក់ ទទួលបានចំណេះដឹងទូទៅពីបញ្ហាគ្រឿងញៀន ប្រភេទគ្រឿងញៀន និងកត្តាជំរុញឱ្យប្រើប្រាស់គ្រឿងញៀន ការចេះប្រើឧបករណ៍សម្រាប់វាយតម្លៃគ្រោះថ្នាក់គ្រឿងញៀននិងការអន្តរាគមន៍ ការផ្ដល់ប្រឹក្សាអ្នកញៀនគ្រឿងញៀនដោយឈរលើគោលការណ៍ស្ម័គ្រចិត្តនិងរក្សាការសម្ងាត់ ការគ្រប់គ្រងភាពញៀនគ្រឿងញៀនតាមរយៈការវាយតម្លៃ ការព្យាបាលបែបចិត្តសាស្រ្ដ ការព្យាបាលជំងឺរួមផ្សំ ការស្ដារនីតិសម្បទា ការអប់រំពីភាពញៀនគ្រឿងញៀន និងការព្យាបាលដោះស្រាយបញ្ហាគ្រួសារ។
លោកថា៖ «បញ្ហាគ្រឿងញៀនគឺជាបញ្ហារបស់យើងទាំងអស់គ្នា ហើយការត្រួតពិនិត្យគ្រឿងញៀន ការព្យាបាលអ្នកញៀនគ្រឿងញៀន គឺមិនអាចធ្វើឡើងដោយកម្ពុជាតែម្នាក់ឯងបាន ទេ គឺត្រូវរួមសហការពីបណ្ដាប្រទេសជាមិត្តនានា ក៏ដូចជាក្នុងតំបន់និងពិភពលោក រួមគ្នាដោះស្រាយបញ្ហាគ្រឿងញៀន។ ប្រទេស កម្ពុជា តែងតែទទួលយករាល់ជំនួយរបស់បរទេស ទាក់ទងការត្រួតពិនិត្យគ្រឿងញៀន ទាំងជំនួយផ្នែកបច្ចេកទេស និងសម្ភារៈផ្សេងៗ ដើម្បីបម្រើដល់ការប្រឆាំងគ្រឿងញៀននៅកម្ពុជា។
បើតាមលោក លឹម តុងហួត សម្រាប់កម្ពុជាបច្ចុប្បន្នគឺការព្យាបាល និងស្ដារនីតិសម្បទា សម្រាប់អ្នកប្រើប្រាស់គ្រឿងញៀនមានចំនួន ២ ប្រភេទ គឺទី១ ការព្យាបាលនៅតាមមជ្ឈមណ្ឌលបណ្ដោះអាសន្នមានចំនួន ១៦ កន្លែង និងទី២ ការព្យាបាលតាមសហគមន៍ ដូចជានៅតាមមន្ទីរពេទ្យបង្អែក មណ្ឌលសុខភាព ជាដើម ដែលមានចំនួន ៤៣០ កន្លែង។
លោក តុងហួត បានអះអាងទៀតថា មន្រ្តីខាងបន្សាបគ្រឿងញៀន តែងត្រូវបានពង្រឹងសមត្ថភាព និងជំនាញខាងបច្ចេកទេសជាបន្តបន្ទាប់។
លោកបន្ថែមថា៖ «ពី ១ ឆ្នាំទៅ ១ ឆ្នាំ យើងបានពង្រឹងសមត្ថភាពដល់មន្រ្តីដែលបានដាក់ពង្រាយហ្នឹង ដើម្បីឱ្យពួកគាត់មានចំណេះដឹង និងបច្ចេកទេសក្នុងការងារព្យាបាលឱ្យកាន់តែមានប្រសិទ្ធភាព»។
របាយការណ៍ស្ដីពីលទ្ធផលនៃការប្រយុទ្ធប្រឆាំងគ្រឿងញៀនឆ្នាំ ២០១៨ បង្ហាញថា មានអ្នកប្រើប្រាស់គ្រឿងញៀនចំនួន ២១ ២៥៧ នាក់ ត្រូវព្យាបាលនិងស្ដារនីតិសម្បទាឡើងវិញ តាមសេវាសុខាភិបាលនិងមជ្ឈមណ្ឌលបណ្ដោះអាសន្នរាជធានី-ខេត្ត។
របាយការណ៍នេះអះអាងថា កម្ពុជានៅតែមានបញ្ហាប្រឈមមួយចំនួន ដូចជាការខ្វះខាតធនធានមនុស្ស ថវិកា សម្ភារផ្សព្វផ្សាយ និងអប់រំស្ដីពីការព្យាបាលអ្នកញៀនគ្រឿងញៀនតាមសហគមន៍ រីឯការព្យាបាលតាមមន្ទីរពេទ្យបង្អែកនិងមណ្ឌលសុខភាពគឺមានតែ ៣៣% ប៉ុណ្ណោះ នៃមន្ទីរពេទ្យបង្អែកនិងមណ្ឌលសុខភាពសរុបចំនួន ១ ៣០៥ កន្លែង។
គណៈកម្មការសម្របសម្រួលការព្យាបាលអ្នកញៀនគ្រឿងញៀនផ្នែកសហគមន៍តាមឃុំ-សង្កាត់ ក៏មិនទាន់បង្កើតឡើងបានទូទាំងប្រទេសដែរ ស្របពេលគណៈកម្មការបង្កើតរួចមិនទាន់ធ្វើសកម្មភាពផុសផុលនៅឡើយ៕
