ភ្នំពេញៈ ក្រុមជំនាញនៃមជ្ឈមណ្ឌលសកម្មភាពកំចាត់មីនកម្ពុជា (CMAC) បានជីកប៉ះជណ្តើរបុរាណ [ជណ្តើរចុះទៅរកទឹកទន្លេ] ដែលស្ថិតនៅចម្ងាយប្រមាណជាង៣០ម៉ែត្រពីទីតាំងដែលបានជីកប៉ះតោថ្មបុរាណកន្លងមកនៅក្នុងការដ្ឋានសាងសង់អាងស្តុកទឹកក្រោមដីរបស់ JICA មុខក្រុមប្រឹក្សាអភិវឌ្ឍន៍កម្ពុជារាជធានីភ្នំពេញ។
លោក ហេង រតនា អគ្គនាយក CMAC ប្រាប់ ភ្នំពេញ ប៉ុស្តិ៍ កាលពីថ្ងៃ ១៤ មីនាថា ក្រុមជំនាញ CMAC ដែលកំពុងគាំទ្រគម្រោងអភិវឌ្ឍន៍ប្រព័ន្ធរំដោះទឹករបស់រាជធានីភ្នំពេញដែលជាជំនួយរបស់អង្គការ (JICA) របស់ជប៉ុន បានជីកប៉ះជណ្តើរបុរាណកាលពីថ្ងៃទី ១១ ខែមីនា ដែលមានចម្ងាយប្រមាណជាង ៣០ ម៉ែត្រ ពីទីតាំងដែលបានរកឃើញតោថ្មបុរាណកន្លងមក។
លោកថ្លែងថា៖ «ជណ្តើរនោះមានប្រវែង ៥ ម៉ែត្រ ទទឹងជាង ៣ ម៉ែត្រ ស្ថិតក្នុងចម្ងាយប្រមាណ ៣០ ម៉ែត្រពីកន្លែងដែលយើងរកឃើញតោថ្មបុរាណពីលើកមុនតែវាចុះមកក្រោមទៅរកមាត់ទន្លេវិញ ហើយជម្រៅដែលយើងជីកប៉ះហ្នឹងប្រមាណជិត ៤ ម៉ែត្រ»។
លោក ហាប់ ទូច អគ្គនាយកបច្ចេកទេសវប្បធម៌នៃក្រសួងវប្បធម៌ និងវិចិត្រសិល្បៈបានប្រាប់ ភ្នំពេញ ប៉ុស្តិ៍ ដែរថា ជណ្តើរបុរាណដែលទើបប្រទះឃើញនេះអាចស្ថិតនៅក្នុងជំនាន់ជាមួយរូបចម្លាក់តោថ្មបុរាណដែលប្រទះឃើញកន្លងមក។
លោកបានបញ្ជាក់ថា៖ «ខ្ញុំគិតថា ជណ្តើរហើយនិងរូបចម្លាក់តោថ្មដែលរកឃើញនៅទីនោះ ប្រហែលជានៅជំនាន់ជាមួយគ្នា ក៏ប៉ុន្តែប្រសិនបើចង់ច្បាស់អាចសួទៅខាងមន្ទីរវប្បធម៌រាជធានីភ្នំពេញ ព្រោះគេធ្វើកិច្ចការងារហ្នឹង»។
លោក ជុំ វុឌ្ឍី ប្រធានមន្ទីរវប្បធម៌ និងវិចិត្រសិល្បៈ រាជធានីភ្នំពេញបានប្រាប់ ភ្នំពេញ ប៉ុស្តិ៍ កាលពីថ្ងៃ ១៤ មីនាថា មន្ត្រីជំនាញមន្ទីរវប្បធម៌ និងនាយកដ្ឋានសារមន្ទីរជាតិបានចុះទៅពិនិត្យមើលជណ្តើរនោះរួចរាល់ហើយ ប៉ុន្តែមិនទាន់អាចដឹងច្បាស់ពីអាយុកាលថាវានៅក្នុងជំនាន់ណាឱ្យប្រាកដនៅឡើយទេ។
លោកថ្លែងថា៖ «ការសង់ជណ្តើរហ្នឹងជំនាន់នោះយើងពិនិត្យឃើញថា ធ្វើពីបេតុងអាមេ ឃើញមានសរសៃដែករលោង និងក្រួសអាចម៍ផ្កាយ តែបើឲ្យកំណត់ថា អាយុកាលប៉ុនណាអត់ដឹងច្បាស់ទេ។ជណ្តើរហ្នឹងឃើញតែមួយកំណាត់ខាងក្រោម ដែលធម្មតាជណ្តើរចុះទន្លេអ៊ីចឹងវាមានចាប់ពីច្រាំងទន្លេមកអ៊ីចឹងជាដំណោះស្រាយយើងទុកនៅកន្លែងហ្នឹងដដែលព្រោះយើងយកចេញអត់រួចទេ វាមានទទឹងរហូតដល់ ៣ ម៉ែត្រជាង»។
បើតាមលោក វុឌ្ឍី មន្ត្រីជំនាញរបស់មន្ទីរវប្បធម៌បានចុច GPS ចំណាំទីកន្លែងរួចរាល់ដើម្បីអាចសិក្សាស្រាវជ្រាវនៅពេលក្រោយទៀត។ «ដោយសារការដ្ឋានរបស់ JICA អ៊ីចឹងគាត់នឹងលុបដីពីលើវិញសិន ហើយថ្ងៃណាមួយពេលសមរម្យ ខាងក្រសួងចាត់ចែងយ៉ាងម៉េចយើងនឹងអនុវត្តតាមនោះ មានន័យថា យើងត្រូវធ្វើកំណាយ ឬមួយយ៉ាងម៉េចអាហ្នឹងរង់ចាំថ្នាក់លើគាត់សម្រេច»។
លោក វុឌ្ឍី បញ្ជាក់ថា ជណ្តើរដែលទើបប្រទះឃើញដោយមន្ត្រីជំនាញ CMAC នេះ អាចមានទំនាក់ទំនងជាមួយតោថ្មបុរាណ ដែលមន្ត្រី CMAC ធ្លាប់ជីកប៉ះក្នុងពេលកន្លងមកក្នុងពេលជីកកាយដី ដើម្បីអនុវត្តគម្រោងអភិវឌ្ឍន៍អាងស្តុកទឹកក្រោមដី និងសាងសង់ស្ថានីយបូមទឹកទី៦ របស់រាជធានីភ្នំពេញនៅជាប់ទន្លេសាបខាងមុខក្រុមប្រឹក្សាអភិវឌ្ឍន៍កម្ពុជា។
លោក វុឌ្ឈី បានបន្ថែមថា៖ «តោថ្មបុរាណវានៅខាងលើឯណេះយើងអត់បានដឹងរូបរាងទាំងអស់ហ្នឹងថាពីលើមកក្រោមវាមានថាសជណ្តើហ្នឹងប៉ុន្មានថ្នាក់យើងអត់ដឹងដែរ ព្រោះអត់មានឯកសារណាមួយច្បាស់លាស់ក្នុងរឿងហ្នឹង។ ចំណែកតោថ្ម មានរចនាប័ទ្មបាខែងប្រហែលជាគេដឹកជញ្ជូនពីប្រាសាទភ្នំបាខែងមកក៏មិនដឹង»៕