ស្ទឹងត្រែងៈ មន្ទីរកសិកម្ម រុក្ខាប្រមាញ់ និងនេសាទ ខេត្តស្ទឹងត្រែងបានច្រានចោលនូវរបាយការណ៍ព័ត៌មានរបស់វិទ្យុអាស៊ីសេរី ដែលត្រូវបានផ្សព្វផ្សាយបន្តលើបណ្ដាញសង្គមដែលថា មានសកម្មភាពដឹកជញ្ជូនឈើចេញពីរោងអារឈើរបស់ក្រុមហ៊ុន អាំងអេន អាសូស៊ីអេត ឡយឺរ អិលធីឌី ក្នុងតំបន់ស្ដារបាតអាងនៃទំនប់វារីអគ្គិសនីសេសានក្រោម ២។
យោងតាមសេចក្តីប្រកាសព័ត៌មាន ដែលចេញដោយមន្ទីរកសិកម្ម ខេត្តស្ទឹងត្រែង ចុះថ្ងៃទី ៧ ខែ មេសា ឆ្នាំ ២០១៩ បានគូសបញ្ជាក់ថា៖ «ចាប់តាំងពីក្រសួងកសិកម្ម រុក្ខាប្រមាញ់ និងនេសាទ បានចេញប្រកាសលុបចោលរោងម៉ាស៊ីនអារ កែច្នៃឈើរបស់ក្រុមហ៊ុន អាំងអេន អាសូស៊ីអេត ឡយឺរ អិលធីឌី ដែលមានទីតាំងស្ថិតនៅក្នុងឃុំក្បាលដំរី និងឃុំភ្លុក ស្រុកសេសាន ខេត្តស្ទឹងត្រែង កាលពីថ្ងៃទី ២៧ ខែ មីនា ឆ្នាំ ២០១៩ រហូតមកដល់ពេលនេះ គឺគ្មានសកម្មភាពដឹកជញ្ជូនឈើចេញពីតំបន់បាតអាងនៃទំនប់វារីអគ្គិសនីសេសានក្រោម ២ នោះទេ»។
ជាមួយគ្នានេះ មន្ទីរកសិកម្ម ខេត្តស្ទឹងត្រែងបានចាត់ទុករបាយការណ៍ព័ត៌មានរបស់វិទ្យុអាស៊ីសេរីដែលបានផ្សព្វផ្សាយកាលពីយប់ថ្ងៃទី ៦ ខែ មេសា ឆ្នាំ ២០១៩ ដែលថា មានករណីធ្វើសកម្មភាពដឹកជញ្ជូនឈើចេញពីរោងអារឈើរបស់ក្រុមហ៊ុន អាំងអេន អាសូស៊ីអេត ឡយឺរ អិលធីឌី ក្នុងការសម្អាតបាតអាងនោះ គឺជា «ព័ត៌មានមិនពិត និងបំផ្លើសព័ត៌មានទាំងស្រុង»។
ចំណែកនៅឯខេត្តរតនគិរី ផ្នែករដ្ឋបាលព្រៃឈើបកែវ កំពុងបន្តនីតិវិធីទៅតាមផ្លូវច្បាប់ ប្រឆាំងទៅនឹងម្ចាស់ទីតាំងស្តុកឈើលួចលាក់ខុសច្បាប់ម្នាក់ឈ្មោះ ប៉ូយ គាវ ជាជនជាតិភាគតិចចារាយ មានទីលំនៅភូមិ-ឃុំប៉ក់ញ៉ៃ ស្រុកអូរយ៉ាដាវ ក្រោយពីសមត្ថកិច្ចចម្រុះខេត្ត បានចុះឆែកឆេរ និងរកឃើញកំណាត់ឈើខុសច្បាប់ជាច្រើនដុំដែលត្រូវបានគេគ្រោងនាំចេញទៅលក់បន្តនៅឯប្រទេស វៀតណាម។
លោក ហុង វ៉ាន់ឌាន នាយផ្នែករដ្ឋបាលព្រៃឈើបកែវ បានប្រាប់ភ្នំពេញប៉ុស្តិ៍ថា នៅល្ងាចថ្ងៃទី ៧ ខែ មេសា ឆ្នាំ ២០១៩ ក្រុមកម្លាំងសមត្ថកិច្ចចម្រុះខណ្ឌរដ្ឋបាលព្រៃឈើខេត្តរតនគិរី បានទទួលព័ត៌មានពីក្រុមបណ្ដាញសកម្មជនព្រៃឈើម្នាក់ថា មានកំណាត់ឈើជាច្រើនដុំ ត្រូវបានគេដឹកចេញពីក្នុងព្រៃនៃទឹកដីស្រុកអណ្ដូងមាស យកមកលាក់ទុកនៅក្នុងទីតាំងមួយកន្លែង ដែលស្ថិតនៅក្បែរទីស្នាក់ការប៉ុស្តិ៍រដ្ឋបាលឃុំប៉ក់ញ៉ៃ ស្រុក អូរយ៉ាដាវ ដើម្បីនាំយកទៅលក់បន្តឲ្យឈ្មួញក្នុងប្រទេស វៀតណាម។
លោកបន្តថា ក្រោយពីទទួលបានព័ត៌មាននេះ ក្រុមសមត្ថកិច្ចចម្រុះខណ្ឌរដ្ឋបាលព្រៃឈើខេត្ត សហការជាមួយកម្លាំងកងរាជអាវុធហត្ថខេត្ត និង ក្រោមការសម្របសម្រួលផ្នែកច្បាប់ដោយ លោក រ៉ាបូ រ៉ាន់នី ព្រះរាជ អាជ្ញារងអមសាលាដំបូងខេត្តរតនគិរី បានចុះធ្វើការឆែកឆេរក្នុងទីតាំងនោះ ហើយបានរកឃើញកំណាត់ឈើប្រភេទសុក្រំ និងស្រឡៅ សរុបចំនួន ១១៤ ដុំ ឬស្មើ ១០ ម៉ែត្រគុប។
លោក វ៉ាន់ឌាន បានបញ្ជាក់ថា៖ «ម្ចាស់ទីតាំងស្តុកឈើលួចលាក់នោះ ឈ្មោះ ប៉ូយ គាវ ជាជនជាតិភាគតិចចារាយ ហើយនៅពេលនេះ ក្រុមការងារយើងខ្ញុំ កំពុងបន្តនីតិវិធីទៅតាមផ្លូវច្បាប់ ដើម្បីឲ្យគាត់ចូលខ្លួនមកដោះស្រាយ ជុំវិញការប្រមូលឈើពីប្រភពមិនច្បាស់លាស់មកសន្និធិ (ធ្វើឲ្យស្របច្បាប់) ដោយខុសច្បាប់»។
ជុំវិញករណីនេះ នគរបាលមូលដ្ឋានម្នាក់បានប្រាប់ភ្នំពេញប៉ុស្តិ៍ក្នុងលក្ខខណ្ឌមិនបញ្ចេញឈ្មោះថា យោងតាមសេចក្ដីរាយការណ៍ពីក្រុមបណ្ដាញសកម្មជនព្រៃឈើថា ឈ្មោះ ប៉ូយ គាវ និងបក្ខពួក បានលួចកាប់ឈើលាក់ទុកនៅក្នុងព្រៃ ក្នុងទឹកដីស្រុកអណ្ដូងមាស ជាច្រើនរយដើម ក្នុងគោលបំណងនាំយកទៅលក់បន្តឲ្យឈ្មួញក្នុងប្រទេស វៀតណាម។
មន្ត្រីនគរបាលរូបនោះបញ្ជាក់ថា៖ «ឈ្មោះ ប៉ូយ គាវ និងបក្ខពួកគ្រោងនាំចេញឈើទាំងនោះទៅកាន់ប្រទេស វៀតណាម នៅថ្ងៃទី ១០ ខែ មេសា ប៉ុន្តែត្រូវបែកការណ៍ ហើយត្រូវបានកម្លាំងសមត្ថកិច្ចចម្រុះថ្នាក់ខេត្តចុះបង្ក្រាបតែម្ដង»៕