ក្រចេះ: រដ្ឋបាលខេត្តក្រចេះដែលមានមន្ទីរជំនាញនានាព្រមទាំងអង្គការ និងក្រុមហ៊ុនរួមគ្នាប្រារព្ធទិវាសត្វផ្សោតទន្លេមេគង្គ ឆ្នាំ ២០១៩ រយៈពេល ៣ ថ្ងៃ គឺចាប់ពីថ្ងៃទី ២៥-២៧ ខែតុលាខាងមុខ នៅទីរួមខេត្តក្រចេះ ដើម្បីពង្រឹងការអភិរក្សសត្វផ្សោតទន្លេមេគង្គសំដៅអភិវឌ្ឍវិស័យទេសចរណ៍ប្រកបដោយនិរន្តរភាពដោយរំពឹងថានឹងមានភ្ញៀវទេសចរចូលរួមប្រមាណ ១០ ម៉ឺន នាក់។
លោក ជួប រតនា ប្រធានមន្ទីរទេសចរណ៍ខេត្តក្រចេះបានប្រាប់ ភ្នំពេញប៉ុស្តិ៍ពីម្សិលមិញថា ទិវានេះធ្វើឡើងក្រោមប្រធានបទ «កើនផ្សោត កើនទេសចរ កើនជីវភាព» ស្របពេលពិភពលោកនឹងចូលរួមអបអរសាទរទិវាសត្វផ្សោតពិភពលោក (World Dolphin Day) ដែលតែងប្រារព្ធឡើងជារៀងរាល់ឆ្នាំនៅថ្ងៃទី ២៤ ខែតុលា។
លោកបញ្ជាក់ថា៖ «តាមការប៉ាន់ស្មាន យើងអាចនឹងទទួលភ្ញៀវទេសចរប្រមាណ ១០ ម៉ឺន នាក់ ក្នុងរយៈពេលហ្នឹង។ អ្វីមួយទៀតសំខាន់គឺប្រជាជនយើងគាត់បានយល់ដឹងកាន់តែច្បាស់អំពីកិច្ចការងារអភិរក្សសត្វផ្សោតនេះ ព្រោះនៅតែមានការនេសាទខុសច្បាប់ ជាពិសេសការដាក់មងពីប្រជាពលរដ្ឋយើង ដែលវាប៉ះពាល់ខ្លាំងដល់សត្វប្រភេទនេះ»។
លោក ជួប រតនា បានបន្តថាក្នុងរយៈពេល ៣ ថ្ងៃ ដែលរៀបចំដោយរដ្ឋបាលខេត្តក្រចេះសហការជាមួយរដ្ឋបាលជលផល មន្ទីរទេសចរណ៍ខេត្តមន្ទីរកសិកម្ម រុកា្ខប្រមាញ់ និងនេសាទ និងអង្គការ WWF រួមទាំងក្រុមហ៊ុនឯកជនផងនោះនឹងមានរៀបចំកម្មវិធីកម្សាន្តជាច្រើន ដូចជាការប្រគំតន្ត្រី តាំងពិព័រណ៍ផលិតផលក្នុងស្រុក កម្មវិធីរត់ប្រណាំង ជិះកង់ ដាំដើមឈើ បោះតង់ ការសម្អាតក្រុង ការទស្សនាសត្វផ្សោត និងរមណីយដ្ឋាននានា ការប្រឡងប្រជែងគំនូរជាដើម។
លោកបញ្ជាក់ថា៖ «ជាមួយនឹងការរៀបចំទិវាសត្វផ្សោតនេះក៏យើងនឹងមានផែនការមេ ប្លង់មេអភិវឌ្ឍ «រមណីយដ្ឋានអន្លង់ផ្សោតកាំពី» ឲ្យក្លាយជារមណីយដ្ឋានស្តង់ដាមួយដែលទាក់ទាញកាន់តែល្អប្រសើរជាងនេះសម្រាប់ផ្តល់បទពិសោធទាំងចំណេះលើជីវសាស្ត្ររបស់សត្វផ្សោត បទពិសោធ ទេសចរណ៍បែបអភិរក្ស»។
លោក សេង ទៀក នាយកប្រចាំប្រទេសនៃមូលនិធិអភិរក្ស និងសង្គ្រោះសត្វព្រៃកម្ពុជាបានប្រាប់ភ្នំពេញប៉ុស្តិ៍ពីម្សិលមិញថា ទិវានេះនឹងជំរុញឲ្យមានការយល់ដឹងកាន់តែខ្លាំងក្នុងការពង្រឹងការអភិរក្សសត្វផ្សោតដែលជាបេតិកភណ្ឌជាតិមានជីវិតរបស់កម្ពុជា។ បន្ថែមពីនេះលោកបញ្ជាក់ថា វាក៏នឹងបង្ហាញឲ្យប្រជាពលរដ្ឋដែលរស់នៅជុំវិញតំបន់មានសត្វផ្សោត បញ្ឈប់ការបៀតបៀនលើសត្វផ្សោត ជាពិសេសប្រើប្រាស់ឧបករណ៍ខុសច្បាប់នានា។
លោកថ្លែងថា៖ «យើងត្រូវមានវិធានការទាំងអស់គ្នាដូចជាការបង្កើនឲ្យមានជម្រើសនៃរបរចិញ្ចឹមជីវិតសម្រាប់អ្នកចាប់ត្រីនៅក្នុងតំបន់ផ្សោតរស់នៅ។ ឧទាហរណ៍ដូចជាការដាំបន្លែ ការចិញ្ចឹមសត្វ និងបង្កើតតំបន់ទេសចរណ៍ធម្មជាតិដែលជាកត្តាសំខាន់។ ប៉ុន្តែចំពោះជនមួយចំនួនដែលបើកអាជីវកម្មរកត្រីក្នុងតំបន់នេះគឺត្រូវតែបញ្ឈប់ ព្រោះតំបន់នេះគឺជាតំបន់ដែលអភិរក្សក្រោមការគ្រប់គ្រងរបស់រដ្ឋបាលជលផល»។
បើតាមលោក សេង ទៀក រហូតមកដល់បច្ចុប្បន្ន ចំនួនសត្វផ្សោតទន្លេមេគង្គមានកំណើនប្រមាណ ១៥% ពោលគឺចាប់ពី ៨០ ក្បាល នៅឆ្នាំ ២០១៥ កើនឡើងដល់ ៩២ ក្បាល នៅឆ្នាំ ២០១៧ ហើយរយៈពេល ៩ ខែដើមឆ្នាំនេះ WWF បានរកឃើញថា មានសត្វផ្សោតបានកើតថ្មីចំនួន ២០ ក្បាល និងបានស្លាប់ក្នុងអំឡុងពេលនេះមានចំនួន ៩ ក្បាល។
ជាមួយនឹងតួលេខខាងលើនាយកអង្គការអភិរក្សសត្វព្រៃរូបនេះអះអាងថាតាមរយៈគម្រោង អភិរក្សសត្វផ្សោតរបស់អង្គការ WWF ជលផលកម្ពុជា រដ្ឋបាលខេត្តក្រចេះ ព្រមទាំងខេត្តស្ទឹងត្រែងនឹងធ្វើជំរឿនលើសត្វផ្សោតជាថ្មីទៀតក្នុងឆ្នាំ ២០២០ ខាងមុខ ដើម្បីឲ្យប្រាកដថាចំនួនសត្វផ្សោតដែលជាសត្វកម្រលើពិភពលោកមានចំនួនប៉ុន្មាននៅទន្លេមេគង្គកម្ពុជា៕