.jpg)
សកម្មភាពកាយស្ដារប្រឡាយមេនៅខេត្តកំពង់ឆ្នាំងកាលពីថ្មីៗកន្លងមក។ រូបថត ANN
កំពង់ឆ្នាំងៈ មន្ទីរធនធានទឹក និងឧតុនិយមខេត្តកំពង់ឆ្នាំងកំពុងពន្លឿនសកម្មភាពស្ដារ និងពង្រីកប្រឡាយទឹក ១ ខ្សែដែលមានប្រវែងជាង ៣ គីឡូម៉ែត្រ ដើម្បីនាំទឹកពីបឹងទន្លេសាបទៅជួយសង្គ្រោះស្រូវប្រាំងជិត ៤ ០០០ ហិកតា របស់ប្រជាកសិករនៅក្នុងឃុំកោះថ្កូវ ស្រុកជលគិរីដែលកំពុងប្រឈមនឹងការខ្វះខាតទឹកស្រោចស្រព។
លោក ដោក ប៊ុនថុន ប្រធានមន្ទីរធនធានទឹក និងឧតុនិយមខេត្តកំពង់ឆ្នាំងបានប្រាប់ភ្នំពេញប៉ុស្ដិ៍ពីម្សិលមិញថា គម្រោងស្តារ និងពង្រីកប្រឡាយមេ ១ ខ្សែនេះបានចាប់ផ្ដើមតាំងពីដើមខែកុម្ភៈ ឆ្នាំ ២០២០ មកម៉្លេះ។ ពោលគឺក្នុងរយៈពេលជាង ១ ខែកន្លងមកនេះក្រុមការងាររបស់មន្ទីរធនធានទឹកសម្រេចបានជាង ៨០ ភាគរយ ហើយក្នុងចំណោមប្រឡាយមេប្រវែង ៣ ៥០០ ម៉ែត្រ និងទទឹងប្រវែង ១២ ម៉ែត្រព្រមទាំងជម្រៅ ៩ ម៉ែត្រ។
លោក ប៊ុនថុន បានបញ្ជាក់ថា៖ «តាមល្បឿនការងាររបស់យើងគឺអាចនឹងរួចរាល់នៅមុនពិធីបុណ្យចូលឆ្នាំខ្មែរឬយ៉ាងយូរបំផុតនោះគឺនៅដំណាច់ខែមេសាខាងមុខនេះ»។
បើតាមលោក ប៊ុនថុន ក្រៅពីការងារស្ដារ និងពង្រីកប្រឡាយមេនេះមន្ទីរធនធានទឹក និងឧតុនិយមខេត្តកំពង់ឆ្នាំងបានរៀបចំធ្វើខ្នងទំនប់ឲ្យក្លាយទៅជាផ្លូវផងដែរ ដើម្បីឲ្យពលរដ្ឋអាចដឹកកសិផលបាន និងរៀបចំសង់ទំនប់ស្ទាក់ទឹកទុកសម្រាប់ប្រជាកសិករប្រើប្រាស់នៅរដូវប្រាំង។
លោកបានបន្ថែមថា៖ «យើងរំពឹងថានៅរដូវប្រាំងឆ្នាំក្រោយនេះប្រជាកសិករនៅស្រុកគិរីជលសារទាំងមូលនឹងអស់បញ្ហាខ្វះទឹកស្រោចស្រពស្រូវប្រាំងទៀតហើយ។ ប្រជាកសិករអាចធ្វើស្រូវប្រាំងបាន ២ ដងក្នុង ១ ឆ្នាំ ប្រសិនបើបរិមាណទឹកភ្លៀង និងទឹកទន្លេមេគង្គព្រមទាំងទឹកបឹងទន្លេសាបមានការកើនឡើងច្រើនជាងឆ្នាំនេះ»។
ការប្រែប្រួលអាកាសធាតុនាប៉ុន្មានឆ្នាំចុងក្រោយនេះបានធ្វើឲ្យប្រជាកសិករប្រឈមនឹងបញ្ហាកខ្វះទឹកស្រោចស្រព ជាពិសេសនៅរដូវប្រាំងដែលមានភាពរាំងស្ងួត និងក្ដៅហួតហែងខ្លាំង។
លោក ងិន ហ៊ុន ប្រធានមន្ទីរកសិកម្ម រុក្ខាប្រមាញ និងនេសាទ ខេត្តកំពង់ឆ្នាំង បានប្រាប់ភ្នំពេញប៉ុស្តិ៍ពីម្សិលមិញថា ដោយសារបរិមាណទឹកភ្លៀង និងទឹកទន្លេសាបនៅឆ្នាំនេះមានកម្រិតតិចតួចជាងឆ្នាំមុនៗនោះធ្វើឲ្យការបង្កបង្កើនផលស្រូវរបស់ប្រជាកសិករបានជួបការខ្វះខាតទឹកស្រោចស្រពដំណាំ ជាពិសេសនៅស្រុកជលគិរី និងស្រុកកំពង់លែងដែលក្នុងប្រព័ន្ធប្រឡាយមួយចំនួនត្រូវគោករីងស្ងួតអស់។
លោកបានបញ្ជាក់ថា៖ «យ៉ាងណាក៏ដោយបញ្ហាប្រឈមនេះក៏ព្រោះតែប្រជាកសិករដាំដុះស្រូវប្រាំងលើសពីផែនការដែលមន្ទីរកសិកម្មខេត្តកំពង់ឆ្នាំងបានកំណត់រហូតដល់ជិត ១ ម៉ឺនហិកតា»។
លោកបានបន្តថា ក្នុងផែនការដាំដុះស្រូវប្រាំងសម្រាប់ឆ្នាំ ២០២០ នេះមន្ទីរបានកំណត់ផ្ទៃដីដាំដុះត្រឹមតែ ៣ ២០០ ហិកតាប៉ុណ្ណោះ ប៉ុន្តែប្រជាកសិករនៅទូទាំងខេត្តបាននាំគ្នាដាំដុះស្រូវប្រាំងរហូតដល់ជាង ៤០ ០០០ ហិកតា ជាពិសេសពលរដ្ឋនៅឃុំកោះថ្កូវ ស្រុកជលគិរីបានដាំដុះស្រូវប្រាំងច្រើនជាងគេ។
ទោះជាយ៉ាងណាលោក ចិន ផាន់ណា មេឃុំកោះថ្កូវបានថ្លែងថា ភូមិសាស្ត្រឃុំកោះថ្កូវជាតំបន់វាលទំនាបមិនអាចធ្វើស្រូវវស្សាបានទេ គឺផ្ទៃដី ៩៩ ភាគរយ អាចដាំដុះស្រូវប្រាំងតែ ១ មុខប៉ុណ្ណោះ។ នៅឆ្នាំនេះពលរដ្ឋក្នុងឃុំបាននាំគ្នាដាំដុះស្រូវប្រាំងលើផ្ទៃដី ៦ ៤០០ ហិកតា ក៏ប៉ុន្តែពេលនេះស្រូវប្រាំងជិត ៤០០០ ហិកតាកំពុងប្រឈមនឹងការខ្វះខាតទឹកដើម្បីស្រោចស្រព។
លោកបានបញ្ជាក់ថា៖ «ប៉ុន្តែមួយរយៈមកនេះខាងក្រសួង និងមន្ទីរធនធានទឹកបានចុះអន្តរាគមន៍បូមទឹកដាក់ដីស្រែទាំងនោះជាបន្តបន្ទាប់ ដើម្បីសង្គ្រោះស្រូវដែលកំពុងចេញផ្លែ [កួរស្រូវ] មកហើយនោះកុំឲ្យវាស្កក» ។
លោក ផាន់ណា បានបន្ថែមថា ឆ្លើយតបនឹងសំណូមពររបស់ប្រជាកសិករ អាជ្ញាធរខេត្តតាមរយៈមន្ទីរធនធានទឹកបានជួយ ស្ដារ និងពង្រីកប្រឡាយមេ ១ ខ្សែដែលតភ្ជាប់ពីបឹងទន្លេសាបមកកាន់តំបន់ស្រូវប្រាំងរបស់អ្នកភូមិគជ្រំ ឃុំកោះថ្កូវជិត ១ ០០០ ហិកតា ដែលតែងខ្វះខាតទឹកជារៀងរាល់ឆ្នាំ។
ជុំវិញការស្ដារ និងពង្រីកប្រឡាយមេនេះ ប្រជាកសិករនៅភូមិគជ្រំ លោក ប៊ិន សុផាន អាយុ ៥០ ឆ្នាំ ដែលអះអាងថា មានដីស្រែប្រាំងជាង ៥ ហិកតាបានប្រាប់ភ្នំពេញប៉ុស្តិ៍ថា គាត់នឹងធ្វើស្រូវប្រាំងឲ្យអស់ដីប្រសិនបើប្រឡាយមេនោះ អាចនាំទឹកចូលមកតំបន់ស្រូវប្រាំងក្នុងភូមិរបស់គាត់នៅឆ្នាំក្រោយមែននោះ។
លោកថ្លែងថា៖ «ជាង ៣០ ឆ្នាំមកនេះខ្ញុំធ្វើស្រូវប្រាំងបានត្រឹមតែ ៣ ហិកតាប៉ុណ្ណោះ ព្រោះគ្មានទឹកគ្រប់គ្រាន់សម្រាប់ស្រោចស្រព។ ខ្ញុំពិតជាត្រេកអរណាស់ នៅពេលឃើញអាជ្ញាធរចុះមកជីកស្ដារ និងពង្រីកប្រព័ន្ធប្រឡាយមេ សម្រាប់នាំទឹកពីបឹងទន្លេសាបមកកាន់តំបន់ស្រូវប្រាំងក្នុងភូមិយើងខ្ញុំ។
ខ្ញុំរំពឹងថា ខ្ញុំអាចដាំដុះស្រូវលើផ្ទៃដីទាំងជាង ៥ ហិកតា របស់ខ្ញុំនៅឆ្នាំក្រោយ»។
លោក សំ សុផល អាយុ ៥៥ ឆ្នាំ ដែលរស់នៅភូមិគជ្រំនោះដែរបានថ្លែងថា លោកមានដីស្រែតែ ២ ហិកតាប៉ុណ្ណោះ ប៉ុន្តែរាល់ឆ្នាំស្រូវរបស់គាត់ប្រមាណ ២០ ភាគរយ ត្រូវស្កកខូច ដោយសារការខ្វះទឹក។
លោកថា៖ «មិនមែនតែគ្រួសារខ្ញុំទេ ដែលរីករាយអ្នកភូមិទាំងអស់សុទ្ធតែរីករាយចំពោះសកម្មភាពចុះជួយអន្តរាគមន៍ជីកស្ដារប្រឡាយមេនេះ»។
លោកបានរំពឹងទុកថា នៅពេលប្រឡាយមេនេះស្ដាររួចលំហូរទឹកពីបឹងទន្លេសាបនឹងហូរចាក់មកតំបន់ស្រូវប្រាំងក្នុងភូមិរបស់លោក ហើយគ្រួសារលោក និងអ្នកភូមិអាចនឹងមានទឹកគ្រប់គ្រាន់សម្រាប់ធ្វើស្រូវប្រាំងហើយស្រូវនឹងលែងស្កកដូចឆ្នាំនេះ និងឆ្នាំមុនៗទៀត៕
