ប៉ៃលិនៈ នៅសល់ប្រមាណតែ ១ សប្តាហ៍ទៀតប៉ុណ្ណោះ មន្ទីរបរិស្ថានខេត្តប៉ៃលិន នឹងបញ្ជូនសំណុំរឿង អតីតមន្ត្រីឧទ្យានុរក្សម្នាក់ ដែលលួចកាប់ដើមគគីរធំៗចំនួន ២ ដើម នៅក្នុងព្រៃអភិរក្សទៅតុលាការបើជននេះមិនព្រមបង់ប្រាក់ពិន័យចំនួន ៣១ លានរៀល ខណៈដែលមានការអះអាងថា តំបន់ព្រៃអភិរក្សសំឡូត នៅតែមានជនខិលខូចលួចចូលកាប់បំផ្លាញជារៀងរាល់ថ្ងៃ។
ដើមគគីរធំៗ ២ ដើម ដែលមានអាយុកាលជាង ១០០ ឆ្នាំ មានកម្ពស់ជាង ៥០ ម៉ែត្រ និងមានមុខកាត់ ១ ម៉ែត្រ នៅក្នុងតំបន់ព្រៃអភិរក្សសំឡូតស្ថិតក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ត្រូវបានអតីតមន្ត្រីឧទ្យានុរក្សម្នាក់លួចអារផ្តួលរំលំកាលពីអំឡុងបុណ្យចូលឆ្នាំខ្មែរ ហើយត្រូវបានមន្ទីរបរិស្ថានខេត្តប៉ៃលិន ពិន័យបុរសរូបនោះ ដោយតម្រូវឲ្យបង់ប្រាក់ចំនួន ៣១ លានរៀល ឬស្មើជាង ៧ ពាន់ដុល្លារ ឱ្យបានមុនថ្ងៃទី ៥ ខែ មិថុនា ហើយបើពុំព្រមបង់ប្រាក់ទៅតាមពេលកំណត់ទេ នឹងត្រូវបញ្ជូនសំណុំរឿងទៅតុលាការ។
លោក គឹម សុខា ប្រធានមន្ទីរបរិស្ថានខេត្តប៉ៃលិន បានប្រាប់ភ្នំពេញប៉ុស្ដិ៍កាលពីម្សិលមិញថា មន្ត្រីរបស់មន្ទីរបរិស្ថាន បានរកឃើញដើមគគីរធំៗទាំង ២ ដើម ត្រូវគេលួចអារផ្តួលរំលំ កាលពីថ្ងៃទី ១៣ ខែ មេសា ហើយបន្ទាប់ពីការស៊ើបអង្កេតក៏បានរកឃើញជនសង្ស័យម្នាក់ឈ្មោះ ឆាយ ឡៃ អាយុ ៥០ ឆ្នាំ ដែលធ្លាប់ជាអតីតមន្ត្រីឧទ្យានុរក្សពីឆ្នាំ ២០០៥ ដល់ឆ្នាំ ២០១៦។
លោកបន្តថា ជននេះបានឆ្លើយសារភាព នៅពេលត្រូវនាំមកសាកសួរ នៅមន្ទីរកាលពីថ្ងៃទី ២២ ខែ មេសា ជននេះនិយាយថា ការអារផ្តួលរំលំដើមគគីរទាំង ២ ដើមគឺដើម្បីយកទៅសាងសង់ផ្ទះ។
លោកបន្ថែមថា មន្ទីរបានសម្រេចពិន័យចំនួន ៣១ លានរៀល ហើយបើមិនបង់ការផាកពិន័យតាមកាលកំណត់ទេ លោកនឹងបញ្ជូនសំណុំរឿងទៅឱ្យតុលាការស្របពេលដែលត្រាក់ទ័រ ១ គ្រឿង ដែលរឹបអូសបាន ត្រូវបានបញ្ជូនទៅរក្សាទុកនៅតុលាការរួចហើយ។
លោកបន្តថា៖ «គាត់ត្រូវបានបណ្ដេញចេញ (ពីមន្ត្រីឧទ្យានុរក្ស) ដោយសារលួចបើកដៃឱ្យមានការកាប់ឈើកន្លងមកហើយជាប់ពាក់ព័ន្ធករណីច្រើនណាស់។ យើងបានពិន័យគាត់ជាអន្តរកាលហើយហើយបើគាត់រត់មិនព្រមបង់ទេ យើងដាក់អាត្រាក់ទ័រគាត់តម្លៃ ២-៣ ម៉ឺនដុល្លារដែរ ជាទ្រព្យសម្បត្តិរដ្ឋទៅ។ ថ្ងៃនេះ ខ្ញុំបានឱ្យមន្ត្រីទៅដាស់តឿនគាត់ម្ដងទៀត អំពីការផុតកំណត់នៃការបង់ប្រាក់»។
បើតាមលោក សុខា ដើមគគីរទាំង ២ ដើម ត្រូវរក្សាទុកនៅក្នុងព្រៃនៅឡើយ ហើយនឹងអាចដឹកមករក្សាទុកនៅក្នុងមន្ទីរនៅពេលមានការសម្រេចពីតុលាការ។
តំបន់ព្រៃអភិរក្សសំឡូតមានទំហំប្រហែល ៦ ម៉ឺនហិកតា ដែល ២ ភាគ ៣ នៃព្រៃនេះ គឺស្ថិតក្នុងខេត្តប៉ៃលិន រីឯ ១ ភាគ ៣ ទៀត ស្ថិតក្នុងទឹកដីនៃខេត្តបាត់ដំបង។ ប៉ុន្តែបច្ចុប្បន្ននេះ ព្រៃឈើតំបន់សំឡូត នៅសល់ប្រហែល ៤ ម៉ឺនហិកតាប៉ុណ្ណោះ ដោយសារមានបទល្មើសកាប់បំផ្លាញព្រៃឈើកើតឡើងជាច្រើន។ នេះបើតាមការលើកឡើងពីមន្ត្រីអង្គការសង្គមស៊ីវិល។
លោក គង់ មុនីច័ន្ទ នាយកអង្គការអភិរក្សព្រៃឈើ ម៉ាដក្ស ចូលី ភីត (MJP) ដែលអង្គការនេះ បានផ្ដល់មូលនិធិសម្រាប់ការពារព្រៃអភិរក្សសំឡូតបានលើកឡើងថា តំបន់ព្រៃឈើស្ថិតក្នុងខេត្តប៉ៃលិន គឺរងការកាប់បំផ្លាញច្រើនជាងនៅក្នុងខេត្តបាត់ដំបង។ លោកយល់ថា បទល្មើសព្រៃឈើទាំងនោះ កើតឡើង ដោយសារ តែការអប់រំឱ្យយល់ដឹងអំពីតម្លៃនៃព្រៃឈើនៅមានកម្រិត។
លោកថា ចំណែកឧបករណ៍សម្រាប់ទាក់សត្វព្រៃ ស្ថិតនៅតំបន់ព្រៃឈើសំឡូតទាំងនៅក្នុងខេត្តប៉ៃលិន និងខេត្តបាត់ដំបងក៏ត្រូវបានគេរកឃើញជារៀងរាល់ថ្ងៃដែរ។
លោកថា៖ «ជាទូទៅបើនិយាយអំពីវិធានការការពារ គឺយើងប្រឹងសព្វប្រឹងគ្រប់ហើយវានៅតែពាក់ព័ន្ធទៅលើចិត្តគំនិត និងអារម្មណ៍របស់មនុស្សលោភលន់ទេដែលនៅតែចង់បានព្រោះបើយើងការពារ គឺទាល់តែយើងដាក់មនុស្សម្នាក់ការពារដើមឈើ ១ ដើម ២៤ ម៉ោង ទើបអត់បាត់»។
បើតាមលោក មុនីច័ន្ទ នៅមុនពិធីបុណ្យអុំទូកខាងខេត្តកំពង់ឆ្នាំង ធ្លាប់ដាក់លិខិតស្នើសុំមន្ទីរបរិស្ថានខេត្តប៉ៃលិនដើម្បីសុំដើមឈើយកទៅកែច្នៃធ្វើទូក ហើយក្រោយមកខាងប្រធានមន្ទីរ ក៏ឱ្យមន្ត្រីរបស់ខ្លួនចេញ ទៅរកនៅក្នុងព្រៃ និងបានរកឃើញហើយចង់ឱ្យកាប់ដើមគគីរធំៗទាំង ២ នេះ។ ប៉ុន្តែក្រោយមកខាងក្រសួងបរិស្ថាន បានបដិសេធ បន្ទាប់ពីទទួលបានលិខិតរបស់សង្គមស៊ីវិល ពាក់ព័ន្ធនឹងការចង់កាប់ដើមគគីរទាំង ២ ដើមនោះ។
ជុំវិញបញ្ហានេះ លោក មិន រ៉ាវុធ ប្រធានរដ្ឋបាលព្រៃឈើខេត្តប៉ៃលិនបានបញ្ជាក់ថា លោកមិនបានដឹងរឿងនេះទេ ដោយសារព្រៃឈើសំឡូតគឺ ស្ថិតក្រោមការគ្រប់គ្រងរបស់ក្រសួងបរិស្ថាន៕