.jpg)
ពូជផ្កាសាគូរ៉ាពណ៌ផ្កាឈូកដិត jindai-akebono ធន់នឹងជំងឺរុក្ខជាតិជាផ្កាសាគូរ៉ាពណ៌សដ៏សម្បូរដុះតាមផ្លូវ។ AFP
ក្រចេះ: មន្ទីរបរិស្ថានខេត្តក្រចេះបានបញ្ជូនសំណាកទឹកបឹងរំលាចស្ថិតក្នុងសង្កាត់អូរឫស្សី ក្រុងក្រចេះ មកពិនិត្យរកសារធាតុពុលនៅក្រសួងបរិស្ថានក្រោយពីទឹកបឹងនេះ ត្រូវបានរោងចក្រច្នៃដំឡូងមីមួយបង្ហូរទឹកកខ្វក់ចូលបង្កការភ្ញាក់ផ្អើលដល់ពលរដ្ឋ ប៉ុន្តែភាគីរោងចក្របានអះអាងថា ជាទឹកស្អាតដែលបង្ហូរសាកល្បងតាមបំពង់ទុយោទុកចោលយូរប៉ុណ្ណោះ។
លោក ដួង ឆាយសាវុធ ប្រធានមន្ទីរបរិស្ថានខេត្តក្រចេះប្រាប់ភ្នំពេញប៉ុស្ដិ៍ថា កាលពីថ្ងៃទី ១៧ កុម្ភៈ ពលរដ្ឋបានផ្អើលថា ទឹកបឹងរំលាចមានផ្ទុកជាតិពុលនៅពេលបានឃើញត្រីក្នុងបឹងនោះងាប់បន្ទាប់ពីមានករណីបង្ហូរទឹកកខ្វក់ចេញពីរោងចក្រច្នៃដំឡូងរបស់ជនជាតិកូរ៉េមួយឈ្មោះ Sing Song។
លោកបន្តថា ក្រោយមានការភ្ញាក់ផ្អើលបែបនេះ លោកជាមួយអាជ្ញាធរសង្កាត់ និងក្រុងបានចុះទៅពិនិត្យផ្ទាល់ដល់រោងចក្រ ហើយក្រោយមកក៏បានយកសំណាកទឹកបឹងមកពិនិត្យរកជាតិគីមីពុលនៅក្រសួងបរិស្ថាន។
លោក ឆាយសាវុធ បន្ថែមថា ប៉ុន្តែបើតាមការបញ្ជាក់ពីភាគីរោងចក្រគឺកាលពីថ្ងៃទី ៧ ខែកុម្ភៈកន្លងទៅ រោងចក្រពិតជាបានបង្ហូរទឹកចូលបឹងរំលាចមែន ប៉ុន្តែគេថាជាទឹកស្អាតទេដើម្បីសាកល្បងទុយោដែលទុកចោលយូរក្រែងមានកន្លែងធ្លុះធ្លាយ។ ក្រុមហ៊ុនប្រាប់លោកទៀតថា ទឹកស្អាតនោះ ក៏បានហូរមកជាមួយទឹកដែលមានក្លិនស្អុយសល់ក្នុងបំពង់ទុយោតាំងពីយូរ ទើបពលរដ្ឋថាជាទឹកកខ្វក់បែបនេះ។
លោកថា៖ «ប៉ុន្តែយើងមិនទាន់សន្និដ្ឋានថាកំណត់កម្រិតទឹកនោះពុលឬមួយយ៉ាងម៉េចទេ រង់ចាំសំណាកទឹកខ្ញុំយកទៅមើល ហើយមិនទាន់មានលទ្ធផលព្រោះទាមទារពេលវេលា។ ប៉ុន្តែសម្រាប់ការសន្និដ្ឋានរបស់មន្ទីរ គឺ ទី ១ ពិតជាមានការបង្ហូរទឹកមែន ហើយទី ២ ករណីថាពុលត្រីនោះយើងមិនទាន់អាចថាពុលដោយសារទឹកនោះទេ ព្រោះរយៈពេលប៉ុន្មានថ្ងៃនេះនៅខេត្តក្រចេះ មានការឡើងកម្ដៅបន្តិច ហើយទីតាំងពុលនោះគឺទឹករាក់ហើយត្រី កាលណាវាក្ដៅវាហើបក្បាលកាលពីយើងនៅតូចៗក៏ធ្លាប់ឃើញត្រីហើបក្បាលអ៊ីចឹងដែរ»។
ចំណែកលោក ឈឺន រិទ្ធ ចៅសង្កាត់អូរឫស្សី បានថ្លែងកាលពីថ្ងៃចន្ទថា បឹងរំលាចគឺមានទំហំប្រហែល ៣០ ហិកតា និងលាតសន្ធឹងក្នុងសង្កាត់ចំនួន ៣ នៃក្រុងក្រចេះគឺសង្កាត់ក្រចេះ សង្កាត់រកាកណ្ដាល និងសង្កាត់អូរឫស្សីដែលជាសង្កាត់រងផលប៉ះពាល់ជាងគេ។ លោកបន្តថា ថ្វីដ្បិតពេលនេះមិនមានពលរដ្ឋជួបបញ្ហាសុខភាពក្ដី ប៉ុន្តែបឹងរំលាចនេះគឺជាប្រភពផ្ដល់ការនេសាទត្រីដ៏សំខាន់ក្នុងតំបន់ និងជាប្រភពទឹកផឹកសម្រាប់សត្វពាហនៈដូច្នេះហើយទើបពលរដ្ឋបារម្ភអំពីសុខភាពនៅថ្ងៃខាងមុខ។
លោកចៅសង្កាត់រូបនេះ បន្តថា បន្ទាប់ពីមានការបង្ហូរទឹកចេញពីរោងចក្រ ទឹកបឹងក្នុងសង្កាត់អូរឫស្សីក៏ចាប់ផ្ដើមប្រែពណ៌ខុសពីធម្មតាដែរ។
លោកថា៖ «វាគ្រាន់តែជាការបារម្ភ ប៉ុន្តែមិនទាន់បញ្ហាគ្រោះថ្នាក់ដល់ជីវិតនិងសុខភាពពលរដ្ឋនៅឡើយទេ។ខ្ញុំបានចុះមើលទឹកបឹងហ្នឹង វាប្រែពណ៌កខ្វក់ជាងមុន ប៉ុន្តែបើធ្វើស្រែល្អវិញ យើងបារម្ភអំពីគោក្របីហើយការចុះងូតអីអាចរមាស់»។
លោក យិន វណ្ណៈ អភិបាលក្រុងក្រចេះលើកឡើងដែរថា អាជ្ញាធរធ្លាប់ចុះណែនាំខាងរោងចក្រច្នៃដំឡូងមីនេះច្រើនលើករួចមកហើយ ចំពោះការបង្ហូរទឹកចេញពីរោងចក្របែបនេះដោយត្រូវជូនដំណឹងមកអាជ្ញាធរជាមុន។
លោកថា៖ «ក្នុងនាមអាជ្ញាធរដែនដី ទាំងក្រុងទាំងសង្កាត់មិនមែនមានន័យថា បណ្ដោយឱ្យក្រុមហ៊ុនហ្នឹងធ្វើអីៗប៉ះពាល់ពលរដ្ឋតាមចិត្ត អត់ទេ អ៊ីចឹងនៅពេលមានបញ្ហា យើងតែងចុះទៅណែនាំច្រើនលើកច្រើនសាដែរ ពាក់ព័ន្ធនឹងការងារបច្ចេកទេសនេះ»។
យ៉ាងណាក្ដី លោក លួន មនោសិលា ប្រធានរដ្ឋបាលក្រុមហ៊ុន Sing Song ឆ្លើយប្រាប់ភ្នំពេញប៉ុស្ដិ៍ថា ទឹកដែលបង្ហូរនោះគឺជាទឹកស្អាត ដោយបង្ហូរសាកល្បងតាមទុយោដែលឈប់ប្រើច្រើនខែតែគ្រោងយកមកប្រើឡើងវិញនៅពេលរោងចក្រអាចបំប្លែងទឹកកខ្វក់ក្នុងរោងចក្រនាពេលខាងមុខ។
លោកបន្តថា មូលហេតុនាំឱ្យមានការចោទក្រុមហ៊ុនថា បង្ហូរទឹកកខ្វក់ចូលបឹង ដោយសារទឹកដក់ក្នុងទុយោជាទឹកស្អុយស្រាប់ហើយពេលបង្ហូរទឹកស្អាតក៏នាំទាំងទឹកស្អុយចូលបឹង ទើបធ្វើឱ្យត្រីក្នុងបឹងកញ្ជ្រោលហើយផ្អើលដល់ពលរដ្ឋចុះចាប់ តែមិនមែនជាករណីពុលងាប់អណ្ដែតពេញបឹងទេ។
លោកថា៖ «តាមខ្ញុំចុះទៅមើលគឺមិនបានឃើញត្រីក្នុងបឹងងាប់អីទេ»។
លោក នេត្រ ភក្ត្រា មន្ត្រីនាំពាក្យក្រសួងបរិស្ថានលើកឡើងថា លោកមិនទាន់ទទួលដំណឹងអំពីការបញ្ជូនសំណាកទឹករំលាចពីក្រុងក្រចេះមកពិសោធរកជាតិពុលនៅក្រសួងបរិស្ថាននៅឡើយទេ ៕
