.jpg)
លោក ផាន អូន ថ្លែងទៅកាន់អ្នកកាសែត។ រូបថត ក្រសួងពាណិជ្ជកម្ម
ភ្នំពេញៈ អគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» កាលពីម្សិលមិញបានបង្ហាញលទ្ធផលវិភាគរបស់មន្ទីរពិសោធន៍ទទួលស្គាល់ជាអន្តរជាតិនៅប្រទេសសិង្ហបុរីថា សារជាតិដែក (Iron) នៅក្នុងម្សៅទឹកដោះគោ Nutrilatt មានកម្រិតទាបជាងការប្រកាសរបស់ក្រុមហ៊ុន និងស្តង់ដាកូដិចអន្តរជាតិ។
ការបង្ហាញលទ្ធផលវិភាគនេះធ្វើឡើងដោយ លោក ផាន អូន អគ្គនាយក នៃអគ្គនាយកដ្ឋាន ក.ប.ប. និងមានការចូលរួមពីតំណាងមាតាបិតានៃទារករងគ្រោះតំណាងក្រុមហ៊ុន Nutrilatt តំណាងអង្គការ WHO អង្គការ UNICEF អង្គការ Helen Keller International និងតំណាងមជ្ឈមណ្ឌលគាំពារមាតា និងទារកនៃក្រសួងសុខាភិបាល។
លោក ផាន អូន បានថ្លែងប្រាប់ភ្នំពេញប៉ុស្ដិ៍កាលពីថ្ងៃពុធ ថា លទ្ធផលវិភាគម្សៅទឹកដោះគោម៉ាក Nutrilatt លើលេខ Batch ចំនួន ៦ (B/N: 487, 488, 536, 537, 538, 539) ដែលធ្វើការវិភាគដោយមន្ទីរពិសោធន៍ឯករាជ្យ និងមានការទទួលស្គាល់ជាអន្តរជាតិ (Independent and Internationally Accredited Laboratory) ឈ្មោះ Eurofins Food Testing Singapore PTE LTD. នៅប្រទេសសិង្ហបុរី បង្ហាញថា ជាតិដែក (Iron) ដែលមាននៅក្នុងម្សៅទឹកដោះគោទាំងនេះមានកម្រិតទាបជាងការប្រកាសរបស់ក្រុមហ៊ុន និងស្តង់ដាកូដិចអន្តរជាតិ (Codex International Standard)។
លោកបានបញ្ជាក់ថា៖ «ក្រោយការបង្ហាញលទ្ធផលនេះ យើងចង់ឱ្យមាននីតិវិធីដោះស្រាយសំណងជូនជនរងគ្រោះតាមរដ្ឋប្បវេណី។ បើសិនជាក្រុមហ៊ុនគាត់អាចដោះស្រាយបានជាមួយមាតាបិតាទារកដែលរងគ្រោះនោះ។ បើសិនជាគាត់មិនព្រមទេ យើងនឹងបញ្ជូនសំណុំរឿងនេះបន្តទៅដោះស្រាយតាមនីតិវិធីតុលាការ»។
លោក ផាន អូន បានឲ្យដឹងថា បច្ចុប្បន្ន ក.ប.ប. កំពុងសុំគោលការណ៍ពីរដ្ឋមន្ដ្រីក្រសួងពាណិជ្ជកម្ម ដើម្បីបញ្ឈប់ការចែកចាយលក់ផលិតផលម្សៅទឹកដោះគោនេះ។ លោកបញ្ជាក់ថា៖ «ទោះបីជាយ៉ាងណាក៏ដោយ ដើម្បីសុខុមាលភាព ប្រជាពលរដ្ឋយើងត្រូវតែដើរត្រួតពិនិត្យមើល។ (ថ្ងៃព្រហស្បតិ៍ ទី ២៦ ខែសីហា នេះ) ក្នុងកិច្ចប្រជុំប្រចាំខែ យើងនឹងណែនាំឱ្យមន្ដ្រីចុះពិនិត្យមើលម្សៅទឹកដោះគោនេះ បើមានលក់នៅលើទីផ្សារយើងនឹងដកហូត»។
លោកបន្ដថា បញ្ហាខ្វះជាតិដែកនេះ ទារកដែលប្រើប្រាស់ម្សៅទឹកដោះគោនេះ អាចប្រឈមនឹងបញ្ហាស្លេកស្លាំង អស់កម្លាំង កាយវិការសរីរាង្គចុះខ្សោយ ដែលបច្ចុប្បន្នមាតាបិតាទារកដែលបានជួបបញ្ហាសរុបមាន ១៦ គ្រួសារ ក្រោយពេលឱ្យទារកប្រើប្រាស់ម្សៅទឹកដោះគោនេះហើយជួបបញ្ហា និងស្នើមក ក.ប.ប. ដោះស្រាយ។
អ្នកស្រី លីវ សំណាង មាតាទារកម្នាក់ដែលបានប្រើប្រាស់ម្សៅទឹកដោះគោនេះ ហើយកូនកំពុងមានបញ្ហាកើតជំងឺខ្វះគ្រាប់ឈាមក្រហម និងខ្វះជាតិដែកធ្ងន់ធ្ងរ។ លោកស្រីថា ក្រុមមាតាបិតាទារករងគ្រោះកាលពីថ្ងៃទី ៦ ខែកក្កដា ឆ្នាំ ២០២០ បានស្នើទៅលោក ម៉ម ប៊ុនហេង រដ្ឋមន្ត្រីក្រសួងសុខាភិបាលដើម្បីធ្វើការត្រួតពិនិត្យទៅលើគុណភាពម្សៅទឹកដោះគោនេះដែរ។ ប៉ុន្ដែមិនទទួលបានលទ្ធផលណាមួយឡើយ។ ទើបស្នើទៅ ក.ប.ប. រហូតបង្ហាញលទ្ធផលកាលពីថ្ងៃពុធកន្លងមកនេះ។
អ្នកស្រីបានប្រាប់ថា៖ «ក្រុមមាតាបិតាទារករងគ្រោះស្នើឱ្យក្រុមហ៊ុនម្សៅទឹកដោះគោនេះទទួលខុសត្រូវ និងទទួលស្គាល់ជាសាធារណៈថា ម្សៅទឹកដោះគោនេះពិតជាខ្វះជាតិដែកមែន និងស្នើឱ្យក្រុមហ៊ុនត្រូវទាក់ទងទៅមន្ទីរពេទ្យកុមារជាតិ និងមន្ទីរពេទ្យគន្ធបុប្ផា ដើម្បីពិនិត្យមើល និងទទួលខុសត្រូវចំពោះទារកដែលរងគ្រោះព្រោះប្រើប្រាស់ម្សៅទឹកដោះគោនេះ»។
ក្រោយពីអគ្គនាយកដ្ឋាន ក.ប.ប. បង្ហាញលទ្ធផលកាលពីថ្ងៃពុធកន្លងមកនេះក្រុមហ៊ុនម្សៅទឹកដោះនូទ្រីលេត បានចេញលិខិតបដិសេធលើលទ្ធផលនេះទាំងស្រុង ដោយអះអាងថាមានភាពមិនប្រក្រតីជាច្រើន។
លិខិតរបស់ក្រុមហ៊ុនសរសេរថា៖ «ក្រុមហ៊ុនម្សៅទឹកដោះនូទ្រីលេត សូមបដិសេធទាំងស្រុងនូវលទ្ធផលនៃការប្រកាសរបស់ ក.ប.ប។ ក្រុមហ៊ុន Nutrilatt សង្កេតឃើញថា មានភាពមិនប្រក្រតីជាច្រើននៅក្នុងការប្រកាសលទ្ធផលជាឯកតោភាគីរបស់ ក.ប.ប។ លទ្ធផលនោះមានភាពខុសគ្នាយ៉ាងខ្លាំងពីលទ្ធផលដែលក្រុមហ៊ុនទទួលបានពីមន្ទីរពិសោធន៍ BVAQ និងមន្ទីរពិសោធន៍ ALS នៃប្រទេសសិង្ហបុរីដែលមានលេខកូដ 537 / 562 / 563 / 568 ដែល ក.ប.ប តែងតែយកទៅធ្វើពិសោធន៍ និងទទួលស្គាល់ជាផ្លូវការ»។
ឆ្លើយតបនឹងការបកស្រាយរបស់ក្រុមហ៊ុនម្សៅទឹកដោះនូទ្រីលេត ខាងលើ អគ្គនាយកដ្ឋាន ក.ប.ប. បានធ្វើការបដិសេធទាំងស្រុងចំពោះព័ត៌មានក្នុងលិខិតដែលក្រុមហ៊ុននេះបានលើកឡើង៕
