The Phnom Penh Post Search

Search form

Logo of Phnom Penh Post newspaper Phnom Penh Post - មន្ទីរពេទ្យ​មួយ​ជួល​គ្រូពេទ្យ​មកពី​ប្រទេស​កូរ៉េ​ខាង​ជើង




មន្ទីរពេទ្យ​មួយ​ជួល​គ្រូពេទ្យ​មកពី​ប្រទេស​កូរ៉េ​ខាង​ជើង

អ្នកដំណើរ​កំពុង​ធ្វើ​ដំណើរ​ឆ្លងកាត់​មុខ​មន្ទីរពេទ្យ Lipo Long Hua ក្នុង​ក្រុង​ភ្នំពេញ​។
អ្នកដំណើរ​កំពុង​ធ្វើ​ដំណើរ​ឆ្លងកាត់​មុខ​មន្ទីរពេទ្យ Lipo Long Hua ក្នុង​ក្រុង​ភ្នំពេញ​។ រូបថត Eli Meiller

មន្ទីរពេទ្យ​មួយ​ជួល​គ្រូពេទ្យ​មកពី​ប្រទេស​កូរ៉េ​ខាង​ជើង

ភ្នំពេញៈ នៅពេល​ក្រឡេក​មើល​ដំបូង មន្ទីរពេទ្យ Lipo Long Hua ដែល​ជា​អគារ​បី​ជាន់​ពណ៌​ត្នោត​ខ្ចី និង​មាន​ដើម​ស្លា​ច្រើន​នៅ​ជិត ដែល​ស្ថិត​នៅ​ផ្លូវ​លេខ ២១៥ មើល​ទៅ​ដូច​គ្លីនិក​ដទៃៗ​ទៀត​ក្នុង​ស្រុក​ដែរ​។ ប៉ុន្តែ​មន្ទីរពេទ្យ​ដែល​មើល​ទៅ​មិន​សូវ​ចាប់​អារម្មណ៍​នេះ គឺ​មាន​ភាព​លាក់បាំង​ខុស​ឆ្ងាយ​ពី​មន្ទីរពេទ្យ​ធម្មតា ពីព្រោះ​គ្រូពេទ្យ​ពីរ​នាក់​នៃ​មន្ទីរពេទ្យ​នេះ មកពី​ប្រទេស​កូរ៉េ​ខាង​ជើង​។

មន្ទីរពេទ្យ​ជា​កម្មសិទ្ធិ​របស់​ចិន​នេះ ត្រូវ​បាន​គេ​និយាយ​ថា ជា​មន្ទីរពេទ្យ​ទី​ពីរ​ក្នុង​ប្រទេស​កម្ពុជា ដែល​មន្ទីរពេទ្យ​មួយ​ទៀត​នៅ​ខេត្ត​សៀមរាប សុទ្ធតែ​ជួល​គ្រូពេទ្យ​ពី​ប្រទេស​កូរ៉េ​ខាង​ជើង​ជា​ប្រទេស​រំលោភបំពាន​សិទ្ធិមនុស្ស​ធ្ងន់ធ្ងរ ហើយ​ប្រព័ន្ធ​គាំពារ​សុខភាព​ប្រទេស​នេះ​គឺ​ស្ថិត​នៅក្នុង​ចំណោម​ប្រទេស​អាក្រក់​បំផុត​ក្នុង​ពិភពលោក។

គ្រូពេទ្យ​ពីរ​នាក់​ប្តីប្រពន្ធ​នៅ​មន្ទីរពេទ្យ​នេះ ត្រូវ​បាន​បន្ថែម​ចូល​ក្នុង​មន្ទីរ Lipo Long Hua ដែល​ភាគច្រើន​បំផុត​ជា​បុគ្គលិក​ជនជាតិ​កម្ពុជា និង​ចិន​កាល​ខែ​កញ្ញា ដែល​ជា​ផ្នែក​មួយ​នៃ​កិច្ច​ខិតខំ​ប្រឹងប្រែង​ទាក់ទាញ​របស់​សហគមន៍​និយាយ​ភាសា​កូរ៉េ​ក្នុង​រាជធានី​ភ្នំពេញ​។ នេះ​បើ​តាម​ការ​សម្ភាស​ជាមួយ​ឪពុកម្តាយ បុគ្គលិក និង​មន្រ្តីទូត​។ ភ្នំពេញ​ប៉ុស្តិ៍ សុំមិន​បង្ហាញ​ឈ្មោះ​ពួកគេ​ទេ​។

កាលពី​សប្តាហ៍​មុន អ្នកទទួល​ភ្ញៀវ​ម្នាក់​បាន​និយាយ​យ៉ាង​ច្បាស់​ថា​៖ «​បាទ នៅក្នុង​មន្ទីរពេទ្យ​របស់​យើង ក៏​មាន​គ្រូពេទ្យ​កូរ៉េ​ខាង​ជើង​ផង​ដែរ»។ អ្នក​ទទួល​ភ្ញៀវ​រូប​នេះ​បាន​ហុច​នូវ​នាមប័ណ្ណ​មួយ​ដែល​អួត​អំពី​សេវា​២៤ ម៉ោង និង​ឧបករណ៍​ដូចជា CT scanner។

ប្រទេស​កូរ៉េ​ខាង​ជើង​មាន​ពលករ​ទៅ​ធ្វើការ​នៅ​បរទេស​ជាច្រើន​រួមមាន ដូចជា​អ្នកបម្រើ កម្មករ និង​គ្រូពេទ្យ​ផង​ដែរ​។ រដ្ឋាភិបាល​ទីក្រុង​ព្យុងយ៉ាង ដែល​ស្វែងរក​ការ​ផលិត​អាវុធ​នុយក្លេរអ៊ែរ គឺ​ស្ថិត​នៅ​ក្រោម​ការ​ដាក់​ទណ្ឌកម្ម​អន្តរជាតិ​ដោយសារ​គោលនយោបាយ​របស់​ខ្លួន​នៃ​ការ​មិន​ព្រម​ឲ្យ​មាន​សេរីភាព​មូលដ្ឋាន និង​ការ​ប្រព្រឹត្ត​អំពើ​ព្រៃផ្សៃ​ទៅលើ​អ្នកប្រឆាំង​នៅក្នុង​ជំរំ​បង្ខំ​ឲ្យ​ធ្វើការងារ​ធ្ងន់ធ្ងរ​។

បើ​តាម​មន្រ្តីការទូត​ម្នាក់​ដែល​មិន​មាន​សិទ្ធិ​និយាយ​ជាមួយ​អ្នកកាសែត បាន​ឲ្យ​ដឹង​ថា​៖ «​មន្ទីរពេទ្យ Lipo Long Hua ជួល​គ្រូពេទ្យ​ជនជាតិ​កូរ៉េ​ផង​ដែរ នៅ​មន្ទីរពេទ្យ​ខេត្ត​សៀមរាប​ដែល​ត្រូវ​បាន​រៀបចំ​តាមរយៈ​តំណាង​នៃ​ក្រុមហ៊ុន​ជ្រើសរើស​ពលករ​កូរ៉េ​ខាង​ជើង ដែល​ប្រតិបត្តិការ​មាន​សេរីភាព​ក្នុង​ប្រទេស​កម្ពុជា​។

កម្ពុជា​ បច្ចុប្បន្ន​ ទំនង​ជា​មិន​មាន​ចំណង​មិត្តភាព​ខ្លាំងក្លា​ជាមួយ​កូរ៉េ​ខាង​ជើង ដូច​កាលពី​ជំនាន់​សម្តេច​ឪ នរោត្តមសីហនុ ដែល​បាន​ចាត់ទុក លោក គីម អ៊ីលស៊ុង ថា ជា​បិតា​បាតដៃ​ដែក​នៃ​ប្រទេស​កុម្មុយនីស្ត​កូរ៉េ​ខាង​ជើង ក្នុង​ចំណោម​មិត្តភក្តិ​ជិតស្និទ្ធ​របស់​ព្រះអង្គ​នោះ​ទេ​។ ភ្នំពេញប៉ុស្តិ៍ បាន​ចុះផ្សាយ​កាលខែ​តុលា​ថា ស្ថានទូត​កូរ៉េ​ខាង​ជើង នៅ​រាជធានី​ភ្នំពេញ​ត្រូវ​បាន​ជួល​ដោយ​មិន​មាន​ការ​បង់​ថ្លៃ​ជួល សម្រាប់​រយៈពេល​ ២០​ ឆ្នាំ​ដោយសារ​ព្រះបាទ នរោត្តម សីហុន កាលពី​ឆ្នាំ​១៩៩១​។ កិច្ចព្រមព្រៀង​នេះ បាន​ផុត​សុពលភាព​ក្នុង​ឆ្នាំ​២០១១​។

បើ​ទោះបី​ជា​រដ្ឋាភិបាល​លោក​នាយករដ្ឋមន្រ្តី​ហ៊ុន សែន នា​ពេល​ប៉ុន្មាន​ឆ្នាំ​ថ្មីៗ​នេះ មាន​ទំនាក់ទំនង​ខ្លាំង​ជាង​ទៅ​កូរ៉េ​ខាង​ត្បូង ដែល​ជា​ប្រទេស​ផ្តល់​ជំនួយ​ធំ​មួយ​ដល់​ប្រទេស​កម្ពុជា ក៏ដោយ ក៏​ភោជនីយដ្ឋាន​ចំនួន​៥​ដែល​គ្រប់គ្រង​ដោយ​ទីក្រុង​ព្យុងយ៉ាង​និង​កំពុង​ប្រតិបត្តិការ​ក្នុង​រាជធានី​ភ្នំពេញ គឺ​ស្ថិត​នៅក្នុង​ចំណោម​កេរដំណែល​ដែល​ស្មោះស្ម័គ្រ នឹង​កូរ៉េ​ខាង​ជើង​។ ភោជនីយដ្ឋាន ​២ ទៀត បាន​បើក​នៅក្នុង​ខេត្ត ​សៀមរាប ហើយ​ដែល​នៅ​ខេត្ត​សៀមរាប ប្រទេស​កូរ៉េ​ខាង​ជើង​ បាន​កសាង​សារមន្ទីរ​មួយ ដែល​មាន​តម្លៃ​ ១០ ​លាន​ដុល្លារ។

នៅពេល​គេ​ដឹង​កាល​ឆ្នាំ​មុន​ថា កម្មករ​កូរ៉េ​ខាង​ជើង​ត្រូវ​បាន​ជួល​ឲ្យ​សាងសង់​ពហុកីឡដ្ឋាន​សម្រាប់ World Cup 2022 របស់​ប្រទេស​កាតា ដែល​ប្រាក់ខែ​ទាំងអស់ ឬ​ស្ទើរ​ទាំងអស់​របស់​ពួកគេ​ត្រូវ​បាន​ដកហូត​ដោយ​រដ្ឋាភិបាល​កូរ៉េ អង្គការ​សិទ្ធិមនុស្ស​ថ្កោលទោស​ថា ជា​ការ​រៀបចំ​ឲ្យ​មាន​«​ទាសភាព​គាំទ្រ​ដោយ​រដ្ឋ​»។

គ្រូពេទ្យ​នៅ​មន្ទីរពេទ្យ Lipo Long Hua ទទួល​បាន​ប្រាក់​តែ ២០០ ដុល្លារ ប៉ុណ្ណោះ​នៃ​ប្រាក់ខែ ១០០០ ដុល្លារ របស់​ខ្លួន ព្រោះ ៨០០ ដុល្លារ​ទៀត​ត្រូវ​បញ្ជូន​ទៅ​ទីក្រុង​ព្យុងយ៉ាង​។ នេះ​បើ​តាម​អ្នកជំងឺ​ម្នាក់​ដែល​បាន​និយាយ​ថា គ្រូពេទ្យ​ពីរ​នាក់​ប្តីប្រពន្ធ​នេះ​បាន​បង្ហាញ​ត្រង់ៗ​ថា​ពួកគេ​ជា​ជនជាតិ​កូរ៉េ​ខាង​ជើង។ អ្នក​ជំងឺ​រូប​នេះ​បាន​ថ្លែង​ថា​៖ «​ខ្ញុំ​មិនមាន​ជំនឿ​ចំពោះ​គ្រូពេទ្យ​កូរ៉េ​ខាង​ជើង​ទេ ប៉ុន្តែ​វា​ប្រសើរ​ជាង​គ្លីនិក​ខ្មែរ​បន្តិច​»។

កាលពី​ឆ្នាំ​២០១០ អង្គការ​លើកលែង​ទោស​អន្តរជាតិ​បាន​លើក​ឡើង​ពី​ប្រព័ន្ធ​វេជ្ជសាស្រ្ត​មិន​ល្អ​របស់​កូរ៉​ខាង​ជើង រួមមាន​ដូចជា អ្នក​ជំងឺ​ត្រូវ​បាន​បង្ខំ​ឲ្យ​វះកាត់​ដោយ​មិន​មាន​ការ​ចាក់​ថ្នាំស្ពឹក មន្ទីរពេទ្យ​ខ្វះ​ម្ជុល​ដែល​រម្ងាប់​មេរោគ​ត្រឹមត្រូវ ខ្វះ​ទឹកស្អាត ខ្វះ​អាហារ និង​ថ្នាំពេទ្យ​។ កាលពី​ឆ្នាំ​មុន កាសែត The Guardian បាន​រាយការណ៍​ថា ប្រជាពលរដ្ឋ​កូរ៉េ​ខាង​ជើង​បាន​ប្រើ​ថ្នាំ​មេតំហ្វេតាមីន​ដោយ​ខ្លួនឯង​ដោយ​គ្មាន​ការ​ប្រឹក្សា​ជាមួយ​ពេទ្យ។

Greg Scarlatoiu នាយក​ប្រតិបត្តិ​នៃ​គណៈកម្មាធិការ​សិទ្ធិមនុស្ស​នៅ​ប្រទេស​កូរ៉េ​ខាង​ជើង បាន​ថ្លែង​តាម​អ៊ីមែល​ថា​៖ «​បច្ចុប្បន្ន មន្ទីរពេទ្យ​ភាគច្រើន​បំផុត ខ្វះខាត​ថ្នាំ​ប្រភេទ​បំបាត់​ការ​ឈឺចាប់​និង​ថ្នាំ​អង់ទីប៊ីយោទិក​(Antibiotics)»​។

មន្រ្តី​ការទូត​ម្នាក់​ដែល​ធ្វើការ​នៅក្នុង​ប្រទេស​កម្ពុជា​បាន​ថ្លែង​ថា ដោយសារ​កម្ពុជា​ខ្វះ​គ្រូពេទ្យ​ «​រដ្ឋាភិបាល​កូរ៉​ខាង​ជើង​គិត​ថា វា​ជា​ទីផ្សារ​ល្អ​មួយ​»។

ការ​រំលោភបំពាន​សិទ្ធិមនុស្ស​ដែល​ប្រព្រឹត្ត​ទៅលើ​ពលករ​កូរ៉េ​ខាង​ជើង​ធ្វើការ​នៅ​បរទេស​ត្រូវ​បាន​គេ​សរសេរ​នៅក្នុង​ឯកសារ​ជាច្រើន​។ ប៉ុន្តែ​ចំពោះ​កូរ៉េ​ខាង​ត្បូង​វិញ វត្តមាន​របស់​កូរ៉េ​ខាង​ជើង​នៅក្នុង​ប្រទេស​កម្ពុជា​ដូចជា​មន្ទីរពេទ្យ Lipo Long Hua និង​ភោជនីយដ្ឋាន​គ្រប់គ្រង​ដោយ​ទីក្រុង​ព្យុងយ៉ាង​បង្ហាញ​នូវ​ឱកាស​កម្រ​មួយ​សម្រាប់​ឲ្យ​ប្រជាជន​កូរ៉េ​ទាំង​ពីរ​មាន​ភាព​ជិតស្និទ្ធ​នឹង​គ្នា​។

អតិថិជនជា​ប្រចាំ​ម្នាក់​នៅ​ភោជនីយដ្ឋាន​កូរ៉េ​ខាង​ជើង ថ្លែង​ថា លោក​បាន​ក្លាយ​ជា​រាក់ទាក់​នឹង​គ្នា​ជាមួយ​អ្នកបម្រើ​ស្រី​។ «​យើង​ខ្លាច​គ្នា​ទៅវិញ​ទៅមក ប៉ុន្តែ​យូរៗ​ទៅ យើង​មាន​ភាព​ជិតស្និទ្ធ​នឹង​គ្នា​»៕ PS

អត្ថបទគួរចាប់អារម្មណ៍