The Phnom Penh Post Search

Search form




Logo of Phnom Penh Post newspaper Phnom Penh Post - មន្ទីរពេទ្យ​កាល់ម៉ែត​បើក​ប្រើ​ប្រាស់​អគារ​ផ្នែក​ប្រព័ន្ធ​ប្រសាទ​តម្លៃ ១០ លាន​ដុល្លារ

មន្ទីរពេទ្យ​កាល់ម៉ែត​បើក​ប្រើ​ប្រាស់​អគារ​ផ្នែក​ប្រព័ន្ធ​ប្រសាទ​តម្លៃ ១០ លាន​ដុល្លារ

ព្រះ​មហាក្សត្រ នរោត្តម សីហមុនី លោក​នាយក​រដ្ឋ​មន្ត្រី ហ៊ុន សែន មន្ត្រី​រដ្ឋាភិបាល និង​មន្ត្រី​អង្គទូត​ជាច្រើន​រូប​ទៀត នៅ​ក្នុង​ពិធី​សម្ពោធ​ដាក់​ឲ្យ​ប្រើ​ប្រាស់​នូវ​អគារ​មជ្ឈមណ្ឌល​វិទ្យាសាស្ត្រ​ប្រព័ន្ធ​ប្រសាទ​កម្រិត​ស្ដង់ដារ​អន្តរជាតិ​ដែល​ស្ថិត​នៅ​ក្នុង​មន្ទីរពេទ្យ​កាល់ម៉ែត កាល​ពី​ថ្ងៃ​ម្សិល​មិញ។
ព្រះ​មហាក្សត្រ នរោត្តម សីហមុនី លោក​នាយក​រដ្ឋ​មន្ត្រី ហ៊ុន សែន មន្ត្រី​រដ្ឋាភិបាល និង​មន្ត្រី​អង្គទូត​ជាច្រើន​រូប​ទៀត នៅ​ក្នុង​ពិធី​សម្ពោធ​ដាក់​ឲ្យ​ប្រើ​ប្រាស់​នូវ​អគារ​មជ្ឈមណ្ឌល​វិទ្យាសាស្ត្រ​ប្រព័ន្ធ​ប្រសាទ​កម្រិត​ស្ដង់ដារ​អន្តរជាតិ​ដែល​ស្ថិត​នៅ​ក្នុង​មន្ទីរពេទ្យ​កាល់ម៉ែត កាល​ពី​ថ្ងៃ​ម្សិល​មិញ។ ហេង ជីវ័ន

មន្ទីរពេទ្យ​កាល់ម៉ែត​បើក​ប្រើ​ប្រាស់​អគារ​ផ្នែក​ប្រព័ន្ធ​ប្រសាទ​តម្លៃ ១០ លាន​ដុល្លារ

ភ្នំពេញៈ អគារ​មជ្ឈមណ្ឌល​វិទ្យាសាស្ត្រ​ប្រព័ន្ធ​ប្រសាទ កម្រិត​ស្តង់ដារ​អន្តរជាតិ មាន​តម្លៃ​ជាង ១០ លាន​ដុល្លារ​សហរដ្ឋ​អាមេរិក ត្រូវ​បាន​សម្ពោធ​ដាក់​ឲ្យ​ប្រើ​ប្រាស់​ក្នុង​មន្ទីរពេទ្យ​កាល់ម៉ែត កាល​ពី​ថ្ងៃ​ម្សិល​មិញ ក្រោម​ព្រះ​រាជ​វត្តមាន​របស់​ព្រះ​មហាក្សត្រ​កម្ពុជា ប្រមុខ​រាជ​រដ្ឋាភិបាល និង​មន្រ្តី​អង្គទូត​នានា​នៅ​កម្ពុជា​ជាច្រើន​រូប។

អគារ​ថ្មី​នេះ ត្រូវ​បាន​សាងសង់​ឡើង​អំពី​ឥដ្ឋ ដំបូល​ប្រក់​ក្បឿង​មាន​កម្ពស់ ៦ ជាន់​មាន​បណ្តោយ ៤៥ ម៉ែត្រ ទទឹង ៣០ ម៉ែត្រ ស្រប​តាម​ប្រព័ន្ធ​ស្តង់ដារ​មន្ទីរពេទ្យ ប្រទេស​បារាំង។

ក្នុង​ការ​ថ្លែង​បើក​កម្មវិធី​រដ្ឋ​មន្រ្តី​ក្រសួង​សុខាភិបាល​លោក ម៉ម ប៊ុនហេង បាន​មាន​ប្រសាសន៍​ថា អគារ​មជ្ឈមណ្ឌល​វិទ្យាសាស្ត្រ​ប្រព័ន្ធ​ប្រសាទ មាន​តម្លៃ​ជាង ១០ លាន​ដុល្លារ​អាមេរិក (១០ ៨៥៧ ៩៥០ដុល្លារ) ជា​គម្រោង​មួយ​ដែល​ទទួល​បាន​ការ​គាំទ្រ​ពី​ព្រះ​មហាក្សត្រ​នៃ​ព្រះ​រាជាណាចក្រ​កម្ពុជា ព្រះ​បាទ នរោត្តម សីហមុនី និង​លោក​នាយក​រដ្ឋ​មន្រ្តី ហ៊ុន សែន តាម​រយៈ​ក្រសួង​សេដ្ឋកិច្ច​និង​ហិរញ្ញវត្ថុ ផ្តល់​ថវិកា ៤ លាន ៥ សែន​ដុល្លារ​សម្រាប់​សំណង់​អគារ អង្គការ La Chanine de l'Espoir ៤ លាន​ដុល្លារ ជំនួយ​ផ្នែក​ជំនាញ​ការ​បច្ចេកទេស​សាង​សង់ បំពាក់​គ្រឿង​បរិក្ខារ​ពេទ្យ និង​បណ្តុះ​បណ្តាល​ធនធាន​មនុស្ស​បន្ថែម, មូលនិធិ GE ឧបករណ៍​បរិក្ខារ​វេជ្ជសាស្ត្រ​បន្ថែម​ជាង ១ លាន​ដុល្លារ​និង​មន្ទីរពេទ្យ​កាល់ម៉ែត ផ្ទាល់​ចូល​រួម​ចំណែក​ជាង ៧៥ ម៉ឺន​ដុល្លារ គួប​ផ្សំ​នឹង​សម្បទាន​ប្រាក់​ពី​ក្រុម​ហ៊ុន លី ឈួង សំណង់​ជាង ៥ សែន​ដុល្លារ។

អគារ​ផ្នែក​ប្រព័ន្ធ​ប្រសាទ​កម្រិត​ស្ដង់ដារ​អន្តរជាតិ ដែល​មាន​តម្លៃ​ជាង ១០ លាន​ដុលា្លរ​អាមេរិក។
អគារ​ផ្នែក​ប្រព័ន្ធ​ប្រសាទ​កម្រិត​ស្ដង់ដារ​អន្តរជាតិ ដែល​មាន​តម្លៃ​ជាង ១០ លាន​ដុលា្លរ​អាមេរិក។ ហេង ជីវ័ន

លោក ម៉ម ប៊ុនហេង ថ្លែង​បញ្ជាក់​ថា៖ «តាម​ការ​ប៉ាន់​ស្មាន​នៅ​ទូទាំង​ប្រទេស ក្នុង ១ ឆ្នាំៗ មាន​អ្នក​ជំងឺ​ពិការ​មួយ​ចំហៀង​ខ្លួន​ប្រមាណ​ជាង ២ ម៉ឺន ២ ពាន់​នាក់ អ្នក​ជំងឺ​មាន​ដុំ​ពក​ក្នុង​ខួរ​ក្បាល​ប្រមាណ ៣ ពាន់​នាក់ និង​អ្នក​ជំងឺ​មាន​បញ្ហា​គាប​សរសៃ​ដោយ​លៀន​ទ្រនាប់​ឆ្អឹង​ខ្នង ១ ម៉ឺន ២ ពាន់​នាក់។ បើ​មិន​មាន​ការ​ព្យាបាល​ដល់​ពួក​គេ​នោះ​បញ្ហា​វា​នឹង​កាន់​តែ​អាក្រក់​ថែម​ទៀត»។

ជុំវិញ​សមិទ្ធផល​នៃ​សំណង់​អគារ​នេះ ព្រះ​មហាក្សត្រ ព្រះបាទ ព្រះ នរោត្តម សីហមុនី មាន​ព្រះ​រាជ​បន្ទូល​ថា៖ «នៅ​ក្នុង​ឱកាស​នេះ ខ្ញុំ​សូម​ចូល​រួម​វិភាគ​ទាន ព្រះ​រាជ​ទ្រព្យ​ចំនួន ១ ម៉ឺន​ដុល្លារ​អាមេរិក​ដើម្បី​ជួយ​ទ្រទ្រង់​ដល់​សកម្មភាព​របស់ មជ្ឈមណ្ឌល​វិទ្យាសាស្ត្រ​ប្រព័ន្ធ​ប្រសាទ​នេះ»។

លោក​សាស្ត្រាចារ្យ ហ្វ្រង់ស័រ ហ្សាវីយ៉េរូ របស់​អង្គការ La Chanine de l'Espoir របស់​បារាំង បាន​ថ្លែង​ថា មជ្ឈមណ្ឌល​ប្រព័ន្ធ​ប្រសាទ​ថ្មី​នេះ នឹង​ក្លាយ​ទៅ​ជា​មជ្ឈ​មណ្ឌល​បង្អែក និង​ក៏​ជា​ថ្នាល​បណ្តុះ​បណ្តាល​សម្រាប់​គ្រូ​ពេទ្យ​ឯកទេស​ប្រព័ន្ធ​ប្រសាទ គ្រូ​ពេទ្យ វះកាត់​ប្រព័ន្ធ​ប្រសាទ អ្នក​ដាក់​ថ្នាំ​សណ្តំ អ្នក​សង្គ្រោះ​បន្ទាន់ ព្រម​ទាំង​បុគ្គល​អម​វេជ្ជសាស្ត្រ ហើយ «មជ្ឈ​មណ្ឌល​នេះ នឹង​អនុញ្ញាត​ឲ្យ​យើង​អាច​ព្យាបាល​គ្រប់​ស្ថានភាព​នៃ​ជំងឺ​ទាំង​អស់​នៅ ប្រទេស​កម្ពុជា»៕

អត្ថបទគួរចាប់អារម្មណ៍