ភ្នំពេញៈ អគារមជ្ឈមណ្ឌលវិទ្យាសាស្ត្រប្រព័ន្ធប្រសាទ កម្រិតស្តង់ដារអន្តរជាតិ មានតម្លៃជាង ១០ លានដុល្លារសហរដ្ឋអាមេរិក ត្រូវបានសម្ពោធដាក់ឲ្យប្រើប្រាស់ក្នុងមន្ទីរពេទ្យកាល់ម៉ែត កាលពីថ្ងៃម្សិលមិញ ក្រោមព្រះរាជវត្តមានរបស់ព្រះមហាក្សត្រកម្ពុជា ប្រមុខរាជរដ្ឋាភិបាល និងមន្រ្តីអង្គទូតនានានៅកម្ពុជាជាច្រើនរូប។
អគារថ្មីនេះ ត្រូវបានសាងសង់ឡើងអំពីឥដ្ឋ ដំបូលប្រក់ក្បឿងមានកម្ពស់ ៦ ជាន់មានបណ្តោយ ៤៥ ម៉ែត្រ ទទឹង ៣០ ម៉ែត្រ ស្របតាមប្រព័ន្ធស្តង់ដារមន្ទីរពេទ្យ ប្រទេសបារាំង។
ក្នុងការថ្លែងបើកកម្មវិធីរដ្ឋមន្រ្តីក្រសួងសុខាភិបាលលោក ម៉ម ប៊ុនហេង បានមានប្រសាសន៍ថា អគារមជ្ឈមណ្ឌលវិទ្យាសាស្ត្រប្រព័ន្ធប្រសាទ មានតម្លៃជាង ១០ លានដុល្លារអាមេរិក (១០ ៨៥៧ ៩៥០ដុល្លារ) ជាគម្រោងមួយដែលទទួលបានការគាំទ្រពីព្រះមហាក្សត្រនៃព្រះរាជាណាចក្រកម្ពុជា ព្រះបាទ នរោត្តម សីហមុនី និងលោកនាយករដ្ឋមន្រ្តី ហ៊ុន សែន តាមរយៈក្រសួងសេដ្ឋកិច្ចនិងហិរញ្ញវត្ថុ ផ្តល់ថវិកា ៤ លាន ៥ សែនដុល្លារសម្រាប់សំណង់អគារ អង្គការ La Chanine de l'Espoir ៤ លានដុល្លារ ជំនួយផ្នែកជំនាញការបច្ចេកទេសសាងសង់ បំពាក់គ្រឿងបរិក្ខារពេទ្យ និងបណ្តុះបណ្តាលធនធានមនុស្សបន្ថែម, មូលនិធិ GE ឧបករណ៍បរិក្ខារវេជ្ជសាស្ត្របន្ថែមជាង ១ លានដុល្លារនិងមន្ទីរពេទ្យកាល់ម៉ែត ផ្ទាល់ចូលរួមចំណែកជាង ៧៥ ម៉ឺនដុល្លារ គួបផ្សំនឹងសម្បទានប្រាក់ពីក្រុមហ៊ុន លី ឈួង សំណង់ជាង ៥ សែនដុល្លារ។
លោក ម៉ម ប៊ុនហេង ថ្លែងបញ្ជាក់ថា៖ «តាមការប៉ាន់ស្មាននៅទូទាំងប្រទេស ក្នុង ១ ឆ្នាំៗ មានអ្នកជំងឺពិការមួយចំហៀងខ្លួនប្រមាណជាង ២ ម៉ឺន ២ ពាន់នាក់ អ្នកជំងឺមានដុំពកក្នុងខួរក្បាលប្រមាណ ៣ ពាន់នាក់ និងអ្នកជំងឺមានបញ្ហាគាបសរសៃដោយលៀនទ្រនាប់ឆ្អឹងខ្នង ១ ម៉ឺន ២ ពាន់នាក់។ បើមិនមានការព្យាបាលដល់ពួកគេនោះបញ្ហាវានឹងកាន់តែអាក្រក់ថែមទៀត»។
ជុំវិញសមិទ្ធផលនៃសំណង់អគារនេះ ព្រះមហាក្សត្រ ព្រះបាទ ព្រះ នរោត្តម សីហមុនី មានព្រះរាជបន្ទូលថា៖ «នៅក្នុងឱកាសនេះ ខ្ញុំសូមចូលរួមវិភាគទាន ព្រះរាជទ្រព្យចំនួន ១ ម៉ឺនដុល្លារអាមេរិកដើម្បីជួយទ្រទ្រង់ដល់សកម្មភាពរបស់ មជ្ឈមណ្ឌលវិទ្យាសាស្ត្រប្រព័ន្ធប្រសាទនេះ»។
លោកសាស្ត្រាចារ្យ ហ្វ្រង់ស័រ ហ្សាវីយ៉េរូ របស់អង្គការ La Chanine de l'Espoir របស់បារាំង បានថ្លែងថា មជ្ឈមណ្ឌលប្រព័ន្ធប្រសាទថ្មីនេះ នឹងក្លាយទៅជាមជ្ឈមណ្ឌលបង្អែក និងក៏ជាថ្នាលបណ្តុះបណ្តាលសម្រាប់គ្រូពេទ្យឯកទេសប្រព័ន្ធប្រសាទ គ្រូពេទ្យ វះកាត់ប្រព័ន្ធប្រសាទ អ្នកដាក់ថ្នាំសណ្តំ អ្នកសង្គ្រោះបន្ទាន់ ព្រមទាំងបុគ្គលអមវេជ្ជសាស្ត្រ ហើយ «មជ្ឈមណ្ឌលនេះ នឹងអនុញ្ញាតឲ្យយើងអាចព្យាបាលគ្រប់ស្ថានភាពនៃជំងឺទាំងអស់នៅ ប្រទេសកម្ពុជា»៕
