តាកែវៈ ក្រុមការងារបច្ចេកទេសនៃមន្ទីរវប្បធម៌ និងវិចិត្រសិល្បៈខេត្តតាកែវកំពុងធ្វើការជួសជុល និងអភិរក្ស សំណង់ចាស់ៗនៅលើភ្នំជីសូរដូចជាកាំជណ្ដើរ ផ្លូវឡើង និងស្រះទឹកចំនួន ២ ខណៈបច្ចុប្បន្ន ក្រសួងវប្បធម៌បានដាក់ឯកសាររួចរាល់ទៅអង្គការ UNESCO ដើម្បីស្នើសុំដាក់ប្រាសាទភ្នំជីសូរ ទៅជាសម្បត្ដិបេតិកភណ្ឌពិភពលោក។
លោក ជេត ពិសុទ្ធ ប្រធានមន្ទីរវប្បធម៌ និងវិចិត្រសិល្បៈ ខេត្តតាកែវ ថ្លែងប្រាប់ភ្នំពេញ-ប៉ុស្ដិ៍ពីថ្ងៃពុធថា ក្រោយពីមានការស្នើសុំពីព្រះសង្ឃ និងប្រជាពលរដ្ឋដែលមានមូលដ្ឋាននៅក្បែរភ្នំជីសូរស្ថិតនៅភូមិដក់ពរ ឃុំរវៀង ស្រុកសំរោងឲ្យមានការជួសជុលកាំជណ្ដើរ ផ្លូវឡើង និងស្រះទឹកចំនួន ២ ឡើងវិញក្រុមការងារនៃមន្ទីរវប្បធម៌ខេត្តដោយទទួលបានជំនួយពីសប្បុរសជនបានធ្វើការជួសជុលផ្លូវឡើងភ្នំនេះរួចរាល់ និងកំពុងបន្ដជួសជុលកាំជណ្ដើរ និងស្រះទឹកចំនួន ២ បន្ថែមទៀត។
លោកថ្លែងថា៖ «ភ្នំជីសូរជាទីតាំងប្រវត្ដិសាស្ដ្រដែលបុព្វបុរសខ្មែរបានបន្សល់ទុកមកតាំងពីសតវត្សរ៍ទី ១១ ក្នុងសម័យកាលគោកធ្លករហូតមក។ បច្ចុប្បន្នមានការកសាងវត្ដនៅជិតភ្នំជីសូរនេះផងដែរ ហើយព្រះសង្ឃ និងប្រជាពលរដ្ឋបានស្នើសុំឲ្យមានការជួសជុល ផ្លូវ កាំជណ្ដើរ និងស្រះទឹក។ យើងបានជួសជុលផ្លូវឡើងរួចរាល់ហើយ និងកំពុងបន្ដជួសជុលកាំជណ្ដើរមានប្រវែងជិត ៤០០ ម៉ែត្រ»។
បើតាមលោក ពិសុទ្ធ ទីតាំងភ្នំជីសូរ និងប្រាសាទនានានៅតំបន់លើភ្នំជីសូរ កំពុងត្រៀមដាក់បញ្ចូលជាបេតិកភណ្ឌពិភពលោក ខណៈបច្ចុប្បន្ន មន្ទីរវប្បធម៌ និងវិចិត្រសិល្បៈតាមរយៈក្រសួងវប្បធម៌បានដាក់ឯកសាររួចរាល់ទៅគណៈកម្មការវាយតម្លៃ UNESCO ដើម្បីស្នើសុំដាក់បញ្ចូលប្រាសាទនៅក្នុងទីតាំងភ្នំជីសូរនេះទៅជាសម្បត្ដិបេតិកភណ្ឌពិភពលោក។
លោកបញ្ជាក់ថា បច្ចុប្បន្នកាំជណ្តើរទ្បើងភ្នំជីសូរផ្លូវខាងត្បូងដែលមានវ័យចំណាស់មានប្រវែងជិត ៤០០ ម៉ែត្រមានការបាក់បង្កាន់ដៃកាំជណ្តើរពិបាកទ្បើងទៅលើភ្នំ និងស្រះទឹក ២ ទៀតមានការខូចខាត។
លោក ពិសុទ្ធ បានឲ្យដឹងទៀតថា នៅលើភ្នំជីសូរមានភ័ស្តុតាងប្រវត្ដិសាស្ដ្រជាច្រើនដែលបុព្វបុរសខ្មែរបន្សល់ទុកក្នុងនោះមានដូចជាប្រាសាទបុរាណស្ថានីយបុរាណដែលក្រសួងបានចុះមករៀបចំប្លង់រួចរាល់អស់ហើយ។ បច្ចុប្បន្នមានទេសចរណ៍តិចតួចប៉ុណ្ណោះដែលទៅកម្សាន្តនៅលើភ្នំជីសូរនេះ។
លោកបន្តថា ការជួសជុលកែលម្អទ្បើងស្រះទឹក និងកាំជណ្ដើរនៅលើភ្នំជីសូរនេះ ក៏មានការជួយឧបត្ថម្ភពីណាម៉ាឌី និងក្រុមគ្រួសារ និងប្រជាពលរដ្ឋមួយចំនួនទៀត ដើម្បីរក្សាទុកតំបន់នេះជាគុណប្រយោជន៍សម្រាប់ប្រើប្រាស់ដល់ភ្ញៀវទេសចរមកកម្សាន្ត និងសិក្សាស្វែងយល់។
ចំណែកលោក ឈន ប៊ុនហាក់ អនុប្រធានការិយាល័យបេតិកភណ្ឌនៃមន្ទីរវប្បធម៌ និងវិចិត្រសិល្បៈខេត្តតាកែវក៏ឲ្យដឹងដែរថា ជណ្ដើរឡើងភ្នំជីសូរនេះមាន ៣ កន្លែង ប៉ុន្ដែមានជណ្តើរតែ ១ ប៉ុណ្ណោះ ដែលជាជណ្ដើរបុរាណនៅផ្លូវឡើងប៉ែកខាងកើតធ្វើពីថ្មបាយក្រៀមមានចំនួន ៦១០ កាំ។
លោកថ្លែងថា៖ «រហូតមកដល់បច្ចុប្បន្នមិនទាន់មានអ្នកជំនាញធ្វើកំណាយណាមួយនៅទីតាំងប្រាសាទភ្នំជីសូរនៅឡើយទេ។ សំណង់ប្រាសាទនៅលើភ្នំគឺមានបន្សល់ទុកតាំងពីបុរាណមកតែម្ដង។ បច្ចុប្បន្ននៅទីតាំងប្រាសាទភ្នំជីសូរ មិនទាន់មានសហគមន៍ពលរដ្ឋនោះទេប៉ុន្ដែមានប្រជាពលរដ្ឋរស់នៅ លក់ដូរ សម្ភារអនុស្សាវរីយ៍នៅក្បែរជើងភ្នំប្រវត្តិសាស្ត្រនេះ»៕