.jpg)
មន្រ្ដីសុខាភិបាលខេត្តបន្ទាយមានជ័យ ចុះយកឈាមពលរដ្ឋជាង ៩០ នាក់ ដើម្បីធ្វើតេស្ត។ រូបថត សហការី
បន្ទាយមានជ័យៈ មន្ទីរសុខាភិបាល ខេត្តបន្ទាយមានជ័យបានឲ្យដឹងថា មានប្រជាពលរដ្ឋក្មេង ចាស់ ប្រុស ស្រី ជាង ៩០ នាក់ក្នុងភូមិចំនួន ៣ ក្នុងសង្កាត់ប៉ោយប៉ែត ដែលមានបញ្ហាជំងឺសើស្បែកដោយអាការក្តៅខ្លួន ចេញកន្តួលរមាស់ ត្រូវបានយកឈាមមកធ្វើតេស្ត ខណៈពួកគេមិនមាននរណាម្នាក់ប៉ះពាល់ដល់អាយុជីវិតនោះទេ គឺមានជាង ១០ នាក់ប៉ុណ្ណោះបន្តសម្រាកក្នុងមន្ទីរពេទ្យ។
សេចក្តីប្រកាសព័ត៌មានពីមន្ទីរសុខាភិបាលខេត្តបន្ទាយមានជ័យពីម្សិលមិញបានឲ្យដឹងថា ក្រុមឆ្លើយតបបន្ទាន់ និងកម្មវិធីផ្តល់ថ្នាំបង្ការសហការជាមួយអាជ្ញាធរមូលដ្ឋានបន្តចុះអន្តរាគមន៍ស្រាវជ្រាវ និងបូមឈាមអ្នកសង្ស័យដែលមានគ្រុនក្តៅ កន្ទួលក្រហមលើស្បែក មានឈឺសាច់ដុំ នឹងឈឺសន្លាក់ដៃជើងចំនួន ៩២ នាក់ (ស្រី ៥១ នាក់)។
ពួកគេទាំងនោះ គឺរស់នៅក្នុងភូមិក្បាលកោះ ភូមិប៉ោយប៉ែត និងភូមិព្រៃគប់ សង្កាត់ប៉ោយប៉ែត ហើយតាមរយៈការចុះពិនិត្យនេះក្រុមការងារក៏បានបូមឈាមអ្នកជំងឺទាំងនោះ ដើម្បីរកមើលជំងឺគ្រុនឈីក (Chikungunya) ជំងឺស្អូច ឫកញ្ជ្រិល និងយកសំណាករកមេរោគជំងឺកូវីដ ១៩។
សេចក្តីប្រកាសបញ្ជាក់ថា៖ «ក្នុងនោះមានអ្នកជំងឺចំនួន ១១ នាក់ (ស្រី ៤ នាក់) បានអនុញ្ញាតឲ្យសម្រាកតាមដាន និងព្យាបាលនៅមន្ទីរពេទ្យបង្អែកប៉ោយប៉ែត»។
លោក ឡេ ច័ន្ទសង្វាត អនុប្រធានមន្ទីរសុខាភិបាលខេត្តបន្ទាយមានជ័យ ប្រាប់ភ្នំពេញប៉ុស្តិ៍ពីម្សិលមិញថា ក្នុងដំណាក់កាលនៃការអន្តរាគមន៍បន្ទាន់នេះ ក្រុមការងារបានផ្តល់ការអប់រំសុខភាពអំពីអនាម័យបរិស្ថាន អនាម័យខ្លួនប្រាណ សុវត្ថិភាពចំណីអាហារ និងវិធីបង្ការជំងឺឆ្លងផ្សេងៗក្នុងនោះក៏បានបំផុសឲ្យមានការចូលរួមសម្អាតបរិស្ថាន និងបំបាត់ជម្រកមូសខ្លា ហើយបានបាញ់ថ្នាំសម្លាប់ជម្រកមូសខ្លានៅភូមិគោលដៅ និងទីសាធារណៈផងដែរ។
លោកបញ្ជាក់ថា៖ «មន្ទីរសុខាភិបាលខេត្តបន្តការខិតខំ ចុះស្រាវជ្រាវ និងអន្តរាគមន៍រាល់បញ្ហាសុខភាព ដែលអាចកើតឡើងជាយថាហេតុក្នុងមូលដ្ឋានដោយសហការជាមួយអាជ្ញាធរមូលដ្ឋាន»។
លោកបានអំពាវនាវឲ្យប្រជាពលរដ្ឋដែលមានបញ្ហាសុខភាពសូមមកទទួលសេវានៅមណ្ឌលសុខភាព និងមន្ទីរពេទ្យបង្អែកដែលនៅជិតផ្ទះបំផុត។ លោកបន្តថា នៅពេលទទួលលទ្ធផលនៃការវិភាគឈាមដោយវិទ្យាស្ថានប៉ាស្ទ័រ ឬវិទ្យាស្ថានស្រាវជ្រាវសុខភាពសាធារណៈមន្ទីរសុខាភិបាលខេត្ត និងផ្តល់ព័ត៌មានជូនសាធារណជនជ្រាបជាព័ត៌មាន។
បើតាមសេចក្តីជូនដំណឹងរបស់មន្ទីរពេទ្យប៉ោយប៉ែតកាលពីថ្ងៃទី ១៩ កក្កដា មន្ទីរពេទ្យបានទទួលព័ត៌មានជុំវិញពលរដ្ឋ ដែលមានអាការគ្រុនក្តៅចេញកន្តួល ក្រហម និងឈឺសន្លាក់នេះ ហើយក៏បានចុះទៅស្រាវជ្រាវដល់ទីតាំងដែលអ្នកភូមិរស់នៅ ដោយបានរកឃើញអ្នកជំងឺចំនួន ៦ នាក់។
ក្រោយមកនៅថ្ងៃទី ២០ កក្កដា ក្រុមការងារក៏បានចុះទៅដល់ទីតាំងម្តងទៀតដោយរកឃើញអ្នកជំងឺ ៤ នាក់បន្ថែមទៀត ហើយបានបញ្ចូនពួកគេមកសម្រាកព្យាបាលនៅមន្ទីរពេទ្យ។ មន្ទីរពេទ្យបានអះអាងថា ការព្យាបាលជូនប្រជាពលរដ្ឋដែលមានបញ្ហាសុខភាពទាំងនេះ គឺមិនយកថ្លៃនោះទេ។
មន្ទីរពេទ្យប៉ោយប៉ែតបញ្ជាក់ក្នុងសេចក្តីជូនដំណឹងថា៖ «ថ្នាក់ដឹកនាំមន្ទីរពេទ្យ និងក្រុមគ្រូពេទ្យបានខិតខំយកចិត្តទុកដាក់សង្គ្រោះព្យាបាលថែទាំអ្នកជំងឺយ៉ាងហ្មត់ចត់តាមបច្ចេកទេសមិនធ្វេសប្រហែសឡើយ។ ចំពោះអាការអ្នកជំងឺទាំងអស់រហូតមកដល់ពេលនេះបានធូរស្បើយមិនមានអ្វីជាគ្រោះថ្នាក់ឡើយ»។
លោក កែវ សុភក្ត្រា ប្រធានមន្ទីរសុខាភិបាលខេត្តបន្ទាយមានជ័យប្រាប់ភ្នំពេញប៉ុស្តិ៍យ៉ាងខ្លីកាលពីម្សិលមិញថា បើសិនជាអ្នកជំងឺពិតជាកើតជំងឺទាំងនេះពិតមែនគឺត្រូវតែរក្សាអនាម័យឲ្យបានត្រឹមត្រូវ ព្រោះជំងឺស្អូច និងឈីក គឺអាចឆ្លងពីមនុស្សម្នាក់ទៅមនុស្សម្នាក់ទៀតបានឆាប់រហ័ស។
លោកបញ្ជាក់ថា៖ «ជំងឺនេះ មិនធ្ងន់ប៉ុន្មានទេ ហើយវាក៏មិនមែនបណ្តាលមកពីអ្វីនោះទេ តែគាត់កើតស្អូចអីហ្នឹង គឺឆ្លងតាមគ្នាលឿនហើយ»៕
