.jpg)
កុមារដែលរស់នៅជាមួយមេរោគអេដស៍ក្នុងឃុំរកា ពីឆ្នាំ ២០១៤។ ហេង ជីវ័ន
បាត់ដំបងៈ មន្ទីរសុខាភិបាលខេត្តបាត់ដំបងបានប្រកាសស្វែងរកជំនួយសប្បុរសធម៌ពីសាធារណជន ដើម្បីជួយឧបត្ថម្ភដល់កុមារដែលកំពុងរស់នៅជាមួយមេរោគអេដស៍ជាង ២១១ នាក់ ខណៈកុមារទាំងនោះកំពុងទទួលរងប៉ះពាល់ធ្ងន់ធ្ងរដោយសារការរីករាលដាលនៃជំងឺកូវីដ ១៩ ក្នុងសហគមន៍ មកលើជីវភាពរស់នៅ ការសិក្សា និងការថែទាំសុខភាពប្រចាំថ្ងៃ។
ការប្រកាសស្វែងរកជំនួយសប្បុរសធម៌នេះធ្វើឡើងបន្ទាប់ពីមានការថយចុះនៃការផ្តល់ជំនួយថវិកា ដែលធ្វើឱ្យអង្គការដៃគូអភិវឌ្ឍន៍មានលទ្ធភាពធ្វើសកម្មភាពបានតិចតួចក្នុងការគាំទ្រលើគម្រោងនានា បន្ទាប់ពីគម្រោងទាំងនោះត្រូវបានផ្អាករយៈពេល ៣ ខែមកហើយ។
លោក ស៊ូ សានិត អនុប្រធានមន្ទីរសុខាភិបាល ខេត្តបាត់ដំបងបានថ្លែងថា ដោយមើលឃើញពីការលំបាក និងការខ្វះខាតរបស់កុមារផ្ទុកមេរោគអេដស៍ដែលមកទទួលសេវាព្យាបាលនៅតាមមន្ទីរពេទ្យបង្អែកជារៀងរាល់ថ្ងៃ ជាពិសេសនៅអំឡុងពេលមានការរីករាលដាលនៃជំងឺកូវីដ ១៩ ដែលបានធ្វើឱ្យប៉ះពាល់កាន់តែខ្លាំងទៅលើជីវភាពរស់នៅ និងការសិក្សារៀនសូត្ររបស់ពួកគេ។
លោកបញ្ជាក់ថា៖ «មន្ទីរសុខាភិបាលខេត្តបានឯកភាពគ្នាក្នុងការរៀបចំកម្មវិធីមនុស្សធម៌ ដើម្បីកៀរគរថវិកាយកទៅទិញជាអង្ករ សម្លៀកបំពាក់ សម្ភារសិក្សា គ្រឿងប្រើប្រាស់ផ្សេងៗទៀតតាមលទ្ធភាពថវិកា ដែលទទួលបាន ដើម្បីជួយឧបត្ថម្ភដល់កុមារដែលកំពុងរស់នៅជាមួយមេរោគអេដស៍ចំនួន ២១១ នាក់ ដែលកំពុងជួបបញ្ហាប្រឈមជាច្រើននៅក្នុងខេត្តបាត់ដំបង»។
លោក លឹម គឹមសេង មន្ត្រីកម្មវិធីអេដស៍នៃគម្រោង EpiC នៃអង្គការ FHI360 និងជាតំណាងឱ្យសមាជិកដែលបានចូលរួមផ្តួចផ្តើមកម្មវិធីសប្បុរសធម៌នេះ បានប្រាប់ ភ្នំពេញ ប៉ុស្តិ៍ កាលពីម្សិលមិញថា បន្ទាប់ពីប្រកាសស្វែងរកថវិកាតាំងពីពាក់កណ្តាលខែមីនាមក ក្រុមការងារបានទទួលថវិកាពីសប្បុរសជនទាំងក្នុងប្រទេស និងទាំងនៅក្រៅប្រទេសប្រមាណជិត ៥ ពាន់ដុល្លារ និងជាលុយខ្មែរប្រមាណជាង ៣ លាន ២ សែនរៀល។
លោកថ្លែងបន្តថា ការទទួលជំនួយពីសប្បុរសជនគឺនៅតែបន្តដរាបណា គម្រោងនានារបស់អង្គការសង្គមស៊ីវិលនៅតែមិនទាន់ទទួលបានថវិកាបន្ត ក្នុងការជួយគាំទ្រដល់កុមារមានផ្ទុកមេរោគអេដស៍ទាំងនេះ ខណៈជំនួយមនុស្សធម៌នេះនឹងអាចជួយដល់ពួកគេបានមួយរយៈពេលក្នុងអំឡុងជួបប្រទះការលំបាកនេះ។
លោកបញ្ជាក់ថា៖ «គ្រួសារកុមារមានផ្ទុកមេរោគអេដស៍ កន្លងមកពួកគេមានការលំបាកស្រាប់ទៅហើយ ដល់ពេលសម័យកូវីដទៀត ជីវភាពឪពុកម្តាយពួកគាត់កាន់តែលំបាកថែមទៀត ព្រោះឪពុកម្តាយមិនអាចចេញទៅរកអ្វីបាន។ នៅពេលមិនមានប្រាក់ចំណូល ឪពុកម្តាយ និងមិនមានលទ្ធភាពផ្គត់ផ្គង់អាហារគ្រប់គ្រាន់ដល់ក្មេងមានផ្ទុកមេរោគ ស្របពេលកុមារទាំងនោះត្រូវការអាហារូបត្ថម្ភគ្រប់គ្រាន់ជាចាំបាច់»។
បើតាមលោក លឹម គឹមសេង ថវិកាដែលទទួលបានពីសប្បុរសជនគឺបានជួយដល់កុមារដែលកំពុងរស់នៅជាមួយមេរោគអេដស៍ ជំងឺអេដស៍ នៅក្នុងខេត្តបាត់ដំបង ខណៈជំនួយទាំងនេះគឺបានចូលរួមគាំទ្រឱ្យពួកគេឱ្យអាចបន្តមកទទួលការព្យាបាល បានជាទៀងទាត់ ហើយមិនបោះបង់ការព្យាបាល ដែលអាចធ្វើឱ្យពួកគេប្រឈមនឹងបញ្ហាសុខភាពពីជំងឺអេដស៍។
លោកបានបន្ថែមថា៖ «ក្នុងអន្តរកាលនេះ គឺយើងព្យាយាមអំពាវនាវមិនថា អ្នកណានោះទេគឺអាចចូលរួមជួយពួកគាត់បានទៅតាមលទ្ធភាពរហូតដល់ពេលអង្គការដៃគូនានាមានថវិកា ដើម្បីបន្តគម្រោងជួយកុមារទាំងនេះ។ កុមារដែលរាប់បញ្ចូលដើម្បីទទួលបានជំនួយ គឺយើងរាប់ចាប់ពីកុមារមានអាយុ ១ ឆ្នាំ ដល់ ១៥ ឆ្នាំ ដែលពួកគាត់ត្រូវមកទទួលសេវាព្យាបាលជាទៀងទាត់»។
បើតាមអង្គការ FHI360 ដែលធ្វើការផ្តោតលើអ្នកមានផ្ទុកមេរោគអេដស៍នៅក្នុងខេត្តបាត់ដំបងបានឱ្យដឹងថា នៅក្នុងខេត្តនេះមានអ្នកផ្ទុកមេរោគអេដស៍ប្រមាណ ៥ ០០០ នាក់ រាប់ទាំងចាស់ ទាំងក្មេង ដោយពួកគេតែងតែមកទទួលសេវាប្រឹក្សា និងព្យាបាលនៅតាមមណ្ឌលសុខភាពទាំង ៦ របស់ខេត្ត។ ចំណែកមន្ទីរពេទ្យចំនួន ៤ ដែលកុមារតែងតែទៅទទួលសេវាព្យាបាល មានចំនួន ៤ ក្នុងនោះ រួមមានមន្ទីរពេទ្យបង្អែកខេត្តបាត់ដំបង មន្ទីរពេទ្យបង្អែកឃុំរកា ស្រុកមោងឫស្សី និងមន្ទីរពេទ្យបង្អែកស្រុកសំពៅលូន៕
វីដេអូ៖
