បាត់ដំបងៈ មន្ទីរសុខាភិបាលខេត្តបាត់ដំបងប្រកាសស្វែងរកជំនួយសប្បុរសធម៌ពីសាធារណជន ដើម្បីជួយឧបត្ថម្ភដល់កុមារដែលកំពុងផ្ទុកមេរោគអេដស៍ជាង ២០០ នាក់ ខណៈកុមារទាំងនោះកំពុងទទួលរងប៉ះពាល់ធ្ងន់ធ្ងរដោយសារការរីករាលដាលជំងឺកូវីដ ១៩ ក្នុងសហគមន៍មកលើជីវភាពរស់នៅ ការសិក្សា និងការថែទាំសុខភាពប្រចាំថ្ងៃ។
ការប្រកាសស្វែងរកជំនួយសសប្បុរសធម៌នេះមន្ទីរសុខាភិបាលខេត្តបានអះអាងថា ដោយសារមានថយចុះនៃការផ្តល់ជំនួយថវិកាដែលធ្វើឲ្យអង្គការដៃគូអភិវឌ្ឍន៍មានលទ្ធភាពធ្វើសកម្មភាពតិចតួចគាំទ្រលើថ្លៃធ្វើដំណើរមកទទួលសេវាព្យាបាល ខណៈគម្រោងគាំទ្រនានាបានផ្អាកអស់រយៈពេល ៣ ខែមកហើយ។
លោក ស៊ូ សានិត អនុប្រធានមន្ទីរសុខាភិបាលបានថ្លែងថា ដោយមើលឃើញពីការលំបាក និងការខ្វះខាតរបស់កុមារផ្ទុកមេរោគអេដស៌ដែលមកទទួលសេវាព្យាបាលនៅតាមមន្ទីរពេទ្យបង្អែកជារៀងរាល់ថ្ងៃ ជាពិសេសអំឡុងពេលមានការរីករាលដាលជំងឺកូវីដ ១៩ ដែលបានធ្វើឲ្យប៉ះពាល់កាន់តែខ្លាំងលើជីវភាពរស់នៅនិងការសិក្សារបស់ពួកគេ ទើបមានការអំពាវឱ្យសប្បុរសជនជួយចូលរួម។
លោកបញ្ជាក់ថា៖ «មន្ទីរសុខខាភិបាលខេត្តបានឯកភាពគ្នា ក្នុងការរៀបចំកម្មវិធីមនុស្សធម៌ដើម្បីកៀរគរថវិកា ដើម្បីទិញជាអង្ករសម្លៀកបំពាក់ សម្ភារសិក្សា គ្រឿងប្រើប្រាស់ផ្សេងៗទៀត តាមលទ្ធភាពថវិកាដែលទទួលបាន ដើម្បីជួយឧបត្ថម្ភដល់កុមារដែលកំពុងរស់នៅជាមួយមេរោគអេដស៍ចំនួន ២១១ នាក់ ដែលកំពុងជួបបញ្ហាប្រឈមជាច្រើននៅក្នុងខេត្តបាត់ដំបង»៕