កំពង់ឆ្នាំងៈ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ឆ្នាំង អំពាវនាវឱ្យពលរដ្ឋប្រុងប្រយ័ត្នខ្ពស់ និងកុំឱ្យចាញ់បោកលើការផ្សព្វផ្សាយលក់ដីឡូត៍ ១ កន្លែង នៅភូមិទី ៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង ខណៈគម្រោងនេះមិនទាន់មានច្បាប់អនុញ្ញាតត្រឹមត្រូវ។
តាមសេចក្តីជូនដំណឹងរបស់មន្ទីររៀបចំដែនដី នគរូបនីយកម្ម សំណង់ និងសុរិយោដី ចេញផ្សាយពីថ្ងៃទី ២១ ខែ មីនា ឆ្នាំ ២០២១ ឱ្យដឹងថា ថ្មីៗនេះមានករណីបង្ហោះវីដេអូផ្សព្វផ្សាយតាមបណ្ដាញសង្គមហ្វេសប៊ុកឈ្មោះ «តារាបញ្ញា អចលនទ្រព្យ» ជាបន្តបន្ទាប់អំពីគម្រោងលក់ដីឡូត៍ស្ថិតក្នុងភូមិទី ៧ សង្កាត់ខ្សាម ក្រុងកំពង់ឆ្នាំង ខេត្តកំពង់ឆ្នាំង។ ប៉ុន្តែតាមការពិនិត្យលើវីដេអូផ្សព្វផ្សាយនេះគឺមិនមានច្បាប់អនុញ្ញាតត្រឹមត្រូវនោះទេ។
លោក លី សុភា ប្រធានមន្ទីររៀបចំដែនដី នគរូបនីយកម្មសំណង់ និងសុរិយោដីខេត្តនេះបានប្រាប់ ភ្នំពេញ ប៉ុស្តិ៍ ពីម្សិលមិញថា គម្រោងដីឡូត៍ ឬការអភិវឌ្ឍដីដែលកំពុងផ្សព្វផ្សាយសម្រាប់ធ្វើអាជីវកម្មនេះពុំមានសុំលិខិតអនុញ្ញាតត្រឹមត្រូវស្របតាមប្រកាសលេខ ០៨៧ ដ.ន.ស ប្រក/នកចុះថ្ងៃទី ១១ ខែ ឧសភា ឆ្នាំ ២០១៨ របស់ក្រសួងរៀបចំដែនដី នគរូបនីយកម្ម និងសំណង់នោះទេ។
លោកបានបន្តថា ទីតាំងដីឡូត៍ខាងលើនេះពុំទាន់មានវិញ្ញាបនបត្រសម្គាល់អចលនវត្ថុ (បណ្ណកម្មសិទ្ធិ) ទេ។
ទីតាំងនេះស្ថិតក្នុងតំបន់ ២ នៃអាជ្ញាធរបឹងទន្លេសាប និងសារាចរណែនាំលេខ ០២ សរណន ចុះថ្ងៃទី ២៧ ខែ មីនា ឆ្នាំ ២០១៣ របស់រាជរដ្ឋាភិបាល។ ប៉ុន្តែលោកបានពន្យល់ថា តាមសារាចរណែនាំនេះ ពលរដ្ឋមានសិទ្ធិរស់នៅ និងអាស្រ័យផលក្នុងតំបន់នេះបាន ប៉ុន្តែមិនអាចលក់ដូរបានទេ។
បើតាមលោក លី សុភា ដោយមើលឃើញនូវការផ្សព្វផ្យាយនេះ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តក៏បានចេញសេចក្តីជូនដំណឹងមួយដើម្បីកុំឱ្យមានការភាន់ច្រឡំ និងទិញដីនោះ ព្រោះវានឹងធ្វើឱ្យប៉ះពាល់ដល់ប្រយោជន៍ ឬអាចមានបញ្ហាទំនាស់ផ្សេងៗ កើតឡើងដោយសារតែការផ្ដល់ព័ត៌មានមិនបានច្បាស់លាស់។
ទោះជាយ៉ាងណាលោក លី សុភា ថា មិនមានចំណាត់ការ ឬវិធានការដល់ម្ចាស់ផេកដែលបានផ្សព្វផ្សាយលក់ដីគ្មានច្បាប់អនុញ្ញាតនោះទេ ព្រោះវាមិនមែនជាសមត្ថកិច្ចមន្ទីររបស់លោកទេ។ ប៉ុន្តែលោកថា មន្ទីរគ្រាន់តែប្រាប់ពលរដ្ឋឱ្យប្រុងប្រយ័ត្នប៉ុណ្ណោះ ព្រោះវាខុសទៅនឹងច្បាប់។
លោក លី សុភា បានបញ្ជាក់ថា៖ «នេះគឺករណីទី១ ដែលបានកើតឡើងក្នុងមូលដ្ឋានខេត្តកំពង់ឆ្នាំងដែលមានការលក់ដីឡូត៍ប្រមាណ ៩០ ឡូត៍ ទើបមន្ទីរផ្តល់ព័ត៌មានបន្ថែមកុំឱ្យមានការចាញ់បោក និងខាតប្រយោជន៍ ព្រោះតំបន់នេះមិនទាន់មានការហាមឃាត់មិនឱ្យមានការចេញបណ្ណកម្មសិទ្ធិនោះទេ ប៉ុន្តែម្ចាស់ផេកមានបណ្ណកម្មសិទ្ធិដែលផ្ទុយទៅនឹងច្បាប់»។
នៅពេល ភ្នំពេញ ប៉ុស្តិ៍ ទាក់ទងទៅភ្នាក់ងារលក់របស់ផេក «តារាបញ្ញាអចលនទ្រព្យ» នោះពីម្សិលមិញ អ្នកលើកទូរស័ព្ទបានថ្លែងក្នុងលក្ខខណ្ឌមិនបញ្ចេញឈ្មោះថា ក្រុមការងាររបស់ម្ចាស់គម្រោងក៏ទទួលបានព័ត៌មានពីការជូនដំណឹងពីមន្ទីររៀបចំដែនដី នគូរនីយកម្ម សំណង់ និងសុរិយោដីនេះដែរ ហើយពេលនេះកំពុងធ្វើកិច្ចការនេះ។
ទោះជាយ៉ាងណា នារីជាភ្នាក់ងារលក់រូបនេះថា មិនដឹងព័ត៌មានលម្អិតទេ ហើយបានបង្វែរឱ្យសួរទៅម្ចាស់គម្រោងផ្ទាល់វិញ ដោយសន្យាថានឹងផ្ដល់លេខទូរស័ព្ទដើម្បីទាក់ទង ប៉ុន្តែត្រូវបានបដិសេធវិញ បើទោះបីភ្នំពេញប៉ុស្ដិ៍ព្យាយាមទាក់ទងជាថ្មីច្រើនលើកច្រើនសាក្ដី។
លោក ឃាង ពុទ្ធី ប្រធានក្រុមប្រឹក្សាភិបាលនៃសមាគមអ្នកជំនាញអចលនទ្រព្យកម្ពុជាបានស្វាគមន៍វិធានការរបស់មន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តកំពង់ឆ្នាំងដែលបានធ្វើឡើងទាន់ពេលវេលាដើម្បីកាត់បន្ថយការខាតបង់របស់អតិថិជន និងពលរដ្ឋ។
ជាមួយនេះដែរ លោក ឃាង ពុទ្ធី បានស្នើដល់អាជ្ញាធរមានសមត្ថកិច្ចពាក់ព័ន្ធនៅថ្នាក់ក្រោមជាតិឱ្យត្រួតពិនិត្យរាល់គម្រោងដីឡូត៍ និងការទិញ-លក់អចលនទ្រព្យនៅក្នុងមូលដ្ឋានខ្លួនដែលពុំមានច្បាប់អនុញ្ញាត និងពុំមានបណ្ណកម្មសិទ្ធិច្បាស់លាស់ ដើម្បីចូលរួមជាមួយរាជរដ្ឋាភិបាលក្នុងការលុបបំបាត់ជម្លោះដីធ្លីនៅក្នុងប្រទេស៕
វីដេអូ៖