.jpg)
ព្រះវិហារៈ មន្ត្រីឧទ្យានុរក្សស្នាក់ការបរិស្ថានតាកឹង បានចាប់ឃាត់អេស្កាវាទ័រមួយគ្រឿងដោយចោទថា បានឈូសឆាយរុករានយកដីព្រៃដោយខុសច្បាប់ ស្ថិតនៅភូមិអភិវឌ្ឍន៍ព្រៃគោល ឃុំស្រយ៉ង់ ស្រុកគូលែន ខេត្តព្រះវិហារ។ ប៉ុន្តែអ្នកភូមិ និងអាជ្ញាធរមូលដ្ឋាន បានអះអាងថា គ្រឿងចក្រនោះ ត្រូវបានជួលមក ដើម្បីជួយស្ថាបនាជួសជុលផ្លូវនៅក្នុងឃុំ។
លោក គី រ័ត្ន នាយរងទីស្នាក់ការបរិស្ថានតាកឹង បានប្រាប់ ភ្នំពេញ ប៉ុស្តិ៍ នៅថ្ងៃព្រហស្បតិ៍ថា កាលពីថ្ងៃទី ០៩ ខែ មីនា ឆ្នាំ ២០២១ ក្រុមការងាររបស់លោក និងដោយមានការអន្តរាគមន៍ផ្នែកច្បាប់ ពីតំណាងអយ្យការអមសាលាដំបូងខេត្តព្រះវិហារ គឺលោក វុធ សាវី បានចុះបង្ក្រាបបទល្មើស ឈូសឆាយដីព្រៃក្នុងភូមិសាស្ត្រខាងលើ ដោយចាប់រឹបអូសអេស្កាវ៉ាទ័រមួយគ្រឿង និងសម្ភារមួយចំនួនទៀត ដែលបម្រើការនៅក្នុងបទល្មើសនេះ យកទៅរក្សាទុកនៅស្នាក់ការបរិស្ថានតាកឹង ក្នុងឃុំស្រយ៉ង់ ដើម្បីចាត់វិធានការបន្តតាមនីតិវីធីច្បាប់។
លោកបានថ្លែងថា៖ «នៅពេលនេះ យើងកំពុងស្រាវជ្រាវរកម្ចាស់គ្រឿងចក្រ និងអ្នកនៅពីក្រោយនៃបទល្មើសឈូសឆាយដីព្រៃក្នុងតំបន់ការពារ និងអភិរក្សដើម្បីចាត់វិធានការទៅតាមនីវិធីច្បាប់»។
ប៉ុន្តែប្រជាពលរដ្ឋដែលរស់នៅក្នុងតំបន់នោះ បានអះអាងប្រាប់ ភ្នំពេញ ប៉ុស្តិ៍ថា ដីព្រៃក្នុងតំបន់នោះ ត្រូវបានអាជ្ញាធរខេត្ត សម្រេចកាត់ឆ្វៀលនិងផ្ដល់ជូនប្រជាជន និងគ្រួសារកងទ័ព ជាច្រើនឆ្នាំមកហើយ។
លោក មី ណាគ្រី តំណាងគ្រួសារកងទ័ព ដែលមានដីនៅក្នុងតំបន់នោះ បានប្រាប់ ភ្នំពេញ ប៉ុស្តិ៍ថា ដោយសារឃើញប្រជាពលរដ្ឋពិបាកនៅក្នុងការធ្វើដំណើរ និងដឹកកសិផលយកទៅលក់នៅក្នុងទីផ្សារនោះ មានសប្បុរសជនជាច្រើន បានជួយឧបត្ថម្ភ ជាថវិកា អង្ករ និង ប្រេង ដល់ប្រជាសហគមន៍របស់លោកក្នុងការស្ថាបនាផ្លូវ ដើម្បីសម្រួលដល់ការធ្វើដំណើរ។
លោកថ្លែងថា៖ «មុនដំបូង ពួកយើងនាំគ្នាកាប់គាស់គល់ឈើ និងជីកដីលើកជាខ្នងផ្លូវ ដោយប្រើកម្លាំងពលកម្មផ្ទាល់»។
លោក ណាគ្រី បានបន្ថែមថា ដោយពិនិត្យឃើញ អំពីតម្រូវការចាំចាច់របស់ប្រជាពលរដ្ឋ អាជ្ញាស្រុកគូលែន បានសម្រេចធ្វើការស្ថាបនាជួសជុលផ្លូវចំនួន ៤ ខ្សែ ដែលមានប្រវែងសរុប ២៨,៥០ ម៉ែត្រ ដោយចាប់ផ្ដើមពីចំណុចភូមិអភិវឌ្ឍន៍ព្រៃគោល ដែលជាភូមិរណបរបស់ភូមិសម្បូរ ឆ្ពោះទៅកាន់ភូមិចំនួន ៤ រួមមានភូមិរំចេក មានប្រវែង ៨ គីឡូម៉ែត្រ, ភូមិសម្បូរមានប្រវែង ៨ គីឡូម៉ែត្រ, ភូមិភ្នំតែល មានប្រវែង ៨,៥០ គីឡូម៉ែត្រ និងចភូមិអាព័រមានប្រវែង ៤ គីឡូម៉ែត្រ ដើម្បីសម្រួលដល់ការធ្វើដំណើរ និងដឹកជញ្ជូនកសិផលទៅកាន់ទីផ្សារ។
លោកបានបញ្ជាក់ថា៖ «បន្ទាប់ពីទទួលបានការគាំទ្រពីអាជ្ញាធរស្រុក សហគមន៍យើងខ្ញុំ ក៏បានប្រើថវិកាដែលទទួលបានពីសប្បុរសជន មកជួលគ្រឿងចក្រ មកឈូសឆាយធ្វើផ្លូវ ដើម្បីឲ្យបានលឿន និងឆាប់មុនពេលរដូវវស្សាមកដល់។ ប៉ុន្តែកាលពី ២ ថ្ងៃមុន ស្រាប់តែខាងមន្ត្រីបរិស្ថាន ២-៣ នាក់ និងតំណាងអយ្យការម្នាក់ មកហាមឃាត់នឹងចាប់រឹបអូសយកគ្រឿងចក្រ ដែលពួកយើងបានជួល យកទៅដោយអះអាងថា ឈូសឆាយផ្លូវគ្មានការអនុញ្ញាតពីសមត្ថកិច្ចជំនាញ»។
លោក ប៉ាង យៀក អភិបាលស្រុកគូលែន បានប្រាប់ ភ្នំពេញ ប៉ុស្តិ៍ នៅថ្ងៃទី ១១ ខែមីនាថា ជាការពិតភូមិអភិវឌ្ឍន៍ព្រៃគោល ស្ថិតនៅក្នុងតំបន់ដែនជម្រកសត្វព្រៃគូលែនព្រហ្មទេព។ ប៉ុន្តែដោយសារប្រជាពសលរដ្ឋ ដែលភាគច្រើនជាគ្រួសារកងទ័ព បាននាំគ្នាចូលទៅតាំងទីលំនៅ និង អាស្រ័យផលយូរឆ្នាំមកហើយនោះ អាជ្ញាធរខេត្ត ក៏បានសម្រេចកាត់ឆ្វៀលភូមិនោះចេញពីការគ្រប់គ្រងរបស់បរិស្ថាន ។
លោកថ្លែងថា៖ «ការស្ថាបនាជួសជុលផ្លូវ នៅក្នុងភូមិខាងលើនេះ គឺអាជ្ញាធរយើង ពិតជាមានការអនុញ្ញាតប្រាកដមែន។ ចំណែកការអនុវត្ត របស់អ្នកម៉ៅការសាងសង់ផ្លូវនោះ ខុសឬត្រូវយ៉ាងដូចម្ដេច ខ្ញុំនៅមិនទាន់បានដឹងនៅឡើយទេ។ ប៉ុន្តែខ្ញុំនឹងមិនគាំទ្រទេ បើសិនជាគាត់ប្រព្រឹត្តខុសពីកិច្ចព្រមព្រៀង ឈូសឆាយចូលទៅក្នុងដីព្រៃការពារនិងអភិរក្សរបស់រដ្ឋ»៕
