The Phnom Penh Post Search

Search form




Logo of Phnom Penh Post newspaper Phnom Penh Post - មហាជន​ជាច្រើន​ទៅ​គោរព​វិញ្ញាណ​ក្ខន្ធ​សព​លោក ចាន់ សុវេត




មហាជន​ជាច្រើន​ទៅ​គោរព​វិញ្ញាណ​ក្ខន្ធ​សព​លោក ចាន់ សុវេត

ក្រុម​គ្រួសារ សាច់​ញាតិ និង​មិត្តភក្តិ ដុត​ធូប​គោរព​វិញ្ញាណ​ក្ខន្ធ​សព​លោក ចាន់ សុវេត។
ក្រុម​គ្រួសារ សាច់​ញាតិ និង​មិត្តភក្តិ ដុត​ធូប​គោរព​វិញ្ញាណ​ក្ខន្ធ​សព​លោក ចាន់ សុវេត។ ផា លីណា

មហាជន​ជាច្រើន​ទៅ​គោរព​វិញ្ញាណ​ក្ខន្ធ​សព​លោក ចាន់ សុវេត

ភ្នំពេញៈ អ្នក​កាន់​មរណទុក្ខ​រាប់​រយ​នាក់​បាន​ទៅ​គោរព​វិញ្ញាណក្ខន្ធ​របស់​លោក ចាន់ សុវេត មន្ត្រី​សិទិ្ធ​មនុស្ស​ល្បី​ឈ្មោះ កាល​ពី​ម្សិល​មិញ ដែល​បាន​លាចាក​ពី​លោក​នេះ ត្រូវ​ចំ​ថ្ងៃ​ប្រារព្ធ​ខួប ទិវា​សិទ្ធិ​មនុស្ស​អន្តរជាតិ​ថ្ងៃ ទី១០ ធ្នូ នៅ​រាជធានី​ភ្នំពេញ។

ជន​រង​គ្រោះ​ដោយ​សារ​វិវាទ​ដីធ្លី បុគ្គលិក​អង្គការ​មិន​មែន​រដ្ឋាភិបាល​ដូច​គ្នា ក្រុម​អ្នក​កាសែត​ពី​តាម​ស្ថាប័ន​មួយ​ចំនួន និស្សិត និង​តំណាង​រាស្ត្រ​គណបក្ស​ប្រឆាំង​បាន​នាំ​គ្នា​ទៅ​ចូល​រួម​គោរព​វិញ្ញាណក្ខន្ធ​លោក ចាន់ សុវេត ដែល​ដាក់​តម្កល់​ធ្វើ​បុណ្យ​នៅ​វត្ត​គល់​ទទឹង ក្នុង សង្កាត់​ព្រែក​ថ្មី ខណ្ឌ​ច្បារ​អំពៅ កាលពី​ថ្ងៃ​ព្រហស្បតិ៍​ម្សិល​មិញ។

លោក ចាន់ សុវេត ដែល​ទទួល​មរណភាព​ក្នុង​ជន្មាយុ ៥១ ឆ្នាំ លោក​គឺជា​អនុ​ប្រធាន​ផ្នែក​ស៊ើប​អង្កេត នៅ​សមាគម​សិទិ្ធ​មនុស្ស អាដហុក ដែល​លោក​បាន​បម្រើ​ការងារ​នៅ​អង្គការ​នេះ​អស់​រយៈ​ពេល​ជិត ២ ទសវត្សរ៍។ មនុស្ស​ជាច្រើន​បាន​បន្ត​សម្តែង​គាវរ​កិច្ច​កាលពី​ម្សិល​មិញ ចំពោះ​បុរស​ដែល​មនុស្ស​ជាច្រើន​នាក់​ចាត់​ទុ​កថា លោក​ជា​មនុស្ស​ម្នាក់​ដែល​គ្មាន​ភ័យ​ខ្លាច​ក្នុង​ការងារ​ស្វែង​រក​យុត្តិធម៌​ជូន​ប្រជាជន​កម្ពុជា ដែល​ទទួល​រង​ការ​រំលោភ​សិទិ្ធ ក្នុង​នោះ រួម​មាន​ការ​ចាប់​យក​ដីធ្លី។

លោក Karim Lahidji ប្រធាន​សហព័ន្ធ​សិទិ្ធ​មនុស្ស​អន្តរជាតិ ដែល​សមាគម​អាដហុក ជា​សមាជិក បាន​ថ្លែង​ថា៖ «លោក សុវេត គឺជា​សំឡេង​សម្រាប់​អ្នក​គ្មាន​សំឡេង។ អស់​ច្រើន​ទសវត្សរ៍​មក​នេះ លោក​បាន​ធ្វើ​ការ​ជូន​ជន​រង​គ្រោះ ដោយ​សារ​ការ​រំលោភ​សិទិ្ធ ជា​ពិសេស អ្នក​ក្រី​ក្រ​និង​អ្នក​ទាំង​ឡាយ​ដែល​ធ្វើ​ការ​នៅ​តំបន់​ដាច់​ស្រយាល»។

លោក​បាន​បន្ថែម​ថា៖ «មរណភាព​របស់​លោក ចាន់ សុវេត គឺជា​ការ​បាត់​បង់​ដ៏​ធំ​សម្រាប់​គ្រួសារ សហសេវិក និង​សហគមន៍​សិទិ្ធ​មនុស្ស​កម្ពុជា ប៉ុន្តែ កេរ​ដំណែល​នៃ​ភាព​ក្លាហាន និង​ការ​ប្តេជ្ញា​របស់​គាត់​នឹង​បន្សល់​ទុក​សម្រាប់​អ្នក​ជំនាន់​ក្រោយ»។

លោក ចាន់ សុវេត បាន​ស្លាប់​នៅ​ផ្ទះ​របស់​លោក ក្នុង​រាជធានី​ភ្នំពេញ​នៅ​ថ្ងៃ​ទិវា​សិទិ្ធ​មនុស្ស​អន្តរជាតិ ១០ ធ្នូ។ សព​លោក​នឹង​ត្រូវ​បូជា​នៅ​ព្រឹក​ថ្ងៃ​សុក្រ​នេះ នៅ​វត្ត​អាស្រម​គល់​ទទឹង៕

អត្ថបទគួរចាប់អារម្មណ៍