.jpg)
មហាឧបាសិកា ប៊ុន ស៊ាងលី នាពេលកន្លងមក។ រូបថត SPM
ភ្នំពេញៈ មហាឧបាសិកា ប៊ុន ស៊ាងលី ដែលត្រូវជាម្ដាយក្មេកលោកនាយករដ្ឋមន្ដ្រី ហ៊ុន សែន បានទទួលមរណភាពកាលពីវេលាម៉ោង ២ និង ១២ នាទីទៀបភ្លឺ ថ្ងៃចន្ទទី ៤ ខែឧសភា ម្សិលមិញនៅភូមិគ្រឹះលោកនាយករដ្ឋមន្ដ្រី ហ៊ុន សែន ក្នុងរាជធានីភ្នំពេញ ដោយសារជរាពាធក្នុងជន្មាយុ ៩៦ ឆ្នាំ។ នេះបើតាមសេចក្ដីជូនដំណឹងនៅលើហ្វេសប៊ុករបស់លោកនាយករដ្ឋមន្ដ្រី។
សេចក្ដីជូនដំណឹងកាលពីយប់ម្សិលមិញបានបញ្ជាក់ថា៖ «លោកស្រី ប៊ុន សាមលេន និងលោក គីម ទូច ព្រមទាំងបុត្រ និងចៅ, ឯកឧត្ដម គ្រី ទូច និងលោកជំទាវ ទ្រី ង៉ូវណាំ ព្រមទាំងបុត្រ និងចៅ,សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន និងសម្ដេចអគ្គមហាសេនាបតីតេជោ ហ៊ុន សែន ព្រមទាំងបុត្រ និងចៅ លោកជំទាវ ប៊ុន សុថា និងឯកឧត្ដម តាន់ បញ្ញាវុធ ព្រមទាំងបុត្រ និងចៅ មានទុក្ខជាទម្ងន់ដោយអ្នកឧកញ៉ាព្រឹទ្ធមហាឧបាសិកា ធម្មញ្ញាណវិវឌ្ឍនា ប៊ុន ស៊ាងលី ត្រូវជាម្ដាយបង្កើត ម្ដាយក្មេក ជីដូន ជីដូនទួត បានទទួលមរណភាពនាថ្ងៃចន្ទ ១៣ កើត ខែពិសាខ ឆ្នាំជូត ទោស័ក ព.ស ២៥៦៣ ត្រូវនឹងថ្ងៃទី ៤ ខែឧសភា ឆ្នាំ ២០២០ វេលាម៉ោង ២ និង ១២ នាទីទៀបភ្លឺដោយជរាពាធក្នុងជន្មាយុ ៩៦ ឆ្នាំ»។
សេចក្ដីជូនដំណឹងឲ្យដឹងថា សពព្រឹទ្ធមហាឧបាសិកា ប៊ុន ស៊ាងលី តម្កល់ធ្វើបុណ្យតាមប្រពៃណីព្រះពុទ្ធសាសនានៅភូមិគ្រឹះលោកនាយករដ្ឋមន្ដ្រី ហ៊ុន សែន ស្ថិតនៅផ្ទះលេខ ៤១ ផ្លូវសុរាម្រិត សង្កាត់ចតុមុខ ខណ្ឌដូនពេញ រាជធានីភ្នំពេញនាថ្ងៃទី ៤-៥ ខែឧសភា។
លុះដល់ថ្ងៃទី ៦ ខែឧសភា ឆ្នាំ ២០២០ វេលាម៉ោង ៧ និង ១៨ នាទីព្រឹក ដង្ហែសពចេញពីភូមិគ្រឹះឆ្ពោះទៅទីតាំងបញ្ចុះសពដែលស្ថិតនៅភូមិទី ២ ឃុំរកាខ្នុរ ស្រុកក្រូចឆ្មារ ខេត្ដត្បូងឃ្មុំ។
ចំណែកពិធីបុណ្យទក្ខិណានុប្បទានគម្រប់ ៧ ថ្ងៃធ្វើនៅថ្ងៃទី ៩ ខែឧសភា ឆ្នាំ ២០២០ ចាប់ពីម៉ោង ២ រសៀលទៅនៅគេហដ្ឋានលោកនាយករដ្ឋមន្ដ្រី ហ៊ុន សែន នៅភូមិទី ២ ឃុំរកាខ្នុរ ស្រុកក្រូចឆ្មារ ខេត្ដត្បូងឃ្មុំ។
វីដេអូស្ដីពីជីវប្រវត្តិ មហាឧបាសិកា ប៊ុន ស៊ាងលី ដែលបានផ្សព្វផ្សាយដោយសារព័ត៌មាន Fresh News ពីម្សិលមិញបានឲ្យដឹងថា មហាឧបាសិកា ប៊ុន ស៊ាងលី កើតនៅថ្ងៃចន្ទ ទី ៤ ខែឧសភា ឆ្នាំ ១៩២៥ នៅក្នុងគ្រួសារកសិករនៅភូមិកោះបីពៃ ឃុំកោះពីរ ស្រុកក្រូចឆ្មារ ខេត្តកំពង់ចាម។ បិតារបស់មហាឧបាសិកា នាម ឱក ប៊ុន មាតានាម ណៃ ហួយ។ មហាឧបាសិកា ប៊ុន ស៊ាងលី ជាបុត្រទី ២ ក្នុងចំណោមបងប្អូន ៤ នាក់ក្នុងនោះមានស្រី ៣ នាក់ និងប្រុស ១ នាក់។
វីដេអូឲ្យដឹងថា កាលពីកុមារមហាឧបាសិកា ប៊ុន ស៊ាងលី មិនបានចូលរៀនសូត្រទេ។ លោកបានចំណាយពេលយុវវ័យដើម្បីតែជួយការងារមាតាបិតា នៅក្នុងគ្រួសារក្នុងការប្រកបរបរធ្វើចម្ការ។ មហាឧបាសិកា ប៊ុន ស៊ាងលី បានរៀបអាពាហ៍ពិពាហ៍ជាមួយឧបាសក លីន គ្រី នៅឆ្នាំ ១៩៤៣ នៅក្នុងឃុំរកាខ្នុរ ស្រុកក្រូចឆ្មារ ខេត្តកំពង់ចាម។ តាមរយៈចំណងអាពាហ៍ពិពាហ៍នេះ មហាឧបាសិកា ប៊ុន ស៊ាងលី មានបុត្រចំនួន ៥ នាក់ ស្រី ៣ នាក់ ប្រុស ២ នាក់។
បន្ទាប់ពីមរណភាពរបស់មហាឧបាសិកា ប៊ុន ស៊ាងលី មានមន្ដ្រីរាជការគ្រប់ជាន់ថ្នាក់ជាច្រើនរូបក្នុងប្រទេសកម្ពុជាបានផ្ញើសារចូលរួមមរណទុក្ខក្នុងនោះ អតីតប្រធាន អតីតគណបក្សសង្គ្រោះជាតិលោក កឹម សុខា ក៏បានផ្ញើសាររំលែកទុក្ខជូនចំពោះលោកនាយករដ្ឋមន្ដ្រី ហ៊ុន សែន និងភរិយាផងដែរ។
លោក កឹម សុខា បានផ្ញើសាររំលែកទុក្ខតាមរយៈហ្វេសប៊ុករបស់លោកថា៖ «សម្តេចជាទីគោរពរាប់អាន, ភរិយាខ្ញុំ និងរូបខ្ញុំមានសេចក្តីសោកស្តាយ និងសមានទុក្ខយ៉ាងក្រៀមក្រំដោយអ្នកឧកញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី ដែលត្រូវជាមាតាក្មេករបស់សម្តេច និងជាមាតាបង្កើតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានទទួលមរណភាពនាថ្ងៃចន្ទ ទី ៤ ខែ ឧសភា ឆ្នាំ ២០២០ វេលាម៉ោង ២:១២ នាទីទៀបភ្លឺដោយជរាពាធក្នុងជន្មាយុ ៩៦ ឆ្នាំ»។
លោក សុខា បន្ដថា មរណភាពរបស់មហាឧបាសិកា ប៊ុន ស៊ាងលី គឺជាការបាត់បង់មាតា ជីដូន ដែលជាអ្នកមានគុណដ៏ធំធេងដែលបានចិញ្ចឹមបីបាច់ថែរក្សា និងអប់រំទូន្មានកូនចៅប្រកបដោយព្រហ្មវិហារធម៌។
លោកបានបន្ដថា៖ «ក្នុងឱកាសប្រកបដោយសមានទុក្ខដ៏ក្រៀមក្រំនេះ ភរិយាខ្ញុំ និងរូបខ្ញុំ សូមចូលរួមរំលែកនូវមរណទុក្ខដោយសេចក្តីសោកស្តាយជាមួយសម្តេចអគ្គមហាសេនាបតីតេជោ សម្តេចកិត្តិព្រឹទ្ធបណ្ឌិត និងបុត្រា បុត្រី ចៅ ចៅទួត ព្រមទាំងសាច់ញាតិក្រុមគ្រួសារទាំងអស់នៃសពដោយសេចក្តីសង្វេគក្រៃលែង»៕
