The Phnom Penh Post Search

Search form




Logo of Phnom Penh Post newspaper Phnom Penh Post - មាន​ការ​គិត​ខុស​គ្នា​ចំពោះ​ជោគវាសនា​កូន​ភ្លោះ

មាន​ការ​គិត​ខុស​គ្នា​ចំពោះ​ជោគវាសនា​កូន​ភ្លោះ

លោក សំបូរ និង​លោក សម្បត្តិ ដែល​ជា​បង​ប្អូន​ភ្លោះ​នឹង​គ្នា​ បង្ហាញ​ពី​ភាព​ស្និទ្ធស្នាល​ក្នុង​ចំណោម​បង​ប្អូន​ពួក​គេ​។ រូបថត MEIXLER
លោក សំបូរ និង​លោក សម្បត្តិ ដែល​ជា​បង​ប្អូន​ភ្លោះ​នឹង​គ្នា​ បង្ហាញ​ពី​ភាព​ស្និទ្ធស្នាល​ក្នុង​ចំណោម​បង​ប្អូន​ពួក​គេ​។ រូបថត MEIXLER

មាន​ការ​គិត​ខុស​គ្នា​ចំពោះ​ជោគវាសនា​កូន​ភ្លោះ

ភ្នំពេញៈ សែម សំណាង និង​សែម ស្រីមាស ដែល​ជា​ប្អូនស្រី​ភ្លោះ​នឹង​គ្នា​ទើប​តែ​បាន​អាយុ​បី​ខែ​ប៉ុណ្ណោះ នៅពេល​ពួកគេ​រៀបការ​ជាមួយ​គ្នា​ទៅ​តាម​ប្រពៃណី​ខ្មែរ​។

កញ្ញា សែម ស្រីមាស បាន​ថ្លែង​ថា ពិធី​រៀបការ​នេះ​គឺ​ធ្វើ​ឡើង​ធំ​ដូច​ពិធីរៀបការ​តាម​ប្រពៃណី​ជាច្រើន​ទៀត​ដែរ​ហើយ​ពិធី​រៀបការ​នេះ​គឺ​សំខាន់​ស្លាប់​រស់​។ កញ្ញាបាន​ពន្យល់​ថា​៖ «​វា​ជា​​អបិយ​ជំនឿ​​របស់​យើង ប្រសិនបើ​យើង​មិន​បំពេញ​ការ​រៀបការ​នេះ មួយ​ក្នុង​ចំណោម​យើង​នឹង​ស្លាប់​»។

ឪពុក​ម្តាយ​កូនភ្លោះ​នេះ បាន​រៀបចំ​ជួល​រោងការ និង​និមន្ត​ព្រះសង្ឃ និង​ចាស់ៗ ក្នុង​ភូមិ​ដើម្បី​មក​ចូលរួម ឬ​​សិទ្ធពរ​ជ័យ​ដល់​កូនកំលោះ និង​កូនក្រមុំ​ទារក​ភ្លោះ​នេះ ខណៈ​ពួកគេ​ដេក​នៅក្នុង​ប្រអប់​តូច​មួយ​។ ភ្ញៀវ​រាប់រយ​នាក់​បាន​​ចូល​រួម​ពិសារអាហារ ដែល​មាន​ផ្លែឈើ ភេសជ្ជៈ និង​សាច់ និង​មាន​ការ​ច្រៀងរាំ​។

ពិត​ណាស់ វា​គឺជា​ពិធី​តាម​ប្រពៃណី ប៉ុន្តែ សំណាង ដែល​ឥឡូវ​នេះ អាយុ​២១​ឆ្នាំ នៅ​តែ​ទទួល​ការ​សើចចំអក​ពេល​ខ្លះ​។

សែម សំណាង និង​សែម​ស្រី​មាស​កាល​ពី​នៅ​តូច​​​។ រូបថត សហ​ការី
សែម សំណាង និង​សែម​ស្រី​មាស​កាល​ពី​នៅ​តូច​​​។ រូបថត សហ​ការី

សំណាង បាន​និយាយ​កាលពី​សប្តាហ៍​មុន​ថា​៖ «​មិត្តភក្តិ​របស់​ខ្ញុំ​មិន​ជឿ​នៅពេល​ខ្ញុំ​ប្រាប់​ពួកគេ​ថា ខ្ញុំ​រៀបការ​រួច​ហើយ ពួកគេ​សួរ​ខ្ញុំ​ថា ហេតុអ្វី​បានជា​ពួកគេ​មិន​បាន​ដឹង​អំពី​ការ​រៀបការ​របស់​ខ្ញុំ​»។

លោក​បាន​ថ្លែង​ទាំង​សើច​ថា​៖ «​ហើយ​បន្ទាប់មក​ខ្ញុំ​ប្រាប់​ពួកគេ​ថា ឪពុកម្តាយ​របស់​ខ្ញុំ​បាន​រៀបការ​ខ្ញុំ​រួច​ហើយ​ជាមួយ​បងប្រុស​ខ្ញុំ​»។

កូនភ្លោះ​ភេទ​ផ្ទុយគ្នា ដែល​ ១០០០ មាន​តែ​ពីរ​បី កើត​មាន​ឡើង​នៅពេល​ដែល​មេជីវិត​ពីរ​ជាមួយ​ក្រូម៉ូសូម​ពីរ​ផ្សេង​គ្នា​មាន​វត្តមាន​នៅក្នុង​ស្បូន​របស់​ស្រ្តី​នៅពេល​មាន​ផ្ទៃពោះ។

ប៉ុន្តែ​រឿងព្រេង​ខ្មែរ​និយាយ​ថា វា​កើតឡើង​ដោយសារ​ពីរ​នាក់​នោះ មាន​ស្នេហា​ដែល​ត្រូវ​គេ​បំបែក ហើយ​ចាប់ជាតិ​សាជាថ្មី​ជាមួយ​គ្នា​។

លោក វង្ស សុធារ៉ា អ្នកជំនាញ​សិក្សា អំពី​ដំណើរ​វិវត្តន៍​របស់​មនុស្ស​អតីតកាល​និង​បច្ចុប្បន្ន និង​ជា​ប្រធាន​ផ្នែក​ប្រវត្តិវិទ្យា​នៅ​សាកលវិទ្យាល័យ​ភូមិន្ទភ្នំពេញ បាន​ថ្លែង​ថា ប្រពៃណី​ជឿ​ថា កូនភ្លោះ​ភេទ​ផ្ទុយគ្នា​គឺជា​គូស្នេហា​ពី​អតីតជាតិ​ដែល​ត្រូវ​បាន​រារាំង​មិន​ឲ្យ​រៀបការ​។ មាន​តែ​ការ​ប្រារព្ធ​ពិធី​រៀបការ​ទេ ទើប​អាច​ឲ្យ​ពួកគេ​រស់នៅ​បាន​។

លោក​បាន​បន្ត​ថា​៖«​កូនភ្លោះ​កម្ពុជា​ភាគច្រើន​បំផុត​ដែល​កើត​មក​មាន​ភេទ​ប្រុស​និង​ស្រី​គឺ​ត្រូវ​រៀបការ​នឹង​គ្នា​»។ «​ពួកគេ​ជឿថា កាលពី​ជាតិមុន​គូស្នេហ៍​នោះ មិន​បាន​ជោគជ័យ ហើយ​បាន​ប្រាថ្នា​ជួប​គ្នា​នៅ​ជាតិក្រោយ​»​។ លោក​បន្ថែម​ថា ការ​ប្រសិទ្ធពរជ័យ​តាមរយៈ​ការ​រៀបការ​នឹង​នាំ​មក​នូវ​សំណាង​ល្អ​។

អ្នកស្រី ព្រេជ សយ ដែល​ជា​ម្តាយ​សំណាង និង​ស្រីមាស បាន​ថ្លែង​ថា ចាស់ៗ​ក្នុង​សហគមន៍​និង​ព្រះសង្ឃ​ជំរុញ​ឲ្យ​អ្នកស្រី​រៀបចំ​ពិធី​រៀបការ​នេះ​ដើម្បី​ស្រប​ទៅ​តាម​ប្រពៃណី​។ ភ្ញៀវ​ប្រហែល​៧០០​នាក់​បាន​មក​ចូលរួម​ពិធី​នេះ ហើយ​ពិធី​នេះ​បាន​ចំណាយ​អស់​យ៉ាង​ហោច​ណាស់​៣០០០​ដុល្លារ​។

អ្នកស្រី​ថ្លែង​បន្ត​ថា​៖«​ចាស់ៗ​ជាច្រើន និង​ព្រះសង្ឃ​ដែល​ខ្ញុំ​ស្គាល់​បាន​អបអរ​ខ្ញុំ និង​បាន​ប្រាប់​ខ្ញុំ​ឲ្យ​រៀបចំ​ពិធីរៀបការ​ឲ្យ​កូន​របស់​ខ្ញុំ ពីព្រោះ​ពួកគេ​ជឿ​ថា កូនភ្លោះ​ប្រុស​ស្រី​ធ្លាប់​ជា​គូស្នេហ៍​នឹង​គ្នា មិត្តភក្តិ​ជិតស្និទ្ធ ឬ​បងប្អូន​បង្កើត។ ដូច្នេះ ខ្ញុំ​ត្រូវ​តែ​ប្រារព្ធ​ពិធី​នេះ​សម្រាប់​ពួកគេ​ដើម្បី​ប្រសិទ្ធពរជ័យ​និង​នាំ​មក​នូវ​សំណាង​ល្អ​សម្រាប់​ពួកគេ​និង​គ្រួសារ​ទាំង​មូល​»។

អ្នកស្រី​បន្ត​ថា​៖ «​ខ្ញុំ​ប្រាកដ ​១០០ ​ភាគរយ​ថា ពួកគេ​នាំ​មក​នូវ​សំណាង​ល្អ​ដល់​គ្រួសារ​។ គ្រួសារ​ខ្ញុំ​រីករាយ​ជាង​មុន ហើយ​យើង​មាន​ស្ថានភាព​គ្រួសារ​ប្រសើរ​ជាង​មុន​»។

កញ្ញា សូម៉ាលី អាជីវករ​អាយុ​ ៣១​ ឆ្នាំ​ម្នាក់ ដែល​រស់​នៅក្នុង​ខេត្ត​សៀមរាប គឺជា​អ្នក​ដែល​មាន​ជំនឿ​ខ្លាំង​ចំពោះ​ទំនៀមទម្លាប់​រៀបការ​កូនភ្លោះ​ប្រុស​ស្រី​នេះ​។ កញ្ញា​​បាន​បន្ទោស​គ្រួសារ ចំពោះ​ការ​មិន​បាន​រៀបការ​តាម​ប្រពៃណី​នេះ ទើប​ធ្វើឲ្យ​បងប្រុស​របស់​កញ្ញា​​លង់ទឹក​ស្លាប់​នៅ​អាង​ហែលទឹក​ពហុកីឡដ្ឋាន​អូឡាំពិក​កាលពេល​គាត់​អាយុ​ ១៦​ឆ្នាំ​។

កញ្ញា​បន្ត​ថា​៖ «​បន្ទាប់ពី​ខ្ញុំ​ខ្លួនឯង​ជួប​នឹង​គ្រោះថ្នាក់​នេះ ខ្ញុំ​ពិតជា​ជឿ​តាម​ប្រពៃណី​»។

«​បងប្រុស​របស់​ខ្ញុំ​ចេះ​ហែលទឹក គាត់​មិន​គួរ​ស្លាប់​ដោយសារ​លង់ទឹក​ទេ ដូច្នេះ​យើង​ត្រូវ​តែ​ទទួល​ស្គាល់​ថា វា​នាំ​មក​នូវ​សំណាង​អាក្រក់​ដល់​គ្រួសារ​បើ​មិន​រៀបការ​»។ ទុក្ខសោក​នេះ បាន​បណ្តាល​ឲ្យ​កញ្ញា​ សូម៉ាលី​ គិត​ដល់​ការ​ធ្វើ​អត្តឃាត។

នាង បាន​និយាយ​ថា៖ «​មនុស្ស​មួយ​ចំនួន​នៅក្នុង​ភូមិ​ខ្ញុំ បាន​ប្រាប់ គ្រួសារ​របស់​ខ្ញុំ និង​បងប្រុស​ខ្ញុំ​ឲ្យ​រៀបការ ប៉ុន្តែ​គ្រួសារ​ខ្ញុំ​ចង់​ឲ្យ​ខ្ញុំ ធ្វើការ​សម្រេចចិត្ត នៅពេល​ដែល​យើង​មាន​វ័យ​ ១៨ ឆ្នាំ​ដោយសារ​តែ ពួកគេ គិត​ថា​យើង​មិន​ចាំបាច់ [ធ្វើ​ពិធី​នេះ​ទេ​] នៅពេល​ដែល​យើង​នៅ​ពី​តូច​។ ដោយសារ​តែ​អកុសល​បងប្រុស របស់​ខ្ញុំ បាន​ស្លាប់​នៅពេល​គេ​មាន​អាយុ​១៦ ឆ្នាំ​»​។

លោក យឹម សុវុត្រា គ្រូពេទ្យ​ចិត្តវិជ្ជា នៅឯ​គ្លីនិក​ផ្លូវចិត្ត​ឈ្មោះ​ព្រះអាទិត្យ​រះ​នៅ​រាជធានី​ភ្នំពេញ បាន​ថ្លែង​ថា វា​ជា​រឿង​មិនមែន​ធម្មតា​ទេ​ដែល សូម៉ាលី​ស្តីបន្ទោស​ការ​បរាជ័យ​របស់​ឪពុកម្តាយ​នាង​ដែល​មិន​បាន​រៀបចំ​ពិធី​នេះ ទើប​ធ្វើឲ្យ​មាន​សោកនាដកម្ម​។

លោក បញ្ជាក់​ថា មនុស្ស​ជា​រឿយៗ តែងតែ​ងាក​ទៅ​រក​អបិយ​ជំនឿ​ក្នុង​ការ​ដោះស្រាយ​បញ្ហា​។

លោក បន្ត​ថា​៖ «នៅ​កម្ពុជា ប្រជាជន​ខ្មែរ បាន​រៀបចំ​ពិធី​ជាច្រើន ដើម្បី​បញ្ចៀស​សំណាង​អាក្រក់។ វា មិន​បង្ក​គ្រោះថ្នាក់​ទេ នេះ​គ្រាន់តែ​ជា​ជំនឿ និង​វប្បធម៌​របស់​ពួកគេ​តែ​ប៉ុណ្ណោះ​»។

លោក​បាន​ថ្លែង​ទៀត​ថា ទោះ​ជា​យ៉ាងនេះ​ក្តី ក៏​លោក ព្យាយាម​បញ្ជាក់​ប្រាប់ អ្នកជំងឺ​ថា ការ​មិន​បាន​ប្រារព្ធ​ពិធី​សាសនា​ឲ្យ​បាន​ត្រឹមត្រូវ មិនមែន​ជា​រឿង​ត្រូវ​ស្តីបន្ទោស​ចំពោះ​គ្រោះមហន្តរាយ​ផ្ទាល់​ខ្លួន​នោះ​ទេ។

លោក បន្ថែម​ថា​៖ «យើង ព្យាយាម ឲ្យ​គេ​កាត់បន្ថយ​ជំនឿ​ទាំងនោះ ប៉ុន្តែ​យើង​មិន​អាច​ប្រាប់​ឲ្យ​ពួកគេ​កុំ​ឲ្យ​ធ្វើ​ពិធី​នេះ​បាន​ទេ​»។

កញ្ញា សូម៉ាលី បាន​ថ្លែង​ថា ការ​ភ័យខ្លាច​របស់​នាង ចំពោះ​ផលវិបាក​នៃ​កូនភ្លោះ ថា តើ​ពួកគេ​មាន​ភេទ​ដូច​គ្នា ឬ​ខុស​គ្នា​មាន​ការ​កើនឡើង ចាប់​តាំងពី​បងប្រុស​របស់​នាង បាន​ស្លាប់​ទៅ​ឬ​យ៉ាង​ណា​? នាង បាន​ស្តីបន្ទោស​ការ​ធ្វើ​អត្តឃាត​មួយ​នៃ​សាច់ញាតិ​របស់​ម្តាយមីង​នាង ដែល​មាន​កូនភ្លោះ​ដូច​គ្នា​បេះ​ដាក់ ដោយសារ​តែ​មិន​បាន​ប្រារព្ធ​ពិធី​សាសនា​ឲ្យ​បាន​ត្រឹមត្រូវ​។

នាង​បន្ត​ថា​៖ «ទោះបី កូនភ្លោះ [ភេទ​ដូច​គ្នា] ពួកគេ ត្រូវ​មាន​ពិធី​ពិសេស​មួយ​ភ្លាមៗ​បន្ទាប់ពី​កើត ដោយសារ​តែ​មាន​រឿង​អាក្រក់​ជាច្រើន អាច​នឹង​កើត​មាន​ចំពោះ​ម្នាក់​ក្នុង​ចំណោម​ពួកគេ​»។

ប៉ុន្តែ​លោក សុធារ៉ា បាន​ថ្លែង​ថា លោក មិន​បាន​ដឹង​ពី​ទំនៀមទម្លាប់​តែ​មួយ​គត់​ណា​មួយ​ដែល​ទាក់ទង នឹង​កូនភ្លោះ​ភេទ​តែ​មួយ​ដូច​គ្នា​ឬ​មិន​ដូច​គ្នា​ទេ​។

ជា​ការពិត កូន​ភ្លោះ​ដូច​គ្នា​បេះ​ដាក់​រវាង​លោក ផល សំបូរ​និង​លោក សម្បត្តិ វ័យ ២៦ ឆ្នាំ ដែល​អ្នក​ទាំង​ពីរ ជា​និស្សិត​អនុបណ្ឌិត​នៅឯ​សាកលវិទ្យាល័យ​បញ្ញាសាស្ត្រ​បាន​ថ្លែង​ថា មិន​មាន​អ្វី​ដែល​មិន​ប្រក្រតី បាន​កើតឡើង ចំពោះ​ពួកគេ​ទេ ទោះបី​ពួកគេ​មិន​បាន​រៀបចំ​ពិធី​តាម​បែប​សាសនា​អ្វី​ក៏ដោយ។

លោក បន្ត​ថា​៖ «[យើង] បាន​រៀបចំ​ពិធី​បួងសួង​ដល់​ជីដូនជីតា ប៉ុន្តែ​នោះ​គឺ​ទូទៅ​មិន​ត្រឹមតែ​សម្រាប់​កូនភ្លោះ​នោះ​ទេ​ប៉ុន្តែ​ថែម​ទាំង​សម្រាប់​ក្មេងៗ​ទូទៅ​ផង​ដែរ​»​។

ទោះ​ជា​យ៉ាង​នេះ​ក្តី ក៏​លោក​សំបូរ បាន ថ្លែង​ថា ជួនកាល​ពួកគេ​មាន​ការ​ខឹងសម្បា​ចំពោះ​សម្តី​ដែល​ពួកគេ​ទទួល​។ យើង​មាន​ការ​ខឹង​តិចតួច​នៅ​ពេល​ដែល​គេ​និយាយ​ថា ហេ! ឯង​ទាំង​ពីរ​មើល​ទៅ​ដូច​គ្នា​!»​។

ដូចគ្នា​នេះ​ដែរ និសិ្សត ជាង ចុងយៀន វ័យ ១៩ ឆ្នាំ​នៅឯ​សាកលវិទ្យាល័យ​ភ្នំពេញ​អន្តរជាតិ បាន​ថ្លែង​ថា ទាំង​លោក និង​បងប្អូន​ភ្លោះ​របស់​លោក​ដែល​ដូច​គ្នា​បេះដាក់ មិន​មាន​សំណាង​អាក្រក់​អ្វី​ដែល​បណ្តាល​មកពី​ការ​មិន​រៀបចំ​ពិធី​នេះ​ទេ​។ ដោយ​បាន​កើត​ខណៈ​ដែល​មាន​ក្រុម​ឧទ្ទាម​ខ្មែរក្រហម​វាយឆ្មក់​កាលពី​អំឡុង​ឆ្នាំ​១៩៩៥ ក្រុម​គ្រួសារ​របស់​លោក មិន​បាន​ធ្វើ​ពិធី​តាម​ប្រពៃណី​នៅ​ក្រោយពេល​លោក​កើត​ទេ​។

លោក ថ្លែង​ថា​៖ «​ខ្ញុំ​មិន​ជឿ​វា​ទេ។ ខ្ញុំ​គិត​ថា វា​គួរ​ឲ្យ​អស់​សំណើច​ណាស់​»។

ទន្ទឹម​នឹង​នេះ​ដែរ កញ្ញា​ ​សែម ស្រីមាស ដែល​ជា​ប្អូនស្រី​ភ្លោះ​របស់​លោក​សំណាង បាន​ថ្លែង​ថា នាង​មិន​ដឹង​ច្បាស់​ទេ​ថា តើ​វា​មាន​អបិយ​ជំនឿ​ឬ​យ៉ាងណា​ទេ​សម្រាប់​កូនភ្លោះ​ដែល​មាន​ភេទ​ខុស​គ្នា​។ នាង​បន្ត​ថា ទាំង​នាង និង​បងប្រុស​នាង មិន​បាន​នៅ​ចាំ​រឿង​កាលពី​ជាតិ​មុន​ទេ​។ «ខ្ញុំ​គ្រាន់តែ​បាន​ឮ​វា​ពី​ចាស់ៗ​»៕ NR

អត្ថបទគួរចាប់អារម្មណ៍