The Phnom Penh Post Search

Search form




Logo of Phnom Penh Post newspaper Phnom Penh Post - មានការ​ចង់​ឲ្យ​ពិនិត្យ​ទឹកនោម​ មន្ត្រី​នគរបាល​រក​សារ​ធាតុ​ញៀន

មានការ​ចង់​ឲ្យ​ពិនិត្យ​ទឹកនោម​ មន្ត្រី​នគរបាល​រក​សារ​ធាតុ​ញៀន

Content image - Phnom Penh Post
លោក ស ថេត (ឆ្វេង) កាលពីពេលកន្លងទៅ។ ហុង មិនា

មានការ​ចង់​ឲ្យ​ពិនិត្យ​ទឹកនោម​ មន្ត្រី​នគរបាល​រក​សារ​ធាតុ​ញៀន

ភ្នំពេញៈ ស្នងការ​នគរបាល​រាជធានី​ភ្នំពេញ លោ​ក ស ថេត បាន​បង្ហាញ​បំណង​ចង់​ឲ្យ​មន្ត្រី​នគរបាល​ដែល​ឈរ​ជើង​នៅ​រាជធានី​ភ្នំពេញ​ធ្វើ​តេស្ត​ពិនិត្យ​ទឹក​នោម​រក​សារ​ធាតុ​ញៀន​ដើម្បី​បង្ការ​កុំឱ្យ​មន្ត្រី​ណា​ម្នាក់​ជាប់​ពាក់ព័ន្ធ​នឹង​ករណី​ប្រើប្រាស់​គ្រឿង​ញៀន​ដែល​ច្បាប់​ហាម​ឃាត់។

លោក ស ថេត បាន​ប្រាប់​កាសែត​ភ្នំពេញ​ប៉ុស្ដិ៍​កាលពី​ម្សិលមិញ​ថា លោក​មិន​ទាន់​បាន​កំណត់​ពេល​ជាក់​លាក់​ដើម្បី​ពិនិត្យ​ទឹក​នោម​មន្ត្រី​នគរបាល​រក​សារ​ធាតុ​ញៀន​នៅ​ឡើយ​ទេ​ដោយ​លោក​គ្រាន់​តែ​បញ្ជាក់​ថា​នឹង​ធ្វើ​នៅ​ពេល​វេលា​សម​ស្រប​ណាមួយ។

យ៉ាងណាក្ដី លោក​មិន​ជឿថា​មន្ត្រីនគរបាល​របស់លោក​ណា​ម្នាក់​កំពុង​ស្ថិត​ក្នុង​ការ​ប្រើប្រាស់​គ្រឿង​ញៀន​ឡើយ ព្រោះ​មុន​ពួកគេ​ប្រឡង​ចូល​ក្របខ័ណ្ឌ​គឺ​តែង​មាន​ការ​ពិនិត្យ​ទឹក​នោម​រក​សារ​ធាតុ​ញៀន​ជាមុន។

លោក​ថា៖ «ប៉ុន្តែ​ចូល​ក្របខ័​ណ្ឌ​ហើយ​អាចមាន​បុគ្គល​តិចតួច អាច​ថា​មាន (ការ​ប្រើប្រាស់​គ្រឿង​ញៀន) អាហ្នឹង​ជា​រឿង​មួយ​ផ្សេង។ អ៊ីចឹង (បំណង​ធ្វើ​តេស្ត​ទឹក​នោម) យើង​គ្រាន់​តែ​អប់រំ​ជាមុន មិន​មែន​យើង​សង្ស័យ​មន្ត្រី​នគរបាល​យើង​ពាក់ព័ន្ធ​នឹង​បញ្ហា​នេះ​ទេ យើង​គ្រាន់​តែ​បង្ការ និង​ឱ្យ (នគរបាល) ចៀស​វាង»។

បើតាម​លោក ស ថេត ប្រសិនបើ​ការធ្វើ​តេស្ដ​ទឹកនោម​លើ​មន្ត្រី​នគរបាល​ហើយ​រក​ឃើញ​សារ​ធាតុ​ញៀន នោះ​ពួកគេ​នឹង​ត្រូវ​បណ្ដេញ​ចេញ​ពី​ក្របខ័ណ្ឌ។

ការប្រកាស​របស់លោក ស ថេត នេះ​បាន​ធ្វើឡើង​ស្រប​ពេលដែល​កាល​ពី​សប្ដាហ៍​មុន រដ្ឋមន្ត្រី​ក្រសួង​មហាផ្ទៃ លោក ស ខេង ចេញ​បញ្ជា​ឱ្យ​មន្ត្រី​នគរបាល​ទាំង​អស់​ត្រូវ​បំពេញ​តួនាទី​តាម​វិជ្ជាជីវៈ និង​ស្អាតស្អំ ដោយ​មិន​ត្រូវ​ពាក់ព័ន្ធ​នឹង​ករណី​បទ​ល្មើស​គ្រឿង​ញៀន ដូចជា ការ​ជួញ​ដូរ ចែក​ចាយ និង​លក់​ដូរ​គ្រឿង​ញៀន​ឡើយ។

ការព្រមាន​របស់លោក ស ខេង នេះ បាន​ធ្វើឡើង​បន្ទាប់ពី​មានការ​បង្ក្រាបបាន​គ្រឿង​ញៀន​ជិត ៥០ គីឡូ​ដ៏​កក្រើក​មួយ​នៅ​ក្នុង​មជ្ឈមណ្ឌល​កម្សាន្ត​រ៉ុក​របស់​ឧកញ៉ា ​គិត ធាង និង​ក្រោយ​មក​បាន​រក​ឃើញ​មន្ត្រី​នគរបាល​ម្នាក់​ជាប់​ពាក់ព័ន្ធ​នឹង​បទ​ល្មើស​នេះ​ដែល​កំពុង​ស្ថិត​ក្នុង​ការ​តាម​ចាប់​ខ្លួន។

លោក ឆាយ គឹម​ខឿន មន្ត្រី​នាំពាក្យ​អគ្គស្នងការ​នគរបាល​ជាតិ​បាន​ប្រាប់​ភ្នំពេញ​ប៉ុស្ដិ៍​កាល​ពី​ម្សិលមិញ​ដែរ​ថា មន្ត្រី​នគរបាល​ម្នាក់​ដែល​ពាក់ព័ន្ធ​ករណី​គ្រឿង​ញៀន​នៅ​ក្លិប​កម្សាន្ត​រ៉ុក​នោះ​គឺ​មក​ទល់​ពេល​នេះ​មិន​ទាន់​មក​បង្ហាញ​ខ្លួន​ឬ​តាម​ចាប់​ខ្លួន​បាន​នៅ​ឡើយ​ទេ។ លោក​ថា៖ «យើង​កំពុង​បន្ត​តាម​ចាប់​ខ្លួន»។

លោក សន ជ័យ នាយកប្រតិបត្តិ​អង្គការ​សម្ព័ន្ធ​គណនេ​យ្យ​ភាព​សង្គម​កម្ពុជា​យល់​ឃើញ​ថា ការធ្វើ​តេស្ដ​ទឹក​នោម​រក​សារ​ធាតុ​ញៀន​ពី​មន្ត្រី​នគរបាល​គឺជា​គំរូ​ល្អ ប៉ុន្តែ​លោក​ចង់​ឃើញ​ការ​ធ្វើ​តេស្ដ​នេះ​ត្រូវ​អនុវត្ត​ឱ្យ​បាន​ទូលំ​ទូលាយ​ចាប់​ពី​មន្ត្រី​នគរបាល​ថ្នាក់​ជាតិ រហូត​ដល់​មន្ត្រី​នគរបាល​រដ្ឋបាល​នៅ​តាម​ឃុំ​សង្កាត់។

លោក​ថា៖ «ពួកគេ​ជានគរបាល​ដែល​ត្រូវ​បង្ក្រាប​គ្រឿងញៀន និង​បទ​ល្មើស​ដែល​បង្ក​ឡើង​ពី​គ្រឿង​ញៀន​ក៏​ដូច​គ្រឿង​ស្រវឹង​ជាដើម។ ក្រៅ​ពីនោះ​យើង​ក៏​ចង់​ឃើញ​កងកម្លាំង​ប្រដាប់​អាវុធ​ទាំង​អស់​បង្ហាញ​ភាព​ជា​គំរូ​ល្អ​នេះ​ដែរ»។

ទោះជា​យ៉ាងណា លោក ស ថេត អះអាងថា លោក​ពុំទាន់​ដឹង​អំពី​វិធានការ​របស់​អគ្គ​ស្នងការ​នគរបាល​ជាតិ​ដែល​ចង់​ឱ្យ​មន្ត្រី​នគរបាល​នៅ​ទូទាំង​ប្រទេស ធ្វើ​តេស្ដ​ទឹក​នោម​រក​សារ​ធាតុ​ញៀន​នោះ​ឡើយ៕

អត្ថបទគួរចាប់អារម្មណ៍

  • កោះកុងៈ កូនអណ្តើក​ហ្លួង​ចំនួន ៣០ ​ក្បាល​បាន​ញាស់​ចេញពី​សម្បុក​នៅលើ​ឆ្នេរ​ខ្សាច់​សិប្បនិម្មិត​ក្នុង​មជ្ឈមណ្ឌល​អភិរក្ស​សត្វ​ល្មូន​ខេត្តកោះកុង កាលពី​សប្តាហ៍​កន្លងទៅ ហើយ​នេះ​គឺជា​លើក​ទី​ ២ ​ហើយ ដែល​អណ្តើក​ហ្លួង​ចិញ្ចឹម​ក្នុង​មជ្ឈមណ្ឌល​នេះ​បាន​ពង​កូន​។ នេះ​បើតាម​អង្គការ​សមាគម​អភិរក្ស​សត្វព្រៃ​នៅ​កម្ពុជា (WCS)​។

  • ភ្នំពេញៈ ការបញ្ចូល​មីក្រូ​សារជាតិ​ក្នុង​អង្ករ គឺជា​ជំហាន​ចម្បង​មួយ​ក្នុងការ​ដោះស្រាយ​បញ្ហា​អាហារូបត្ថម្ភ​ក្នុង​ប្រទេស​កម្ពុជា ដែល​ប្រជាជន​ភាគច្រើន​ទទួលទាន​បាយ ក្នុង​បរិមាណ​ច្រើន​ជា​រៀងរាល់ថ្ងៃ​។ នេះ​បើតាម​មន្ត្រី​ក្រុមប្រឹក្សា​ស្តារ​អភិវឌ្ឍន៍​វិស័យ​កសិកម្ម និង​ជនបទ​។

  • ភ្នំពេញ: ក្នុង​ចំណោម​ភោជនីយដ្ឋាន​ពោរពេញ​ដោយ​សិល្បៈ​ចម្អិន​ម្ហូបអាហារ ការ​គិតគូរ​ពី​និរន្តរភាព​បរិស្ថាន​ភព​ផែន​ដី និង​បង្កប់​រឿង​រ៉ាវ​ប្រពៃណី​វប្បធម៌​ដ៏​អស្ចារ្យ​នៅ​អេស្ប៉ាញ ប៉េរូ​សហរដ្ឋអាមេរិក​ ថៃ ដាណឺម៉ាក​ នូវែលសេឡង់ ចិន ជប៉ុន អ៊ីតាលី និង​ម៉ិកស៊ិក អាហារ​នៅ​​ផ្ទះ​ប្រពៃណី​បុរាណ​មួយ​​​តាម​ដង​ទន្លេ​មេគង្គ

  • ភ្នំពេញៈ ទាំង​អ្នកនយោបាយ អ្នកវិភាគ និង​ស្ថាប័ន​គណៈកម្មាធិការ​ជាតិ​រៀបចំ​ការបោះឆ្នោត​បានចាត់ទុក​ដំណើរការ​ឃោសនា​រក​សំឡេងឆ្នោត ក្នុង​រយៈពេល ៣ ​ថ្ងៃ​របស់​គណបក្ស​នយោបាយ ដែល​បាន​ចុះបញ្ជី​បេក្ខជន​ចូលរួម​បោះឆ្នោត​ជ្រើសរើស​ក្រុមប្រឹក្សាឃុំ សង្កាត់​អាណត្តិ​ទី​ ៥ ដែល​នឹង​ប្រព្រឹត្តទៅ​នៅ​ថ្ងៃទី​ ៥ ខែមិថុនា ថា មាន​ភាពចាស់ទុំ​ផ្នែក​នយោបាយ និង​មិនមាន​អំពើហិង្សា​ណាមួយ​កើតឡើង​នោះ

  • ភ្នំពេញៈ សាលាឧទ្ធរណ៍​ភ្នំពេញ​នៅ​ថ្ងៃទី​ ២៣ ​ឧសភា បានប្រកាស​សាលដីកា​កំបាំង​មុខមន្ត្រី​សមាគម​ការពារ​សិទ្ធិមនុស្ស​អាដហុក​ ៤ ​រូប និង​អតីត​មន្ត្រី​ ១ ​រូប​ទៀត​សម្រេច​តម្កល់​សាលក្រម​របស់​សាលាដំបូង​រាជធានី​ភ្នំពេញ​ដដែល បន្ទាប់ពី​បាន​កាត់ក្តី​ឱ្យ​ពួកគេ​ជាប់ពន្ធនាគារ​ក្នុង​ម្នាក់​ ៥ ​ឆ្នាំ តែ​ឱ្យ​អនុវត្ត​ទោស ​១៤ ​ខែ​ពាក់ព័ន្ធ​បទចោទ​សូកប៉ាន់​សាក្សី និង​សមគំនិត​សូកប៉ាន់​សាក្សី​ដល់​ នាង ខុម ចាន់តារាទី ហៅ​ ស្រីមុំ​។

  • បន្ទាយមានជ័យៈ ក្នុង​មួយ​ថ្ងៃៗ​មាន​ប្រជាពលរដ្ឋ​នៅតាម​ព្រំដែន ជាពិសេស​ពលករ​ខ្មែរ​ពី ​៤០០ ទៅ​ ៥០០​ នាក់​បាន​ទៅ​ស្នើសុំ​ធ្វើ​បណ្ណ​ឆ្លងដែន ដើម្បី​បាន​ចូលទៅ​ធ្វើការ ឬ​លក់ដូរ​ស្របច្បាប់ នៅក្នុង​ប្រទេស​ថៃ បន្ទាប់ពី​ភាគី​ទាំង​ ២​ បាន​ឯកភាព​គ្នា​បើក​ច្រកព្រំដែន​ឡើងវិញ កាលពី​ថ្ងៃទី​ ១ ខែឧសភា ក្នុង​កម្រិត​ថ្នាក់​តំបន់​។