មណ្ឌលគិរីៈ សកម្មជនព្រៃឈើនៅខេត្តមណ្ឌលគិរីបញ្ជាក់ថា ទាហាននៅមូលដ្ឋានកងទ័ពគ ១ នៅស្រុកពេជ្រាដា និងពលរដ្ឋខ្មែរចំនួន ៣ នាក់បានឃុបឃិតជាមួយជនជាតិវៀតណាម ៣ នាក់ទៀតប្រមូលយកសសរថ្មលក្ខណៈធម្មជាតិ មានអាយុកាលរាប់រយឆ្នាំ ដើម្បីដឹកចេញទៅលក់នៅប្រទេសវៀតណាម។
លោក គ្រើង តុលា សកម្មជនព្រៃឈើនៅឃុំប៊ូស្រាប្រាប់ភ្នំពេញ-ប៉ុស្ដិ៍ពីម្សិលមិញថាកាលពីថ្ងៃព្រហស្បតិ៍សប្ដាហ៍មុនលោក និង ពលរដ្ឋមួយចំនួនទៀតបានសហការជាមួយប៉ូលិសប៉ុស្ដិ៍ឃុំប៊ូស្រាចំនួន ៣ នាក់ចុះទៅដល់ទីតាំងចំណុចអូរស្រាក្នុងភូមិឡាំម៉េះ ស្រុកពេជ្រាដា បន្ទាប់ពីអ្នកភូមិរាយការណ៍ថា ទីតាំងនោះកំពុងមានទាហានខ្មែរ និងជនជាតិវៀតណាមធ្វើសកម្មភាពគាស់កាយយកសសរថ្មធម្មជាតិ ដើម្បីដឹកទៅលក់នៅប្រទេសវៀតណាម។ សសរថ្មធម្មជាតិនោះមានមុខកាត់ចាប់ពី ៤០ ទៅ ៦០ សង់ទីម៉ែត្រ និងប្រវែង ២ ទៅដល់ ៤ ម៉ែត្រ។
លោកបន្តថានៅទីតាំងនោះមានសសរថ្មរាប់ពាន់ដើមដែលពលរដ្ឋជឿជាក់ថា មានអាយុរាប់រយឆ្នាំដែលស្ថិតនៅចម្ងាយពីផ្ទះរបស់ប្រជាពលរដ្ឋប្រហែល ១០ គីឡូម៉ែត្រ និងពីប្រទេសវៀតណាមប្រហែល ៤០ គីឡូ។ លោកបញ្ជាក់ថា ក្នុងសសរ ១ ដើមត្រូវបានគេថ្លឹងលក់ និងមានតម្លៃរាប់ពាន់ដុល្លារ នៅពេលដឹកទៅលក់នៅប្រទេសវៀតណាមដោយយកទៅធ្វើជារបស់លម្អសម្រាប់ដាក់តាំងនៅក្នុងផ្ទះ។
លោក គ្រើង តុលា ប្រាប់ថា៖ «គ្រាន់តែបានដឹងពីប្រជាពលរដ្ឋរាយការណ៍ភ្លាម ខ្ញុំបានខលទៅអភិបាលស្រុកពេជ្រាដា ដើម្បីសុំកម្លាំង ដោយសារក្រុមហ្នឹងដែលជាទាហានគឺមានកាំភ្លើង អ៊ីចឹងខ្ញុំមិនហ៊ានទៅជាមួយសហគមន៍ទេ។ មានប៉ូលិសប៉ុស្ដិ៍ ៣ នាក់ទៅជាមួយពួកខ្ញុំប៉ុន្តែដោយសារបែកការណ៍មុនពួកហ្នឹងបានរត់ហើយមកជួបយើងនៅតាមផ្លូវដែលមានចម្ងាយពីទីតាំងកើតហេតុប្រហែល ១ គីឡូ។ យើងបានចុះទៅដល់កន្លែងកើតហេតុផ្ទាល់ ហើយមិនអាចឃាត់ពួកគេបានទេ ដោយសារយើងគ្មានភ័ស្ដុតាង ពីព្រោះជួប (ពួក) វាតាមផ្លូវ»។
សកម្មជនព្រៃឈើរូបនេះបន្តថា ទាហានចំនួន ៣ នាក់ដែលសហការជាមួយជនជាតិវៀតណាមដើម្បីលួចយកសសរថ្មពីខ្មែរទៅលក់នៅប្រទេសវៀតណាម គឺជាទាហានមកពីមូលដ្ឋានកងទ័ពគ ១ ប្រចាំនៅស្រុកពេជ្រាដា។ សសរថ្មទាំងនេះគឺជាសម្បត្តិរបស់ជាតិដែលមានតម្លៃស្មើនឹងសម្បត្តិធនធានធម្មជាតិផ្សេងទៀត ដូចជាព្រៃឈើ និងរ៉ែជាដើម។
លោកថ្លែងថា៖ «ខ្ញុំគិតថាអ្វីដែលគួរធ្វើ គឺរក្សាអ្វីដែលជាសម្បត្តិដូនតា និងសម្បត្តិរបស់ជាតិយើង គឺជារឿងត្រឹមត្រូវ ហើយបើយើងយកទៅលក់ឱ្យគេ វាក្លាយជាសម្បត្តិរបស់គេ។ អ៊ីចឹងខ្ញុំមានការសោកស្ដាយ ហើយខ្ញុំសំណូមពរឱ្យអាជ្ញាធរ និងថ្នាក់ដឹកនាំកំពូលៗដែលមានប្រាក់ខែហើយ គួរស្ងប់ហើយក្នុងនាមជាកងទ័ពមានកាតព្វកិច្ចស្នេហាជាតិត្រូវចេះស្រឡាញ់ជាតិ»។
លោក តុលា សង្ស័យថាមូលហេតុមានជនជាតិវៀតណាមអាចចូលមកយកថ្មនៅក្នុងខេត្តមណ្ឌលគិរីនេះអាចមានការបើកផ្លូវពីមន្ត្រីក្នុងខេត្ត។ លោកបញ្ជាក់ទៀតថា នៅពេលក្រុមពលរដ្ឋ និងប៉ូលិសចុះដល់ទីតាំងនោះសង្កេតឃើញថ្មមួយចំនួនត្រូវគាស់ចេញពីដី ប៉ុន្តែមិនបានឃើញមានគ្រឿងចក្រត្រៀមដឹកចេញនោះទេ។
លោក លន់ គឹមហេង មេប៉ុស្ដិ៍ឃុំប៊ូស្រានិយាយដែរថា ពិតជាមានជនជាតិវៀតណាមចូលមកគាស់សសរថ្មទាំងនោះក្នុងមូលដ្ឋានរបស់លោកមែន។ លោកបន្តថា សសរថ្មទាំងនោះត្រូវបានគេដឹងតៗគ្នាថាបានដុះឡើងដោយខ្លួនឯងនៅតាមចង្កេះភ្នំប៉ុន្តែមើលទៅប្រៀបដូចជាត្រូវបានគេលើកបន្តុបលើគ្នា ដែលហាក់ដូចជាទីតាំងរបស់ប្រាសាទដែរ។
លោកថ្លែងថា៖ «តាមខ្ញុំសង្កេតមើលទៅថ្មទាំងហ្នឹង គឺអ្នកមានគេចង់យកទៅធ្វើជាបង្កាន់ដៃផ្ទះ ឬធ្វើជាភូមិគ្រឹះ ហើយមិនមែនលំដាប់អ្នកទន់ខ្សោយមកយកថ្មហ្នឹងទេ។ ទីតាំងហ្នឹងមិនមែនជាប្រាសាទបុរាណអីទេ ប៉ុន្តែគ្រាន់តែថា ថ្មទាំងអស់ហ្នឹងដុះមកស្អាត ហើយដែលគេចង់យកទៅធ្វើជាផ្ទះ ហើយវាដុះនៅតាមចង្កេះភ្នំដែលមានកម្ពស់ប្រហែល ២ ម៉ែត្រទៅ ២ ម៉ែត្រជាង»។
មេប៉ុស្ដិ៍រូបនេះបញ្ជាក់ថា មិនមានទាហានមកពីមូលដ្ឋានកងទ័ពគ ១ ឃុបឃិតជាមួយជនជាតិវៀតណាម មកយកថ្មទាំងនេះទេ។ លោកក៏មិនអាចបញ្ជាក់ដែរថា ថ្មទាំងនោះពិតជាត្រូវបានគេប្រុងដឹកចេញទៅលក់នៅប្រទេសវៀតណាមឬយ៉ាងណានោះដែរ។ លោកបន្ថែមថា សកម្មភាពលួចថ្មទាំងនេះ គឺត្រូវចាត់ចូលពីបទបំផ្លាញធនធានរបស់ជាតិ។
លោកថា៖ «ខ្ញុំបញ្ជាក់បន្តិច ទាហានទាំងអស់ហ្នឹងពីមុនជាទាហានមែនប៉ុន្តែឥឡូវគេដេញពួកវាចេញក្រៅជួរហើយ។ យើងកំពុងតាមដានក្រែងពួកវាទៅយកទៀតដើម្បីថតអំពីសកម្មភាពដើម្បីដាក់បន្ទុកពួកវា។ ព្រោះឥឡូវយើងមិនទាន់ឃើញពួកវាធ្វើសកម្មភាពនៅកន្លែងកើតហេតុហ្នឹងផង អ៊ីចឹង! យើងមិនអាចដាក់បន្ទុកលើពួកវាបានទេ»។
លោក គង់ ដាំ មេបញ្ជាការមូលដ្ឋានកងទ័ពគ ១ ថា មិនបានដឹងទាហានឃុបឃិតជាមួយជនជាតិវៀតណាមលួចថ្មពីខ្មែរទៅលក់នៅប្រទេសវៀតណាមឡើយ។លោកថា៖ «និយាយរួមខ្ញុំមិនដែលឮថានៅស្រុកពេជ្រាដា មានថ្មហ្នឹងផង»។ លោក កែវ សុភ័ក្រ ប្រធានមន្ទីរបរិស្ថានខេត្តមណ្ឌលគិរី មិនអាចទាក់ទងសុំបញ្ជាក់បានទេពីម្សិលមិញ៕
វីដេអូ៖