ភ្នំពេញៈ ក្រុមប្រឹក្សាជាតិកម្ពុជាដើម្បីកុមារ (ក.ជ.ក) បានថ្កោលទោសករណីបោះបង់កូនចោលក្រោយពេលសម្រាល ខណៈអង្គភាពការពារកុមារ Child Protection Unit (CPU) កំពុងសហការជាមួយស្នងការដ្ឋាននគរបាលរាជធានីភ្នំពេញ និងនាយកដ្ឋាននគរបាលបច្ចេកទេស និងវិទ្យាសាស្ត្រក្រសួងមហាផ្ទៃស៊ើបអង្កេតករណីនេះព្រោះអាចពាក់ព័ន្ធរឿងព្រហ្មទណ្ឌ។
ការថ្កោលទោសនេះធ្វើឡើងតាមសេចក្ដីថ្លែងការណ៍ពីថ្ងៃទី ៣ ខែវិច្ឆិកា ដោយហៅការបោះបង់ទារកចោលថា ជាអំពើឃោរឃៅ យង់ឃ្នង ព្រៃផ្សៃ អមនុស្សធម៌ បន្ទាប់ពីមានករណីនេះនៅសង្កាត់ស្រះចក ខណ្ឌដូនពេញ រាជធានីភ្នំពេញ។ ជាមួយនេះ (ក.ជ.ក) បានស្នើស្ថាប័នពាក់ព័ន្ធ យកចិត្តទុកដាក់ចាត់វិធានការតាមច្បាប់ឱ្យតឹងរ៉ឹងលើជនល្មើស ដើម្បីកុំឱ្យអំពើអាក្រក់នេះកើតមានបន្តទៀត។
លោកស្រី ញ៉េប សុភាព អគ្គលេខាធិការនៃ (ក.ជ.ក) បានថ្លែងពីម្សិលមិញថា កត្តាដែលជំរុញឱ្យជនល្មើសប្រព្រឹត្តបែបនេះដោយសារពួកគាត់ខ្លះខ្វះចំណេះដឹង និងមានការទទួលខុសត្រូវទាបមានការលោភលន់ច្រើន និងជាមនុស្សខូចចិត្ត ប៉ុន្ដែមិនពាក់ព័ន្ធកត្តាជីវភាពទេ។ «ខ្ញុំគិតថា បញ្ហានេះគឺមកពីឪពុកម្ដាយខ្លះមិនទាន់យល់ពីតួនាទីខ្លួនឯង ការគិតពិចារណាទាប ទើបអាចប្រព្រឹត្តរឿងមិនគប្បីបែបនេះ»។
ទាក់ទងបញ្ហានេះដែរកាលពីថ្ងៃទី ២ វិច្ឆិកា លោក James McCabe នាយកប្រតិបត្តិអង្គភាពការពារកុមារ (CPU) បានសរសេរនៅក្នុងទំព័រហ្វេសប៊ុកថា អង្គភាព (CPU) ជាមួយសមត្ថកិច្ចនៃស្នងការដ្ឋាននគរបាលរាជធានីភ្នំពេញ និងនាយកដ្ឋាននគរបាលបច្ចេកទេស និងវិទ្យាសាស្ត្រនៃក្រសួងមហាផ្ទៃបានស៊ើបអង្កេត បន្ទាប់ពីបានរកឃើញសាកសពទារកទើបមានអាយុពី ១ ទៅ ៣ ថ្ងៃនៅមុខវិទ្យាល័យហ៊ុនសែនប៊ុនរ៉ានីវត្តភ្នំកាលពីថ្ងៃទី ១ វិច្ឆិកា ឆ្នាំ ២០២០។
លោក James McCabe បានសរសេរថា៖ «ក្រុមការងារស៊ើបអង្កេតបទល្មើសមនុស្សឃាត និងក្រុមការងារបច្ចេកទេស និងវិទ្យាសាស្ត្រនៃអង្គភាពការពារកុមារ (CPU) បានចូលរួមពិនិត្យកន្លែងកើតហេតុ និងធ្វើកោសល្យវិច័យសាកសពបានរកឃើញថា ការស្លាប់របស់ទារកនេះគឺមានស្ថានភាពគួរឱ្យសង្ស័យ» ។
តាមមន្ត្រីរបស់ CPU ម្នាក់ទៀតសុំមិនបញ្ចេញឈ្មោះដែលបានចូលរួមពិនិត្យកន្លែងកើតហេតុបានប្រាប់ភ្នំពេញប៉ុស្តិ៍ពីថ្ងៃទី ៣ វិច្ឆិកាថា បច្ចុប្បន្ន CPU និងសមត្ថកិច្ចពាក់ព័ន្ធកំពុងដំណើរការនីតិវិធីស៊ើបអង្កេត។ ហេតុនេះមិនអាចផ្តល់ព័ត៌មានលម្អិតបានទេ។
លោកថា៖ «យើងចង់ឱ្យមានការផ្សព្វផ្សាយដែរ ប៉ុន្តែយើងកំពុងដំណើរការស៊ើបអង្កេតហើយខាងប៉ូលិសក៏កំពុងធ្វើការស៊ើបអង្កេតរឿងហ្នឹងបន្ថែមដែរថា មូលហេតុអ្វីបានជាគាត់ [ប្រជាពលរដ្ឋបង្កើតកូនហើយបោះបង់ចោល] យកសាកសពក្មេងដែលស្លាប់ហើយយកទៅបោះបង់ចោលមិនយកទៅធ្វើបុណ្យ អ៊ីចឹងទៅ»។
យ៉ាងណាក្ដី ភ្នំពេញ ប៉ុស្តិ៍ មិនអាចសុំការបំភ្លឺពីស្នងការនគរបាលរាជធានីភ្នំពេញលោក ស ថេត បានទេកាលពីថ្ងៃទី ៣ វិច្ឆិកាដោយលោកថា កំពុងនៅក្រៅប្រទេស ហើយបានណែនាំឱ្យទាក់ទងទៅខាងប្រតិកម្មរហ័ស ប៉ុន្តែលេខទូរស័ព្ទមិនអាចទាក់ទងបាន។ ចំណែកឯលោកស្រី ម៉ានចិន្តា រដ្ឋលេខាធិការ និងជាអ្នកនាំពាក្យក្រសួងកិច្ចការនារីក៏មិនបានបកស្រាយអ្វីជុំវិញរឿងនេះដែរ។
ក៏ប៉ុន្តែលោកមេធាវី សាង គឹមថាច់ បានឱ្យដឹងពីថ្ងៃទី ៣ វិច្ឆិកា ថាតាមក្រមព្រហ្មទណ្ឌកម្ពុជាមាត្រា ៣២១ អំពើរបស់បុគ្គលមានអំណាចថែរក្សាដែលបោះបង់អនីតិជនអាយុតិចជាង ១៥ (ដប់ប្រាំ) ឆ្នាំត្រូវផ្ដន្ទាទោសដាក់ពន្ធនាគារពី ១ (មួយ) ឆ្នាំ ទៅ ៥ (ប្រាំ) ឆ្នាំ និងពិន័យជាប្រាក់ពី ២ ០០០ ០០០ (ពីរលាន) រៀលទៅ ១០ ០០០-០០០ (ដប់លាន) រៀល ប្រសិនបើអំពើបោះបង់នោះបណ្ដាលឱ្យអន្ដរាយដល់សុខភាព ឬសន្ដិសុខរបស់អនីតិជននោះ។
លោកបានបញ្ជាក់ថា៖ «ការបោះបង់កូនចោលដែលជាអនីតិជនអាយុតិចជាង ១៥ ឆ្នាំអាចបណ្តាលមកពីកត្តាផ្សេងៗដូចជាឪពុកម្តាយមានវ័យក្មេង និងមិនបានយល់ដឹងពីច្បាប់ដែលត្រូវផ្តន្ទាទោសរហូតជាប់ពន្ធនាគារ។ ក្នុងករណីស្ត្រីវ័យក្មេងមានផ្ទៃពោះដោយគ្មានការគ្រោងទុក ហើយមិនចង់ទុកកូន គួរតែទទួលបានការប្រឹក្សាផ្នែកច្បាប់ពាក់ព័ន្ធនឹងការរម្លូតកូនក្នុងលក្ខខណ្ឌណាមួយដែលច្បាប់អនុញ្ញាត»៕
វីដេអូ៖