.jpg)
លោកសុខ ឥសាន អ្នកនាំពាក្យគណបក្សប្រជាជនកម្ពុជា នាពេលកន្លងមក។ ហេង ជីវ័ន
ភ្នំពេញៈ ប្រភពព័ត៌មានដែលសុំមិនឲ្យបញ្ចេញឈ្មោះពីមន្ត្រីម្នាក់ក្នុងចំណោមមន្ត្រីជាប់បម្រាមធ្វើនយោបាយជាង ១១០ រូបនោះ បង្ហើបឲ្យដឹងថា ក្រុមអ្នកជាប់បម្រាមទាំងនោះនឹងស្នើសុំសិទ្ធិធ្វើនយោបាយឡើងវិញក្នុងទ្រង់ទ្រាយធំឆាប់ៗនេះដែលការបញ្ចេញព័ត៌មាននេះ ខណៈដែលមន្ត្រីជាន់ខ្ពស់បក្សកាន់អំណាច និងអ្នកនយោបាយ ក៏បានផ្ដល់យោបល់ឲ្យអ្នកជាប់បម្រាមស្នើសុំសិទ្ធិធ្វើនយោបាយឡើងវិញផងដែរ។
ប្រភពព័ត៌មានពីមនុស្សម្នាក់ក្នុងចំណោម ១១៨ បានថ្លែងប្រាប់យ៉ាងខ្លីថា នាពេលនេះមានការរៀបចំស្នើសុំសិទ្ធិធ្វើនយោបាយវិញក្នុងទ្រង់ទ្រាយធំ។ ទោះយ៉ាងណាប្រភពនោះមិនបញ្ជាក់លម្អិតពីចំនួនអ្នកស្នើសុំសិទ្ធិធ្វើនយោបាយវិញមានប៉ុន្មាននាក់ទេ។ ប៉ុន្តែ គិតត្រឹមថ្ងៃពុធម្សិលមិញ លោក ផាត សុផានិត អ្នកនាំពាក្យក្រសួងមហាផ្ទៃដែលជាសេនាធិការទទួលពាក្យស្នើសុំនីតិសម្បទានយោបាយនោះបានប្រាប់ឲ្យដឹងថា មិនទាន់មានការដាក់ពាក្យស្នើទៀតនៅឡើយទេ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានសរសេរតាមប្រព័ន្ធតេឡេក្រាម កាលពីថ្ងៃអង្គារថា អ្នក កឹម សុខា និយមគួរតែស្នើសុំសិទ្ធិធ្វើនយោបាយវិញព្រោះថា លោក កឹម សុខា និងលោក សម រង្ស៊ី មិនមែនជាមនុស្សតែមួយទេ ផ្ទុយទៅវិញលោក កឹម សុខា ត្រូវបានលោក សម រង្ស៊ី ជាន់ពន្លិច។
លោកថ្លែងថា៖«នៅពេលនេះជាឱកាសមាសឱកាសពេជ្រសម្រាប់ក្រុមកឹម សុខានិយម ជាពិសេសកូនស្រី កឹម សុខា មិនគួរនៅបង្អែបង្អង់តទៅទៀតទេ។ បើនៅតែអល់អែករង់ចាំមើលសភាពការណ៍ដោយអូសបន្លាយពេលនឹងនាំឲ្យខាតប្រយោជន៍ជាមិនខាន»។
លោកបន្តថា៖ «ដូច្នេះបើដឹងល្បិចកលពិសពុលរបស់ទណ្ឌិតរត់ចោលស្រុកហើយ គួរគប្បីរួសរាន់បង្ហាញឲ្យឃើញសកម្មភាពប្រតិកម្មប្រឆាំងនឹងក្រុមទណ្ឌិតរត់ចោលស្រុកឲ្យបានឆាប់រហ័សដើម្បីផលប្រយោជន៍ កឹម សុខា និងក្រុមកឹម សុខា និយម»។
លោក សុខ ឥសាន ថ្លែងថា អ្វីដែលក្រុមអ្នកនិយម កឹម សុខា គួរធ្វើដើម្បីធ្វើឲ្យមានសភាពការណ៍នយោបាយថ្មីដែលអំណោយផលដល់លោក កឹម សុខា និងក្រុមរបស់គាត់ គឺបង្ហាញជំហរការពារផលប្រយោជន៍កម្មករនិយោជិត និងប្រជាពលរដ្ឋដោយប្រឆាំងនឹងការព្យាយាមដកប្រព័ន្ធអនុគ្រោះពន្ធ EBA និង GSP ដោយសហភាពអឺរ៉ុប និងអាមេរិក។
លោកថ្លែងថា៖ «សូមក្រុម កឹម សុខា និយមកុំកាប់បំពង់រង់ចាំទឹកភ្លៀងនៅខែប្រាំងឲ្យសោះ។ បើមិនលើកទំនប់ ជីកប្រឡាយទេនឹងអត់មានទឹកធ្វើស្រែទេ សូមជ្រាប»។
ថ្លែងប្រាប់ភ្នំពេញប៉ុស្តិ៍ពីម្សិលមិញ លោក សុខ ឥសាន បញ្ជាក់ថា អ្វីដែលលោកបានសរសេរគឺជាយោបល់ផ្ទាល់ខ្លួនព្រោះថា លោក កឹម សុខា និងលោកសម រង្ស៊ី មិនមែនជាមនុស្សតែមួយទេ គឺមួយកំពុងស្ថិតនៅក្រោមការត្រួតពិនិត្យរបស់តុលាការ ហើយមួយទៀតកំពុងជិះស្គីលេងនៅបារាំង។ លោកបានបញ្ជាក់សាជាថ្មីនូវពាក្យរបស់លោកនាយករដ្ឋមន្ត្រីដែលបានថ្លែងកាលពីថ្ងៃចន្ទថា ទ្វារដែលបើកចំហអាចនឹងបិទ ហើយផលប្រយោជន៍នយោបាយនឹងបាត់បង់សម្រាប់ពួកគេ។
លោកថា៖ «ប្រសាសន៍របស់គាត់ (លោក ហ៊ុន សែន) គឺជាចេតនាល្អដើម្បីឲ្យបងប្អូនមានសិទ្ធិនយោបាយឡើងវិញ កុំបន្ទោសគណបក្សប្រជាជនកម្ពុជាបិទសិទ្ធិអ្នកដទៃ ឬមួយយាយីអ្នកដទៃមិនឲ្យមានសិទ្ធិធ្វើនយោបាយ»។
លោក គង់ គាំ ដែលទទួលបានសិទ្ធិធ្វើនយោបាយវិញ ហើយបច្ចុប្បន្នជាប្រធានកិត្តិយសគណបក្សឆន្ទៈខ្មែរ ក៏បានជំរុញលើកទឹកចិត្តដល់អ្នកនយោបាយជាប់បម្រាមដទៃទៀតឲ្យស្នើសុំសិទ្ធិធ្វើនយោបាយ ដោយមិនបាច់ស្ដាប់ការណែនាំរបស់លោក សម រង្ស៊ី។
លោកថា ការអំពាវនាវរបស់លោក សម រង្ស៊ី មិនឲ្យស្នើសុំនីតិសម្បទានយោបាយ ការគំរាមចូលមកចាប់លោកនាយករដ្ឋមន្ត្រី ហ៊ុន សែន និងការអំពាវនាវឲ្យកងទ័ពមិនស្ដាប់បង្គាប់នោះ គឺជាការធ្វើឲ្យមានការបែកបាក់ប៉ុណ្ណោះ។
លោកថ្លែងថា៖ «គាត់កំពុងតែបំបែកបំបាក់ទាំងផ្ទៃក្នុងគណបក្សសង្គ្រោះជាតិ ហើយកំពុងតែបំបែកបំបាក់អ្នកគ្រប់គ្រងអំណាចនៅកម្ពុជាដើម្បីបម្រើមហិច្ឆតារបស់គាត់ ប៉ុន្តែអ្វីដែលជាមហិច្ចតាទាំងអស់នេះគឺថាធ្វើឲ្យគាត់កាន់តែឯកោ។ គាត់ជាមេមាន់ចង់កៀងកូនទាដែលនៅក្នុងទឹកឲ្យតាមគាត់។ ខ្ញុំគិតថា មេមាន់មិនអាចគ្រប់គ្រងកូនទាបានទេ ដូច្នេះទាំងសមាជិករបស់គាត់ ទាំងអ្នកដឹកនាំនៅកម្ពុជាមិនលុះដោយការញុះញង់ ការលើកឡើងរបស់គាត់ទេ។ ដូច្នេះគាត់ជាមេមាន់ដែលស្រែកពីត្រើយដង្ហោយចង់ឲ្យកូនទាដើរតាមនោះ វាមិនអាចទៅរួចទេបាទ»។
លោកបន្តថា ទាំងលោក កឹម សុខា និងក្រុមនិយម កឹម សុខា គួរធ្វើតាមសតិសម្បជញ្ញៈ មនសិការ ហើយបន្តជីវិតនយោបាយឡើងវិញឲ្យបានឆាប់រហ័សទៅ។
លោកថា ពាក្យស្លោក «កឹម សុខា សម រង្ស៊ី ជាមនុស្សតែមួយ» នាពេលនេះគ្រាន់តែជាពាក្យសម្ដីប៉ុណ្ណោះ «ដូច្នេះគេមិនយកសម្ដី គេយកអំពើ។ អំពើគឺបែកបាក់គ្នាបាត់ទៅហើយ ដូច្នេះវាសាបសូន្យហើយ»។
លោក អ៊ូ ច័ន្ទរ័ត្ន ដែលជាប់បម្រាមដែរនោះ បានថ្លែងថាលោកមិនទាន់សម្រេចចិត្ត ហើយនៅតែស្នើសុំឲ្យក្រសួងមហាផ្ទៃរៀបចំការស្នើសុំជាកញ្ចប់ទោះជាប៉ុន្មាននាក់ក៏ដោយ។ ប៉ុន្តែលោកបានកោតសរសើរដល់អ្នកដែលបានទទួលនីតិសម្បទានយោបាយរួចហើយ និងស្នើកុំឲ្យមានការជេរប្រមាថពួកគេ។
លោកថ្លែងថា៖ «អ្នកដែលគេបានចេញទៅនោះគួរតែពិនិត្យថា គេបានលះបង់បួនដប់ម្ភៃឆ្នាំជាមួយគណបក្សប្រឆាំង គេបានលះបង់ពេលវេលាថវិកា កម្លាំងចិត្ត និងកាយក្នុងបក្សប្រឆាំង គួរតែអរគុណគេវិញ មិនគួរជេរប្រមាថទេ។ មួយចំនួនធំដែលជេរប្រមាថគេនោះ ខ្លួនឯងអត់ទាំងបានធ្វើអីផងកន្លែងខ្លះ»។
លោក ឯម សុវណ្ណារ៉ា អ្នកវិភាគនយោបាយយល់ឃើញថា ការលើកឡើងរបស់លោក សុខ ឥសាន នឹងធ្វើឲ្យគណបក្សសង្គ្រោះជាតិដែលប្រេះឆាស្រាប់នោះ បែកបាក់កាន់តែខ្លាំង។ លោកថ្លែងថា លោក សម រង្ស៊ី បានចងជើងមន្ត្រីបក្សសង្គ្រោះជាតិតាំងពីលោកឡើងកាន់ជាប្រធានស្តីទី ដោយហាមមិនឲ្យមន្ត្រី CNRP ស្នើសុំនីតិសម្បទានយោបាយ។
លោកថា អ្នកដែលស្នើសុំធ្វើនយោបាយប្រឈមមុខនឹងការឈប់គាំទ្រពីពលរដ្ឋ ហើយការឈប់គាំទ្រនេះគឺជាជោគជ័យរបស់គណបក្សប្រជាជនកម្ពុជាដែលកំពុងកាន់អំណាច។
លោកថា៖ «គ្រប់អ្នកនយោបាយ គ្រប់គណបក្សត្រូវយកការគាំទ្រពីប្រជាពលរដ្ឋឲ្យបាន។ សង្គ្រោះជាតិកន្លងមកមានការគាំទ្រពីពលរដ្ឋដោយសារតែគាត់គោរពស្មារតីដែលពលរដ្ឋចង់បាន។ បើគាត់លែងគោរពលើការជឿទុកចិត្តរបស់ពលរដ្ឋហើយ បានន័យថាពលរដ្ឋលែងគាំទ្រហើយ»។
លោក ឡៅ ម៉ុងហៃ អ្នកវិភាគនយោបាយបានថ្លែងថា ការវិវឌ្ឍចុងក្រោយនេះហាក់ដូចជាយុទ្ធសាស្ត្រ «ការ៉ុត និងឈើ» ឬជាយុទ្ធសាស្ត្រផ្ដល់រង្វាន់ផង និងគំរាមកំហែងផង។
លោកថ្លែងថា៖ «លោកនាយករដ្ឋមន្ត្រីថ្មីៗនេះបានលើកដំបងក្នុងរូបភាពគំរាមកំហែងថានឹងបញ្ឈប់ការផ្ដល់ (ឱកាស) ហើយឯកឧត្តម សុខ ឥសាន កំពុងផ្ដល់ការ៉ុត (រង្វាន់) ក្នុងរូបភាពដែលថានឹងមានតម្រុយសម្រាប់លោក កឹម សុខា ដើម្បីទាក់ទាញពួកគេឲ្យទទួលយក ហើយធ្វើឲ្យដើរចេញពី សម រង្ស៊ី»។
លោក ម៉ុងហៃ បានបញ្ជាក់ថា៖ «វាគួរឲ្យឆ្ងល់ណាស់ថា តើអ្នកទាំងនោះ (អតីតបក្សប្រឆាំង ) ត្រូវគេទាញបានឬអត់នៅពេលពួកគេដឹងច្បាស់ថា ទ្រនិចនាឡិកានៃការដក EBA និង GSP កំពុងតែដើរទៅឆ្ងាយពីរដ្ឋាភិបាល»៕
