.jpg)
លោក អេង ឆៃអ៊ាង អតីតតំណាងរាស្ត្រអតីតគណបក្សសង្គ្រោះជាតិ។ រូបថត ភ្នំពេញប៉ុស្តិ៍
ភ្នំពេញៈ លោកនាយករដ្ឋមន្ត្រី ហ៊ុន សែន បានបញ្ជាក់ជាថ្មីថា ៧ មករាគឺជាថ្ងៃកំណើតទី ២ ជាសច្ចធម៌ប្រវត្តិសាស្ត្រដែលគ្មានជនណា ឬកម្លាំងណាអាចមកបំភ្លៃ ឬបំផ្លាញបានឡើយ ខណៈអ្នកប្រវត្តិសាស្ត្រ និងប្រជាពលរដ្ឋមួយចំនួនបានរិះគន់ចំពោះការលើកឡើងរបស់មន្ត្រីជាន់ខ្ពស់ អតីតគណបក្សសង្គ្រោះជាតិដែលថា ៧ មករាគឺជាថ្ងៃចាប់ផ្ដើមនៃការឈ្លានពានរបស់វៀតណាមមកលើកម្ពុជា។
នៅក្នុងពិធីអបអរសាទរខួបលើកទី ៤០ ឆ្នាំថ្ងៃជ័យជម្នះ ៧ មករា ដែលធ្វើឡើងនៅពហុកីឡដ្ឋានជាតិ អូឡាំពិក កាលពីម្សិលមិញដែលមានអ្នកចូលរួមរាប់ម៉ឺននាក់លោក ហ៊ុន សែន ថ្លែងបញ្ជាក់ជាថ្មីទៀតថា៖ «ប្រជាជនកម្ពុជាបានប្រសិទ្ធនាមថាថ្ងៃ ៧ មករា ឆ្នាំ ១៩៧៩ គឺជាថ្ងៃកំណើតទី ២ របស់ខ្លួន បើគ្មានជ័យជម្នះ ៧ មករា ក៏យើងគ្មានអ្វីៗនៅថ្ងៃនេះដែរ។ នេះជាសច្ចធម៌ប្រវត្តិសាស្ត្រដែលគ្មានជនណា ឬកម្លាំងណាអាចមកបំភ្លៃ ឬបំផ្លាញបានឡើយ។ កម្លាំងមហាសាមគ្គីរបស់កម្ពុជាក្រោមការដឹកនាំរបស់គណបក្សប្រជាជនកម្ពុជា និងការជួយឧបត្ថម្ភយ៉ាងធំធេង ទាន់ពេលវេលា និងមានប្រសិទ្ធភាពពីសំណាក់ កងទ័ពស្ម័គ្រចិត្តវៀតណាម។ បើគ្មានការផ្គួបផ្សំនៃកម្លាំងទាំង ២ នេះទេគឺពិតជាមិនអាចមានជ័យជម្នះ ៧ មករា ១៩៧៩ បានឡើយ»។
ប៉ុន្តែទោះយ៉ាងណាមន្ត្រីជាន់ខ្ពស់អតីតគណបក្សសង្គ្រោះជាតិមួយចំនួន ក្នុងនោះក៏មានលោក សម រង្ស៊ី ផងដែរបានអះអាងថាលោកនាយករដ្ឋមន្ត្រី ហ៊ុន សែន ត្រូវបាន «លើកបន្តុបជាមេដឹកនាំអាយ៉ងដោយកងទ័ពយួនឈ្លានពាន» ខណៈដែលលោក អេង ឆៃអ៊ាង បានលើកឡើងថា «ម្ចាស់នៃថ្ងៃ ៧ មករាឆ្នាំ ១៩៧៩ ពិតប្រាកដគឺជារដ្ឋាភិបាលវៀតណាម»។
លោក សម រង្ស៊ី បានបង្ហោះនៅលើហ្វេសប៊ុករបស់លោកដោយបានចោទប្រកាន់ថាកាលពីថ្ងៃទី ៧ មករា ឆ្នាំ ១៩៧៩ លោក ហ៊ុន សែន «ត្រូវបានលើកបន្តុបជាមេដឹកនាំអាយ៉ងដោយកងទ័ពយួនឈ្លានពាន និងនៅឆ្នាំ ១៩៨៥ លោក ហ៊ុន សែន ត្រូវបានបន្តុបឲ្យឡើងធ្វើជានាយករដ្ឋមន្ត្រីអាយ៉ង ហើយក្នុងឆ្នាំ ១៩៩៧ លោក ហ៊ុន សែន បានធ្វើរដ្ឋប្រហារដើម្បីដណ្តើមអំណាចមកវិញដោយមានការបង្ហូរឈាម និងពីឆ្នាំ ១៩៩៨ ដល់ ២០១៨ លោក ហ៊ុន សែន បាននៅក្រាញអំណាច ដោយសារតែការលួចបន្លំសន្លឹកឆ្នោត»។
ចំណែកលោក អេង ឆៃអ៊ាង បានសរសេរបង្ហោះនៅលើហ្វេសប៊ុករបស់លោកកាលពីព្រឹកថ្ងៃទី ៧ ខែមករាម្សិលមិញថា៖ «ម្ចាស់នៃ ៧ មករា ១៩៧៩ មិនមែនមនុស្សនៅក្នុងរូបថតនេះទេ គឺ យួន។ មនុស្សទាំងអស់នេះគ្រាន់តែជាតួអង្គ យួនលើកបន្តុបឲ្យធ្វើជាអាយ៉ងដូចសម័យមេទ័ពយួន ទ្រឿង មិញយ៉ាងលើកបន្តុបម្ចាស់ក្សត្រី អង្គម៉ី ជាអាយ៉ង»។
ភ្នំពេញប៉ុស្តិ៍បានព្យាយាមទាក់ទងដោយផ្ញើសារតាមហ្វេសប៊ុក និងតាមអ៊ីមែលទៅលោក សម រង្ស៊ី និងលោក អេង ឆៃអ៊ាង ដើម្បីសុំការអធិប្បាយបន្ថែម ថាតើពួកលោកមានបានធ្លាប់ឆ្លងកាត់របបខ្មែរក្រហមឬអត់? តើហេតុអ្វីបានជាលោកលើកឡើងថាមេដឹកនាំបច្ចុប្បន្នជាអាយ៉ងរបស់វៀតណាម? និងថា តើពួកលោកមានបងប្អូន ឬសាច់ញាតិត្រូវបានខ្មែរក្រហមសម្លាប់ដែរឬទេ? ប៉ុន្តែពុំមានការឆ្លើយតបទេគិតមកដល់ម៉ោងបោះពុម្ពផ្សាយកាសែតកាលពីយប់មិញ។
យ៉ាងណាក្តីអ្នកប្រវត្តិសាស្ត្រ និងពលរដ្ឋមួយចំនួនមិនយល់ស្របចំពោះការលើកឡើងរបស់មន្ត្រីជាន់ខ្ពស់អតីតគណបក្សប្រឆាំងនេះឡើយ។
លោក សំបូរ ម៉ាណារ៉ា សាស្ត្រាចារ្យប្រវត្តិសាស្ត្រថ្លែងថាការលើកឡើងរបស់មន្ត្រីអតីតគណបក្សប្រឆាំងគឺវាគ្រាន់តែជាទស្សនៈមួយ ប៉ុន្តែសម្រាប់រូបលោកមើលឃើញថា ៧ មករាគឺជាថ្ងៃប្រវត្តិសាស្ត្រថ្មីសម្រាប់ប្រទេសកម្ពុជា ដោយសារតែថ្ងៃនោះបានជួយរំដោះប្រជាជនកម្ពុជាឲ្យរួចផុតពីការសម្លាប់ និងការលំបាកវេទនាពីរបបប្រល័យពូជសាសន៍ខ្មែរក្រហមដែលមានរយៈពេល ៣ ឆ្នាំ ៨ខែ ២០ ថ្ងៃហើយថា ៧ មករា គឺជាថ្ងៃបើកទំព័រប្រវត្តិសាស្ត្រថ្មីប្រាប់ពិភពលោកថា ប្រទេសកម្ពុជាបានរងទុក្ខវេទនា។
លោកបន្ថែមថាកងទ័ពវៀតណាមមានវត្តមាននៅក្នុងប្រទេសកម្ពុជាតាំងពីឆ្នាំ ១៩៧០ ដែលសម័យលោក លន់ នល់ បានឲ្យវៀតណាមខាងត្បូងមកច្បាំងគ្នា នៅលើទឹកដីខ្មែរ ខណៈអ្នកដែលតស៊ូក្នុងព្រៃក៏បានឲ្យវៀតណាមខាងជើង មកច្បាំងតតាំងនៅលើទឹកដីខ្មែរ។ លោកថា៖ «តម្លៃពិតប្រាកដការលំបាកវេទនារបស់ប្រជាជនយើងដែលទាមទារឲ្យមានការដោះស្រាយបញ្ហាយើងមិនគួរនៅតែចោទបញ្ហាបែបនេះទេ»។
លោកបានបន្ថែមថា៖ «នៅពេលដែលយើងខឹងគេហើយជេរ វាមិនចំណេញអ្វីទេ។ យើងបង្កើតទោសៈមោហៈខ្លួនយើង និងបង្កើតឲ្យមានបញ្ហាវិវាទពូជសាសន៍ ហើយធ្វើឲ្យសង្គមហ្នឹងមានភាពល្អក់កករ»។
លោក កង សុខុម អាយុ ៤៧ ឆ្នាំដែលបានចូលរួមក្នុងពិធីអបអរសាទរខួបលើកទី ៤០ ឆ្នាំថ្ងៃជ័យជម្នះ ៧ មករា នៅពហុកីឡដ្ឋានជាតិអូឡាំពិកថ្លែងថា លោកចងចាំមិនភ្លេចទេការឈឺចាប់ក្នុងរបបខ្មែរក្រហមដែលបានសម្លាប់សមាជិក និងសាច់ញាតិគ្រួសាររបស់លោកហើយថា បងស្រីរបស់លោកម្នាក់ក៏ត្រូវបានខ្មែរក្រហមយកទៅសម្លាប់ចោលដែរ។
លោកបានអះអាងថា ដោយសារតែវត្តមានកងទ័ពវៀតណាមបានធ្វើឲ្យប្រជាជនកម្ពុជាបានរស់រានមានជីវិតដល់សព្វថ្ងៃហើយប្រសិនបើគ្មានវៀតណាមនោះទេ ប្រជាជនកម្ពុជាអាចស្លាប់ទាំងអស់។ «ការលើកឡើងដែលថាថ្នាក់ដឹកនាំដែលបានរំដោះប្រទេសកម្ពុជាពីរបបប្រល័យពូជសាសន៍ជាអាយ៉ងនោះ វាហាក់ដូចការបញ្ឆេះឲ្យមានការរើសអើងជាតិសាសន៍ និងបន្លំប្រវត្តិសាស្ត្រ»។
លោក សេង សុខហៀង អាយុ ៥៦ ឆ្នាំក៏បានថ្លែងដែរថា៖ «ប្រសិនបើគ្មានវៀតណាមយើងមិនមានអ្វីដូចសព្វថ្ងៃនេះទេ។ ពលរដ្ឋនឹងស្លាប់ទាំងអស់ ដោយសារតែរបបខ្មែរក្រហមបានសម្លាប់រៀបសម្លាប់ទាំងអស់តែសំណាងល្អបានកងទ័ពវៀតណាម និងថ្នាក់ដឹកនាំបានជួយរំដោះយើងទាំងអស់គ្នាពីសេចក្តីស្លាប់។ ពេលដែលយើងចោទថាអ្នកដែលរំដោះយើងជាអាយ៉ងគឺជាការកេងចំណេញនយោបាយដោយសារតែពួកគាត់ ពិតជាបានជួយយើងឲ្យមានជីវិត»។
លោក សុខ ឥសាន អ្នកនាំពាក្យគណបក្សប្រជាជនថ្លែងថានៅសម័យបច្ចុប្បន្ន ទោះបីប្រទេសជាតិមានសុខសន្តិភាពពេញលេញ បរិបូរណ៍ មានស្ថិរភាពនយោបាយហើយក៏ដោយក៏នៅមាន «ពួកអគតិទាំងនោះតែងតែប្រើវប្បធម៌លាបពណ៌មកលើខ្មែរគ្នាឯង ចោទថាជាអាយ៉ងប្រទេសនេះអាយ៉ងប្រទេសនោះមិនចេះចប់ដែលជាមូលហេតុនាំឲ្យខ្មែរបែកបាក់គ្នា និងចុះខ្សោយបណ្តាលឲ្យប្រទេសជិតខាងមើលងាយ»។
លោកថា៖ «ការដែលខ្មែរមួយចំនួនរួមមានក្រុមទណ្ឌិត សម រង្ស៊ី ជាដើមមានអាកប្បកិរិយាដូច្នេះគឺជាការបម្រើបរទេសយ៉ាងជាក់ស្តែង។ ចោទថាគណបក្សប្រជាជនកម្ពុជាជាអាយ៉ងជាតិសាសន៍ដទៃ និងប្រទេសជិតខាងតែធាតុពិតគឺខ្លួនឯងទេធ្វើជាអាយ៉ងបរទេសនោះ»៕
