.jpg)
អាជ្ញាធរខេត្តឧត្តរមានជ័យពិនិត្យផែនទីពីថ្ងៃទី ២៤ មករា ក្រោយទាហានថៃចូលមកក្នុងដីកម្ពុជា។ រូបថត FB
ឧត្តរមានជ័យៈ ទាហានរបស់ប្រទេសថៃប្រមាណពី ២០ ទៅ ៣០ នាក់ នៅតែបន្តលួចឆ្លងដែនចូលមកខួងគល់ស្វាយ និងបាញ់ថ្នាំលើដំណាំស្វាយរបស់ប្រជាពលរដ្ឋខ្មែរ ជាបន្តបន្ទាប់ ដែលស្ថិតក្នុងភូមិរដ្ឋចំប៉ី សង្កាត់អូរស្មាច់ ក្រុងសំរោង ខេត្តឧត្តរមានជ័យ។
លោក យួន ហំ មេបញ្ជាការរងនៃវរនគរបាលការពារព្រំដែនលេខ ៧០២ បានប្រាប់ ភ្នំពេញ ប៉ុស្តិ៍ កាលពីថ្ងៃទី ២៤ មករា ថា ទាហានថៃដែលបានខួងគល់ស្វាយ និងបាញ់ថ្នាំដំណាំស្វាយរបស់ប្រជាពលរដ្ឋខ្មែរបានកើតមានឡើងតាំងពីយូរណាស់មកហើយ។ ពួកគេបន្តចូលមកជាប្រចាំ ហើយមន្ត្រីការពារព្រំដែនរបស់កម្ពុជានៅតែបន្តដើរល្បាតទប់ស្កាត់ និងហាមឃាត់កុំឱ្យពួកគេបន្តចូលមកទៀត។
លោក យួន ហំ បានឲ្យដឹងថា នៅពេលដែលទាហានថៃលួចចូលភាគីទាំង ២ បានជួបគ្នា និងពិភាក្សាគ្នាមិនឱ្យមានការចូលមកទៀតនោះទេ ហើយភាគីថៃបានសន្យាថានឹងកែសម្រួល ប៉ុន្តែនៅតែបន្តលួចចូលដដែល។ ចំពោះការខួង និងបាញ់ថ្នាំលើដើមឈើទាំងនោះមានប្រមាណជាង ២០០ ដើម មិនដូចមានការផ្សព្វផ្សាយតាមបណ្តាញសង្គមប្រមាណជាង ២ ០០០ ដើមនោះទេ។
បើតាមមន្ត្រីការពារព្រំដែនរូបនេះនៅពេលដែលទាហានថៃខួង និងបាញ់ថ្នាំ មិនបានធ្វើឱ្យដើមឈើទាំងនោះងាប់ទេ ហើយពួកគេក៏បានចូលមកកាប់បំផ្លាញម្តងហើយ ប៉ុន្តែវាមិនងាប់ទៀត ពួកទាហានក៏បន្តលួចចូលខួងទៀត។
លោកបានថ្លែងថា៖ «ដើមឈើដែលបាញ់ថ្នាំ និងខួងនោះគឺមានប្រហែលប្រមាណ ២០០ ដើម។ វាធ្វើក្នុងគោលបំណងបំពានមកលើកម្ពុជា ដោយសារតំបន់នេះមិនទាន់ដោះស្រាយ (តំបន់ស)។ ប៉ុន្តែតំបន់នេះ មានដើមស្វាយធំៗ និងទទួលបានផល។ តាំងពីពេលដាំ វាមិនឃាត់ ប៉ុន្តែ វាទើបតែឃាត់ឥឡូវ វាមិនត្រឹមត្រូវ»។
លោក ឌី រ៉ាដូ អភិបាលរង និងជាអ្នកនាំពាក្យរដ្ឋបាលខេត្តឧត្តរមានជ័យ ថ្លែងពីម្សិលមិញថាទាក់ទងនឹងបញ្ហាព្រំដែន គឺជាកិច្ចការរបស់គណៈកម្មាធិការជាតិវាស់វែងដោះស្រាយព្រំដែន។ ប៉ុន្តែលោកបញ្ជាក់ថា បញ្ហាដែលទាហានថៃ បានចូលមកខួង និងបាញ់ថ្នាំស្វាយនៅខាងកម្ពុជានេះ បច្ចុប្បន្នកងយោធភូមិភាគទី៤ បាននិងកំពុងដោះស្រាយជាមួយនឹងភាគីថៃ។
លោកថ្លែងថា៖ «ខាងកងយោធភូមិភាគទី៤ របស់កម្ពុជាបានធ្វើលិខិតអញ្ជើញភាគីថៃមកប្រជុំនៅថ្ងៃទី ២៤ ខែមករា ដើម្បី ដោះស្រាយបញ្ហានេះ ប៉ុន្តែទាហានខាងភាគីថៃបានពន្យារពេល ដោយគេជាប់រវល់ប្រជុំនៅភូមិភាគទី២ របស់គេ»។
លោក ឈុំ សុជាតិ អ្នកនាំពាក្យក្រសួងការពារជាតិមិនអាចទាក់ទងសុំការអត្ថាធិប្បាយបន្ថែមបានទេពីម្សិលមិញ។
លោកស្រី កុយ ពិសី អនុប្រធានគណៈកម្មាធិការកិច្ចការព្រំដែនថ្លែងកាលពីថ្ងៃទី ២៤ មករា ថា គណៈកម្មាធិការកិច្ចការព្រំដែនមិនទទួលបានព័ត៌មានជុំវិញ ការចូលបាញ់ថ្នាំ និងខួងដើមស្វាយរបស់ទាហានថៃនៅខាងដីកម្ពុជានោះទេ។ ប៉ុន្តែលោកស្រីថា បើមានករណីនេះកើតឡើងមែននោះអាជ្ញាធរនិងនគរបាលការពារព្រំដែនត្រូវមើលការខុសត្រូវ ដោយមិនចាំបាច់ថ្នាក់លើចុះដោះស្រាយឡើយ។
លោកស្រីបញ្ជាក់ថា គណៈកម្មាធិការកិច្ចការព្រំដែនមានតួនាទីក្នុងការចរចាធ្វើការដោះស្រាយ ហើយការពារបូរណភាពទឹកដីនៅលើដីជាក់ស្តែងគឺជាភារកិច្ចរបស់នគរបាលការពារព្រំដែន និងអាជ្ញាធរមូលដ្ឋានប៉ុណ្ណោះ ។
ទោះជាយ៉ាងណា លោកស្រីថ្លែងថា៖ «ខ្ញុំមិនអាចជម្រាបជូនបានទេ ហើយក៏មិនអាចនិយាយព្រាវៗបានដែរ ហើយក៏មិនដឹងគេ (ថៃ) ធ្វើនៅខាងដីគេ ឬក៏នៅខាងដីយើងទេ លុះត្រាតែពិនិត្យមើល ទីតាំងជាក់ស្តែង និងពិនិត្យលើនិយាមការ។ តាមធម្មតា គេមានគោលការណ៍លើការគ្រប់គ្រងបច្ចុប្បន្នភាព អ្នកណានៅទីណាគឺនៅទីនោះ អត់មានធ្វើអ្វីទេ»៕
