.jpg)
គ្រឿងចក្រកំពុងឈូសឆាយទីតាំងដីស្ថិតក្នុងតំបន់ការពារគូលែនព្រហ្មទេព ស្ថិតក្នុងឃុំស្រយ៉ង់ ស្រុកគូលែន។ រូបថត សហការី
ព្រះវិហារ៖ មានការអះអាងថា ដីព្រៃប្រមាណ ៤៧០ ហិកតា ដែលជាដីស្ថិតក្នុងតំបន់ការពារគូលែនព្រហ្មទេព ស្ថិតក្នុងឃុំស្រយ៉ង់ ស្រុកគូលែន ត្រូវបានជនខិលខូចមួយក្រុម លួចឈូសឆាយជាបន្តបន្ទាប់។ សង្គមស៊ីវិលបារម្ភថា មិនយូរទេ តំបន់ការពារទាំងនេះ នឹងមានតែនៅលើក្រដាសប៉ុណ្ណោះ ព្រោះមានការកាប់រុរាន ឈូសឆាយ បានកើតឡើងជារៀងរាល់ថ្ងៃ។
តាមប្រជាពលរដ្ឋដែលរស់នៅក្នុងតំបន់នោះ បានរាយការណ៍ដល់កាសែតក្នុងស្រុកក្នុងន័យមិនបញ្ចេញឈ្មោះកាលពីពេលថ្មីៗនេះថា ដីព្រៃប្រមាណ ៤៧០ ហិកតា ដែលជាដីរដ្ឋនៅក្នុងតំបន់ការពារគូលែនព្រហ្មទេព ស្ថិតនៅចំនុច ឃុំស្រយ៉ង់ ស្រុកគូលែន នៃខេត្តព្រះវិហារ ត្រូវបានជនខិលខូចរំលោភបំពានធ្វើជាកម្មសិទ្ធិ។
សេចក្តីរាយការណ៍នោះបានឲ្យដឹងថា៖ «មានមេការម្នាក់ឈ្មោះ ឃុតវី (រហ័សនាមចង្អុលដាច់ដី) មានទីលំនៅភូមិព្រៃគោល ឃុំស្រយ៉ង់ ស្រុកគូលែន ខេត្តព្រះវិហារ និងកូនចៅមានគ្នា ៣ ទៅ ៤ នាក់ទៀត បានយកគ្រឿងចក្រប្រភេទត្រាក់ទ័រចូលទៅឈូសឆាយទន្ទ្រានរំលោភយកដីព្រៃទាំងបំពាន ដោយមិនកោតញញើតទៅនឹងច្បាប់បន្តិចណាសោះឡើយ»។
ប្រជាពលរដ្ឋដែលបានឃើញហេតុការណ៍នេះ អំពាវនាវដល់អាជ្ញាធរដែនដី ជាពិសេសរដ្ឋាភិបាលគួរមានវិធានការចំពោះករណីនេះ និងត្រូវចុះត្រួតពិនិត្យនៅចំណុចកើតហេតុទាំងនេះ ដើម្បីធ្វើការទប់ស្កាត់ឲ្យបានទាន់ពេលវេលា។
ភ្នំពេញ ប៉ុស្តិ៍ មិនអាចស្វែងរកប្រភពទាក់ទងបុគ្គល ឈ្មោះ ឃុតវី និងបក្ខពួក ដើម្បីឆ្លើយតបនឹងការចោទប្រកាន់នេះបានទេ។
ចំណែកលោក សុង ច័ន្ទសុជាតិ ប្រធានស្តីទីមន្ទីរបរិស្ថានខេត្តព្រះវិហារមិនអាចសុំការបំភ្លឺពីករណីឈូសឆាយដីព្រៃក្នុងតំបន់ការពាររាប់រយហិកតានេះបានទេ ដោយលោកមិនលើកទូរស័ព្ទ ខណៈលោក ប្រាក់ សុវណ្ណ អភិបាលខេត្តព្រះវិហារ បានបដិសេធធ្វើការអត្ថាធិប្បាយនៅថ្ងៃនេះ ដោយថ្លែងថា កំពុងជាប់រវល់។
លោក ឡោ ច័ន្ទ មន្ត្រីសម្របសម្រួលសមាគមអាដហុកប្រចាំខេត្តព្រះវិហារបានបង្ហាញក្តីបារម្ភចំពោះបទល្មើសឈូសឆាយរំលោភយកដីព្រៃរបស់រដ្ឋនៅក្នុងតំបន់ការពារនានា ក្នុងខេត្តព្រះវិហារ។ លោកបារម្ភយ៉ាងដូច្នេះ ក៏ព្រោះលោកសង្កេតឃើញថា បទល្មើសនៃការកាប់បំផ្លាញ និងឈូសឆាយដីព្រៃរបស់រដ្ឋ គឺនៅតែបន្តកើតមានជារៀងរាល់ថ្ងៃ។
លោកបញ្ជាក់ថា៖ «យូរៗតំបន់គូលែនព្រហ្មទេព និងតំបន់មួយចំនួនមានតែលើក្រដាសនោះទេ ព្រោះភាពជាក់លាក់តែងត្រូវបានអ្នកមានអំណាច និងលុយកាក់ឃុបឃិតគ្នាជាប្រព័ន្ធរំលោភអស់ភាគច្រើនហើយ»៕
