ភ្នំពេញៈ ខណៈកាលបរិចេ្ឆទបានបិទបញ្ចប់ មានគណបក្សចំនួន ៧ បានចុះបញ្ជី និងចុះឈ្មោះបេក្ខជនទាំងពេញសិទ្ធិនិងបម្រុងដែលមានសរុបចំនួន ២០ ៦៦៨ នាក់ ដើម្បីចូលរួមប្រកួតប្រជែងគ្នាក្នុងការបោះឆ្នោតជ្រើសរើសក្រុមប្រឹក្សារាជធានី-ខេត្ត និងសមាជិកក្រុមប្រឹក្សាក្រុងស្រុក-ខណ្ឌ អាណត្តិទី ៣។នេះបើតាមមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប)។
លោក ហង្ស ពុទ្ធា មន្ត្រីនាំពាក្យ គ.ជ.ប ប្រាប់ភ្នំពេញប៉ុស្ដិ៍ម្សិលមិញថា ក្នុងដំណើរការចុះបញ្ជីគណបក្សនយោបាយពីថ្ងៃទី ៧ ដល់ថ្ងៃទី ១១ មីនា គឺមានគណបក្សចំនួន ៧ បានមកចុះបញ្ជីនៅ គ.ជ.ប ក្នុងនោះដូចជា គណបក្សប្រជាជនកម្ពុជា គណបក្សយុវជនកម្ពុជា គណបក្សហ្វ៊ុនស៊ិនប៉ិច គណបក្សឆន្ទៈខ្មែរ គណបក្សសញ្ជាតិខ្មែរ គណបក្សខ្មែររួបរួមជាតិ និងគណបក្សខ្មែរសាធារណរដ្ឋ។
យ៉ាងណាក្ដី លោកបានបញ្ជាក់ថា៖ «តួលេខនេះមិនទាន់ប្រាកដទេណា ព្រោះកំពុងស្ថិតក្នុងការត្រួតពិនិត្យនៅឡើយ»។
លោកបន្ថែមថា គ.ជ.ប នឹងប្រើរយៈពេល ១០ ថ្ងៃ គឺរហូតដល់ថ្ងៃទី ១ ខែ មេសា ក្នុងការពិនិត្យ និងដោះស្រាយក្រែងមានខ្វះខាតក្នុងបញ្ជីចុះឈ្មោះដែលគណបក្សបានដាក់មក គ.ជ.ប ហើយដល់ថ្ងៃទី ១១ ខែ មេសា គឺជាថ្ងៃបិទផ្សាយបញ្ជីឈ្មោះគណបក្ស និងចាប់ពីថ្ងៃទី ១៧ ដល់ថ្ងៃទី ២៤ ឧសភា គឺជាថ្ងៃបើកការឃោសនាបោះឆ្នោត។
រដ្ឋាភិបាលបានសម្រេចយកថ្ងៃអាទិត្យទី ២៦ ខែ ឧសភា ជាថ្ងៃបោះឆ្នោតជ្រើសរើសក្រុមប្រឹក្សារាជធានី-ខេត្ត និងសមាជិកក្រុមប្រឹក្សាក្រុង-ស្រុក-ខណ្ឌអាណត្តិទី៣ ដោយមានសមាជិកក្រុមប្រឹក្សាឃុំសង្កាត់ទាំង ១១ ៥៧២ នាក់ ជាអង្គបោះឆ្នោតដែលនឹងចូលរួមបោះឆ្នោតនៅតាមមណ្ឌលបោះឆ្នោតចំនួន ២២៨ ក្នុងទូទាំងប្រទេស។
លោក គង់ មូលីកា ប្រធានគណបក្សឆន្ទៈខ្មែរថ្លែងថា ថ្វីដ្បិតគ្មានអង្គបោះឆ្នោតក្ដី ប៉ុន្តែគណបក្សរបស់លោកបានសម្រេចចុះបញ្ជីនៅ គ.ជ.ប រួចហើយ ដើម្បីចូលរួមការបោះឆ្នោតក្រុមប្រឹក្សាអាណត្តិទី៣ និងបានដាក់បេក្ខជនឈរឈ្មោះប្រកួតប្រជែងយកតំណែងសមាជិកក្រុមប្រឹក្សារាជធានី-ខេត្តចំនួន ១០។
លោក មូលីកា ប្រាប់ពីមូលហេតុចូលរួមនេះថា៖ «ព្រោះជាឱកាសដើម្បីបង្ហាញខ្លួនឱ្យពលរដ្ឋបានដឹងឱ្យកាន់តែទូលំទូលាយអំពីគណបក្សឆន្ទៈខ្មែរ ហើយសង្ឃឹមថា អង្គបោះឆ្នោតរបស់បក្សកាន់អំណាច និងអង្គបោះឆ្នោតរបស់អតីតគណបក្សសង្គ្រោះជាតិដែលបានចូលរួមជីវភាពជាមួយគណបក្សកាន់អំណាចនឹងអាចបោះឆ្នោតឱ្យគណបក្សឆន្ទៈខ្មែរ ដើម្បីបន្តកំណែទម្រង់អភិវឌ្ឍន៍នៅមូលដ្ឋាន ក្នុងន័យពហុបក្ស និងលទ្ធិប្រជាធិបតេយ្យ»។
ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជាថ្លែងថា ការបោះឆ្នោតជ្រើសរើសក្រុមប្រឹក្សារាជធានីខេត្ត និងស្រុកខណ្ឌ គឺជាការបោះឆ្នោតខុសប្លែកដែលមានអង្គបោះឆ្នោតជាសមាជិកឃុំសង្កាត់ប៉ុណ្ណោះ ខុសពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ និងតំណាងរាស្ដ្រ ហើយលោកថា អង្គបោះឆ្នោតជាសមាជិកក្រុមប្រឹក្សាឃុំសង្កាត់ដែលភាគច្រើនបំផុតជារបស់គណបក្សកាន់អំណាចនឹងមិនអាចបោះឆ្នោតឱ្យគណបក្សដែលគ្មានសមាជិកនៅឃុំសង្កាត់នោះឡើយ។
លោកថា៖ «ធម្មតាជាសមាជិករបស់គណបក្សណាគឺត្រូវបោះឆ្នោតជូនគណបក្សនោះហើយ មិនអាចបោះឆ្នោតឱ្យគណបក្សផ្សេងក្រៅពីគណបក្សដែលខ្លួនដើរតាមនោះទេ»។
ប៉ុន្តែលោក ម៉ម សុណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យបានបញ្ជាក់ថា ដោយសារគ្មានអង្គបោះឆ្នោតនៅតាមឃុំ-សង្កាត់ ដូច្នោះគណបក្សរបស់លោកបានសម្រេចមិនចូលរួមការបោះឆ្នោតក្រុមប្រឹក្សានេះឡើយ៕