ភ្នំពេញៈ គិតមកដល់ត្រឹមថ្ងៃទី ៩ ខែមីនា មនុស្សចំនួន ១៨៨ ០២៦ នាក់ បានចាក់វ៉ាក់សាំងកូវីដ ១៩ ស៊ីណូហ្វាមដែលជាជំនួយរបស់សាធារណរដ្ឋប្រជាមានិតចិន និងវ៉ាក់សាំងកូវីសែល (COVISHIELD) របស់ក្រុមហ៊ុន AstraZeneca ដែលជាការផ្តល់ជូនតាមរយៈមជ្ឈមណ្ឌលកូវ៉ាក់។ នេះបើតាមរបាយការណ៍របស់ក្រសួងសុខាភិបាល និងក្រសួងការពារជាតិនៅថ្ងៃទី ៩ ខែ មីនា ឆ្នាំ ២០២១។
ក្រសួងសុខាភិបាលបានឱ្យដឹងថា គិតចាប់ពីថ្ងៃទី ១០ ខែកុម្ភៈ ដល់ថ្ងៃទី ៩ ខែ មីនា ឆ្នាំ ២០២១ អ្នកដែលបានស្ម័គ្រចិត្តចាក់វ៉ាក់សាំងកូវីដស៊ីណូហ្វាម (Sinopharm) លើកទី១ មានចំនួន ៨៤ ៥៤៤ នាក់ និងវ៉ាក់សាំងកូវីសែល (COVISHIELD) លើកទី១ មានចំនួន ៤ ៩៦២ នាក់។ ចំណែកអ្នកដែលបានចាក់វ៉ាក់សាំងស៊ីណូហ្វាមក្នុងដូស ឬលើកទី២ មានចំនួន ៣ ២៨០ នាក់។
ក្រសួងសុខាភិបាលបញ្ជាក់ថា៖ «បើសរុបចំនួនមនុស្សដែលស្ម័គ្រចិត្តមកទទួលការចាក់វ៉ាក់សាំង គឺមានសរុបចំនួន ១០៣ ៥៥៣ នាក់ ប៉ុន្តែមនុស្សចំនួន ១៤ ០៤៧ នាក់ មិនត្រូវបានអនុញ្ញាតឱ្យចាក់វ៉ាក់សាំងនេះទេដោយសារបញ្ហាសុខភាពរបស់ពួកគេ»។
ចំណែកក្រសួងការពារជាតិក៏បានឱ្យដឹងផងដែរថា ក្នុងរយៈពេលដូចគ្នានេះដែរ អ្នកដែលបានចាក់វ៉ាក់សាំងកូវីដ ១៩ ស៊ីណូហ្វាមលើកទី១ មានចំនួន ៩៨ ៥២០ នាក់ និងអ្នកដែលបានចាក់លើកទី២ មានចំនួន ៣០ ៣៦៦ នាក់។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលកាលពីថ្ងៃទី ៦ ខែមីនា បានប្រកាសពីការចាប់ផ្តើមចាក់វ៉ាក់សាំងកូវីដ១៩ របស់ក្រុមហ៊ុន AstraZeneca ជូនមន្ត្រីរាជការ និងមនុស្សដែលមានអាយុចាប់ពី ៦០ ឆ្នាំឡើងទៅចាប់ពីថ្ងៃទី ១០ ខែមីនា នៅក្នុងរាជធានីភ្នំពេញ ខេត្តកណ្តាល និងខេត្តព្រះសីហនុដែលកំពុងរងនូវហានិភ័យខ្ពស់ពីការផ្ទុះការឆ្លងជំងឺកូវីដ ១៩ ក្នុងសហគមន៍។
លោក ប៊ុនហេង លើកឡើងថា៖ «វ៉ាក់សាំងដែលផលិតនៅប្រទេសឥណ្ឌា ដោយមានអាជ្ញាប័ណ្ណពីក្រុមហ៊ុន AstraZeneca នៅពេលដែលចាក់លើកទី១ ឬដូសទី១ រួចហើយត្រូវមកចាក់លើកទី២ ឬដូសទី២ ក្នុងរយៈពេលពី ៤ ទៅ ៨ សប្តាហ៍ បន្ទាប់ពីថ្ងៃចាក់លើកទី១»។
សម្រាប់ដំណើរការចាក់វ៉ាក់សាំងស៊ីណូហ្វាមនៅតាមបណ្តាមន្ទីរពេទ្យធំៗក្នុងរាជធានីភ្នំពេញគឺនៅដំណើរការធម្មតា ប៉ុន្តែសម្រាប់មន្ទីរពេទ្យកុមារជាតិ ត្រូវបានផ្អាកជាបណ្តោះអាសន្នសម្រាប់អ្នកចាក់លើកទី១ ឬដូសទី១ ដោយសារអស់វ៉ាក់សាំង។
លោកវេជ្ជបណ្ឌិត អ៊ុង សុផល អនុប្រធានមន្ទីរពេទ្យកុមារជាតិបានប្រាប់ ភ្នំពេញ ប៉ុស្តិ៍ ពីម្សិលមិញថា៖ «សម្រាប់អ្នកមកចាក់លើកទី១ គឺពេទ្យយើងអស់វ៉ាក់សាំងហើយ ប៉ុន្តែយើងនៅមានវ៉ាក់សាំងសម្រាប់តែអ្នកដែលត្រូវមកទទួលដូសទី២ ដែលយើងបានត្រៀមទុកសម្រាប់ពួកគាត់»។
លោក អ៊ុង សុផល បានបន្តថា លោកមិនទាន់ដឹងទេថាតើវ៉ាក់សាំងស៊ីណូហ្វាមនេះនឹងមានការចាក់ឡើងវិញ នៅពេលណានោះឡើយ តែដំណើរការនៃការចាក់វ៉ាក់សាំងក្រុមហ៊ុន AstraZeneca គឺមានចាក់សម្រាប់អ្នកដែលមានអាយុពី ៦០ ឆ្នាំឡើងទៅ។
គួរបញ្ជាក់ផងដែរថា កម្ពុជាបានទទួលវ៉ាក់សាំងកូវីដ ១៩ ស៊ីណូហ្វាម ដែលជាជំនួយពីសាធារណរដ្ឋប្រជាមានិតចិនដំបូងចំនួន ៦០ ម៉ឺនដូស ក្នុងចំណោម ១ លានដូស ដែលត្រូវបានដឹកជញ្ជូនមកដល់កម្ពុជាកាលពីថ្ងៃទី ៧ ខែកុម្ភៈ និងបានដំណើរការចាក់កាលពីថ្ងៃទី ១០ ខែកុម្ភៈ។ ឯវ៉ាក់សាំងដែលនៅសល់ចំនួន ៤០ ម៉ឺនដូស នឹងដឹកមកដល់កម្ពុជាមុនពិធីបុណ្យចូលឆ្នាំប្រពៃណីខ្មែរក្នុងខែមេសាខាងមុខ។
ចំណែកវ៉ាក់សាំងកូវីដរបស់ក្រុមហ៊ុន Astrazeneca ចំនួន ៣២៤ ០០០ ដូស បានដឹកមកដល់ប្រទេសកម្ពុជាកាលពីយប់ថ្ងៃទី ២ ខែ មីនា ឆ្នាំ ២០២១ ដែលជាចំនួនដូសដំបូងក្នុងចំណោមវ៉ាក់សាំងសរុបចំនួន ១,១ លានដូស ដែលយន្តការ COVAX នឹងផ្តល់ជូនប្រទេសកម្ពុជា ជាដំណាក់កាលៗនៅត្រឹមដំណាច់ខែឧសភា ឆ្នាំ ២០២១៕
វីដេអូ៖