.jpg)
បន្ទប់ដាច់ដោយឡែកសម្រាប់ព្យាបាលអ្នកជំងឺកូវីដ ១៩ នៅខេត្តកំពង់ចាម។ រូបថត ក្រសួងសុខាភិបាល
ក្រសួងសុខាភិបាល បានចេញសេចក្តីប្រកាសព័ត៌មានថា គិតត្រឹមម៉ោង៧ព្រឹកថ្ងៃទី ០១ ខែ មេសា ឆ្នាំ ២០២០ មិនមានករណីវិជ្ជមាន ជំងឺកូវីដ ១៩ ថ្មីទៀតនោះទេ ខណៈអ្នកកើតជំងឺនេះ ០២ នាក់ទៀត ត្រូវបានព្យាបាលជាសះស្បើយ។
ក្រសួងបញ្ជាក់ថា បុរសជនជាតិខ្មែរអាយុ ៣០ ឆ្នាំ (កាន់សាសនាឥស្លាម និងមានទីលំនៅក្នុងខេត្តកំពត) ដែលបានវិលត្រឡប់មកពីចូលរួមពិធីសាសនា នៅប្រទេស ម៉ាឡេស៊ី និងបុរសជនជាតិម៉ាឡេស៊ីអាយុ ៦១ ឆ្នាំ មកពីប្រទេស ម៉ាឡេស៊ី បានជាសះស្បើយ ដោយទទួលបានតេស្តអវិជ្ជមានកូវីដ ១៩ ចំនួន ២ លើក ហើយត្រូវបានអនុញ្ញាត្តឲ្យចេញពីមន្ទីរពេទ្យខេត្តកែប។
ក្រសួងបញ្ជាក់ថា មិនមានករណីវិជ្ជមានជំងឺកូវីដ ១៩ ថ្មីនៅថ្ងៃទី ៣១ ខែ មីនា ឆ្នាំ ២០២០ នោះទេ ហើយគិតរហូតមកដល់ត្រឹមថ្ងៃទី ១ ខែមេសា នេះ អ្នកព្យាបាលជាសះស្បើយសរុបមានចំនួន ២៥ នាក់ ហើយអ្នកកំពុងសម្រាកព្យាបាលនៅមន្ទីរពេទ្យមានចំនួន ៨៤ នាក់ (ស្ត្រី ២៨ នាក់ បុរស ៥៦ នាក់) ក្នុងចំណោមអ្នកឆ្លងជំងឺកូវីដ ១៩ សរុបទាំងអស់ចំនួន ១០៩ នាក់។
បើតាមសេចក្តីប្រកាសរបស់ក្រសួងសុខាភិបាល គិតចាប់តាំងពីខែមករា មកដល់ថ្ងៃទី ៣១ ខែ មីនា ឆ្នាំ ២០២០ សំណាកដែលបានធ្វើវិភាគសរុបទូទាំងប្រទេសមានចំនួន ៥ ៧៦៨ ករណី៕
